|
|
 وبتذكرك
|
وبتذكرك
انا زول مكرّب بي هموم هذا الفريق
فارد رويحتي علي الخلق وكت الزهج يملاها ضيق
شايل كليمتي كما النفس ال منّو مابيكمل شهيق
ومخلايتي جد عبّت قصيد
كلما تمد حلقك غنا جوّاها مابتصل الغريق
وسعيتلي شاشاية فرح
ضحّكت هذا الغريب
بالصدفة ساي جنب ابتسامي ال مَرَّ جا
فمابالك
اذا مرّ
قاصدني الصديق
وانا صاحب الصاحب صديق
تاكل حمامتي عليهو سر
وناسج خيوت العنكبوت
لو حَت اموت
مابنكشف منّك غُتا
في صدري بانيلو البيوت
فارقد قفا
واتكل همومك وماتخاف
البينا ماواهن الخيوت
البينا امتن من متين
البينا لايمكن يفوت
دون مايغشاهو الفرح
أو حتى بالساهل يموت.
__________________
وبتذكرك
اذا طلّ الشهيق بسوق وِرِد واستغفرك
وادخل مسامك بارتياح
تفرد الحنية في ليلك جناح
شهقة بتسد البراح
وأقلع زفيرك في الصباح
تصبح محلّق ومابراك
زي نحن طايرين دون حراك
انا بعبر حواسك بامتلاك
شايلانا جنحات الملاك
المابتشيلو معاي..سواك
نعبر حدود الغيم بخور..حنّة..و..زغاريد وانعتاق
وقدر ماادخل جواك يبقى ماليك اشتياق
وقدر مانعبر سما ونجمة وسحابة واشتهاك
فوقنا يتنزّل مطر في مواسم اكتفاك برضو ماحنقول كفاك.
بدخل مساماتك مسا وفستان مطرّز أكسجين
ورئتيك تفرش ليّ رواكيب الحنين
ال شدّت ملايات من دميك
والعلّقت في الحيط وشيك
وقشّت الروح بي مشيك
والكوّع رقد جوّاك مين
طقطق ضلوعي بلاااااااااا حنين
حيندهك جوّاي انين
يتأوّهك برضك شهيق
تدخل رئايَّ كما البريق
بتضوّي ياخ جوّاي حريق
كُريات دِمَاي تتلوّنك لون الرحيق
انزف عسل واشهق سهاد
وطعمي ال بَرَاي وكتين تكون قاعد بَرَّاي زي الرماد ويملاني ضيق
وابقى كايسالك براح حِتّة في هذا الزمان
ابقى كايسالك مكان لو حَتّى في صورة صديق..
والحق يقال أنا جد معاك
وكيفن تصادق الاشتهاك
وتبدّل القلب الهواك
لكن بحاول أعيش بلاك..أو أكتم شهيقي الاكتوابك
نار بتحرق في ...حشا....ك
ما العقبى ليّ
وآخر نفس خاش في جواك
كان أنا الأصبحت بفعلك أناك!
|
|
 
|
|
|
|
|
|
|
|
Re: وبتذكرك (Re: تماضر الخنساء حمزه)
|
Quote: ابقى كايسالك مكان لو حَتّى في صورة صديق..
والحق يقال أنا جد معاك
وكيفن تصادق الاشتهاك
وتبدّل القلب الهواك
لكن بحاول أعيش بلاك..
أو أكتم شهيقي الاكتوابك
نار بتحرق في ...حشا....ك
ما العقبى ليّ
وآخر نفس خاش في جواك
كان أنا الأصبحت بفعلك أناك! |
يا سلام يا خنساء
وينك ياخ ...
ماشفتى البقى على الشعر فى غيبتك القصيرة دى ...
ما تخلينا ياخ
مش نحن امانه فى ذمتك انت وفضيلى جماع وبشرى
ومن تبقى من الابداع ؟؟؟؟؟؟؟
ــــــــــــــ
ما نسيناك ذاتو لما نتذكرك ...
| |
|
|
|
|
|
|
|
|
|
Re: وبتذكرك (Re: دينا خالد)
|
تماضر
سلام وتحية
ونحن على ذكراك لا زلنا وعلى متن حروفك
طالت غيبتك لعل الأسباب خير
وقدر ماادخل جواك يبقى ماليك اشتياق
وقدر مانعبر سما ونجمة وسحابة واشتهاك
فوقنا يتنزّل مطر في مواسم اكتفاك برضو ماحنقول كفاك.
بدخل مساماتك مسا وفستان مطرّز أكسجين
| |
|
|
|
|
|
|
|
|
 Re: وبتذكرك (Re: دينا خالد)
|
يادينا الواحد بقى يكتب بوست يرجع بعد شوية يلقاو ايييك أو مايلقاو
يسعد مساك وصادقي،صادقي أخير من العيشة بلاو
انبسطت انك مانسيتيني حسيت بعظمة وشان كبير:)
| |
|
|
|
|
|
|
|
|
|
Re: وبتذكرك (Re: baha eassa)
|
سلامات بهاء ويسعد صباحك شكرا على الطلة:)
حنكون في القاهرة الشهر الجاي كنترول وكدا
البروتوكول خلص الحمدلله
تشكرات
| |
|
|
|
|
|
|
| |
دينا خالد
ابو جهينة
علي محمود علي
baha eassa
عاطف عمر
Adil Osman
فيس بوك
تويتر
انستقرام
يوتيوب
بنتيريست