|
|
 أنا أخو البت اللكعت قرن الخمره النازه على وردان الصبوه الراكزه... مدد يا شيخنا.... مدد !!!
|
أنا أخو البت اللكعت قرن الخمره النازه على وردان الصبوه الراكزه
الجنيات الهازه..صدورن لازه ورقا النص زي خيت الشلا ...
قبل اسابيع زارنى صديقى ود بادى... فقلت له انسحتت منا السنون بغة كما يندلغ الماء من بين اصابع الكفين ,, ذللك انك..( اى ود بادى ) تهت.. كما نفعل نحن.. فى متاهة البحث عن الرزق و لم تكمل لناهذا العقد من الغنى والترف كما فعل سابقيك .. عكير الدامر والحاردلو الكبير .. شيوخ الوصف فى شعر البطانة ..
تأملوا معى هذا الغنى (rich :
أنا أخو البت
اللكعت قرن الخمره النازه
على وردان الصبوه الراكزه
الجنيات الهازه..
صدورن لازه ورقا النص زي خيت الشلا
بالحيل آ جني إي والله
***********
الجنيات الحزمو الجبه
وعرق الشتوي عليهم نايا و صبا
قول ما دله ..
رجالا حصدوا الحبه
عيشون هادو انكال واتعبا
ومنو كتير في الواطا انكبا
وباقي مصوبر واقف قبه
الحمد آلاف .. الشكر آلاف
الحمد آلاف الشكر آلاف
العيش الرقد أصناف أصناف
الولد الكان.. عزام .. حلاف...ضياف
الرزق الجانا مدلا.. الحلق الجاف اتبلا
بالحيل آ جني إيي والله
********
الوادي الجانا مترقن
مدد جناحو الطايل شرقا وغربا
القبلي بروقو على القلعات اضربن
الدكن البعدن قربن
فوق صنقور الحله الطالت كبن
قول للحله بيوتك خربن
قول ما دله.. الحلق الجاف اتبلا
بالحيل آ جني إيي والله
**********
مرحاتنا شرابهن يوت ماغبن
شبعانات في الشقل أب شوك ما شبن
الحومل ولدن وربن
حلماتن تقلن.. جرن.. فوق سيقانن كبن
اللبن العاتم في ضرعاتن جبن
المغصة إن كان ضرعاتن خربن
القرعة آ وليد .. السعن آ بنيه
القربة كمان... كبوها المية
المغصة إن كان ضرعاتن خربن
شوفو النعمة السالت فوق قيزان الرمله
ناس البندر لبن الشاي بالعمله
سمح الخمج الفوق أسيادو
سمح العز المن أجدادو
الجنيات المشو ما عادو
كان بالرد أكان اتنادو
غرب حامد وشرق بلة
كانوا بحلبو الضرع الدلا
كانوا بحضرو الخير القدحو معلا
الجنيات ما كفرت بنعمة الله
بالحيل آ جني إي والله
*****
والغيمة تهتف مطرا نقع
فوق نوار الطلح الفقع
ريحة البرد إن جاتك
عطرا فايت خمر الفوق أردافا مجدع
شفنا الوادي يقشقش في دمعات الليل
والتعل الشايل بدا يتفقع
تلب حامد فوق مخلوفة أب زور واتربع
طلق الرسن أب زمة وسوا خبيبا بدع
هود في رقاب الصي
لا قوه ثلاثة زبيدية
خالفين سيقانن فوق السنكيت ورقاب ألبل بيناتن مرخيه
محجوبات بالخرز الفصلو السوميت
كل واحد درقة وسيف وطبنجيه وباقي جرابن مليان دلميت
الجنيات اتقبلو وضاقو الحاره وضاقو المره
وكان حجازن صقر الجو
حامد كان عارفين ضاقوه رجال قبالكن
شوفو أرزاقكم أخير من ضو
حامد عوج الطندب آ وليدات
عوج الطندب نار القصب الهبلت ما بتعدلو
شوفو شلوخو تلاتة مطارق رقدن
وكل تلاتة يمين سياف اتقبلو
حبوب القارح ... ما دله
ولدا ما ختالن زلة
شن قولك فيهو عليك الله
بالحيل آ جني اي والله
***********
*******
وين مراتع الدرت الباسط دايما ببكي عليهن
وين بنوت الحلة البوكر عصرا بدري يسون في شاهيهن
بعد الليل ما يهود ونحن نهود.. عاد أماتن ينادن ليهن
نمشي على القيزان نتقادم.. أقيس الخطوة مع التاتاي ومشيهن
والله البعد الحاصل ما نساني
وحاتكن في قمراتنا بشوفو وشيهن
الا النضم أب غنه اللهج السكر وين بلقاهو
بنات الريل الدوب ليهن
الخوف يا ناس كان يبقى الشوق الحاصل بينا معشعش فيهن
مقنع سابل وين بلقاهو
طرفا ذابل وين بلقاهو
وعينا بتدنقر من واليهن
الوجنات الشعن بقن
ود العين النايم زرقن
مو زايغ رسيان وميقن
زولن كان خدران ومحقن
من الشوفه عروقو يطقن
كان الدنيا ب صح تتخلا
كان بركنا معاهن فوق رملاة الحله
الا كمان بنشوفا مذلة
الجنيات الغابت جابت
إنت الجيب ؟ بس قايلو قميص افرنجي ؟ وكرتونات كرملة ؟!
لا لا وحاتك حاشا وكلا
ديل يوم عادوا اتلافو الجاهل بحقوق الله
ديل كم لحقو البشهق ضايق وداوو العله
الولد الجايب حقايب سفرو تقال
.تقال من جنس كتاب ومجله
الحكمة النضم إياهو الكان.. الحكمة الولد اتوضا وصلى
عادة البلد الدخلت فيهم سكنت . سكنت ما ب تتخلا
نحن كمان طارين الحله ودرنا الطله
نشيلا معاهم فرح وميته
حلاة الموت كان في عبدله
http://www.youtube.com/watch?v=UR4s6DqoWLs
|
|
 
|
|
|
|
Awad Omer
فيس بوك
تويتر
انستقرام
يوتيوب
بنتيريست