|
|
 سيناريوهات : مشروع الختة الكبرى
|
صحيفة الرأى العام
عدد الجمعة الموافق 7 نوفمبر 2008م
أصل الحكاية :
أصل الحكاية يعود إلى لقاء أجراه أحد الصحفيين الشباب مع مسئول (مشروع محاربة الفقر) ونقتطف لكم بعضاً من الأسئلة والردود التى جاءت فى ذلك اللقاء :
- سعادتك على الرغم من أن (مشروع محاربة الفقر) ليهو سنين طويلة إلا إنو المواطن ما حاسى بأى حاجة وكل يوم زايد فقر وحالتو بقت صعبة
- والله أنحنا ما خلينا حاجة ما حاربنا بيها (الفقر) ده … عملنا كمية من (الصناديق) عشان نحارب بيها الفقر ده عندك صندوق (دعم التكافل) وصندوق (دعم الطلاب) وصندوق (دعم الإسكان) وصندوق (دعم الدواء) وصندوق (دعم الغذاء) وصندوق (دعم الكساء) وما وقفنا على كده .. كل واحد من صناديق الدعم دى عملنا ليهو (صندوق دعم) عشان يدعمو … لكن فى الأخير إتضح لينا إنو مافى فايدة؟؟؟
- الصحفى مندهشاً كيفن سعادتك؟
- كيف كيفن؟؟ إنتو قايلين (الفقر) ده حاجة ساهلة ؟؟ سيدنا على (كرم الله وجهه) قال : (لو كان الفقر رجلاً لقتلته) هسع لو ما الفقر ده (حاجة صعبة) كان قال (لخنقتو) أو لضربتو مش كان قال( لقتلته) !! - ثم مواصلاً – الفقر ده ما حاجة هينه وميتين ألف وتلتمية ألف جنيه للمواطن الواحد ما بتحارب ليها فقر حتى لو مليون !!
- يعنى على كدة نقدر نقول إنكم رفعتو إيدكم من مسألة محاربة الفقر دى وما قدرتو عليهو؟؟
- فى جدية نرفع إيدنا ده شنو؟؟ وما قدرنا على شنو؟؟ والله نحنا حاجة بتغلبنا مافى … والله أنحنا المواطن ده عندنا ليهو مشروع مش يشيلو من حتة الفقر دى كمان يخليهو (منغنغ) !
- فى إستغراب (منغنغ) حتة واحدة !!
- أيوه (منغنغ) آخر (نغنغة) !! كمان نحنا بنكضب !!!
- لا حاشاكم .. لكن (المواطن) من (فقير) ما عندو (حق الأكل) لى (منغنغ) دى ما كتيرة شوية ؟؟
- أكتب الكلام ده وأنشرو وأنا مسئول عنو
- وإن شاء الله طيب نشوف (النغنغة) دى متين؟؟
- إن شاء الله قريب والعالم كلو ح يسمع ويشوف مشروعنا ده !!!
ردود الأفعال :
وبالطبع قام الصحفى الشاب بكتابة ونشر(الكلام المسئول منو) المسؤول .. وفى اليوم التالى لنشر تصريح المسؤول أصبح (ما أفاد به) هو حديث الشارع والمكتب والبيت بل حديث المواطنين جميعهم أينما كانو داخل وخارج البلاد ، كيف لا ومسؤول كبير يصرح على صفحات الصحف بأن جميع المواطنين سوف يبارحون (محطة الفقر) المدقع ويلتحقون (بقطار الثراء العريض) والنغنغة !! فهذ (عم صابر النقاش) بعد أن عاد إلى منزله العصرية وهو يحمل كعادتة كيس الرغيف فى يد والجريده فى اليد الأخرى منفرج الأسارير وهو يخاطب زوجته :
- خلاص فرجت يا التومة ؟
- شنو ؟؟ لقيت ليك عمارة تضربا جير؟؟
- عمارة شنو يا ولية؟؟ خلاص ح نبقى مليارديرات ومنغنغين آخر (نغنغة) !
- (مردريرات) شنو يا حاج؟؟ إنت عدم الشغل و(الفلس) ده خلاك تهضرب ؟
وبعد أن قعد (عم صابر) فى عنقريب الحبل (المهتوك) وفتح الجريده وقام بقراءة التصريح الذى أدلى به مسؤول محاربة الفقر إلتفتت إليه (التومة) التى كانت تتابعه فى إنصات تام قائلة :
- عليك الله إنت تصدق كلام الناس ديل ؟؟ بس معقول هم يزيدو فى الحاجات بى جاى ويجو يعملوكم (مردريرات) بى جاى ؟؟
- لما لم يجد عم صابر رداً لكلام (التومة) خاطبها آمراً:
- كدى قومى قطعى لينا (السلطة) دى خلينا نتغدى بيها الجوع قرضنا !!
واحد من الجماعة :
- أنا من زمان مش قلت ليكم أصبروا وما تستعجلو الناس ديل خاتين ليكم مفاجأة ؟ تقوموا تستعجلوا ساكت وتشبكوهم .. قروش البترول راحت وين ؟؟ .. وقروش الدهب مشت وين؟؟ وقروش الما بعرف شنو وين؟؟هسع عرفتوها وين؟؟
- لكن الكلام ده ما كتير .. كل مواطن يدوهو (عشرة مليار)جنيه؟؟
- طبعاً لازم تشككوا فى الموضوع ما إنتو بس قاعدين للتشكيك ..إنتو أصلو ياهو حالكم لا بتستحملو (النقمة) لا بتستحملو (النعمة) .. يزيدوا ليكم الأسعار وووب يعملوكم (مليونيرات) وووبين
- نحنا ما قلنا حاجة لكن بس ما مصدقين !!
- طبعاً تصدقو كيف ؟؟ إنتو بس خليكم فى طابوركم الخامس ده .. والله إنتو ما تستاهلو يدوكم عشرة جنيه !!
مساطيل :
- هسع العشرة مليار ديل ح تعمل بيهم شنو يافرده
- تعرف أزرع ليكا مزرعة كبيييييره وأعمل ليك فيها (فرن) يكون فاتح فى (الأوضه) البقعد فيها وأعمل ليك فى الأوضة (مروحة شفط) وأجيب ليكا عمال اليوم كلو يشيلو من المزرعة ويدخلو جوه الفرن وأنا أشيل فى نفسى!!
- والله أنا ما عاوز أطير ليك (السجارة) دى من راسك لكن أنا بفتكر لمن نستلم (العشرة مليار) دى ح يقولو لينا أدفعوعليهم دمغة عشرة مليار وخمسمية !!!
خلف الكواليس :
لم يكن مسؤول (مشروع محاربة الفقر) كاذباً حينما أفاد فى تصريحه ذاك بأنهم أخيراً توصلوا ليس لمحاربة الفقر فحسب بل إلى أن يكون المواطن (مليارديرا)ً أسوة ببقية إخوانه (المليارديرات) أصحاب الفلل والعمارات الذين لوقت قريب كانوا (على الحديدة) .. والفكرة بسيطة جداً فقد قام المسؤلون فى مشروع محاربة الفقر بتجريب كافة أنواع الصناديق إلا صندوق واحد وهو ( الخته) أو الصرفة فلماذا لا يحاولون تجريبه ..
إجتماع لجنة مشروع الختة القومية الكبرى :
إجتمع المسؤولون فى (مشروع محاربة الفقر) لمناقشة كيفية تنفيذ المشروع الجديد الذى تمت تسميته بمشروع الختة الكبرى :
مسؤول 1 : شوفوا يا جماعة أنحنا طبعاً قاعدين نسبق العالم أجمع فى حكاية المشاريع دى .. والمشروع ده هسع نحنا أول ناس فى العالم كلو نعملوا وننفذوا والعالم كلو كالعادة ح يقعد (يتفرج علينا) !!
مسؤول 2 : يا جماعة كلام أخونا المسؤول 1 ده كلام كويس والمشروع ده فكرتو غير مسبوقة لكن فى حاجات لو ما خلينا ليها بالنا ح يطرشق ذى باقى مشاريعنا الطرشقت كلها دى
- المجتمعون يقاطعونه : حاجات ذى شنو يعنى؟؟
- مسؤول 2 مواصلاً : أنحنا حقو نكون صريحين مع بعض .. نحنا مشاريعنا كلها طرشقت لأنو إعتمدنا فى إدارتها على ناس عندهم (ولاء) وما عندهم كفاءة أو خبرة عشان كدة لو مشروعكم ده عاوزنو ينجح شوفو ليكم زول يكون عندو خبرة فى مسألة) الختات) والصناديق دى
- المجتمعون يقاطعونه : وده يجيبوهو من وين ؟؟؟
- مسؤول 2 : شوفو والله نحنا عندنا جارتنا إسمها (عزيزة ختة) دى بتاعت صناديق من الستينات مما كانت موظفة فى (البوسته) –ثم مواصلا- دى شدت ما شديدة ممكن تعمل ليها عشرين صندوق فى وكت واحد ..
- مسؤول 3 : يعنى (عزيزة ختة) دى بتقدر تشرف لينا على المشروع ده؟؟
- مسؤول 2 : تشرف دى شنو؟؟ بقول ليكم ده (التخصص (بتاعا .. يعنى تكون عملت ليها لى هسع مليون صندوق !! يا أخوانا دى إسمها (عزيزة ختة) !!
- مسؤول 1 : خلاص خليها تجينا ونعمل ليها (إنترفيو) يعنى معاينه
- مسؤول 2 : هى ح تنجح بس على شرط تسألوها ليا بس فى الصناديق والختات !! ما تقومو تسألوها ليا (غسل الجنابه) وإلا عن (زكاة الانعام) والا الشنو ما بعلرفو داك داك !! تسألوها ليا بس فى الصناديق والختات
توصيات الإجتماع :
- التوصية الأولى : إستدعاء (الأستاذة / عزيزة ختة) وتعيينها مستشاراً (لشئون الختات) بالمشروع القومى لمحاربة الفقر بعد إجتيازها للمعاينات .
- التوصية الثانية : إلغاء كل صناديق محاربة الفقر الفاشلة وتحويل مخصصاتها وأصولها وحساباتها إلى مشروع (الختة القومية الكبرى)
- التوصية الثالثة : إنشاء شركات تتبع لمشروع الختة القومية الكبرى كالآتى :
- شركة إستيراد أجهزة الكمبيوتر وملحقاتها لأستخدامها فى حفظ وتسجيل (بيانات الختة)
- شركة إستيراد الأثاثات المكتبية لتأثيث المكاتب والقاعات
- شركة إنشاءآت وتشييد ، لتشييد مقر ومكاتب وفروع (المركز القومى لشئون الختة والصناديق) وكذلك لتصميم وتنفيذ الأكشاك التى سوف يقوم المواطن بتوريد رسوم ختته فيها وعددها 1456232 كشك بواقع كشك لكل حى
- شركة إدارة القوى البشرية لتتولى عملية تعيين الموظفين والعمال والمحاسبين والكتبة التابعين للمشروع والإشراف عليهم
- شركة دعاية وإعلان ، لتتولى عملية الترويج والإعلان عن المشروع فى مختلف الوسائط الإعلامية
- شركة) أمن منشأآت) لحفظ الأمن ولحماية أكشاك إستلام رسوم ختات المواطنين وكذلك مبانى ومقار وفروع المركز القومى لشئون الختة والصناديق
أما التوصيات المتعلقة (بالختة الكبرى) ذات نفسها فقد قرر المجتمعون التالى :
- الختة إجبارية على كل مواطن بالغ عاقل وعلى كل مواطن أن يدفع إشتراكة الشهرى البالغ ألف جنيه فقط فى أو قبل كل يوم 25 ميلادى من كل شهر
- يتم صرف الخته للمواطن فى اليوم الأول من كل شهر ويتم ذلك كما فى جميع الصناديق والختات عن طريق القرعة
- إلى حين إجازة قانون الختة القومية الكبرى يتم العمل بقانون مؤقت يعمل به منذ بداية المشروع يحدد أسس العلاقة بين المواطن والمشروع بصورة مفصلة.ً
وبدأت الحملة الدعائية للمشروع :
دعاية إذاعية 1:
- يا نعمات ما تجى تدخلى معانا الصندوق بتاعنا ده .. صرفتو تلاته مليون فى الشهر
- شن بخلينى أدخل صندوقكم (السجمان) ده يا ثريا
- تلاته مليون فى الشهر وسجمان يا علوية؟؟
- آآى سجمان إنتى ما سمعتى بالختة الكبرى؟؟
- ودى العاملاها منو ياختى؟
- دى عاملا (صندوق محاربة الفقر)
- والنفر بى كم ؟؟
- بى ألف جنيه بس فى الشهر
- والصرفة كم ؟
- أقول ليك وما تغمرى
- البغمرنى شنو؟؟
- إنتى متأكده ما ح تغمرى ؟؟ طيب الصرفة .. عشرة مليار جنيه
كررر كب طاااخ طااااخ ….. صوت إرتضام بالأرض
دعاية إذاعية 2
- مالك يا مختار محتار كده؟؟
- ياخ والله الحياة غلبتنا والواحد ما عارف يعمل شنو ؟؟
- كيف يعنى؟
- ياخى والله ما عارفين نصرف على الأكل والشراب والهدوم والا على الجامعات والمدارس والا على العلاج والدواء والا ندفع الجمرات والا حق الإيجار والا العوائد والا النفايات والا ..
- مقاطعا ما تحتار يا مختار .. أنا ايه رأيك أوريك حاجة تحلك من الحاجات دى كلها ؟؟
- حاوى ؟؟
- لا ما حاوى يا مختار
- طيب يكون شنو؟
- لا دى حاجة إسمها الختة الكبرى
- ما فاهم
- دى يا مختار دايرا ليها فهم؟؟ دا صندوق عادى بس تدفع إشتراكك ألف جنيه فى الشهر
- والصرفة كم ؟؟
- عشرة مليار يا مختار ..عشرة مليار يا مختااااار ..عشرة مليار يا مختااااااااا .. ما تحتار يا مختار…. عشرة مليار يا مختاااارررر
دعاية تلفزيونية 1 :
يقف دفار مستف بالعملات الورقية الموضوعة داخل أكياس شفافة – عشان الناس تشوفا- أما م أحد منازل الجالوص .. ينزل منه أفراد الفريق ومعهم (مصور) يحمل كاميراته .. يطرق أحدهم باب (الزنك) المتهالك .. يخرج لهم شيخ فى العقد السادس من العمر
- ده مش بيت (أبوالخير عبدالله أبوالخير)؟
- وهو ينظر فى إندهاش للدفار المكدس بالدينارات : أيوه يا إبنى أنا ذاااتى (أبوالخير) !
- طيب يا حاج شفت القروش الكتييييييرة الفى الدفار دى
- فى إندهاش آآى شايفها … مالها
- دى يا حاج حقتك … 10 مليار جنيه … حقتك .. حلال بلال
- يا أولاد كلمونى دى (الكاميرا الخفية) ؟؟
- لا يا حاج دى والله ما الكاميرا الخفية
- طيب دى شنو؟؟
- يا حاج دى صرفتك
- فى ذهول معقولة.. الوقعة صرفت ليا …. الوقعة صرفت ليا !!
بينما كان حاج (أبوالخير) يهذى كان سكان الحى والجيران قد توافدوا وأحاطوا بالمكان وهم يرددون على أصوات زغاريد النساء .. أبوالخير بقى ملياردير .. .. أبوالخير بقى ملياردير.. .. أبوالخير بقى ملياردير .. .. أبوالخير بقى ملياردير !!!!
ثم صوت مذيع غليظ .. لو عاوز تحصل أبوالخير وتبقى ملياردير أدفع إشتراكك الشهرى بس ألف جنيه
دعاية تلفزيونية 2:
تن… تان .. ترم … تن… تان .. ترم … تن… تان .. ترم موسيقى حذر تصويرية .. ثم صورة close-up تملأ الشاشة لحذاء رجل يسير فى خطوات رتيبة .. الكاميرا تترك الحذاء وتأخذ متجولة كما عينا الرجل … الشوارع خالية تماماً من أى بشر .. شارع الجمهورية … البرندات.. الدكاكين .. المحلات .. المحطة الوسطى .. شارع النيل .. لا ناس ولا عربات ولا أى حياة .. والموسيقى التصويرية لا زالت .. تن… تان .. ترم ... ترررم … تن… تان .. ترم ... ترررم … تن… تان .. ثم فجأة صوت جهورى غليظ يقول أنظروا للشوارع فهى خالية تماما .. إنه ليس حلما ولا (عيانا مدنيا)كما إنه ليس (ظراً للتجوال)… إنه يوم واحد فى الشهر .. يوم الصرفة – مواصلاً- نعم لأن المواطنين الآن يجلسون الآن أمام شاشات التلفزيون يشاهدون برنامج من (سيربح الختة) !! الشاشة تعرض صوراً متتابعة سريعة )(فوتومونتاج) لعدد من الأسر والأشخاص وهم يتسمرون أمام أجهزة التلفاز –يعود الصوت من جديد- أشترك ولا تتردد فى مشروع (الختة القومية الكبرى) وتأكد بأن (حياتك) سوف تتغير ّ
بوسترات وملصقات :
إمتلأت جميع الشوارع بالملصقات .. أعمدة (الكهرباء المافى) .. سياجات الحدائق المتسخة .. واجهات الكبارى (المظلمة) .. الزجاج الخلفى للحافلات (المتسابقة) … كلها تدعو المواطن للمشاركة فى مشروع الختة القومية الكبرى .. وتغريه بالمليارات التى سوف تحول فقره المدقع إلى غنى فاحش إش … إش … إش
ضربة البداية :
كانت ضربة البداية مؤتمراً صحفياً لإدارة مشروع الختة القومية الكبرى تم إنعقاده أمام أحد أكشاك إستلام الرسوم من الجمهور وقد نقلته كل وسائل الإعلام وحضره لفيف من ممثلى الصحف ووكالات الأنباء العالمية والمحلية حيث قام (مدير المشروع) بإعطاء الحضور كل المعلومات اللازمة عن فكرة وتخطيط وتنفيذ المشروع ثم بعد ذلك تم فتح باب الأسئلة للحضور :
- فائز الفائز مراسل قناة CBN … الحقيقة المشروع فكرتو جميلة لكن السؤال البطرح نفسو هو إذا كان آخر تعداد بيقول إنو عدد المواطنين تلاتين مليون وقلنا إنو عدد البالغين العاقلين عشرة مليون والصرفة كل شهر بتدوها لمواطن يعنى بالحساب كده الصندوق ده ح ينتهى بعد عشرة مليون شهر يعنى ثمانمائة أربعة وتلاتين ألف سنة … السؤال هو منو ال ح يشرف عليهو لمن تنتهى؟؟
- نحنا طبعاً !!!!!
- صوت من الحضور : للوكت داااااك ؟ الله يخليكم !!
- المراسل مواصلاً طيب ال ح يصرف (الصرفة) بتاعتو أكيد ح يموت قبلما يسدد القروش العليهو السؤال مين الح يدفع ويسدد بدلاً عنو؟؟
- ورثتو طبعاًً !!
أعطيت الفرصة لمندوب آخر قام بتقديم نفسه :
- الجوهر الفردى – مراسل قناة الإخبارية بالخرطوم .. الحقيقة بس انا عاوز أسأل عن الستة شركات الأنشأهم المشروع ده منو الح يشرف إدارتهم وحساباتهم ؟؟ ومراجعتهم ح يقوم بيها منو؟؟
- نحنا طبعاً !!!!
ثم أعطيت الفرصة لمندوب آخر :
- سلطان السلطان – قناة العرب … والله طال عمرك (نبى نعرف) هل هذى ( الخته) اللى يأخذها الشخص المواطن عليها (ضرائب ورسوم) ومتل هذى الأشياء؟
- والله هذا سؤال جميل .. نعم هنالك بعض الضرائب والخصومات من أجل تغطية رسوم تأسيس المشروع وإدارته
- (الشخص الذى يدير المؤتمر) : نكتفى إلى هنا بالأسئلة ونعطى الفرصة للسيد مدير المشروع فى كلمة أخيرة قبل أن يقوم بقص الشريط التقليدى وتدشين المشروع وتنفيذ (ضربة البداية)
- بسم الله الرحمن الرحيم .. (أحسب) أن هذا اليوم يوم تاريخى فى حياة هذا الشعب الذى صبر طويلا على الفقر والمعاناة والمسغبة … اليوم يمكننا أن نقول بأننا إنتصرنا على الفقر وإلى الأبد وذلك عن طريق فكرة بسيطة إستلهمناها من واقعنا وحياتنا اليومية وهى الصندوق يعنى (الختة) .. إننى وبإسم جميع الذين عملوا فى صمت حتى يرى هذا المشروع الكبير النور ويصير حقيقة ماثلة نشيد بمجهودات جميع العاملين بالمشروع وعلى رأسهم المستشارة والمنسقة والمخططة لهذا المشروع (الأستاذة / عزيزة ختة) فلها منا كل التقدير والإحترام !!!
ثم يتوجه مدير المشروع نحو الكشك إلى جواره (الأستاذة /عزيزة ختة) حيث يقوم بفتح محفظته (المكرضمة) ويخرج منها (ألف جنيه (معدة سلفاً يعطيها للموظف الذى بداخل الكشك الذى يسلمه إيصالاً بذلك .. ثم تبعته (الأستاذة/ عزيزة ختة) حيث قامت بفتح (شنطة يدها) الجلدية السوداء وأخرجت (ألف جنيه) سلمتها لموظف الكشك ثم بعد ذلك توافد على الكشك (الحاشيه) .. و بعض المواطنين !!
ونجح المشروع :
بمجرد إفتتاح الأكشاك للجمهور لتلقى رسوم إشتراك الخته الشهرى والمواطنون يتدافعون بالآلاف لدفع إشتراكهم ... أيه يعنى تدفع (ألف جنيه) مايمكن (الحظ يلعب) معاك وتصرف ليك (عشرة مليار) !!!
الصرفة الأولى :
وكما جاء فى الإعلان التلفزيونى الذى صاحب حملة الترويج لهذا المشروع ففى اليوم الأول من الشهر وإبتداء من الساعة الثامنة مساء بدأت الشوارع تخلو من المارة وتتابع بتركيز شاشات التلفزيون حيث يتم نقل أحداث عملية إجراء القرعة بالنسبة للصرفة الأولى والتى من المفترض أن تقوم بتنسيقها (الأستاذة/ عزيزة ختة) ، إمتلأ (إستاد الخرطوم) بالمواطنين عن آخره حتى تم منعهم من الدخول … شاشات (البلازما الضخمة) المثبتة على الجهات الأربع تنقل الحدث للمواطنين داخل الإستاد التلفزيون ووكالات الأنباء والقنوات الفضائية تنقل الحدث بث مباشر … الجميع فى إنتظار (الأستاذة/ عزيزة ختة) مستشار شئون الختة والصناديق بالمشروع القومى لمحاربة الفقر لإجراء القرعة وتسليم الشخص المحظوظ (قروش الصرفة الأولى) .. الساعة تقترب من (التاسعة مساء) موعد إجراء القرعة … جميع مسؤولى المشروع فى ترقب لوصولها … ولكنها لم تأت … بأعصاب تالفة أخذ المدير هاتفة الجوال وإتصل بها :
- شنو يا أستاذه عزيزة إنتى وين…؟؟ نحنا ما راجنك عشان نسحب القرعة ونشوف الصرفة الأولى دى ح تكون بتاعت منو؟؟
- إنتو يعنى ما عارفنها بتاعت منو ؟؟
- طبعا لا
- كيفن يعنى إنتو ما عارفين البتعمل الصندوق بتشيل (الصرفة الأولى) !!!!
|
|
 
|
|
|
|
|
| |
الفاتح يوسف جبرا
شكرى سليمان ماطوس
عبدالكريم أحمد الامين
ناهد بشير الطيب
فيس بوك
تويتر
انستقرام
يوتيوب
بنتيريست