|
|
 حليلك ياالقليب النيّ..
|
بفتِّش في جموع الناس..بفتِّش عن شبيهاً ليّ
خيال مليان جراح..مليان..منو البتزيد جراحو عليّ
حليلك قلبي ياحزنان حليلك ياالقليب النيّ
هوَّ الباع ..هوَّ الخان وموَّت للغرام الحيّ
سيبو إفتِّش تاني عن إنسان مابلقى ليك ال ذيّ
قرقرابك ضحكتي الصافية وكت شوفتك مواسم ريّ
أسمِّي اللحظة بي جيتك..وأعيِّد يوم بتضحك ليّ
وأحارب دونك الأكوان..
ودونك الأعراف..
ودونهم إنتا تغدر بيّ!
صحيح كان الغرام ..عِلَّة..وصحيح ..أخلفتا فيني الكيّ
خلاس حنيت..
وجيت ترجع..ومن تاني تلعب بيّ؟؟
أبعد عيونك ديل
قصاد عيونك ديل قراري مابي إيديّ
شيل عيونك ديل
مابقدر أقبِّل صاد
عاوز أقبِّل صاد
تخدر كمان كِرعيّ
لو بتطاوعيهو ياعينيَّ يحرم عليك الضيّ
ولو حنَّ القليب تاني..السويتو ببقى شويّ.
|
|
 
|
|
|
|
|
|
|
|
Re: حليلك ياالقليب النيّ.. (Re: تماضر الخنساء حمزه)
|
شبيهك في البنات معدوم شبيهك مافي ليهو خوي
ولو قلبك صبح حزنان بتجري الدمعة في عيني
ولو طال الغياب عنك بشوفو ناوي يغدر بي
هويتك انتي يا غالية وربي في سماهو عالم بي
محال عن ريدك اتخلي ولو جارت ظروفي علي
بضمك في حنايا القلب مهماالدنيا ضاقت بي
واعلن حبي دون كتمان خلاس السمحة فازت بي
ونوقد للفرح شمعات تضؤي للقليب الني
| |
|
|
|
|
|
|
|
|
|
Re: حليلك ياالقليب النيّ.. (Re: تماضر الخنساء حمزه)
|
هاك دي مؤازرة من قلبي النجيض لقلبك الني 
وقفت بشاطيء الاحلام ارقب وجه من اعشق..
جـمـيــل فــاتـــن ســحـــره...
وامواج الحياة تصارع الانواء فـي بحـره...
فـتـطـفـو تـــــارة فــرحـــة..
واخــــرى بـسـمــة تــغــرق..
فابكيها كمـا الاطفـال ثـم اظـل اترقـب..
واسقط صخرة الاحلام في امـواج قسماتـه..
واتلو كل صلواتي علـى شطـان محرابـه..
ايــا بـحــرا مـتــى تـسـكـن؟؟..
ويــا نـجـمـا مـتــى تـسـطـع؟؟..
ويــا شـمـسـا مـتــى تـشــرق؟؟..
حـبـيـبـي حــبـــه يـســكــر..
وفي عينيـه سحـر فـي الهـوى يؤسـر..
وبـيـن شفـاهـه الاكــوان تتـعـثـر..
حـبـيـبـي الــكــل يـعـشـقــه..
فسـبـحـان الـــذي صــــور....
| |
|
|
|
|
|
|
|
|
|
Re: حليلك ياالقليب النيّ.. (Re: تماضر الخنساء حمزه)
|
عزمْ رسم الكلام بالدم
قلبيك نى ...
مفرهد بالوحيح دفقات
مرق فوح الفرح منك
زمانك رجــعْ الضحكات
وفارقتك دموع الهم
حليلك يا وحيحى البى
ملانى أســـف
إذا ما مات
إذا ما فات
على الدفق البجيك نضم
تعالى وخدرى الساحات
عشان عارف قليبك حى
| |
|
|
|
|
|
|
|
|
|
Re: حليلك ياالقليب النيّ.. (Re: عبدالله داش)
|
أخاف إن قلتا شوقك حرفتي
أدمن رؤاكا وأرتحل
وتصبح عيونك وجهتي
ويسكن الإحساس هطول
تِخْضَرَّ يمكن ...وحشتي !
أخاف ..
إرحل حنينك ويختفي
السميتو برضك.. مهنتي
وألقانى مرهونة ذبول
وماشة تنقص فرحتي
تقدر تبدِّل رهبتي ..؟؟
وتوهب الإحساس خلود
الكان بشتِّت فُرقتي
عارفنى بفتقدك كتير
تبراكا ديمة محنتي
وإنتا بينات المسام
وكتين تصادفك دهشتي
وتديها من لقياك فرح
ماإنتا أصلاً روعتي
أنا بيكا بتحدَّى الأماكن
كان تشابه حتتي..
| |
|
|
|
|
|
|
|
|
|
Re: حليلك ياالقليب النيّ.. (Re: تماضر الخنساء حمزه)
|
خطيت خٌطــاى
منســيه عمداً
والخطى الجالت وراى
إتبخرت فكرة تمازج
فرحى بيك ...
زفة غناوي وأمنيات
وقصدتْ ألقاك إنتباه
جوا العصب
وندهتْ ألقاك أو أجيك
فى منعطف متوسدك يا منتهاى
يا آية السطر البدائى ومختلف
مختلف جداً
كما الزخم البـ .. جــيب العافيه للحمى
رقيص نخل العتامير
فى هبوب الريح
وملحمة الزعف
| |
|
|
|
|
|
|
|
|
|
Re: حليلك ياالقليب النيّ.. (Re: ماجدة عوض خوجلى)
|
Quote: أبعد عيونك ديل
قصاد عيونك ديل قراري مابي إيديّ |
القرار بيد القلب ..
و القلب لا يمكن ردعه ..
و القلب يلوم العينين ..
و لو إستطعنا أن نلجم القلب و العينين ... فإن النفس أمارة بالمتاوقة
****
خلاصة القول يا قريبتنا ... كلام سمح بالحيل
| |
|
|
|
|
|
|
|
|
|
Re: حليلك ياالقليب النيّ.. (Re: Randa Hatim)
|
رندا حاتم ياشبه الرز بى لبن يانقية القلب
ياخ حمد لله على سلامتك انتى دى ياعسسسسسسسل
| Quote: ندوية يوم بي "وشيك" السمح دا يا قول سجيمان بتكتلي ليكي زول.. |
سجمى يابتى وهو نان وشى كان بكتل انا دايرة بيهو شنو ؟!!
مااسمح من وشك والكلام على الروح ياحبيبة وش شنو وبطيخ شنو مافى اغلى من روح الانسان ونقاوة قلبو الوش ده يوم ود اللحد عشوة دود وخلاص وتبقى صالح الاعمال وحب خلق الله بنية طيبة وصافية ..
| |
|
|
|
|
|
|
|
|
|
Re: حليلك ياالقليب النيّ.. (Re: Randa Hatim)
|
رندا قلنا البكا بحرروهو اسيادو ماصدقونا
ندوية دي وشيها وكلاما كلو سمح في سمح
Quote: بشيل الشوق دليل سفرى....
وبهاجر ليكا يا عمرى.....
بهاجر لى اراضيكا
وبفرح يوم الاقيكا ....
وبحلم بى صباح بكره
تجيب نسامو طاريكا....
احس القمرى فوق غصنو
يقوقى دوام يحن ليكا....
نسايم الليل وقت تفرح
تغازل فى لياليكا....
ودموع ريدى تصبح نيل
يخدر كل بواديكا....
واهاجر بى مراكب الشوق
على احضان مراسيكا....
واقول اقدارى صافتنى
وزمانى الليله جاد بيكا....
وكان غدر الزمان طالنى
وبقت بعيده على اراضيكا.....
... |
دي الحالة ممغسننا يارندا
Quote: بشيلك فى القليب جواى
وفى الاحلام بلاقيكا |
احساسك جميل رندا
| |
|
|
|
|
|
|
|
|
|
Re: حليلك ياالقليب النيّ.. (Re: Abdel Aati)
|
والله مره ياتماضر عملتي ليكي بوست .. لا حول الله .. ابدعتي فيهو عديل كدا .. بس المشكله ما متذكرة عنوانه كان شنو .. كنتي بتكتبي في كلام سمح بالحيل والناس يدخلو يكتبو وانتي تردي طوالي وكل زول تديهو من قافيته ذاتها.. انا اتحيرت .. قلت البنية دي شيطان شعرها من نوع "كيمو الجاهز" بس تقول ليهو "عوووك" يقعد يشوت ليها في الاشعار ...
خمسة وخميسة ...
| |
|
|
|
|
|
|
|
|
|
Re: حليلك ياالقليب النيّ.. (Re: تماضر الخنساء حمزه)
|
جيت بفتش لهوا نضيف ..
ريحة البورد تزكم .. و زفارة الكلام .
باللهي إنقِنَاليه !!
( هي بُرُو .. أنداندي قِجِركُونَا ؟؟ ) .
ثم , من أهازيج " القليب النيّ " الزاجرة , قالوا :
( كفي يا قلبي انسى الفات
وعش من تاني وحداني
ولو حنيت لعهد الشوق
اجيب من وين عمر تاني
كفى يا قلبي شفت الويل
وليل السهد بكاني
بعدما تبت من النار
حرام تتجدد احزاني ) ..
قاتلنا الله في حال شيزوفرانيانا .
| |
|
|
|
|
|
|
|
|
|
Re: حليلك ياالقليب النيّ.. (Re: Emad Abdulla)
|
عماد عبد الله تود
ان هال مندى ياخى ؟!!
كمبو شديد كده بالله ؟!!
اى دسن مشتقرى والله هى (ايماد) امبس
| Quote: إإخخخخخيييييييييي يا نادية ياخي . |
منلى هى تود ؟!!
او ليس ذلك طبيعي مع سيولة الدموع يارجل ؟!! 
| |
|
|
|
|
|
|
|
|
|
Re: حليلك ياالقليب النيّ.. (Re: تماضر الخنساء حمزه)
|
يا قلبى دايما تبكى
دايما عليك تتالم
انت السعيت لنارك
ليه تشكى و تظلم
بكرة الندم ما بيفيدك
خليك اسير الامك
و انا فى العذاب خلينى
العاشو بحنينك
فى لحظة فاتو منك
و دموعك الحزانة
تتهاوى تملا دنك
حبك زمانو روح
و ايامو ودعنك
الفاتك امشى فوتو
و اطويهو من سنينى
يا قلبى انت بادى
و البادى قالو اظلم
غيرك بيعيش نعيمو
و لهيبك انت مضرم
الجنة ليك و ليهو
ليه ترضى بجهنم
لو هان عليك شبابك
ايه زنبى تبتلينى
يا قلبى يا حبيبى
اصبر على التاسى
خلينى انسى انك
اسباب شقاى و بؤسى
ارحمنى من عذابى
خلينى اطرا نفسى
و احس بانى عايش
ليومى ما لامسى
قاصدنى ما مخلينى
راخصنى ما مغلينى
يا قلبى يا معذبنى
فى حبو ليه ترمينى...
| |
|
|
|
|
|
|
|
|
|
Re: حليلك ياالقليب النيّ.. (Re: محمد عثمان)
|
شبيهك في البنات معدوم شبيهك مافي ليهو خوي
شبيهك يا شجرة الدر مالو مثيل، حليلك ياالصباح الضي
شعرك كما الشلال بيروي قلوبنا، حليلك يا قصيدي الني!
العزيزة تماضر قلت اجاري حبيبنا الشاعر المطبوع هاشم ولأول مرة أكتب بالدارجة التي اموت عشان اجربها. لقدام يا بنية!
| |
|
|
|
|
|
|
|
|
|
Re: حليلك ياالقليب النيّ.. (Re: عبدالأله زمراوي)
|
اقايتو ياطمطم
بوستينك ده بقى زى بيت البكاء لكن اظن الفراش ماحايترفع ابدا وتراهو كل يوم شايلين صنية الفطور وجايين !! 
لكن الصراحة اتارى اغانى المشوكشين دى ذات اثر بالغ يشبه (الطعنة النجلاء) فى نص القلب يابت امى
| |
|
|
|
|
|
|
|
|
|
Re: حليلك ياالقليب النيّ.. (Re: تماضر الخنساء حمزه)
|
خسارة يا قلبى الحنين
هجرونا احباب السنين
من غير سبب ظلموا الغراام
الكان حلو و الكاان امين
يقولوا عننا ظالمين
يا حليلنا نحن المخصلين
خسار يا لحنى الفريد
جرحى المغور و كلو ريد
وا حرى من هجر البريدو
و لهفة الزول البريد
ابكيك وين القى الدموع..؟؟
يا ريتا من بعدك تفيد
يا قلبى انت الفى هواك
دايما وفى و دايما امين
اشقاك احب الناس اليك
رغم الحنين الطال سنين
يا قلبى سامح دى المحبة
و فى الدنيا مافى محبتين
و القالوا ليك عن الفراق
انشاء الله يوم ما تشوفوا عين
| |
|
|
|
|
|
|
|
|
|
Re: حليلك ياالقليب النيّ.. (Re: تماضر الخنساء حمزه)
|
كدا اسأل عيونك يا أجمل حبيب
واسأل لي خدودك براها بتجيب
في عيونك حياتي في حسنك بغيب
قلبي الحباك .. اسألو
ما حب سواك .. أسألو
ما عاش لولاك .. اسألو
طول عمرو فداك .. اسألو
تنبيك عن سؤالك .. اشواقي
أسألو...!!!
| |
|
|
|
|
|
|
|
|
|
Re: حليلك ياالقليب النيّ.. (Re: تماضر الخنساء حمزه)
|
تماضر يا خنساء يا حبيبة..
قلنا ندحرج التماسي لأحلى ناس وأحلى كلام..
ياخ بوستاتك دي (شترة) خالص مع الشايفاهو برًة ده..
وبعد ما النفس تتملي يأس ونقنع بالفرجة.. تجيبينا تاااني نقرأ كلام حلو. ونلاقي إنه من العيب نقعد نتفرج وما نقول:
شكرا..
ودي
| |
|
|
|
|
|
|
| |
هاشم أحمد خلف الله
الطاهر ساتي
Alsa7afa_30
عبد المنعم سليمان
ماجدة عوض خوجلى
ابو جهينة
مجدي عبدالرحيم فضل
salma subhi
Muna Khugali
رأفت ميلاد
bushra suleiman
Abdel Aati
Emad Abdulla
Raja
فيس بوك
تويتر
انستقرام
يوتيوب
بنتيريست