ســـيناريوهات : حسن طحنية

مرحبا Guest
اخر زيارك لك: 03-29-2024, 04:20 PM الصفحة الرئيسية

منتديات سودانيزاونلاين    مكتبة الفساد    ابحث    اخبار و بيانات    مواضيع توثيقية    منبر الشعبية    اراء حرة و مقالات    مدخل أرشيف اراء حرة و مقالات   
News and Press Releases    اتصل بنا    Articles and Views    English Forum    ناس الزقازيق   
مكتبة الفاتح يوسف جبرا(الفاتح يوسف جبرا)
نسخة قابلة للطباعة من الموضوع   ارسل الموضوع لصديق   اقرا المشاركات فى شكل سلسلة « | »
اقرا احدث مداخلة فى هذا الموضوع »
05-13-2007, 05:51 AM

الفاتح يوسف جبرا
<aالفاتح يوسف جبرا
تاريخ التسجيل: 10-31-2006
مجموع المشاركات: 1617

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
ســـيناريوهات : حسن طحنية

    صحيفة الرأى العام
    الجمعة الموافق 10 مايو 2007م

    لا أذكر على وجه التحديد من هى تلك الجهه التى قامت بدعوتى لحضور ذلك الإحتفال بتلك (الولاية النائية) .. كانت ساحة الإحتفال يتوسطها (صيوان) ضخم رصت فى الصفوف الأمامية منه عددا من كراسى الجلوس الوثيرة ليجلس عليها كبار المسئولين الذين جاءوا لحضور الإحتفال وكذلك (الضيوف) الذين إمتلأت بهم جنبات الصيوان .. بينما أنا اتجه لمقعدى قمت بمصافحة الذين يجلسون معى فى (الصف الأول) واحدا .. واحدا .. (كنوع من الإتيكيت) .. فجأة وجدتنى وجهاً لوجه أمام (شخص) ذو لحية (خفيفة) يرتدى (بدله سفارى) بنية اللون (كم طويل) .. إستدعيت ذاكرتى لأكثر من ثلاث عقود من الزمان .. معقولة ده (حسن طحنية)؟؟ .. فعلاً لينا كم وتلاتين سنه ما إتقابلنا لكن ياهو ذاتو الما بغبانى
    - (وأنا آخذه بالأحضان) : معقوله (حسن طحنية) !!
    - (بينما يأخذنى بالحضن يهمس فى أذنى) : أنسى حكاية (طحنية) دى .. أنا هسع
    (الوالى) !!
    ألجمتنى المفاجأة فأنا أعرف (حسن) معرفة تامة كيف لا وقد نشأنا فى الحى معاً وآخر عهدى به كان قبل حوالى ثلاثين عاماً حيث كان يعمل (ترزيا) بالسوق العربى ..
    - كيف عامل يا(جبرا) ؟
    - أهو والله قاعدين نكتب فى (الجرايد) وندرس فى (الطلبه) .. وإنت الجابك هنا شنو؟
    - (فى صوت خافت) : بحكى ليك بعدين بعد الإحتفال ما يخلص

    فلاش باك :
    دخل (حسن طحنية) معنا إلى المدرسة الأولية لكنه سرعان ما تركها بعد أن أبدى (نبوغا) هائلا فى الدك و(الزوغان) من (الحصص) وضرب (التلاميذ) إذ أنه كان يمتلك بسطة فى الجسم أهلته ليكون (رباط) المدرسة دون منازع .. ترك (حسن) المدرسة وألحقته والدته ليعمل (صبى عجلاتى) عند (الأسطى حنكل) عجلاتى الحى وقد كانت تلك رغبته إذ أن صديقه (طراوة) – هكذا كنا نطلق عليه حتى نسينا إسمه الحقيقى – كان قد سبقه بترك المدرسة وإلإلتحاق كصبى (عجلاتى) مع (الأسطى حنكل) حيث كان يقوم بتشحيم ونظافة العجلات التى كنا نقوم بتأجيرها للتنزه بها . لم يمكث (حسن طحنية) طويلاً مع (الأسطى حنكل) حيث أنه كان كثير (المزاح) مع صديقه (طراوة) إضافة لكونه كان كثير التشاجر مع (الزبائن) والزوغان (بعجلات المحل) من أجل التنزه و(الفسحة) .
    كان حسن عريض المنكبين، كث الحاجبين، طويل القامة، قوى الساعدين، ذو لون (أغبش داكن)! وقد كان يلعب الكرة معنا فى فريق (الحى) بعد أن نعود من المدرسة .. كانت لديه مهارات (فظيعة) فى اللعب غير (النظيف) وكانت تلك هى المهارات الوحيده التى لديه .. ما أن تمسك بالكرة حتى يأتى إليك كما (الطوربيد) لتجد نفسك معلقا فى الهواء شاقاً طريقك نحو الارض فى سرعة (صاروخية) لا تعرف بعدها على أى (جنب) أصبت بينما يردد هو فى غباء
    بصوته (الجهورى) ذاك :
    - والله الليله أخليكم كلكم (طحنية)
    لم نكن ندرى حينها لماذا إختار (حسن) الطحنية بالذات ولم يختار مثلا (الفول) أو (الجبنه) مثلاً غير أنه ولكثرة ما كان يردد هذه العبارة فقد سارعليه اللقب (حسن طحنية) !!
    لا زلت أذكر تلك المباراة التى لعبناها ضد فريق الحى الآخر والتى أصر فيها (حسن) أن يكون ضمن تشكيلة الفريق بعد أن قال جملته (التى صارت مثلاً) :
    - (يا فيها يا شنو ما بعرف داك) !! أى (يا تلعبونى وإلا بفرتقها ليكم) !!
    كان فريقنا فريق (الذئاب) يلعب ضد فريق (الشباب) إنتهت المباراة بعد أن منينا بهزيمة نكراء بعد إحراز فريق (الذئاب) لـ 12 هدفا فى مرمانا مقابل لاشئ على الرغم من أن (حسن طحنية) قد إستخدم كل مهاراته الكامنه فى (ضرب) وتشليت وخنق عدد مقدر من لعيبه فريق (الشباب) الذين كانو يستنجدون بالحكم الذى لم يكن بإستطاعته طرد (حسن طحنية) من الميدان حتى لا يعرض نفسه لكارثه لا تحمد عقباها و لا أنسى كيف أنه وبعد إطلاق الحكم لصافرة النهاية قد توجه نحوه (طحنية) معبرا له عن شكره و امتنانه مكتفيا بحمله من الأرض مراراً وأعادته إليها تكراراً، حتى تم حمله إلى المستشفى بعد أن أصيب بتهشم فى (الجمجمه) وبعض الرضوخ وشئ من الكسور .
    لم تكن فظاظة (حسن طحنية) حكرا فقط على مباريات كرة القدم بل كانت هى ديدنه وسلوكة اليومى إذ كان طبيعيا أن ترى أحد (الأطفال) وهو يجرى نحو منزلهم باكيا مخاطبا والدته :
    - يمة ألحقيني أنا يدى إتكسرت !
    - ووووب على .. منو الكسر ليك إيدك !
    - حسن...!
    - حسن منو !
    - حسن يا أمي .... حسن (طحنية) !
    أو تشاهد طفلاً آخر وقد سال الدم من رأسه وهو يصرخ مهرولا نحو منزلهم حيث كان والده يجلس (العصرية) على كرسى أمام باب الشارع :
    - يا ولد الفلقك كده وسيل دمك شنو؟
    - ده حسن يا بوى
    - حسن منو؟
    - حسن يا بوى حسن .. طح طح طحنية !!
    مرت سنوات الطفولة سريعة .. عندما إنتقلنا إلى المرحلة الثانويه كان (حسن طحنية) قد إستقر به المقام فى إحدى برندات (السوق العربى) مع والده الذى كان يعمل (ترزى بلدى) والذى ما لبث أن فارق الحياة بعد أن أصيب بدأء القلب فقام حسن بالجلوس على ماكينه الخياطة وأصبح يمارس مهنة (الخياطه) والتى أبدع فيها أيما إبداع فمن إبداعاته أنه لا يستخدم المتر لأخذ المقاسات بل يكتف بالنظر إليك نظرة فاحصة بعد أن يطلب منك أن (تلف) يمنة ويسرى فإذا حضرت لإستلام (جلابيتك) وجدت أنها (عراجيه) أى (بين الجلابية والعراقى) وفى هذه الحالة فهو لم يكن يعترض أبداً في حال عدم دفعك ثمن الحياكة اعتقاداً منك انه قد أفسد القماش! بل كان يكتفي – أي حسن - في مثل هذه المواقف بأن يحملك ويحمل قماشك قاذفاً بكما معاً على بعد أمتار من دكانه، بعد أن يأخذ منك ثمن ما صنعه لك مضاعفاً، مؤكداً لك ولنفسه انه يستحق أتعابه!
    كانت هذه آخر (معلوماتى) عن حسن طحنية إذ بعد ذلك سافرت طالبا للعلم ثم مغتربا لسنوات قاربن العشرين ثم بعد عودتى للبلاد عرفت أن أسرته قد تركت منزل (الإيجار) الذى كانت تستأجره معنا فى الحى منذ سنوات طويلة وذهبت إلى مكان غير معلوم وبهذا إنقطعت أخباره عنى !!

    فى ضيافة (حسن طحنية):
    بعد نهاية الإحتفال أخذنى (حسن طحنية ) إلى منزله (الحكومى) حيث شقت (العربة) اللاندكروزر الجديده (العااالية) طريقها يتقدمها عدد من عربات (الـتأمين والحراسة) .. توقفت العربة أمام بوابة المنزل حيث قام أحد أفراد (كشك الحراسة) بفتحها فدخلنا إلى المنزل عبر ممر طويل تحيطة الأشجار على الجانبين حيث تقع مبانى المنزل على اليمين بينما على اليسار توجد (حديقة) غناء وضع فى منتصفها طقم فاخر من كراسى (البامبو) .
    - نقعد جوه فى الصالون وإلا برة هنا (مشيراً للحديقه) ؟
    - لا أفتكر بره أحسن الجو جميل
    بينما دخل (حسن طحنية) إلى صالون المنزل (ربما لإعداد شئ من الضيافة) كنت أتجول بنظرى حول أرجاء الحديقة ذات (النجيلة) الخضراء الناعمة و(اللمبات المضيئة) التى تحف بها بعناية وأسائل نفسى :
    - (طحنية) ده يكون عمل العملية دى كيف ؟ يكون قرا بى ورانا يا ربى ونحنا ما عارفين؟؟
    إنقطع حبل تفكيرى حينما رأيتة وهو يشق الحديقة قادما نحوى وهو يرتدى جلابية (بيت) بيضاء ناصعة ويحمل فى يديه (شخصياً) صينية عليها (أدوات الضيافة)
    - إنت يا حسن قاعد براك هنا؟
    - (وهو يضحك) لا قاعدين معاى (أربعه)؟
    - أربعة (ولاة) يعنى ؟
    - ولاة شنو يا جبرا ؟ أربعة (نسوان) نسوااان
    - يعنى إتزوجت أربعة؟
    - (وهو يرتشف من كوب العصير) : وكمان مقعدهم كلهم معاى فى البيت ده !! – مواصلاً – ده غير (الفكينا تسجيلاتهم) ؟
    - وديل مقعدهم كلهم فى بيت واحد ما بعملو ليك غلبة؟
    - والله يعملو أى (غلبه) أعملهم ليك (طحنية) !!
    - لا والله كان كده إنت ما تبقى (حسن طحنية) إنت تبقى (حسن طحنية هارون الرشيد) !!
    - (وهو يضحك من تعليقى) : طبعا إنت مندهش (للنقلة) دى ؟
    - لكن يا (حسن) بتبالغ هى دى نقلة نصاح؟ زول يخلوهو (ترزى بلدى) يجو يلاقوهو بقى (والى) .. كدى أحكى ليا دى حصلت كيف !!
    رجع (حسن طحنية) إلى الخلف مستنداً على مقعد (البامبو) الوثير فى ذات اللحظة التى كان فيها أحد
    أفراد (فرقة الضيافة) يضع (صينية الشاى ومستلزماته) أمامنا على الطاولة الدائرية .

    أصل الحكاية :
    شوف يا جبرا بعدما إنتو سافرتو تقرو أنا واصلت فى محل الخياطه وما كان فى زباين لأنو إنت عارف أخوك كان (أشتر) فى حكاية الخياطة دى غايتو ربك رب الخير قام (الجماعة) ديل جو .. وكل يوم والتانى طالعين (مسيرة) وكل يوم والتانى عاملين ليهم (مؤتمر) واليافطات بتاعت (القماش) ما تديك الدرب .. شئ (ملصق) فى (الباصات) وشئ (معلق) فى (الكبارى) قمت طوالى فكرت أعمل ليا محل (لافتات قماش) وقمت طوالى أجرت االمحل القدامى وجبت ليا (خطاط)
    - أها وبعدين ؟
    - (كمن يتذكر) أها يا زول أتفقت ليك مع الزول (المسئول) عن حكاية اللافتات دى وبقيت أديهو ليكا (عمولة) وعلى كده مسكت ليكا (السوق) وبقت أى (لافتة) فى أى مسيرة أو مؤتمر أو شنو ما بعرف داك يعملوها (الجماعة ديل) تلاقى مكتوب عليها تحت (الختم) بتاع (طحنية لللافتات) !!
    - أها وبعدين؟
    - بعدين بقيت (أطلع) ليك مع أى مسيرة يجيبوا ليا اللافتات بتاعتا وأكون أول زول فيها ؟
    - يعنى إنضميت (للجماعة) ؟
    - إنضميت شنو؟؟ أنا كنت بمشى عشان بعدما المسيرة (تفرتق) أجمع وألملم (اللافتات) تانى وأرجعهم المحل عشان أبيعهم ليهم (للمسيرة التانية) !!!
    - (وأنا أرتشف من كوب الشاى الأنيق) : أها وبعدين؟
    - أها يازول أى (مسيرة) طالعة تلقانى أول زول .. فى المقدمة وقاعد أهتف والناس تهتف وراى .. وإنت عارف (أخوك) عندو (حنجرة) ما شاء الله .. وعلى كده بقيت (عضو أساسى) فى أى (مسيرة)
    - وبعدين؟
    - بعدين قلت (المسيرات) دى ما كفاية يا ود يا (حسن) حقو (تساعدا) بى كم (متحرك) كده ..
    وفعلاً خليت (الود الشغال معاى) يمسك الدكان ومشيت ليك كم (متحرك) كده .. وفى واحد من (المتحركات) كان معاى (مسؤول كبير) طلعنا كم (عملية) سوا وتوطدت علاقتى معاهو
    ولمن عرف إنى زول(إعلانى) أقصد (إعلامى) لمن رجعنا قام بتعيينى طوالى (مسئول الإعلام) بالولاية !!
    فى هذه الأثناء وبينما (حسن طحنية يواصل لى فى سرد (قصة حياتو) جاءت صينية (القهوة) ذات (الطقوم الفاخرة) .. أخذ فى صب (القهوة) بينما واصل حديثة :
    - أها يا (جبرا) قلت ده برضو ما كفاية حقو أساعد المسألة بى (حاجة) تانية قمت من هنا لى هنا إتزوجت ليك (بتو) والأمور مشت تمام التمام لحدت ما (نسيبى) المسئول ده (شالوهو) وجابو واحد تانى وسمعت تحت تحت إنو بفكر (يشيلنى)
    - أها عملت شنو يا حسن ؟
    - شمشمت هنا وهنا عرفت إنو عندو أختو ما متزوجة ... قمت إتقدمت ليها وعرستها وبقينا (نسايب) !!!
    (الله لا كسبك يا حسن طحنية ده كلو يطلع منك؟) – قلتها فى نفسى -!!! فى الوقت الذى كان هو يستقبل محادثة عبر هاتفه الجوال عرفت من ردوده أن المتحدث هو (المقاول) الذى يقوم بتشييد منزله (بالعاصمة) حيث علمت من الحوار الذى يدور بأن (المقاول) يستعجل (حسن طحنية) لإرسال مبلغ من أجل إكمال تشييد (حوض السباحة) !!
    بينما كان (حسن طحنية) يرد على محادثة (المقاول) كان عدد من (الخدم) يحملون (أطباق الطعام) ويقومون بتجهيز طاولة العشاء التى تم وضعها بعناية فى أحد أركان الحديقة
    - العشاء جاهز يا (سعادتك)
    قالها أحد الذين كانوا يشرفون على إعداد (طاولة العشاء) عندها هب (حسن طحنية) واقفاً وهو يشير لى بأن نتوجه لتناول العشاء .. لم يكن أحداً معنا إذ أن (سعادته) كان قد طلب من سكرتيره الخاص عند قدومنا للمنزل بأنه لا يود مقابلة أى شخص كان .. جلسنا على (مائدة العشاء) والتى كانت تحتوى على كل ما لذ وطاب من مشويات ومحمرات ومجمرات ومنديات وسلاطات وحلويات وفواكه وعصائر !!
    - ما تميت ليا القصة؟؟
    - أيوه أيوة المحادثة بتاعت المقاول دى قطعت لينا حديثنا ... – متسائلاً كنا واقفين وين؟
    - كنا واقفين فى (العرسة التانية) !!
    - أها يا زول كلما يجيبو ليك مسئول أقوم (أناسبو) ليك لحدت ما تميتهم (أربعه)
    - مسئولين؟
    - لا .. نسوان
    - أها وبعدين؟
    - أها يا زول (كنكشت) ليك فى حتت (المسئول الإعلامى للولاية) دى (كنكشة) شديده وبقيت ليك خبير (مسيرات) يعنى بس أعاين ليك لى (عنوان المسيرة) كده أعرف ليك عاوزة كم (باص) وكم (مكرفون) .. وكم (لافتة) .. وكم (مدرسة) نمشى نجيب منها (شفع) وكم (مصلحة) نمشى نجيب منها (الموظفين) ومش كده وبس !!
    - أها عملت تانى شنو؟
    - أول حاجه إستحدثت ليا وحدات فى (الإدارة الإعلامية) ذى مثلا وحده (صياغة الهتافات) ودى العاملين فيها بس مهمتهم يقعدو يطلعو لينا (هتافات) جديدة ويدوها – بعد إجازتا منى – لوحده (الهتيفة الدائمين) وهم الناس البتشوف (وشوشهم) فى كل (مسيرة) طالعة – مواصلاً – المهم يا زول (كربت ليك الشغلانه) وبقيت ليك أهم زول فى البلد وما تنسى إنو (المسئول الكبير) هو (أبو النسب) !!
    - (فى غباء مصطنع) : وحكاية البيت البتعمل فيهو و(حوض السباحة) والشنو ما بعرف ده؟ عملتو كيف يا (حسن) ... من دكان (الترزى) ؟؟
    - (فى خبث ) : يعنى يا (جبرا) عاوز تعمل ليا ما فاهم ؟ شفت ليك (عراوى) بتعمل ليها (حوض سباحة) ؟!!
    - طيب من وين؟
    - بسيطة عملت ليا فرع هنا للمحل بتاع (اللافتات) وكمان عملت فيهو تأجير (للساوند سيستم) وللمنصات (البقيفو) فيها المسئولين .. وعشرة عشرين (صيوان) وميه ميتين (حفاظة مويه) وكم ألف (كرسى) وكم ألف (تربيزة) ولمبات للإضاءة وبصين تلاته عشان يشيلو الناس !!
    - والحاجات دى جابت ليك قروش ؟
    - ما تجيب ليا كيف؟ ما تنسى كل يوم يومين عندنا (مسيرة) .. شوف فى كم (إتفاقية سلام) كل ذكرى إتفاقية (مسيرة) .. ده غير حاجات (فلسطين) وحاجات (العراق) وحاجات (أفغانستان) ويوم (الأم) ويوم (العمال) ومسيرات الإحتجاج على (قرارات الأمم المتحدة) !!
    - وما تنسى كمان إنو الحاجات دى ذاتا فى الأمسيات قاعدين نشغلا (للأعراس) !!
    - (الله لا كسبك يا حسن طحنية ده كلو يطلع منك) !! : أها تم ليا قصة بقيت (والى) دى كيف؟
    - لحدت هنا يا (جبرا) والشغلانية كانت ماشة كويس
    - والحصل شنو؟
    - أبو النسب شالوهو !! وجابو واحد تانى !!
    - وعرست أختو؟
    - لا المرة دى هو العرس (أختى) أنا !!
    - ودى كيف ؟؟
    - أيواا .. أقول ليك ... أنا أول ما إستلمت (مسئول إعلامى) قمت عينت ليك أخوانى وأخواتى وأولاد عمى وأولاد خالى وأقربائى كلهم فى (الولاية) السكرتيرة سكرتيرة والصراف صراف والمخزنجى مخزنجى والسواق سواق .. أها (أختنا) دى كانت شغاله سكرتيرة فى مكتب (أبوالنسب) قبال ما يشيلوهو ولمن جاء (صاحبنا) ده ولقاها سكرتيرتو والظاهر هو من النوع الجنو (عرس) قام طوالى طلبها وأديناها ليهو على سنة الله ورسولو !!
    - يعنى المرة دى جات براها كده !!
    - (وهو يتناول كوباً من العصير) : أيواا ما تعبت فيها !!
    - أها (والى) دى عملتها كيف؟
    - (وهو ينهض من المائدة) : ما تستعجل يا (جبرا) أنا ح أحكى ليك .. كدى نمشى نغسل إيدينادى ونرجع نقعد !!

    وبقيت والى :
    عدنا مرة أخرى لطقم الجلوس (البامبو) .. وضع (حسن طحنية) رجليه على الكرسى الذى فى قبالته .. أطرق بعينيه نحو السماء كمن يتذكر :
    - أها بعد ما القروش القاعد أطلعا من المحل بتاع (تجهيز المسيرات) كترت قلت يا ود يا (حسن) الدنيا ما معروفه قمت عملت ليا كم مشروع كده .. مزرعة بتاعت دواجن .. مصنع بتاع (أدوات صحية) ... معاهد بتاعت كمبيوتر .. وحاجات ذى دى
    - وبعدين ؟
    - بعدين لمن (الشركات) و(المزارع) و(المعاهد) كترت لقيت نفسى ما قاعد إشتغل (للحكومة) ذى زمان ووقتى كلو قاعد أديهو للأعمال الخاصة بتاعتى وأخلى (الموظفين) الصغار يشتغلوا ليا شغلى ويقوموا بعملية (تنظيم المسيرات) وباقى الحاجات (الإعلامية) دى ..
    - وبعدين كده ما ح يشيلوك؟
    - شيل ده مافى ما (أبو النسب) كان قاعد !!
    - أها طيب والحصل شنو؟
    - الحصل إنو فى يوم مفروض تكون فيهو (مسيرة) قمت قلت لى واحد من الأولاد الموظفين معاى قوم بتنظيم المسيرة دى .. قام الود الموظف عشان يبرهن ليا إنو على قدر المسئولية حشد ليهو أكتر من (مليون واحد) فى المسيرة ..شئ باصات وشئ عربات وشئ مواتر المهم لما المسيرة قاطعة (الكبرى) ماشه (مبنى الولايه) عشان يخاطبا الوالى قام (الكبرى) إنهار من حمولة الناس !!
    - وبعدين دى كارثة؟
    - والله كانت كارثه فعلاً لأنو طالما الناس ديل كتار بالشكل ده كان مفروض مسار (المسيرة) يتغير وما يمشوا فوق الكبرى ده ودى مسئوليتى !
    - أها وبعدين؟
    - بعدين الكارثة كانت كبيرة .. ناس ماتت .. وناس إتجرحت وأنا شلت قلبى فوق إيدى قلت خلاص يا ود يا (حسن) ح ترجع (ترزى) تانى ويشيلوك .. وفعلاً تانى يوم للحادث الصباح بدرى جانى (طراوة) مدير مكتبى وجاب ليا جواب مستعجل من (المسؤلين) فى (الخرتوم)
    قلت بس خلاص (الجماعة) شالونى
    - وما شالوك يعنى؟
    - شالونى شنو؟ .. رقونى ..... والى !!

    يمكن قراءة كل الموضوعات للكاتب على موقعه :


    www.alfatihgabra.com
                  

05-13-2007, 12:41 PM

محمد سنى دفع الله
<aمحمد سنى دفع الله
تاريخ التسجيل: 12-10-2005
مجموع المشاركات: 10986

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: ســـيناريوهات : حسن طحنية (Re: الفاتح يوسف جبرا)

    بالرعم من الطحنية لكن الجماعة حملوا حميل ولاواحد دخل
    الشي طحنية حتة واحده من ترزي لي والي
    ذكرتني نسافر ونرجع نلقى ناس قعدت في الكراسي
    ولايلكون من اي شي اي شي
    ولا يعرفون يفكون الغنماية ولا الخط
    اها زولك طحنية عجبني عجب شديد
    ولمن نتلاقى
                  

05-13-2007, 02:14 PM

عبدالأله زمراوي
<aعبدالأله زمراوي
تاريخ التسجيل: 05-22-2003
مجموع المشاركات: 744

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: ســـيناريوهات : حسن طحنية (Re: محمد سنى دفع الله)

    قريبي الفاتح..

    ما أمتع خيالك الفنان..

    لا تتوقف، لا تتوقف، لا تتوقف!

    حسن طحنية الذي صار واليا علينا بزوجاته الأربع، تجسيد رائع لحالنا الماثل... فكم من وزير ووال نعرفه يصدق عليه قول الشاعر:

    أنذكر أذ لحافك جلد شاة
    واذ نعلاك من جلد البعير
    فسبحان الذي أعطاك ملكا
    وعلمك الجلوس على السرير!

    (عدل بواسطة عبدالأله زمراوي on 05-13-2007, 02:18 PM)

                  

05-13-2007, 02:36 PM

بخاري بشير
<aبخاري بشير
تاريخ التسجيل: 07-07-2005
مجموع المشاركات: 294

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: ســـيناريوهات : حسن طحنية (Re: عبدالأله زمراوي)

    العزيز جبرا
    لك كل الود ،وأنت تتحفنا بهذه السيناريوهات الرائعة والمدهشة.. وأنت تتداعى في استراحاتك "ساخر سبيل"..
    والله ياجبرا لو ما إنتو ديل المواطن ده كان طرشق عدييييييييل كدة
    تحياتي



    بخاري
                  

05-13-2007, 02:28 PM

Raja
<aRaja
تاريخ التسجيل: 05-19-2002
مجموع المشاركات: 16054

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: ســـيناريوهات : حسن طحنية (Re: الفاتح يوسف جبرا)

    الأستاذ الفاتح جبرا..

    سلام وتقدير..

    حقيقة قابلت شخصا عرفته منذ وقت بعيد ولا يمكن لأي مخلوق كان أن يتوقع له أن يصبح وزيرا (ليه شنة ورنة)..

    للأسف لا أستطيع الحكى عنه.. ربما في زمن آخر

    الغريب لما سمعت أن الزول البعرفه هو الوزير الحاقابله، رددت (لا إله إلا الله) ثمانية مرات.. السائق قال لي بعد ما رجعنا: أنا خفت لما شفتك بترددي في الشهادة.. هو الزول ده كعب للدرجة دي؟ قلت ليه ما كعب. بالعكس زول كويس جدا على المستوى الإنساني.. لكنه ابدا ما ممكن يكون مسئول في حكومة.. وكمان وزير..

    الله يكون في عون بلدنا..

    شكرا ليك للسيناريو الحقيقة
                  

05-13-2007, 11:59 PM

الفاتح يوسف جبرا
<aالفاتح يوسف جبرا
تاريخ التسجيل: 10-31-2006
مجموع المشاركات: 1617

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: ســـيناريوهات : حسن طحنية (Re: الفاتح يوسف جبرا)

    العزيز محمد السنى
    إنت وين يا راجل؟ مشتاقون ... قلت ليا (حسن طحنية) ده عجبك ؟ طيب ح تعمل شنو لو حكيت ليك قصة (على كمونية) !!

    كسرة :
    الإجازة متين؟؟
                  

05-14-2007, 00:02 AM

الفاتح يوسف جبرا
<aالفاتح يوسف جبرا
تاريخ التسجيل: 10-31-2006
مجموع المشاركات: 1617

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: ســـيناريوهات : حسن طحنية (Re: الفاتح يوسف جبرا)

    Quote: أنذكر أذ لحافك جلد شاة
    واذ نعلاك من جلد البعير
    فسبحان الذي أعطاك ملكا
    وعلمك الجلوس على السرير!


    عزيزى قريبى عبدالإله
    التذكر نعمة من نعم الخالق لأنه يقود إلى (التفكر) .. لكن نقول شنو لى ناس (طحنية) ديل !!!
                  

05-14-2007, 00:05 AM

الفاتح يوسف جبرا
<aالفاتح يوسف جبرا
تاريخ التسجيل: 10-31-2006
مجموع المشاركات: 1617

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: ســـيناريوهات : حسن طحنية (Re: الفاتح يوسف جبرا)

    عزيزى بخارى :
    أشكرك على هذا الشعور الطيب تجاه ما يخطه قلمنا المتواضع .. ألف شكر
                  

05-14-2007, 00:09 AM

الفاتح يوسف جبرا
<aالفاتح يوسف جبرا
تاريخ التسجيل: 10-31-2006
مجموع المشاركات: 1617

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: ســـيناريوهات : حسن طحنية (Re: الفاتح يوسف جبرا)

    Quote: هو الزول ده كعب للدرجة دي؟


    العزيزة رجاء :

    كان تقولى ليهو يا رجاء (كعب عالى) !!
                  

05-14-2007, 12:42 PM

Raja
<aRaja
تاريخ التسجيل: 05-19-2002
مجموع المشاركات: 16054

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: ســـيناريوهات : حسن طحنية (Re: الفاتح يوسف جبرا)

    العزيز جبرا..

    سلامات تاني..

    غايتو في وضع طبيعي وبلد طبيعي.. صاحبنا ده أكتر شئ يبقى باشكاتب. ده ما تقليل من الباشكتبة - حاشا لله - لكن الوزارة والسفارة عايزة ليها تأهيل معين ناس الإنقاذ ما شغالين بيه الشغلة..

    تحياتي
                  

05-14-2007, 01:06 PM

الشيخ إبراهيم الشيخ
<aالشيخ إبراهيم الشيخ
تاريخ التسجيل: 11-02-2006
مجموع المشاركات: 705

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: ســـيناريوهات : حسن طحنية (Re: Raja)

    الاستاذ جبرا لك التحية

    صراحة اول مرة اعرفك حاسد للدرجة ده

    اسع حسن طحنية ده مالو عيبه شنو

    بعدين اساساً الوزارة ده مش دايرة ليها واحد

    يفصل ليها البرامج والخطط ... اهو ياخي جابو ليك ترزي عديل

    برضو زعلان.

    ربنا يديك العافية يا استاذ
                  

05-14-2007, 01:28 PM

خالد الطيب أحمد

تاريخ التسجيل: 03-13-2007
مجموع المشاركات: 0

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: ســـيناريوهات : حسن طحنية (Re: الشيخ إبراهيم الشيخ)

    ربنا يديك العافية يا استاذ
                  

05-14-2007, 02:36 PM

nazar hussien
<anazar hussien
تاريخ التسجيل: 09-04-2002
مجموع المشاركات: 10408

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: ســـيناريوهات : حسن طحنية (Re: خالد الطيب أحمد)

    Quote: (يا فيها يا شنو ما بعرف داك)



    لو كنت كتبتها زي ما بنطقها حسن طحنية بي جضومو الكبار ديل...يا افصّيها)
    كان مافي زول عرفها...


    وبعدين يا رجاء...زولك دا انا عرفتو...(مش الناس ما بتريّح)؟
                  

05-14-2007, 03:21 PM

ولياب
<aولياب
تاريخ التسجيل: 02-14-2002
مجموع المشاركات: 3785

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: ســـيناريوهات : حسن طحنية (Re: nazar hussien)

    الأستاذ الفاتح

    لك التحية

    مشكور على هذا السرد الجميل والتصور الرائع

    بس لكن قطعت قلبي ، كان عندنا مدير مدرسة أسمو حسن طحنية ، قلت معي نفسي متين بقي الوالي

    وزد على ذلك أنا تكفيت خالص بالبوست ، تعرف ليه ؟ لأني بحب الطحنية.
                  

05-14-2007, 08:41 PM

essam&amal
<aessam&amal
تاريخ التسجيل: 11-15-2003
مجموع المشاركات: 2579

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: ســـيناريوهات : حسن طحنية (Re: الفاتح يوسف جبرا)

    الله يديك العافية
    لكن حسن طحنية عجيب
    ومثله كثيرون
    وفى انتظار الكمونية
    لك التحايا
    ام وضاح
                  

05-17-2007, 10:21 AM

الفاتح يوسف جبرا
<aالفاتح يوسف جبرا
تاريخ التسجيل: 10-31-2006
مجموع المشاركات: 1617

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: ســـيناريوهات : حسن طحنية (Re: الفاتح يوسف جبرا)

    شكراً ليكم كلكم يا ناس يا رائعين ولو ما عندى شوية ملاريا وراقد (طحنية) كان رديت عليكم واحد واحد !! شكرا ليكم كتير !!
                  

05-17-2007, 10:35 AM

maia

تاريخ التسجيل: 03-05-2002
مجموع المشاركات: 2613

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: ســـيناريوهات : حسن طحنية (Re: الفاتح يوسف جبرا)

    الاستاذ يوسف جبرا

    واصل في هذه الطحنية البديعة


    شكرا لهذه الكلمات التي اضحكتني بعمق
                  


[رد على الموضوع] صفحة 1 „‰ 1:   <<  1  >>




احدث عناوين سودانيز اون لاين الان
اراء حرة و مقالات
Latest Posts in English Forum
Articles and Views
اخر المواضيع فى المنبر العام
News and Press Releases
اخبار و بيانات



فيس بوك تويتر انستقرام يوتيوب بنتيريست
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
About Us
Contact Us
About Sudanese Online
اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين
News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums
If you're looking to submit News,Video,a Press Release or or Article please feel free to send it to [email protected]

© 2014 SudaneseOnline.com

Software Version 1.3.0 © 2N-com.de