|
|
 إلى همباتة العصر الحديث
|
إلى همباتة العصر الحديث
شاذلى جعفر شقَّاق
إلاما الليلْ يغطِّيكم ؟
إلاما الباب يحولْ بينكم
وبين الـ فى الصدور يغلِى
غُبُنْ زارعِنّو بى ايدكم ؟
إلاما الباب يحول بينكم
ويحميكم مِن الشِّلْتوها
مِى هِيــلكم ؟
مِن العِقْتوهو فى رزْقو
ونازعْتوهو فى حقُّو
وهمْبتُّوهو ما زادْ
ليهو فَدْ لَبْعه
تشكِّروا فيهو ميزانكم
وقنطاركم يقول
للوقَّه يا دُفْعه !
تَنَقُّوا الناس ولمَّا تْنِقْ
يجى الكرباج يجى الخنزير
مع العبلاج تصيح البومه :
ما تْنِقُّوا !
وانتو تلمّوا انتو تخمّوا
يزيد اصرارنا وانتو تصُرُّوا !
نحن نسوِّى الجامع شَغَلَه
وانتو هبوبكم هابَّه تضَرَّوا
تعبَّوا مَسورْكم من ضرعاتنا
جبينَّا يَخُرْ ما خَرَّ جبينكم
يا همباته عشان روسينكم
ما تِتْزلَّط أبقوا اتْوقُّوا !
وشيلوا حصادنا ووقِّفوا
حالنا وأوْقفوا حيلكم
إلاما الليل يغطِّيكم ؟
إلاما الباب يحول بينكم
وبين الـ فى الصدور يغلِى
غُبُن زارعِنّو بى ايدكم ؟
إلاما الباب يحول بينكم
ويحميكم من الشِّلتوها
مِى هيــلكم ؟
مِن الفار الـ لِعِبْ
فى عِبَّكم جُمباز
من التار الـ رَتَعْ
فى خِصْركم طبَّاز
من الضِحِك الـ شَرَط
مسندْ وثيراً ناز !
من السَّفَروق من الشوتال
من الحرْبه ومن العُكَّاز
من الغضب الدَّعول قمَّاز
لو رعديد ولو لاواز
لاهو عميل ولاهو نشاز
غضب يشْلَع متاريسكم
غضب يكْسِر ترابيسكم
غضب يقْلِب ترابيزكم
غضب يحْشِر صُباع
الهوْجَه فى
عينكُم !!
|
|
 
|
|
|
|
shazaly gafar
فيس بوك
تويتر
انستقرام
يوتيوب
بنتيريست