|
|
 ياصاحبــــ ة
|
لها..
له..
غريب أن نخاف الإلفة..ولانستمتع إن بدأت تتزايد..
نخاف فقدان من نألفهم..
ماني متخوّف..سماحتو..
بس ماني مُتشهي..الجراح
أخبرتها..قبلاً ..أنها تستطيع أن تخفي كل المشاعر..إلا إحساسها به..
خلّي بالك..من مكانك..في حكايتو..
وخلّي بالك..من عيونك يفضحنِّك..
ومن ابتساماتك براك..وانتي ماشة بيحرجنّك
ولمّا في بالك يمر خاطر كلامو..
صوتك بيضحك..
ياخي.. كلِّك..
تفاصيلو البسيطة..إتملّكنّك..
إنتي من يومك قليبك قبال يجيو ساكناهو رعشة..روحو هشَّة
وماموزونة أصلك
وعارفة حِسّك..وكوم مشاعرك..علّلنِّك
مرَّات بقول معذورة برضك..
لمّا أشواقو بتجيكي
شايلة ريدك..في محلِّك
ولمّا يحلف بي صباحاتو بتريدك
إنو الاحاسيس الغِشنّو ياهِن أكيد نفس الغِشّنِّك
والجاهو منِّك...حاجات أكيد برضك بِجنِّك
ولمّا تعترفي وتقولي ..مابقدر أفارقك لو دقايق..
يقول..دقايقو..بيسبقنّك
بعد هذا...
معترفة ياصاحبة بتريدي..
ولا إحتمالات النهايات لخبطنّك؟
|
|
 
|
|
|
|
|
|
|
|
Re: ياصاحبــــ ة (Re: تماضر الخنساء حمزه)
|
تماضر
كل سنة و إنت طيبة و الأسرة
Quote: ولمّا في بالك يمر خاطر كلامو..
صوتك بيضحك..
ياخي.. كلِّك..
تفاصيلو البسيطة..إتملّكنّك.. |
تمام جدا
Quote: معترفة ياصاحبة بتريدي..
ولا إحتمالات النهايات لخبطنّك؟ |
متْل اتَّكنو لخبطنها النهايات قطِع شك .. بس حسب حيثيات القصيد .. ما بنحتاج إعترافاتا .. لأنو الصوت لما يضحك .. معناتو دة دليل مادي للريدة
مش؟
دمت
| |
|
|
|
|
|
|
|
|
|
Re: ياصاحبــــ ة (Re: ابو جهينة)
|
| Quote: كل سنة و إنت طيبة و الأسرة |
وانت وأسرتك طيبين يارب
| Quote: متْل اتَّكنو لخبطنها النهايات قطِع شك |
التفكير فيها بلخبط
ممكن نعيش اللحظات دون التفكير فيما يليها؟؟
مُش
كل الود
| |
|
|
|
|
|
|
|
|
|
Re: ياصاحبــــ ة (Re: تماضر الخنساء حمزه)
|
Quote: إنو الاحاسيس الغِشنّو ياهِن أكيد نفس الغِشّنِّك
والجاهو منِّك...حاجات أكيد برضك بِجنِّك
ولمّا تعترفي وتقولي ..مابقدر أفارقك لو دقايق..
يقول..دقايقو..بيسبقنّك |
يمكن !!
__
لي عودة إن سمحت لي .. أن أطيل إقامتي هنا.
| |
|
|
|
|
|
|
|
|
|
Re: ياصاحبــــ ة (Re: تماضر الخنساء حمزه)
|
دربكنك
بس لانك..
زول محنك..
جهجهنك ..
كيف تقول ماهن طرنك..
مانسنك..
العوينات اشترنك..
قسمنك حتة حتة ووزعنك..
ياحليلك ..
عذبنك ..
طمطم..خطير موش؟
باين حتيتي فيني..
| |
|
|
|
|
|
|
|
|
|
Re: ياصاحبــــ ة (Re: DKEEN)
|
ديكو كل سنة وانت طيب
Quote: طمطم..خطير موش؟
باين حتيتي فيني.. |
عشان كده بقيت سمح
| Quote: قسمنك حتة حتة ووزعنك.. |
وين؟
| |
|
|
|
|
|
|
|
|
|
Re: ياصاحبــــ ة (Re: تماضر الخنساء حمزه)
|
دكين الـ ........
قائلهم قال :
أخرجي يا عين يا عنية ..
يا كافرة يا نوبية ..
النبي قال ليك أخرجي ..
الرسول قال ليك أخرجي .
فاخرج ..
متل السبيبة من ود العين ..
أخرجوا إنت و نوبي و ..
.. إتوزعوا ياخ .
....
خنساء ..
البنية سمحة النضم ..
كمّلي الكلام .
| |
|
|
|
|
|
|
|
|
 Re: ياصاحبــــ ة (Re: تماضر الخنساء حمزه)
|
طُمطُم
سأكون هنا رُغما عن عارضي
لامن رفرف قليبكـ و نادي
و خلي الاحاسيس تتهادي
وصوتكـ من هناكـ اتمادي
عمدة ..
ما سمعت "ست اللهيج السُكري" 
دكين
يا صاحب .. احساسكـ يقودكـ .. لكن حذار ان يخونكـ ،،،
| |
|
|
|
|
|
|
|
|
|
Re: ياصاحبــــ ة (Re: تماضر الخنساء حمزه)
|
تعالي..
وبعزمك ياصاحبة تحكي
وأكلِّمك أنا بي صراح
فحكينا....
قلنا ليك الالفة..إنتي..أوعي تديها البراح..
وماتخلّي بالك من كلامو..عارفة ماليهو السماح
وعدنا إلى البدايات ..
ماني متخوّف..سماحتو..
بس ماني مُتشهي..الجراح
..
ثم إتفقنا..
وين حدِّك إنتي؟؟
ولمَّا أوَّل مرَّة..مِلتي..
ختينا المحاذير في الكلام..
ماسمعتي ياروحي الكلام
أبقي قدرو..إنتي ياصاحبة..الملام..
وكان لك منطق لايفهمه سواك
بس بالله يكفي
بحكي ليك عنُّو..وعني
وعن حكاياتي بتعرفي
بتعرفي ليه عِشت الجنون
بحكي ليك..
بالبي صوتو..بِشفي
وريني بس..
لو غلط في الريد بِكون
أو في شرعِك إنتي
في شرعي الهوى :
حرام عموم
إلا ليهو وبالخصوص..
ياصاحبة معفي
| |
|
|
|
|
|
|
|
|
|
Re: ياصاحبــــ ة (Re: تماضر الخنساء حمزه)
|
الصداقة تدوم..سمِّيه صاحب..
مابقدر أشوفو
زيُّو وزي بقية الناس
السميتهم من زمان أصحاب!
وكت ألقاهو أفرح بيهو
ووكت يروِّح هوّ منِّي بعيد..
مرَّة ...مرَّة.. أطراهو..كده زيو زي الناس؟
وكت ألقاهو ..بلقاني..
ووكت يمشي بضيع مني وبفتشني لامن تاني ألقاهو
أشوفني بطِل من جوّه عينيهو
بمشي معاهو..خطواتو..بعرف وين بكون دربي
لمَّا مشاعري تبراهو
وبعد صريح اعترافكــ؟
لو حاولتا أشرح ليك
مابتعرفي انتي الفيَّ
لمَّا الدنيا تغدر بيّ
بحِس عينيهو تنده ليَّ
تطيِّب خاطر الأيَّام
بشوف أيّامو جاية عليَّ
تمشي علي مهل نظراتو..مشاعري البيهو دايماً حيّة..
| |
|
|
|
|
|
|
|
|
|
Re: ياصاحبــــ ة (Re: تماضر الخنساء حمزه)
|
علِمتُ سرّك..فعرفتُ أين تكونين ..حين لا أجدك..
والآن عرفت لماذا تُورق أشجاركــ والمواسم حولك جفاف..
البعض ..كما الشمس ..شديد الوضوح لحد الإحراق ..
والبعض كثيف الغموض ..كما العتمة ..
ليس ممتعاً أن تحرق ..وإن كنت شمساً تهدي الضياء ..
ليس حميماً يا صاحبة..أن نقتربَ من الظلام ..والملامح أكثر جمالية إن أُضيئت .
أكان مامنك له..اشتهاء..
أخبرته..
أنا ماإشتهيتك شان تكون
المتعة غاياتي فى لقاك
ولا حلمت أكون معاك
ساعة.. وأتوسَّد ضياك
أو حتَّى شالتني الأماني
سحابة مسنودة بسماك
وماإرتجيتك
ولا إتوهمتَ وعدك
شان أسرج الحلم التوتر
وإنتظارى على القلق
تحقيقو بستعجل وفاك
أنا بس لقيتك إنت نبضات
الفؤاد
وزى تقول سمُّوك فى جوايَّ روح
والنطفة كانت هي الميعاد
صوت تراتيلك ..
شهيقي.. بعض تَنَفُّسي
وصوت سؤالك ..
البينا جد بتقدسي ؟؟
ماقلتا ليك ..
مخلوق معاي قبل الميلاد
أنا بس لقيت
إنِّي ..ماملكي ..وبراي
لقيت..
بعضي معطون بي هواك
وكلي..
مملوك ليك براك
وبس.
وبس؟
أحياناً تلتقى أحدهم ذات شوقٍ ..
فتبحث عمَّا يُعبِّر عن لحظتك هذه فلا تجد الكلمات ..
وتقصر الأحرف عن سماءِ فرحتك ..
وإن كان الصمت ..أحياناً..أبلغ !
بين عينيه يضيع الكلام..
ووقفت بين عينيك مسافة
مرَّات إتعبني الهيام
ومرَّات إودرني المشي
لانى قادر أوصلك
لانى بقدر أبتعد
مكتول قليبي ومنتشي
إلا بس غالبنى ريدك
شاعلنى حد الإبتسام
سالب فؤادى وكل شئ
أهذا فعل العيون؟
أخبرته قبلاً ..عادةً أخبر إحساسي..لصاحبه..
إنتا لو عارف عيونك... لمّا تنظرني و..
تقابل لحظة بس أطراف عيوني..
روحي ترحل ليك تهاجر وأبقى من غير روح ..بسافر
أبقى مستغرب مشيها..منِّي ماعارف أجيها ..
وتشعل النيران عَضَايا إنتا ياأسباب أذايا ...
إنتا لو عارف عيونك
ديمة تقدل في رحابي...
فيها منبع إشتياقي..
وفيها آهاتي وعذابي ..
مرّة بفرح بي حضوري
وفيها محتاج ..لي غيابي ..
وفيها بتكل كل همومي ..
إنتو ياإتنين صحابي
وياها أكبر إهتمامي..
وبين رموشا بقول حبابي..
ولمّا تَفْرِق.. خط رموشك ..
كل وريد جوّاي بدوبي..
ترقص النبضات تغنّي ..
..
من حنينا بشيل غُنايا ..
ومن غُنايا نسجتو توبي ..
ولّما تغمض هيَّ برضو
تاني ترحل منّي روحي
ماشة في سكة مسامي..
وتبدا تنتر لي جروحي..
ولمّا ترجع تاني تَنْظُر
هل تصدق؟؟..
ليّ..ترجع ..تاني روحي.
ياصاحبة..
أحياناً ..الوجع نفسه يخدِّر ..
لعمق مانحس به ..نفقد الإحساس !
لذا أخبرته..
تقرا فى خاطري السؤال
جوابو حيفاجئك جرح
تقدر تبدِّل لوعتو
ونهاية العشق السرح
لو بس لقيتك أوَّلو
كنا صادفنا الفرح
إنتَ الجمال بتكمِّلو
يابلبل الدوح الصدح
| |
|
|
|
|
|
|
|
|
|
Re: ياصاحبــــ ة (Re: تماضر الخنساء حمزه)
|
أحياناً يُغيِّب أحدهم ..أحدنا ..
فلا يعد يدرك بأي وجود هوَّ ..
ولا على أي أرضٍ يسير إحساسه ..
وإن أدرك أنَّ الآخر صار له السماء ..
أهوّ السماء؟
أذكر أخبرتني مرّة ..أنّه الشمس..لكِ..
فأعلمي ياصاحبة..
الشمس ..كم هى مبهرة ولكنها..حارقة ..
تعطي الضوء إن حافظنا على المساحات الطبيعية التى تفصلنا عنها..
حارقة إن حاولنا إمساكها وإمتلاكها ..
فهى كما الوطن ..للجميع ..
كما الحقيقة ساطعة ..
وإن غطتها الغيوم لحين ..
دائماً ماتُثبت لنا أنَّها تتوسَّدُ الوضوح ..
وتلدُ الفجر !
فقط فلنحافظ على المساحات التي تحدِّدها لنا..هل نستطيع؟
عنِّي فقط أُجيب..
لا.
| |
|
|
|
|
|
|
|
|
 Re: ياصاحبــــ ة (Re: د.محمد حسن)
|
بسم الله الرحمن الرحيم
تماضر
إزيك وكل سنة وكل أمنياتك في خانة الممكن محققة يارب !
وكانت نهاية .. لأجمل حكاية !
لأجمل رواية .. رواها السحر!
جلسنا وحكينا .. في ظل القمر!
وكانت حكاية في كف القدر!
كتبنا ورسمنا .. تفاؤل وأمل !
تسلمي تماضر
وصال عالم
| |
|
|
|
|
|
|
|
|
|
Re: ياصاحبــــ ة (Re: وصال عالم)
|
ياسلام يا الخنساء
الواحد بيفتخر بالكلام الجميل ده ولو في فكرة انتاج كتاب انا ممكن اساعد
ساهمت في طباعة الرواية(عطر نسائي(عماد براكه وكنت في القاهرة وقتها لكن مازلت احفظ صاحب المطبعه بالدقي يمكن ان نعمل شيئ يفيد نشر هذا الجمال(انت بس قول لي بسم الله وانا جاهز
مع مودتي بدون زهج
عليش
| |
|
|
|
|
|
|
|
|
|
Re: ياصاحبــــ ة (Re: wd al geran)
|
Quote: ماقلتا ليك ..
مخلوق معاي قبل الميلاد |
ودى الحقيقه ياتماضر .. زمن تانى وعالم جميل وحقيققى و فو ق للخيال !
أبشرى يا تماضر بالكلام السمح الجاييك مع المخيله السمحه دى , وبساتين الغنا الجواك !
وبشرانا بيك .
| |
|
|
|
|
|
|
|
|
|
Re: ياصاحبــــ ة (Re: wd al geran)
|
Quote: بس لكن مرِس مرِس كِر قي ويكا إننين دوقور بو إنجيتّل اني ..
عشان القوكانجي فِري مي نين كرم .. وكِدة |
مش بالله؟؟
شكرا على الطلة الحلوة
كل سنة وانت طيب ود الجيران
| |
|
|
|
|
|
|
|
|
|
Re: ياصاحبــــ ة (Re: تماضر الخنساء حمزه)
|
لا أعلم..لا أستطيع أن أقول غير أني تَلُفّني الدهشة ..
كلّما حاورتك..وكلّما لمست حكاياكِ..
ولكني أعلم صراعات الواقع..والمُحْتّمَل..
المنطق وماسمّاه البعض..جنوناً..
المنطق؟؟
ماذا إن أخبرتك أنّه يستطيع إلباس أي فكرة مجنونة قد تأتيك يوماً ثوب المنطق..
ويجعلك بسحرِ مالِك متملّك صاحبتها بعد أن صارت هي المنطق بعينه..وتُقيمي لها مراسيم التمكُّن فيك!
لايدهشني غير احتمالاته التي تهزم المنطق
فأجده_المنطق_ يلبس كل مايحتمله هوّ معزّزاً صدق احتمالاته دون حوجة للتجربة!
أوقفتني عبارة مالك متملّك
طبيعي إذاً إن أنشأ هوّ مامَلَك كما إشتهى..وليس بغريب إن سنَّ هوّ المنطق
ومكّن فيك ماشاء..لاتزيدين أنتِ عن صلصالٍ رقص على أصابعه ودعاه لتشكيله ..فإمتثل.
عذراً ياصاحبة إن أنا قسوتُ عليك..
جميلٌ أن أرقصتني بين أصابعِه..فليتك صادقة..وليتني صلصاله الذي ذكرتِ..
| |
|
|
|
|
|
|
|
|
|
Re: ياصاحبــــ ة (Re: تماضر الخنساء حمزه)
|
أعرفك أنا وأعرف إنبهارك بكل من حمل دواخلاً جميلة ونقية..
أعرف أوجه في أوّله..وتناقصه..بمقارنته مع غيره..وأخيراً يصبح ضمن -العادي- في أحداثك.
ياصاحبة..
أخشى أنّك أقرب إليّ منِّي..ولم تعلمي أنه يسبقك إليّ.
أخشى أنّني ماعدتُ أعلم الفرق بين العادي..وغيره إلا عند مقارنتهما بهِ..
أخشى أنّ كلّ ماحولي..ومابي صار تفاصيلاً _سهل_ وضعها جانباً إلى حين ..مع إكتمال حضوره.
أخشى أنّي ماعدت أدري غير أني له أشتاق في الغياب والحضور..
لاأخفيك..
أكبر خشيتي..
خوفي منِّي علينا.
| |
|
|
|
|
|
|
|
|
|
Re: ياصاحبــــ ة (Re: تماضر الخنساء حمزه)
|
الرائعة تماضر الخنساء
سلامات زمن مضى وزمن آت
ولك الأمنيات كلها
يا قليبك لو يعاين
جذوة الريد القديمة
كان يفارق دربً اليجيب الريح
**
ولو يا صاحبة شوقك
كتف الوجع المعاند
كان إعتراف النهايات أنفضح
احتراماتي
| |
|
|
|
|
|
|
|
|
|
Re: ياصاحبــــ ة (Re: عبد الله إبراهيم الطاهر)
|
لاأدعي شمولية معرفية ..
ولكن بقدر ما أتيح لي من فرص إطلاع علي أعمال شعرية..
لم أقف علي شاعر او شاعرة ..
فصلا بين الجسد الطبيعي والروح ..
ليدير الجسد المادي حوارا رائعا وشائقا وشفيفا مثل هذا
مع صاحبه الهلامي..
ذلك المفتون بفضاء حريته وقدراته الا محدوده
في الإنطلاق نحو براحات الوجود ..
فيعلق السؤال يابسا بين الشفتين ..
| Quote: أبقى مستغرب مشيها .. مني ما عارف أجيبها .. |
| |
|
|
|
|
|
|
|
|
|
Re: ياصاحبــــ ة (Re: منى على الحسن)
|
Quote: قولي ليها :
خلي بالك من قليبك..
اصلو آدم منو خوف !!! |
قلت ليها..
وقلت ليها..خلِّي بالك من مشاعرو بيسرقنّك
قلت ليكم بالي في حِسّو بيضيع..
الجايّ من أضلاع حنان بالريدة قبلاً شكلنّي
ومامُلام لو قلت بشتاق ليهو وإنّي
المشاعر الفيهو طبعاً ودَّرنّي
أدوني خاطر ريدي بس
ولو زدتو في شكواي..تجنِّي..
مني ..برحل ..ليو..لأنّي..
فيو بلاقي هواها نفسي
ولو تمانع..مني برحل..برضو..عنِّي..
آدم ..حالي مشتاق ليك كأنّي
فُت منّك وإنت منّك..فيني..في جوايّ..سجنّي..
وبعضي نافر من شعوري..وبعضي بزعل برضو منّي
مرَّة بتحاشاهو عِنية..
عارفو شوقك هوَّ الغلبني
| |
|
|
|
|
|
|
|
|
 Re: ياصاحبــــ ة (Re: محمد البشرى الخضر)
|
إنعام
تفترض إني جيت ... هل تحولتِ الي عابدة يا أختاه و ماني عارف
البوست اسمه يا صاحبــــــ و التاء المربوطة دي جات غلط في العنوان و في رواية اخري دفاعا عنها
طُمطُم
دافننو سوا نحن و لسه كراعو بره
ود البشري
ما تفرح شديد عشان تغش الجماعة و يفتو ورقهم هنا يا حريف
قال اسبوع البورد قال
__
نحن قوم لا نقول الرووووووووب
| |
|
|
|
|
|
|
|
|
|
Re: ياصاحبــــ ة (Re: فيصل نوبي)
|
الأخت النضرة / تماضر
سلام غلى روحك الطيبة
غنى المرحوم طلال مداح قائلاً : يا صاحبي مافي الهوى راخة!! أحسب إنه صادق في هذا التعبير
| |
|
|
|
|
|
|
|
|
 Re: ياصاحبــــ ة (Re: فيصل نوبي)
|
Quote: ود البشري
ما تفرح شديد عشان تغش الجماعة و يفتو ورقهم هنا يا حريف |
يا بوي لينا بالظاهر
البوســ(ط) ستو قالت ما حقك
تاني شنو
والله افرح فرح
| |
|
|
|
|
|
|
|
|
|
Re: ياصاحبــــ ة (Re: تماضر الخنساء حمزه)
|
تماضر ... انا من الناس المرابطين خارج البوست لحفظ الامن والنظام خوفا على زوارك من اى هجمات ارهابيه من ارهابى المنبر وهم كثر فى هذا المنبر... جانى زميل غيرنى وقلت اجى اقول ليكم مع السلامة قبل ما امشى... قولى ( نورا سبدو)
| |
|
|
|
|
|
|
| |
ابو جهينة
فيصل نوبي
بله محمد الفاضل
Emad Abdulla
Alsa7afa_30
هاشم أحمد خلف الله
د.محمد حسن
وصال عالم
Mohamed Ahmaed Olyesh
wd al geran
مامون أحمد إبراهيم
abubakr
انعام حيمورة
عبد الله إبراهيم الطاهر
محمد على طه الملك
محمد البشرى الخضر
خالد حاكم
فيس بوك
تويتر
انستقرام
يوتيوب
بنتيريست