|
|
 ساخر سبيل : تقويم جديد !
|
صحيفة الرأى العام
عدد الأحد الموافق 9 نوفمبر 2008
_____________________________________________________________________________________________
نادى المسئول على (مدير مكتبه) فدخل اليه مسرعاً:
- أى أوامر سعادتك؟
- طبعاً فيه أوامر ...يعنى ناديتك ساااكت !
- اؤمر سعادتك
- أنا ملاحظ انو كل ما يجى (اكتوبر)الناس دى قاعده تتكلم وتكتب فى الجرايد وتعمل ندوات وكمان
الشغلانية جابت ليها غناء وأناشيد و(إستادات) !
- هو (أكتوبر) براهو سعادتك ما برضو لمن يجى (أبريل) بيحتفلو وآخر مقالات فى الجرايد والمجلات
وآخر ندوات ولقاءآت وشنو ما بعرف داك !
- أيواا ... يعنى الشعب يحتفل بى عيدين (أكتوبر وأبريل) ونحنا نحتفل بى (يونيو) بس؟ مش كده ؟
- نعمل شنو سعادتك ! مافى حاجه نعملا
- القال ليك منو مافى؟ أنا ناديتك هسه عشان نشوف الموضوع ده
- نشوفو كيف سعادتك
- أيواا أنا قررت إنو نشيل (أكتوبر وأبريل) ديل من شهور السنة ونخلى السنة عشرة شهور !
- ده كلام شنو سعادتك ؟ الدنيا كووولها السنة فيها (إطناشر) شهر
- أنحنا يا إبنى (كوم) وباقى دول العالم دى كووولها (كوم) نحنا لازم تكون حاجاتنا مختلفة ، مالو
لو عملنا تقويم خاص بينا ؟ وإتخلصنا من الشهر الإسمو (إكتوبر) وكمان الشهر الإسمو (ابريل) ده !
- لكن سعادتك كده نحنا ح نخالف (تقويم) العالم كلو
- وأنحنا لمن (جرينا الوكت) ساعة لى وراء الحصل شنو؟ نحنا يابنى لازم يكون عندنا تقويمنا الخاص بينا
ومفيش حد يفرض علينا التقويم بتاعو ... يابنى (من لا يملك تقويمو لا يملك قرارو) - مواصلا- كدى
نادى ليا (مستشار شئون التقويم) حالاً !
لم يمض وقت طويل حتى حضر سعادة المستشار لشئون(التقويم)الذى خاطب المسئول :
- صباح الخير سعادتك
- صباح النور .. (صلاح) مدير مكتبى ما كلمك؟
- لا والله إن شاء الله خير ؟؟ عاوزين (تنقصو الساعة) تااانى؟؟
- لا لا المرة دى عاوزين ننقص الشهور!
- (فى إستغراب) : كيف يعنى !
- عاوزين نشيل (أكتوبر وأبريل) ونشتغل بى (عشرة شهور) ! يعنى السنة تبقى عشرة شهور بس !
- لكن سعادتك ده ما ممكن كده ح نخالف العالم !
- ما ممكن ليه ؟ كل زول حر فى (تقويمو) ! إن شاء الله نعمل السنة (شهر واحد) والساعة (خمسين
دقيقة) .. مش على كيفنا ! وإلا كمان دى فيها أمم متحدة ومجلس أمن ؟
- طبعن سعادتك على كيفنا لكن بس (السنين) بتاعتنا بالنظام ده ح تمشى أسرع وح نفوت العالم !
- النفوتو كان فوتناهو هو العالم ده أصلو ما نفوتو فى حاجه ..
- لا ... لا سعادتك معليش لكن الكلام ده ما بجى كده
- طيب إنت مستشار على شنو؟ ما تورينا الكلام البجى
- (وهو يفكر) : سعادتك إنت عاوز تشيل (أكتوبر وأبريل) من شهور السنة صح؟
- صح
- ونحنا ما عاوزين المسألة دى تخلينا نتأثر بالتقويم العالمى كتير صح
- صح
- خلاص الأيام بتاعت (أكتوبر وأبريل) ديل نوزعا على باقى الشهور وبى كده تكون السنة بتاعتنا 365
يوم قدر السنة الماشى بيها العالم كلو!
تمت إجازة مشروع القرار القاضى بحذف (أكتوبر وأبريل) من شهور السنة وتوزيع أيامهما على بقية الشهور لتصبح بعض الشهور 36 يوما وبعضها 37 يوما ! وقد وجد القرار صدى واسع وتصدر نشرات الأخبار فى معظم القنوات الفضائية العالمية كما أصبح القرار محوراً للمناقشات والونسة فى (بيوت البكا) بدلاً عن (أخبار الكورة) و(الفساد) فهذا أحدهم يسأل فى دهشة :
- معقولة بس الشهر 37 يوم؟ هو أنحنا مرتباتنا كنا بنصرفا أساسا يوم 37 هسه يعنى ح نصرفا متين؟
- شنو يعنى المسألة ما واضحة ! يعنى عاوزه ليها يعنى (درس عصر؟) تانى تصرفوها معنى كده يوم 44 !
بعد عدة أسابيع وبعد أن أثبتت التجربة فشلها الذريع قام المسئول بالإجتماع مع مستشار (شئون التقويم) :
- شوف يا سعادة المستشار .. أنا شايف موضوع (العشرة شهور) فى السنة ده عمل (ربكة شديدة) للناس
فعاوزك تغيرو ليا وتشوف لينا حل تانى
- وأغيرو كيف؟
- تخت لينا شهرين(يونيو) تاانى بدل الشهرين الشلناهم؟
- (فى إندهاش) : يعنى السنة يكونو فيها 3 شهور (يونيو)؟
- ومالو مش نحنا حرين نخت العاوزين نختو ونشيل العاوزين نشيلو؟
- أكيد سعادتك دى طبعن ما فيها شك
- خلاص يبقى يناير فبراير مارس ( يونيو) مايو (يونيو) يوليو أغسطس سبتمبر (يونيو) نوفمبر
ديسمبر !
|
|
 
|
|
|
|
|
|
|
|
Re: ساخر سبيل : تقويم جديد ! (Re: الفاتح يوسف جبرا)
|
ياجماعة المستشار دة ما بالغ عديل كدة الناس المولودة في يونيو ماخشو في ورطة!!!!!!!! يعني تلاتة اعياد ميلاد في السنة دة ما خراب بيوت عديييييل كدة!!!!!!
والمشكلة الاكبر اللجنة العليا للاحتفالات باعياد الثورة ما حاتقدر تعمل تلاتة احتفالات في السنة وكمان يجي عليها احتفالات السلام نيفاشا + ابوجا بصراحة كدة دخلتونا في ورطة اما مواليد ابريل واكتوبر ربنا (ريحم) من اعياد الميلاد وقلة الحيا
الله يجازي محنك يا استاذ جبرا
| |
|
|
|
|
|
|
|
|
|
Re: ساخر سبيل : تقويم جديد ! (Re: محمد عمر الفكي)
|
غايتو يااستاذ الفاتح لو ماكنت بينا (لاخترعناك) مباااااااااااااااااااااااااالغة
طبعا ال10 شهور من صالحنا نحن المغتربين ديل معنى كدة جيتنا للسودان تانى حتكون عشرة شهوريا .....كدة
زاتو زهجنا واهلنا زهجوا وناس الاعلام زهجوا من كلمة سنويا دى ......
________________________
غايتوا الله يجازى محنك ......
| |
|
|
|
|
|
|
|
|
|
Re: ساخر سبيل : تقويم جديد ! (Re: NEWSUDANI)
|
استاذنا الكبير الفاتح جبرا
لك مكانة خاصة في قلبي وربنا يديك الصحة والعافية ويجازي محنك
دايما متابع سخرياتك واستفدت منها كثير
كتر لينا من السخريات دي وكده يا راجل يا لزيز
فتك بعافية
اخوك دايما
اشرف مصطفي
| |
|
|
|
|
|
|
|
|
 Re: ساخر سبيل : تقويم جديد ! (Re: الفاتح يوسف جبرا)
|
البروف ابو ناجي
اها أديهم الإقتراح دا ,, مايخلو السنه سنة سجن (9شهور) ويشيلو ابريل ومايو واكتوبر ,, ويخلو بكده سنة السجن (6شهور) وطبعاً دا كلو في صالحهم وهم عارفين ونحنا عارفين..
** هاك التسميات الجديده :- يناير , فبراير, مارس , يونيو الاول , يونيو التاني , يونيو الثوره , يوليو , أغسطس , سبتمبر , يونيو الاخير , نوفمبر , ديسمبر..
** يا عبد المنتقم طلع لجبرا وأبو محمد حافز خاص وتذاكر سفر لماليزيا وأديهم مفتاح الفيلا بتاعتي هناك وكلم ناس السفاره عشان يستقبلوهم..
(ابو محمد فؤاد - دبي)
| |
|
|
|
|
|
|
| |
الفاتح يوسف جبرا
Nasir Ahmed Elmustafa
محمد عمر الفكي
ناهد بشير الطيب
rosemen osman
هاشم أحمد خلف الله
ASHRAF MUSTAFA
ياسر عبدالكريم محمد
Nasr
عبدالكريم أحمد الامين
فيس بوك
تويتر
انستقرام
يوتيوب
بنتيريست