|
|
 أدسدس فيك وأشاشيلك
|
أنا المخلوقة يوم ريدتك
وأنا السمُّوني بى عشقك
وأنا الشلتك معاي فــ غناي
كم رتبتا قافية ريد
ووصيت النغم إبراك
حنين شحتف حروف معناي
بغتغت.. فيني بالغيمة
وأضاري البيَّ من شوقك
تباغت المطرة أشواقي
وإفضح كل حنينى الناي
أدسدس فيك وأشاشيلك
وعن أحلامي بحكيلك
وإنتا تجيني من جوَّاي
وألقى السكة عشمانة
وقلوب بي الريدة مليانة
ومكانك ..بالعِشِق هدَّاي
كتير البيكا متوضِّي
وراجي أذانو فى عيونك
وأنا الصلَّت معايا دماي
وأديت الفروض قبلاً
عشان أترجَّى جناتك
وخوفاً من فراقاً جاي
وأفتش فيك وأناديلك
وأردِّد فى خشوع دعوات
إكون ريدك نصيبي براي
وتطلع إنتا فى الأنفاس
وتدخل شهقة مابتنقاس
ولابتفوت ..وتبقى معاي
وتفرهد تاني فى الشريان
تشلهت بالحنين نفساً
إسابق فى دماي جرَّاي
وتبقى الراحة فى قربك
مراد حققتو بى جيتك
وصدقت أسي فيهو رؤاي
|
|
 
|
|
|
|
فيس بوك
تويتر
انستقرام
يوتيوب
بنتيريست