|
|
 نداء .. للبطل الذي بداخلنا (جواك بطل)
|
في نهار (حار من نارو) كعادة نهاراتنا و تلذذها بإستحلاب ماء الجسد عنوة وإقتدارا وحكمتها التي تجعل للمساكين رزقا في المجانين من مناديل ورق ومنشفات قطنية وماء لا صحة فيه سوي ان بارد ومثلج تنتهي صلاحيته بمجرد إفراغ (الكريستالة داخل جوفك المحروق ايها المواطن السوداني البطل) وان شق عليك ذلك فما عليك الا ان تحسس جيبك نحو الفكة الحديدية مستصحبا بأس الحديد ومعددا منافعه متجها صوب جركانة بيضاء بها لذة للشاربين دون ان تسأل نفسك (بينك وبين الاخلاص) عن مصدر الماء ....او ان تختار الطريق الثالث او النضال السهل بدخول برندات السوق العربي (وعرقك يتخرت) مداقشا خلق الله باحثا عن مبرد مياه يرد روحك التي تغريت عن جسدك بفعل العطش موفرا ما يحفظ ماءوجهك امام الكمساري والمغالطة الحسابية بين 400 او 500 وزيادة تعريفة المواصلات التي تكون انت اخر من يعلمها بينما يحتفظ الكمساري بالمنشور تحوطا من لداحةالراكبين مستفيدا من حكمة قديمة( واقفين تحتننو .. وراكبين تجننو) ..... بعد حوار مضني وعدة كلكسات استطاعت عربتنا تجاوز كوبري الحرية لنجد إشارة مرور تضن باخضرها وتجود باحمرها واصفرها متمهلة تمهل قطرات (الدرب) في عد ارقامها ... حدقت وحدقت كثيرا في جريدة احملهاتشغلني عن تعنت الاشارات مارست بفضول زائد القراءة الصامتة لمن يجاورني متلصصا علي جريدته الرياضيه فامتعض مني مقلبا صفاحتها في زهج متعمد بادلته إبتسامة مونديالية تخللتها جملة تبرز متابعتي للرياضة منشط كرة القدم فرع كاس العالم(والله الانجليز امبارح رشوهم رش) لم يعيرني إنتباها فاحسست بان الهايس متجه نحو مانشستر جنوب وليس جبرة جنوب فازدت حماسة لموضوع الكورة تركت العالمية واتجهت صوب المحلية (بالله الهلال جاب مدرب جديد)بعدها قام صاحب الصحيفة الرياضيةبطيها وادخلها في جوف شنطته وقتها فتحت الاشارة وزال عني حرج التطفل الرياضي وقراءة جرايد الاخرين ...
|
|
 
|
|
|
|
|
|
|
 Re: نداء .. للبطل الذي بداخلنا (جواك بطل) (Re: omar alhag)
|
شئ ما جعلني اتذكر اغنية من الاسكلا وحلا لكن إشارة المرور الثانية قتلت (الشياطين ال13) والمغامرين الخمسة لحاسة الشعر عندي و(علي الطلاق) بتاع اغنية الاسكلا لو شاف إشارات المرور وكيف انها
قد ضجت( قدامك وراك) ما كان يستطيع ان يكتب بيت شعر واحد، اخرجت راسي بشباك الحافلة موصوبا بصري نحو لافتة كبيرة وضخمة لمشروب (شعيري) خال من الكحول (وشن فايدة الشعير الما مكحل) يدعي شامبيون (برد الله جوفكم احبتي الراكبين علي متن الهايس 885 المتجه الي جبرة جنوب) تلك الدعاية الرويانة والشعير يتطاير منها(وبرضو بدون كحول) وبجوارها عبارة مستفة بالكحول (جواك بطل) هلا هلا انا اخو البنات فاخذ البطل يمد رجليه إيذانا بالخروج ويحفزني لإشرب الشامبيون بمجرد وصولي للمحطة فما اشد حوجتي لهذا المارد واحسست ان لو قُُُُُُُُدر لنا نحن ركاب الهايس (ال15) ان نخرج اولئك الابطال الذي يسكنون الشامبيون يمكننا ان (نشكل فلوترون) ونهزم الاشرار وبعدها يمكن ان نمزمز ميرندا ..........
ملوحظة
الموضوع
قابل للنقاش .. والاقتباس .. وإضافة صورة .. وتحميل اغنية .. واشياء اخري مفيدة
يتبع
| |
|
|
|
|
|
|
|
|
|
Re: نداء .. للبطل الذي بداخلنا (جواك بطل) (Re: انور التكينة)
|
صادني صاحب الصحيفة الرياضية (الغتيت) وانتزع حملقة عيوني من الشامبيون الي داخل الهايس بقوله (والله البتاع ده عجيب خلاص) ممنيا نفسه بحوار ممتد حتي تاتي محطته (ويسبيني في عز الجمر)واتجاوب معه ونتجادع المعلومات والتعليقات بداية بالشعير ونهاية بالبصل الابيض تلقاها عند الغافل (تمتمت بداخلي)
يعني الانجليز ما جبو خبرك داير تفلسف في الشعير انت وكت خريج زراعة تخصص نشويات الجرايد الرياضية ليك شنو اها والله اليلة الشامبيون اكان غلب المانيا خشمي ده ما افتحو معاك (مواصلا تمتمتي) ..
ولكنه الحر الذي جعلني ابلع طعم الثرثرةاسرع من سمك جبل اوليا ومن ناحية اخري انتفخت اوداجي بالثرثرة وادرنا الحوار التالي ومسكت المايك من الراجل وهاك يا مساء جديد لدرجة احسست ان يفاجني المخرج بفاصل اعلاني فابتسم للشاشة واعود ثانية وفي لحظيات تحول المقعد الي استديو والكمساري الي كاميرا مان واستلمنا الجو...
صاحب الجريدة ..
تعرف يااستاذ البتاع ده ( المقصود هنا البطل البرناني السيد شامبيون) لو غيرو العبوة بتاعتو لي حجم اصغر في علب بكون احسن من البلاستك لانو للبسلاتك خطورة كبيرة .. وا .. أحتمال ..
(امك الزول ده ما طلع هنكن عديل كده) علبة وحديد ياخي دي ما مركبة فضائية عديل كده ونحن ناسا
لعنت ابليس الذى طفق يدغدغ جيبي وانو (الجنيه ونص) ما كتار علي البطل واساسا البطل جواك انت بس ح تساعدو بي حبة شعير ........ وخلي العيال تفرح
| |
|
|
|
|
|
|
|
|
|
Re: نداء .. للبطل الذي بداخلنا (جواك بطل) (Re: omar alhag)
|
ومع سرحة الرجل شاني الشك في الموضوع ففكرت جيدا وقلت اقوقل الرجل قوقلة علي راي اهلنا عرب قوقل يمكن يطلع من ناس (يارمال حلتنا زولا كأن بانسك يا حليلو)فبدأت بمحرك البحث نحو الجزيرة والله ياشاب انت بتشبه لي ناس الكاملين ولم يجاوبني الرجل فقلت إحتمال تكون في نسخة مخأبة ما نستعجل التفاصيل فنقرت الزر الايسر للمقعد وتململت كمالماوس (ياولدي)...
الله الزول يكون في حرس الصيد اونا قرد الكلام بنطط من عندي قبل ساعة..
وقتها سادتي حقيقة قد لعب الفار في عبي
نعم انه من حرص الصيد وقوات الحياة البرية ...
فغيرت مجري الكلام ..
تعرف السنة دي الحج ح يكون تكلفتو عالية ...
وعرجت علي كأس العالم (والله الهولندين ديل اولاد لزينا)
ورفض الرجل ان يعلق علي الكاس ايضا ...
وفجاني النهار عندما إبتدر حديثه
انت عارف قصة الشعير دي قصة عجيبة وفي بلاد تانية بحتلفو بيهو زيو وزي القمح عندنا...
الله الرجل طلع (جواهو بطل)
فامسكت زمام الامور ثانية
واتوكلت وقلت نحن احسن نمسكا من العتي
| |
|
|
|
|
|
|
|
|
|
Re: نداء .. للبطل الذي بداخلنا (جواك بطل) (Re: omar alhag)
|
حدثت صنة مفاجئة فشردت بفكري مستفيدا من سيرة البطل الجواني وخلت ان المكان (سهلة) وممتنعة لغير الانس والطرب وخلت صاحب الجريدة الغتيت متابطا العود (بدل شنططو الشينة دي) يدندن نادو لينا البنا يبني لينا الجنة وياتي الكمساري مبشرا و يرمي طوبة محنة والعبد لله وصاحبة الابتسامة اللطيفة بالمقعد الخلفي (يعقدو لينا اهالنا بالكتاب والسنة) وقتها يستعدل السواق مرايته مرددا ننتصر ياحب فيردد الركاب نحن نلنا .... املنا ,,,,,,,,,,,,,,,,,,,
ولكن قاتل الله الباقي وبعثر فكته وشتت شملها كما شتت افكاري من حلم جميل ..
يتبع
| |
|
|
|
|
|
|
|
|
|
Re: نداء .. للبطل الذي بداخلنا (جواك بطل) (Re: omar alhag)
|
إندلعت مشاجرة حامية ونارية بين طالب والكمساري و تحمس بعض الراكبين تضمانا مع التجربة التعلمية في تركيا
وحقوق الطلاب في هندرواس (ولا واحد جاب سيرة الحكومة مافي) ماعدا راكب واحد يظهر بان البطل في (عيوني متخبي) و لكن .......... ياريت ياريت ياريت .. علي الاقل كان الفؤاد ارتاح
اخيرا اتي النداء من الكمساري عبر حلقوم مدرب وموسيقي وصول المحطات (بلال بلال في زول نازل )نزلت من الهايس بهدوء وطمانينة تشبه (الفكي ودالبشير رحمه الله) عندما يهم بخطبة الجمعة وكيف انه يقوم بمسح المسجد بنظرة طويلة ثم يخرج كتابه(الاصفر) لابن نباته ويبداء في السجع فتردد معه حبوتي عشة اثناء نفخها لبرنجية توطئة لنهاية الخطبة وبداية الصلاة بعد (مصميصة خشم دون إعادة وضو) فهي تصلي خلف الامام من خلال المكرفون وعيونها مصوبة نحو باب غرفتها خوفا من هجوم الطيب ود بخيتة الملقب ب (جنينة) وختف عصايتها وعلبة السجاير خاصتها وكذالك يردد ناس الحلة خطبته المحفوظة لهم واخرين حفظو حتي نحنحته في المايكرفون، ترجلت تاركا خلفي مقعدي وصاحب الجريدة و(البتاع داك) وما تبقي من شكلة الكمساري وذات اللهيج السكري والثرثرات ونغمات الموابايل ( الصيني منه والنوكيا) المختلفة والمكالمات الجهرية منها والهامسة معقلا إما بسقف الهايس إما بزمة الكمساري الذي ابتلع بعض البواقي ...
يتبع
| |
|
|
|
|
|
|
|
|
|
Re: نداء .. للبطل الذي بداخلنا (جواك بطل) (Re: omar alhag)
|
مابين الاستدارة نحو سيدالاسم (بتاع الخضار) ومشقة العبور للضفة الاخري من الشارع والتوجه مباشرة الي البيت بداء ذلك البطل بالطنطنة مرة اخري واصبحت وليمة لاعشاب افكاري ووساوسي (لو مشيت البيت ولقيت ضيوف وعيش مافي) واحتمال زيادة كهربا وقطع شك مافي سلطة ووووو ... لالا المسألة اظنها في حوجة الي منبر تفاوض مع دوحة النفس الامارة بالشراء والتبضع .. توكلت علي الحي الدائم متجها نحو السلطة (بفتح السين) غاضا بصري عن حرمة النظر للبندورة في هذا الشهر (اللئيم)
مرددا في داخلي لو أقدر (اشتري كليو طماطم وكليو لحمة وووو)....
فهل بقدر اسوي كده كلو!!!!!!!!!!
يتبع
| |
|
|
|
|
|
|
|
|
|
Re: نداء .. للبطل الذي بداخلنا (جواك بطل) (Re: omar alhag)
|
عمر الحاج
وجدت نصك الفسيح دة بعد طول حوامة و مكابسة
وفي الحقيقة زعلت شديد إني ما قريتوا قبل كدة
لظروف قاهرة( المعز) وكدة
وحاتك اليومين ديل بتحاوم من نيت كافيه لي موبايل
عشان أقرا لي حرفين
ظروف بتعدي يا حبيب
المهم
بتعجبني تلقائيتك
وطريقتك الرهيبة في السرد
و بحس إني كنت حاضر المشاهد دي وحصلت كلها قدامي
ياخي ربنا يديك العافية
| |
|
|
|
|
|
|
|
|
|
Re: نداء .. للبطل الذي بداخلنا (جواك بطل) (Re: omar alhag)
|
حدقت بكوم الطماطم ابو 20 جنيه( واغالط نفسي باصرار واقول يمكن انا الماجيت) رفعة راسي علنّي اجد لافتة ذلك البطل لإنزله من تعبيته البلاستكية واصرخ بوجهه (اكان راجل امرق علي الطماطم دي) خليك من الشعير وعدم اهليتك الغير كحولية هذه...
اتت عربة فاخره بداخلها بطل (شحمان) من ازمنة التمكين والبكاسي التسعين خمخم كل انواع الخضار بدون ادني مناقشة علي شاكلة (لا حولة ومتين زادوه لالا ماداير وعلي الطلاق البلد سيدا منو ما عرفناه) وقتها طفرة دمعة من داخل جيبي من حبيبتي الحمراء (خمسة جنيه صم) انتحبت معها عملة حديدية من ذوات الدم الحار وهي ما تعرف(بخمسمية الركشة) التي يطنطن منها حمودى ود عواطف ويحتج علي السلم التعليمي ويرفض الذهاب الي الروضة مالم ياخذ جنيه بحالو ،بعدها ذهب ذلك الاسطوري نحو الفرن ثم الجزارة وعرج علي بعض الفاكهه وعندما هم بركوب عربته وقتها احبيتي سالت مشاعر الناس جدوال و كدنا ان نصفق له لفرط سرعته في الشراء وتناغمه بين السعر و سرعةالدفع (المقدم) والدفع الرباعي ايضا...
يتبع
| |
|
|
|
|
|
|
|
|
|
Re: نداء .. للبطل الذي بداخلنا (جواك بطل) (Re: omar alhag)
|
إنتابتني نوبة من السرحان وصوت الكرن جاني (بكسر الكاف) وسميتا زينوبا (تلك السرحة) بان المدعو شامبيون اصبح شيخ وفكي وحلال عقد (مش احسن من قصة بطل دي) واتخذ من مايو مسكنا ومزارا يقصده الحكوميين وتجار الجملة والقطاعي والمفاضون والمفاوضات وناس (قريعتي راحت) والشيخ شامبيون ساكن بيت الطين وحلال شبك المساكين في غرفته الطينية مستعينا ببعض الجلكسات (راس دابى وضنب ضب وعروق) وقليل من نبات السنمكة دلالة علي نفاذبصيرةالفكي شامبيون وإلمامه بالتدواي بالاعشاب.
وفي ذات السرحة امتطيت عربة امجاد متجها صوب الفكي شامبيون ، وبدأت في استدراج صاحب الامجاد نحو كرامات الفكي ، مفخخا الحوار بتفشي الدجل والشعوذة .. فالي مطابط الحوار..
فاخرج صاحب الامجاد محضره للتحري بلسان زرب وابتسامة نصف دائرية (هاف مون) ...
وطوالي خشيت في شخصية مختلفة تماما كما قال الشاعر (نكر صوتك صداك) وتبرجت غيمة الثقافة نحو الغيبيات والبرا (ساي) كلوجي ..
تعرف (جملة إستهلالية) تفيد الادعاء بالشئ..
قصة الفكي وخزعبلات المحايات في زمن اللابتوب والاي باد والثروة الالكترونية بقة عبارة عن اسطورة كبيرة وحتي شعوب زي (المايا) في اعالي البحار تخلصت منها...
نظر صاحب الامجاد مليا في وجهي (ناعلا البنقو) في سره ..
والله شوف شيخ محمد ده اداني رتينزا لي شهرين ما قطعت وصل ولا في بتاع مرور اتكلم معاي ولا بالغلط ..
تقول لي شعب واسطورة ولابتوب وشنوشنو ..
| |
|
|
|
|
|
|
|
|
|
Re: نداء .. للبطل الذي بداخلنا (جواك بطل) (Re: omar alhag)
|
شعرت ان صاحب الامجاد لمنا دخلنا في الغريق بتاع الثقافة والمفردة المكثقة وشعر الهايكو وكتابات تنية ولا تنية والحب في ازمنة الوبائيات (الحب في زمن الكوليرا) ولسان العرب وكوارع الفرنجة .. بانه وضعني في اعلي مراتب الجنوب من (جنونا الحبيب) ...
فقاطعني قائلا (اسمع لو لقينا زول في طريقنا ممكن نشليو معانا، وبراك عارف المدارس والمصاريف)
تمام يا شاب انت متوزج
اجابني ما هو عادي لا ..
طيب مصاريف المدرسة لمنو ..
تبسم ضحاكا واخرج راسه متخلصا من سفة..
اصلا الامجاد دي بتاعت خالتي ..
لالا ياشاب عرفة القصة
راجلا نزلو معاش وإستبدل المعاش بامجاد والامجاد طلعة ماسورة ووو، لالالا انا سناريو (اليابسة وغناء العزلة ضد العزلة) ده حافظو حفظ ..
اسمع نشيل الزول داك معانا
ممكن طالما المدراس بتاعة تعليم قياداة السيارات مالية البلد..
فكانت الحركات التالية
فرملة
ثم الخلف
بعده
وطي صوت الرادي
ثم
نزل القزاز
وفتح الباب
يتبع
| |
|
|
|
|
|
|
|
|
|
Re: نداء .. للبطل الذي بداخلنا (جواك بطل) (Re: omar alhag)
|
ملخص ماسبق نشره
في زول اشر لينا وركبناهو معنا (الموضوع باختصار شديد)
اتضح ان الرجل رديفنا في الدابة سمسار وبتاع شمار ...
شايفين العمارة البيضاء دي بتاعة واحد كانو عندو محل تمباك سنة تسعين وبعداك فجاءة بقي عندو مليارات وعربات ومتزوج 4 ....
انت يازول متزوج لازا السؤال نحوالمقعد الامامي حيث اجلس ..
صمت قليلا (قلت اهرب منو)
طبعا متزوج
طيب في قطع اراضي رخيصة يدك علي 5 مليون بس واكتب نمرة تلفوني عندك لو المبلغ ما جاهز ...
سرة في بدني قشعريرة وارتعاشة اشبه بارتعشة موبايل (صامت) في إجتماع وزاري بجيب احدهم ..
اسمع في فكي اسمو شامبيون بتعرفو ..
اوووووووووووووووووووك شيخ شامبا ياخي والله خشمك فيهو اللبن
انت عارف ولا ماك عارف
سالني علي طريقة احذف اجابة..
لا والله ماك عارف ...
شيخ شامبا شوف عيني الصينين والاتراك والمصاورة وعربات الامم الامتحدة ديل بجو تلاتة يوم في الاسبوع
الخميس نهاية اليوم والسبت والاحد .. يازول الاجانب مايدوك الدرب ...
وابان عقالات ديل بجو يوم الاربعاء والاتنين ... يازول العرب ديل لمن يجو بس انت تسوك (من السواك) في بيتكم وتجي علي الشيخ شاي وقهوه ومندي وجداد اوووووووووووووووووك مولد ياعمك كلو ملح وفي بتاع شيشة فتح جنوبو ... وعلي الطلاق مرات بقسمو قروش ..
يتبع
| |
|
|
|
|
|
|
|
|
|
Re: نداء .. للبطل الذي بداخلنا (جواك بطل) (Re: omar alhag)
|
هزتني رسالة (لانو مشغل الموبايل هزاز) من ناس زين (تعمل شنو كدة وتدخل رقم ونجمة وشرطة وتتكلم الساعة بي 3 جنيه) يعني خلاص إكتشفتو العجلة ، إستفقت من حلمي الجميل ... محدقا في الفراغ الذي بين كشك الجرايد وسيد الخضار، لمحة ثلاجة بارد جسلت والخوف بعينها في ناصية دكان منتحل شخصية ولا هو بسوبر ماركت ولا دكان جملة بداخلها البطل في نكهات متعددة وحتي خالي السكر برضو جواه بطل فتممت في سري (سبحان الله اول مرة اشوف بطل عندو سكري)
يتبع
| |
|
|
|
|
|
|
|
|
|
Re: نداء .. للبطل الذي بداخلنا (جواك بطل) (Re: omar alhag)
|
إنتابتني رغبة اكيدة في شراء ذلك البطل متعدد النكهات والخالي من السكر والخالي من الكحول ايضا (هس ده مشروب ولا بُن) فأتاني بيت اللعن ووقفة وقفة شحيح ضاع في التراب خاتمه وهمُت في وداي عبقر(جنوب) ووادي عبقر (شمال) وتوكلة علي الحي الدائم مستغلا تلك الدابة الهندية ذات الثلاث (لساتك) والخمسامئة قرش (اجرة) والامبي ثري (كثير الصراخ) عملا بالحكمة القائلة
(اقلهن لساتك) أقلهن أجرة) .....
تحرك صاحب الركشة بموسيقي صاخبة وصوت متعارف عليه ومحفوظ في اقليم جبرة جنوب شمال خط 18 مارا بالسكة حديد مقتطعا قليل من الاراضي الهاملة وسيدا بظهر فجاءة بالمسلح والسراميك والطوب الحراري (حبك قايلو اسطورة وانتي طلعتي ماسورة) وبين الاسطورة والماسورة يبيناًًًًً عجايب .. ترجلة من الركشة وققعت في فخ (فكة مافي) إتجهة الي حلول علمية (نمشي لبتاع الدكان داك) فهز صاحب الركشة راسه بالنفي طيب ممكن تستني هنا شوية افك واجيك فهز راسه بعدم الرضا والحل السلمي اخيرا اتي بعض سكان جبرة الاصليين مارا بنا وحل المشكلة ...
| |
|
|
|
|
|
|
|
|
|
Re: نداء .. للبطل الذي بداخلنا (جواك بطل) (Re: omar alhag)
|
بعد نهار مضن (جفلن عيوني من التلفاز وقرعن النوم) وما إن تلاقت الرموش والاجفان لفحني البطل نحو كوابيس واضغاث ......
ورايت فيما يري النائم...
خبط علي الباب في منتصف الليل وفتحت الحاجة الباب لشباب في زي مدني وبكسي كشف
دايرين الشاب ده ممكن تصحيه لينا
الحاجة سجمي انتو منو
لا ياخالة نحن زملانو في الشغل
بعد نعنعة وتحانيس ختف البنطال وتي شيرت توجهت صوب الباب
ممكن يا استاذ ساعة زمن بس
في شنو
لا لمن تركب معانا ح تعرف
طمنت الحاجة
توكلت علي الحي الدائم ممتطيا البوكسي ........
لم ينبس احدهمم (ببنت او ولد او احمر شفاه ) بحرف واحد.
امك ده شكلو بوليس كيس .. او او (تكاثرات الواوات عندى)
رش احدهم رزاز اشبه (بقاتل الناموس والحشرات) ولكنه يبعث الخدر اللذيذ ايضا والنشوة الممتزجة بالتوجس
يتبع
| |
|
|
|
|
|
|
|
|
|
Re: نداء .. للبطل الذي بداخلنا (جواك بطل) (Re: omar alhag)
|
...
تمت جرجتي بواسطة الافراد الذين صحبوني في البوكسي معصوب العنيين (ومنعنش) شارد الذهن و يكاد ان يكون حذائي ملتص بمادة لزجة إضافة لفرض رائحة نكهات متعددة وانين وصراخ لقوير بلاستكية تعبأ بشئ ما ........
في متكب مساحته 3×3 وجدت نفسي امام شاب عسلي اللون يرتدي غطاء راس احمر منتفخ امامه حزمة من الاوراق...........
وفجأءة أمطرني الرجل بأسئلته المتتالية ولقلة مصارف الاجابة عندي فضلت الصمت
انت تابع لي ياتو مشروب ...
ولا بتتاعمل مع مشاريب اجنبيه
عندك علاقة بالبيسي او الكولا
ولا انت من جماعة الاسبرايت اياهم
ولا انتو جماعة شربنا .. وبتخططو لي شنو
مظاهرة ولا إضراب ولا عصيان مدني
علي فكرة نحن متابعنكم من زمان
وراصدين كل القعدات البتشربو فيها المشاريب اياها ..............
طاخ ضرب الشاب طربيزة الحديد التي امامه ورشقني
بالجملة الاتيه
شوف احسن ليك تعترف ...........
رشفت ريقي بصعوبة واصابني التنميل وانا في حالةمن الكحول ولاكحول مع ذهللة حادة
لمحة صورة كبيرة لمشروب شاب ( بعد عملية تجميل بالفتوشوب) يخاطب جمع من العبوات البلاستكية الفارغةوصورة اخري للمشروب الشاب (بالفتوشوب ايضا) منتفخ ودايت ولم اتمكن من حسم حالة الكحول في الصورةمكتوب علي الصورة مشروب البلد...... الما متلك ولد ...
بعد طاخ التزبيزة
هدأ الشاب قليلا
شوف نحن عارفين انو في مشروبات وطنية مخلصة
وفي مشروبات تانية عندها اجندة خفية وبتتعامل مع نكهات اجنبية ... وعايزة تتدمر سمعة البلد ..
اخرج صورة من الدرج بتعرف المشروب ده
(الصورة لمشروب وطني معروف)
يتبع
| |
|
|
|
|
|
|
| |
omar alhag
نادر النور آدم
nashaat elemam
انور التكينة
حبيب نورة
حافظ حسن ابراهيم
فيس بوك
تويتر
انستقرام
يوتيوب
بنتيريست