|
|
 العالم السفلي ....فتوات امدرمان
|
الفتوات في امدرمان اغلبهم لم يكونوا اشرارا ، يستفيدون من قوتهم لتحقيق مكاسب ماديه او لممارسة الجريمه . لقد كانوا افرادا لهم قوه جسديه ، او بعض الذين كانت عندهم قوه بدنيه عاديه اكملوها بالشجاعه و الثبات و عرفوا بي ( زول سالط ) . و لقد كان بينهم نساء فلنبدأ بهم .
بت الحناوي كانت قوية الجسم يميل لونها الي البياض ( حلبيه) . و كانت المرأه الوحيده التي كسرت احتكار الرجال علي سوق الخضار و صارت بائعة خضار في سوق امدرمان .
فبعد بناء الجذر و سوق الخضار و سوق الدجاج و الحمام وسوق الكسره ( الانجيره ) حيث تجلس الخالات هجوه و كلتوم و رابحه . سوق الطواقي و الهبابات . جمع المفتش برمبل كل اصحاب مهنه مثل جزارين الكرشه و العفشه و الطايوق و وزع لهم الاماكن .
و عندما اراد تقسيم الاماكن للخضرجيه لاحظ وجود بت الحناوي بجسمها الضخم وسط الرجال فقال لها ( دا هنا مهل بتا رجال ، انتا امشي مهل نسوان ) فادخلت بت الحناوي سبابتها في فمها و نفضت السفه قائله ( رجال !! رجال شنو ؟ انا ارجل من ديل كلهم ) و تقدمت خطوات الي الامام و تراجع بعض الرجال و ضحك الاخرون . فقال برمبل ( انتا في مهل خضار ) .
الاخ الفنان ابراهيم عوض عبدالمجيد ، كان يمر امام طبليه بت الحناوي في صغره و هو في طريقه الي فنان الحقيبه ميرغني المأمون الذي كان يبيع الخضار و كانت بت الحناوي تقول له ( تعال هنا يا .... ماشي وين ، الخضار ما يا هو قدامك ) و يضطر للشراء منها . او ان يلتف من خلف الزنك لكي يذهب الي جاره ميرغني المامون .
اولاد الحناوي التيمان حسن و حسين كانا من فتوات امدرمان و يمتازان بالقوه كعمتهم بت الحناوي التي ربتهم و لقد بدأت حياتهم كفتوات مع موسي راس حربه الذي كان مخنجي فارع الطول منزله في زقاق خلف الله و هو الزقاق المحصور بين شارع البوسطه و شارع زريبة القش و يتجه شمالا و جنوبا . و منزله خلف منزل مبارك زروق و زير الخارجيه و قطب الوطني الاتحادي .
عندما داهم البوليس منزل موسي راس حربه. وضع موسي جسمه خلف الباب و لم يستطع البوليس ان يقتحم المنزل الي ان سمح لهم موسي بعد ان تاكد ان البضاعه قد اختفت . لان احد اولاد الحناوي قد طوح بها في منزل الوزير .
عند احضار البضاعه قالوا لموسي ( يلا علي المركز ) فقال موسي ( لقيتوا عندي حاجه ؟ سوقوا الناس اللقيتوا عندهم البضاعه ) و عندما قالوا له انه لا يمكن ان يتهموا الوزير قال موسي ( اسه انا يادوب عرفته ، الناس ديل العربات تطاقش و الناس ليل و نهار داخله و مارقه ، اتاريهو ديل بقرطسوا .) .
سمعت ان موسي اخذ اسمه راس حربه لانه اصيب بحربه في ساقه و كنت احسبها مزاح و في سنه 1963 عندما كان يجلس معي في قهوة مهدي حامد بالقرب من عربة بيين مكوار اشهر بائع باسطه في امدرمان ، لاحظت اثر جرح بليغ في ساق موسي عندما خلف رجله .
اخر مره اقابل ود الحناوي كان في منزله جنوب سينما الوطنيه لانه كان جارا لصديقي احمد الميكانيكي و كان ود الحناوي يعاني من قطع مخيف في يده اليمني لم يشف بعد . و قال انه قد غضب من زوجته اسماء الحلبيه فضرب صحن الباشري بيده فانكسر الصحن و انغرز في يده . اسماء الحلبيه كانت من نساء امدرمان المشهورات .
اخونا محمود اسماعيل ابراهيم رحمة الله عليه ، دخل في كثير من المعارك في براغ . فاطلق عليه مامون يوسف المامون لقب ودالحناوي لان لونه كان فاتحا فلازمه هذا الاسم طيلة حياته .
محمود الفُخ كان قويا و اشتهر كبائع بنقو بالجمله و صاحب تربيزة قمار في منزله بحي العرب . و كان كريما يرتاد منزله كثير من الناس، و لا يخلو من ميل للسخريه .
فعندما اتاه الشاويش و طلب منه ان يوزع الكمنقه لان هنالك كشه ، اعطاه ما فيها النصيب ثم اتي اومباشا و ردد نفس الشئ و اخيرا اتي رجل بوليس تعبان قائلا ( وزعوا الدخانه ) فقال الفخ ( هي اصلو كمنقه و لا منشورات شيوعيين ، وزعناها زمان ياخ ) .
و عندما جائت الكشه فتح الفخ للشاويش و قال هازئا ما صار مثلا يردد في امدرمان ( جيت تقبض الكمنقه ؟ جدع ولدي ) و صفق الفخ بيديه ثم اضاف ( وزعناها زمان ) و كنا و لا نزال نقول عندما يحاول الانسان شيئا و يفشل ( جيت تقبض الكمنقه ؟ جدع ولدي ) .
النفراوي كان قويا و يمت بالصله للفخ و بينهما صداقه و كان من المؤكد اشهر مخنجي في امدرمان . و منزله غرب سوق الحداحيد و بالقرب من زقاق المنفله .و الي ان تركت امدرمان لم يلق البوليس القبض عليه . و كان يبيع من شباك عالي في منزله . و لا يبيع اقل من وزنه او تعريفه و تساوي 25 قرش و الاخرون يبيعون ورقه و تاوي 10 قروش و هي كميه صغيره و نوعيه رديئه .
في احدي المرات تعلق بيد النفراوي اثنين من رجال البوليس السري عندما باع لهم الوزنه . و لم يتمكن الرجلان من القبض علي يده . فانتزع يده . و فتح الباب فهرب الرجلان .
من العاده ان لا يذهب الناس الي النفراوي بعد الساعه العاشره ليلا . في احدي المرات طرق شباكه شخص ملهوف في نصف الليل فاتاه صوت النفراوي الجهوري ( جاييني نص الليل ، بائعات الهوي و ناموا ، انا ما انوم ؟ ..انتظر ....) و قبل ان يفتح النفراوي الباب هرب الشخص الذي كان صديقا لابن عمتي عثمان عبدالمجيد علي طه المشهور بكوارع .
اول مره اشاهد النفراوي خارج منزله . كان في منزل عبدالقادر حسن عباس المشهور ب(تورو ) في بانت . و لقد اتي لانها كانت( قاطه) كما قال هو و اللواري ما جات من الجنوب . و قام بلف سجاره لم يشاركه فيها اي انسان . ثم اخذ ربع رطل و ذهب .
تورو كان مخنجي يغطي منطقة بانت و جزء كبير من المورده . لان الِوش كان يغطي منطقة سوق المورده و فريق ريد . محمد عثمان كان الفتوه الذي يدير العمل مع تورو و لهجته كانت غريبه . و بالرغم من انه لم يكن دنقلاويا الا انه كان يؤنث المذكر و قد يكون من شرق السودان او اثيوبيا.و في يوم من الايام صرع رجل بوليس سري امام منزل تورو بلكمه واحده . فعندما كان محمد عثمان يحاول ادخال دراجته حاول رجل البوليس الدخول معه . و لم يعرف محمد عثمان ان رجل البوليس احد معارف تورو .
و لقد كنت اشاهد كثير من رجال البوليس حتي بملابسهم الرسميه في منزل تورو . احدهم شخص خفيف الدم بشنب ضخم اسود اللون عرف ب( جاور السعيد) لانه يصرخ عند الباب عندما يحضر ( جاور السعيد تسعد).
عندما رجعت في نهاية الستينات كان محمد عثمان قد انفصل عن تورو و صار مخنجي في منزل جنوب منزل العم عبدالله حسن عقباوي و بالقرب من منزل العم محمود صالح المغربي والد المذيعه ليلي رحمة الله عليها .
محمد عثمان قد انفصل بعد سجن تورو المتكرر . ففي بدية الستينات انسجن تورو بتهمة الاساءه للمحكمه . فلقد فتح بلاغ ضد عبدالعزيز الذي كان مسئولا من الحصاله و اختفي بسبعين جنيه . فتدخل ابن عمه نور الهدي واحضر عبدالعزيز من عشش فلاته . و عند الذهاب الي القاضي لشطب البلاغ قال القاضي لعبدالعزيز ( انته ولد صغير و ابن ناس ، ايه البقعدك مع المجرمين ديل ؟) فقال تورو ( مافي لزوم للاساءه ) فرد القاضي ( تتكلم بديك شهر سجن ) فواصل تورو ( .......امك لو ما عملتها سته شهور ) و لقد كان .
بهذه المناسبه ، احد القضاة من خارج امدرمان قال لصديقي المعلم قدوره الذي كان اكثر الناس شياكة في امدرمان ( انته زول وسخ ) فرد المعلم ( وسخ انا !! انا بستحمه مرتين في اليوم . انتو حلتكم ادبخانات ما فيها بـ..... زي الغنم في الشارع ) و كان الحكم بالسجن .
لان اهل امدرمان كانوا يعرفون بعض و يتداخلون . فلم يكن من السهل عمل كشات . فاستعان البوليس بشاويش صغير السن من عطبره . اوقع بكثير من المخنجيه .
كان هنالك كيس يحوي البنقو و في وسطه حجر ثقيل ، و في حالة اي كشه يسلم هذا الكيس للمرحاض . و فجأه يظهر بعض الكهربجيه و يضعون سلما و يبدأون العمل في عامود الكهرباء بالقرب من منزل تورو . و بعد ان يطمئن لهم ابراهيم ابودقن سائق التاكسي و الذي يعمل مع تورو ، و تبادل التحيات و القفشات . يقفز رجال الشرطه من ذلك السلم و يقبض علي تورو.
ابراهيم ابودقن كان اصفر اللون وسيما ربع البنيه انيق الثياب ، يرتدي في بعض الاوقات بدله كامله . و دائما نظاره سوداء . كان يسوق سيارة والدي في بداية الخمسينات و كان مرحا يحب النكته . و نحن صغار كان يقود السياره بقدمه . و كان بمثابة الاخ لنا . ثم صار سائق سيارة التاكسي التي يمتلكها تورو . و فهمت وقتها لماذا كان يقود السياره بقدمه . و كيف كان يذهب الي اختي نضيفه في المطبخ و يقول ( ادونا اي حاجه حلوه ) و بالعدم يسف سكر . الراجل كان ( بحبس ) .
من النساء القويات في امدرمان و يهابهم الرجال قبل النساء . الخاله كيكونه والدة لاعب الكره و نجم فريق الشاطئ صديقي بنضر الذي اشتهر بجملة ( و لولا براعة الشبل بنضر) التي صارت يضرب بها المثل في امدرمان . فبعد هزيمة الشاطئ بخمسه اهداف كتب صحفي ( ولولا براعة الشبل بنضر لكانت الهزيمة اسوأ) .
كيكونه كانت تبيع الخضار في سوق المورده . و تكون مستلقيه علي جنبها في الطبليه بالقرب من الخضار . و لا تتكلم كثيرا و لا تزيد عن الابتسام و لا تفاصل . كنت اشتري منها الطماطم باستمرار. اسأل عن السعر و اضع الفلوس تحت الشوال و اخذ الباقي كالاخرين . و قلت مداعبا احد اصدقائي ( اها لو الزول شال زياده ؟) فكان الرد ( منو البقدر ، شوفها قدر شنو ) .
علي عكس كيكونه كانت صديقتها زمبيري الحلبيه . اميل الي البياض نحيفه نخناخه كثيرة الكلام و هي كذلك تبيع الخضار . و هي ام اثنين من فتوات امدرمان ، عرفه زمبيري بشعره المنكوش و هو عربجي و سيد صربندي او اطرش قديس كان قويا يقوم بتقطيع لساتك السيارات في الصباح و يبيع التذاكر امام سينما قديس في الليل . انتهي به الامر الي سجن كوبر ثم سجن بورتسودان .كل حياة سيد كانت مرتبطه بالسينما . و عندما سمع في سجن كوبر ان الممثل جري كوبر قد مات ، بكي و حزن و امتنع عن الاكل . و بالرغم من انه اطرش فيتحدث بصعوبه . و عندما قالوا له ( زعلان مالك ، جري كوبر ده قريبك ) قال ( ده اخوي ،كده ) و وضع سبابته ملتصقه بالاخري .
الخاله كيكونه انقذت المفتش الانجيزي عندما اراد فتوات المورده الاعتداء عليه . فهرب جاريا ، فادخلته الخاله كيكونه منزلها و خرجت لمقابلة الفتوات بمرق العنقريب فهرب الفتوات . و اعطاها المفتش الانجليزي رخصة بيع الخضار في سوق المورده بدون رسوم طيلة حياتها .
حوه كرنقو كانت من فتوات امدرمان . عندما كانت صغيره كانت( محمد ولد) و لعبت الدافوري مع صديق منزول و هي صغيره . و كانت تجيد العراك و تضرب راس يصرع اقوي الصبيه . كما كانت تربط للصبيه و تقلع قروش فطورهم . صديقي (ع) الذي صار ظابطا في الجيش تعرض لعملية نهب بواسطة حوه كرنقو فصار يتفادي شارعها . و كنت امزح معه و هو ضابط مهاب و اقول له انني سافشي سر حوه كرنقو لزوجته .
كرنقو كان شابا قويا شكله يقرب الي شكل اشقائنا من النوبه بعضلات بارزه و جسم طويل . كان بشوشا مع معارفه و اولاد الحي . و عندما كان الرماي يشبك في النيل ( يكرد) يساعدني في اخراجه حتي بدون ان اساله لان منطقة النمر امام الصهريج القديم بالقرب من الطابيه كانت عميقه و خطره . و كنت اصغره بعدة سنوات . كرنقو كان من فتوات امدرمان الكبار .
و بينما نحن جالسون في قهوة السماني المقابله لمطعم صبير في الملجه و التي صار يديرها صديقي علي شلوفه و سيد ودابونا بعد مرض السماني النفسي . سمعت محجوب عجيب علي ما اظن يقول( كرنقو و ود ام شطور كتلوا البوليس ) . و لم يعلق احد وقتها و ربما لان البوليس السري عربي كان موجودا بعمته القلووظ . و كان هذا في 1964 ثم عرفت من الدكتور محمد محجوب عثمان بانه شاهد صديقي كرنقو في سجن كوبر قبل شنقه و انه كان متماسكا و مشي الي المشنقه بثبات و شجاعه .
حتي انا عندما اجتر هذه الزكريات استعجب . ما الذي يدفع شاب صغير لمعاشرة هؤلاء الناس . و لكني عاشرت المثقفين و المتعلمين و المترفين و وجدت الغير متعلمين اصدق و اكثر حفظا للود . و والدي ابراهيم بدري الذي قضي اغلب حياته وسط الدينكا و في جنوب السودان ، و والدتي التي ولدت و ترعرعت في جبال النوبه كانوا يؤمنون بان يعطوا الاطفال فرصه مشاهدة الحياة عن قرب خارج الحمايه المبالغ فيها .
قبل ان ابلغ الثالثه عشر قضيت اجازه مدرسيه علي ظهر قندراني يخص محمد عبدالله عبدالسلام زوج خالتي . و تعلمت الكثير من الرجل الرائع سائق القندراني محمد يس الدنقلاوي واخيه عوض الذي صار سائقا للبص السريع . و كنت اشاركه النوم في كابينة القندران او علي شوالات الاسمنت و هو يحكي لي عن الدنيا و تجاربه ، لقد كان من خيرة اساتذتي في هذه الدنيا . و كنا ننقل مواد البناء الي اكوبو و الناصر و البيبور و فشلا و جبل بوما و هذا في الخمسينات. اطلقوا ابنائكم لكي يعيشوا . و نواصل فما اكثر فتوات امدرمان مثل كبس الجبه و قدوم زعلان و دغماس و راس الميت و كاتوحه و عبدالفتاح و عُبد و رزيق و الفي و ....الخ .
شوقي
|
|
 
|
|
|
|
|
|
|
|
Re: العالم السفلي ....فتوات امدرمان (Re: shawgi badri)
|
يا عم شوقي بدري
انت بتتكلم عن سودان من الارشيف
الان الفتوات ما في ام درمان بس وما محتاجين قوة عضلية
الفتوات زمان كان عندهم مبادئ الان اي زول بيقلع حقك جهارا نهارا
وما تقدر تقول بغم
البلد كلها بقت تنشل مافي حاجة اسمها النشالين اسع
انا بعد كم سنة لو حاولت اكتب زي كلامك دا عن السودان
ما بلقي صعوبة لانه كان مسكت اي زول من طرف ممكن اكتب
زي كلامك دا
البلد ما دايرة قوة الان او ذكاء البلد دايرة
زول عينه قوية وكذاب
| |
|
|
|
|
|
|
|
|
|
Re: العالم السفلي ....فتوات امدرمان (Re: اساسي)
|
عزيزي اساسي
حتي مجرمين زمان كانوا معقولين و الفتوات عادة يحمون الحله . و يقفون في الحفلات حتي لا يأتي اخرون لفركشتها . و يقدمون المساعده لاهل الحي و يعاملون الكبار بأدب . لقد شاهدت ادم قطيه و هو من اعتي مجرمي السودان يقف متأدبا و يحيي الصول شنب الروب ( اهلا عم ضرار) . هذا هو الفرق يا اساسي . هل تذكر الواثق الذي اعدم في ايام نميري ، لقد كان هنالك كثير من امثاله في السودان. حتي اذا نهب يعطي لمن ليس له .
و لك التحيه
شوقي
| |
|
|
|
|
|
|
|
|
|
Re: العالم السفلي ....فتوات امدرمان (Re: shawgi badri)
|
العم شوقى
من المخنجيه الكبار نسيت معروف نكير وهو أول من أدخل الافيون فى السودان وعلى حسب كلامه لى مره إنو ببيع بنقو من زمن الإنجليز وقد القى القبض عليه مرات عديده ولكن لم تدنه المحكمه ولا مره لأن هناك دائمآ من يتبرع بحمل التهمه عنه وكان يمارس مهنته بحى الشهدا
| |
|
|
|
|
|
|
|
|
|
Re: العالم السفلي ....فتوات امدرمان (Re: فجراوى)
|
عزيزي منتصر
انا لسه ما خلصته من المخنجيه الكبار العندهم بيوت مفتوحه . في حوالي عشرين مخنجي في امدرمان بيوت ثابته . ده قبل ما يظهر صاحبنا داموك ود علي الله و اخرين .
نكير كان متخصص و الافيون ده كان ببلعوهو ناس معينين . او يستعملوهو كعلاج للعصره و هي المغص الحاد الذي يلازم الدسنتاريا . ده راجل بتاع استقراطيه ، نحنه صحبانا كانوا عجلاتيه و نقلتيه و عربجيه زي سقيد و فضل المولي و حبه حبه و الجد. الحصان بياكل اكتر من اسياد البيت . راس برسيم بي 25 قرش و ملوة فتريته و لا ودعكر بي اربعه قروش و نص . الافيون كان بالجنيهات يا منتصر . العربجي كان اديتو جنيه يقتل . المشوار بي 15 قرش و بعد الساعه 12 الحصان بيحرن لحدي اربعه . لكن حنواصل مع المخنجيه و الفتوات . و لك التحيه
شوقي
| |
|
|
|
|
|
|
|
|
|
Re: العالم السفلي ....فتوات امدرمان (Re: shawgi badri)
|
أستاذ شوقي
سلام
أتابع بوستاتك وكل ما تكتبو
أمدرمان القديمة والصنعتا هجرة الحوجة في سنين الحوجة , لحدي المهدية وإمتداداتا في الحارة كم وستين , خليتا قبل ستة سنة أربعة وخمسين , كل شي زايد , حتى حدود أمدرمان القديمة , مافضل من قديما غير طوابي الطين ,
أحكي ونسمع , عن محطة الدومة , والترام الوقفو شنو , حكاوي الترام والنشالين الأٍسلفت وحكيت في بوست سابق .
أحكي ومنك نعرف الما حنلاقيهو كتب التاريخ , الناس السكنوا امدر وعمروا فيها وعمرت بيهم .
| |
|
|
|
|
|
|
|
|
|
Re: العالم السفلي ....فتوات امدرمان (Re: shawgi badri)
|
الرائع الأستاذ أبو فقوق.
الله يديك العافية ويطول عمرك ويخلي ليك نسوانك وأولادك ...
نواصل الاستمتاع بما كتبت ، ونتشوق لما ستكتب ، ونطمع في كرمك الفياض ، ويجعلنا العشم أكثر ثقالة فنطالب بالمزيد والمواصلة بالكتابة رغم اليقين بأن لديك مشاغل أخرى أهم منا ولكنه العشم في إبن أمدرمان والسودان كله (الربانكاوبي) الرباطابي+الدينكاوي+النوباوي.
فلا تتأخر علينا بما هو آتٍ فنحن على أحر من الجمر ننتظر كلماتك لنلتهمها إلتهاماً وما تزعل من الساحوته فكلما كتبت إلتهما وكلما إلتهمنا قشقشنا خشومنا وقلنا جيب تاني يا عمو ..
راجنك ،،، وسنظل نجتر ما كتبت حتى يأتينا الجديد.
...
| |
|
|
|
|
|
|
| |
shawgi badri
اساسي
Al-Shaygi
Frankly
فيس بوك
تويتر
انستقرام
يوتيوب
بنتيريست