سيناريوهات : فش غبينة !

مرحبا Guest
اخر زيارك لك: 03-29-2024, 07:03 AM الصفحة الرئيسية

منتديات سودانيزاونلاين    مكتبة الفساد    ابحث    اخبار و بيانات    مواضيع توثيقية    منبر الشعبية    اراء حرة و مقالات    مدخل أرشيف اراء حرة و مقالات   
News and Press Releases    اتصل بنا    Articles and Views    English Forum    ناس الزقازيق   
مكتبة الفاتح يوسف جبرا(الفاتح يوسف جبرا)
نسخة قابلة للطباعة من الموضوع   ارسل الموضوع لصديق   اقرا المشاركات فى شكل سلسلة « | »
اقرا احدث مداخلة فى هذا الموضوع »
07-04-2008, 05:51 AM

الفاتح يوسف جبرا
<aالفاتح يوسف جبرا
تاريخ التسجيل: 10-31-2006
مجموع المشاركات: 1617

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
سيناريوهات : فش غبينة !

    صحيفة الرأى العام
    عدد الجمعةالموافق الرابع من يونيو 2008م

    موقع الكاتب www.alfatihgabra.com


    كعادته عصر كل يوم حمل (حاج صديق) بنبر (البلاستيك) وخرج من منزله متجهاً نحو (شجرة النيم) التى تقع فى (ناصية الشارع) والتى يجتمع فيها بشكل يومى (شلته) من الجيران (كبار السن) ، ما أن وضع (حاج صديق) البنبر على الأرض وجلس عليه حتى أخرج من جيب (العراقى) صحيفة قام بفضها والإطلاع فيها قليلا ثم قال مخاطباً بقية الشلة:
    عليكم الله قريتو الخبر المكتوب فى الجريده ده ؟-
    - خبر شنو كمان فى طيارة (خامسة) تانى وقعت؟
    - لا لا ده خبر من (الصين)
    - والله يا حاج (صديق) عندك جنس (شمارات) كدى أقراهو لينا
    - (يقوم بتثبيت نظارته الطبيه ويستعدل فى قعدتو) : الخبر يا جماعة بيقول إنو فى جمهورية(الصين) عملو ليهم محلات بتاعت (بيوت بكا) و..
    - (مقاطعا) : كيف الكلام ده يا حاج يعنى؟ هو البكاء بيعملولوو كمان محلات
    - إنت أصبر يا (كامل) ياخوى خليهو اليكمل لينا كلامو
    - هو لكن (كامل) بيصبر؟؟ (مواصلا) أها يا جماعت الخير قالو ليكم المحلات دى عملوها عشان الواحد (الصينى) يعنى المواطن (الصينى) يمشى ليها ويدخل يقعد يبكى ويجعر لمن يفش (غبينتو) !!
    - أها يا (حاج صديق) والحكايه دى بى قروش؟
    - والله يا (مأمون) يا خوى أنا بفتكر إنها أكيد بى قروش يعنى العملا يكون عملا (هوايه) يعنى ؟
    - والله يا حاج أنحنا المستاهلين لينا محلات ذى دى الواحد فينا (ممغووس) وماشى
    - (صينيين) شنو يا (حاج صديق) والله لو فى شعب أولى بالحزن وندب (الحظ) المهبب ومحتاج لى (متنفس) عشان الزول (يتفشى) يكون ياهو الشعب (الفضل) ده
    - والله يا (حاج صديق) لو عملت المشروع ده بى (قريشات المكافأة) بتاعتك دى ينجح جنس نجاح
    - والله يجوك كترت شباب يبكو حظهم العاثر ويلطموويجعرو .. الواحد تلقاهو إتخرج ليهو كم سنه وما لاقى ليهو وظيفة وعايش عاله على ناس البيت وقاعد عاطل لا شغله لا مشغلة !
    - الأولاد ديل كوم والبنات كوم تانى .. والله يجن يبكن ويجعرن جنس جعير بى ( شخنفتو) .. الواحدة فاتت (سن الزواج) بى غادى ولسه أمل ساااكت مافى إنو يجيها (فارس) إن شاء الله راكب ليهو (ركشه) !
    - يا حاج صديق والله إتوكل على الله وأعمل المشروع ده والله تكسب دهب وكمان تفش غبينة الناس ديل والعجب كان عملت ليك قسم (للناس الكبار فى السن) والله ديل كمان غبينتهم شديدة بالحيل المرضان مرض مزمن وما قادر يتعالج (نعمل ليهم شنو عينهم للعلاج المجانى والدواء المجانى وما عاوزين يمشو ) وكمان فيهم الما عندو مصدر دخل لا قادر (يلبس) ولا قادر (ياكل) ولا قادر (يشرب) والدوله ما شغالة بيهو وعاملة (أضان الحامل طرشة) وما سائلة فيهو وما بتقدم ليهو أى إعانه!
    - أنا كمان يا حاج صديق بقترح عليك لو عملت المشروع ده تقوم تعمل ليك قسم براهو كده لى (ضحايا) المؤسسات الحكومية والقوميه يعنى قسم لضحايا مشاهدى برامج التلفزيون عشان يبكو وينفسو عن (العذاب) اليوماتى المفروض عليهم من الناس (الموهومين) ديل !
    - والله يا حاج صديق أقول ليك حاجه لو عملت المشروع ده لو جوك بس المواطنين المغبونين من ناس (المرور والكشات) براهم مشروعك ده ينجح والله يجوك كترت ناس (مغبونين) ..أقول ليك حاجه والله كان جوك ناس (الركشات) ساااكت كفايه تلقى الواحد اليوم كلو يجمع فيها .. جنيه .. جنيه .. بس مما يفكر يمشى يشترى (القفة) لى أولادو إلا يقابلو ليك (هادم الملذات ) ومتصيد (الغرامات) وفى لمحة عين تلاقى (الأيراد) فى (خبر كان) وبدلً الإيراد ما يدخل لى (قفة الملاح) يدخل فى (جيب الحكومة)..
    - العجب كمان لو عمل ليهو قسم لى ضحايا (المستشفيات) و(السدود) و(البنوك)الخلت شغلا وبقت (دلاليه) تبيع فى (العربات) و(الحاجات) للمواطنين بالأقساط الما بقدرو يسددوها دى
    - (حاج صديق يستعدل فى جلسته) : والله يا جماعه دخلتو ليا فكرة المشروع ده فى راسى – مواصلا- هسه تفتكرو الزول كان قدم ليهو لى محل ذى ده ما برخصوهو ليهو
    - أفو والله يرخصوهو ليك جنس ترخيص .. هم قالو ليكا عندهم شغلة بى حاجه غير لم القروش ..شئ رخص وشئ ضرايب وشئ زكاة وشئ عوائد وشئ ما بعرفو داك
    - (حاج صديق فى جديه مصطنعه): أقول ليكم حاجه والله أنا إلا أسوى ليا محل بتاع (بيت بكاء )ذى العملوهو (الصينين) ديل
    - إنت أعملو والله نجى نبكى ليك جنس بكاء !
    هوووى أسمعو كان جايين تبكو ليا بكاء مجااانى يعنى (بكا ملح) ما تجونى ولا أشوف وشكم ده -

    حاج صديق ينفذ :
    كان الجميع يعتقدون بان ما قاله (حاج صديق) بالأمس ونيته فى فتح (محل بكاء) قد كان نوعا من المداعبه لولا أن (كامل) قد قابله الصباح الباكر وهو يحمل عددا من الأوراق فى يده متجها إلى محطة المواصلات :
    - على وين الليلة من الصبح كده ؟ المعاشات ولاايه
    - معاشات أيه يا كامل يا خوى أنحنا ما قبضنا المكافأة .. أنا ماشى المحليه
    - إن شاء الله خير ماشى تشتكى ناس النفايات الإتراكمت وملت الواطة دى؟
    - نفايات شنو يا كامل البشتكوها ديل إلا نشتكيهم لى اللا نام لا أكل طعام
    - طيب المقومك من بدرى كده شنو على المحليه قبال الموظفين ما يمشو؟
    - ماشى أقدم طلب للمحل .. عاوز أعمل نفس فكرة (الصينيين) القريتا ليكم أمبارح
    - إنت يا زول بى جدك؟
    - طبعا بى جدى هو يعنى أكان الصينيين الإسمهم صينيين (ممغوسين) وقاعدين يبكو نحنا نعمل شنو ندق ( السكلى )؟
    - والله من ناحيت كلامك صاح فهو صاح لكن باقى ليك المشروع ده بينجح؟
    - والله شوف من ناحيت بينجح فهو بينجح يا (كامل) لأنو أنا شايف إنو نحنا أكتر شعب مفروض يبكى من الحاصل ليهو ده

    فى المحليه :
    (الضابط الإدارى) فى مكتبه الوثير وامامه يقف عدد من المواطنين يمسكون بطلباتهم ، يقوم (حاج صديق) بالإنتظار ريثما يأتى دوره للوقوف أمام (الضابط الإدارى) الذى ما أن يقوم بقراءة (الطلب) حتى يفتح فاه دهشة ثم ينظر إلى (حاج صديق) من تحت نظارته الطبيه وهو يخاطبه :
    - قلت ليا عاوز تفتح شنو؟
    - بيت بكا !!
    - (فى إندهاش) بيت شنووو؟
    - بيت بكااا !
    - ما فاهم ... كيفن يعنى ؟
    - أيواا أفهمك يا أستاذ .. أصلو الفكرة إنو ...
    قام (حاج صديق) بشرح فكرة المشروع للضابط الإدارى والذى إستمع إليها وهو فى غاية الإندهاش إلا انه أخيراً قام بالتصديق على (الطلب) وهو يقول بصوت خافت :
    - بيت بكا .. بيت عرس .. (بيتون بليس) .. المهم تدفع لينا حق (الرخصة) والعوائد والنفايات والضرائب والزكاة !!

    التحضير للمشروع :
    ما أن إستلم (حاج صديق) تصديقو وختاهو فى جيبو حتى قرر ان يغشى (الفاضل السمسار) فى سبيل إيجاد (مقر) لهذا المشروع :
    - والله يا الفاضل يا خوى أنا بفتش ليا فى بيت بس يكون كبير
    - إنت يا حاج صديق ما ساكن فى (ملكك) عاوز بالبيت شنو؟
    - بقول ليك يا الفاضل عاوز ليا بيت كبير !
    - أنا بقصد يعنى عاوزو لى عايلة كبيرة وإلا لى عايلتين يعنى؟
    - يا الفاضل ياخ أنا ما عاوزو لى سكن عاوزو (تجارى) .. تجاااارى
    - عاوزو مخازن يعنى؟
    - لا ما مخازن .. عاوزو لى مشروع كده !
    - حقو تورينى عاوزو لى ياتو مشروع عشان أقدر أشوف ليك البيت المناسب
    - والله يا الفاضل ياخوى عاوز أعملو (بيت بكاء) !!
    - (فى إندهاش) : بكاء شنو؟ المات ليكم منو؟ - ثم مستدركا- طيب ما تدق ليك صيوان فى (الشارع) ؟
    - ياخى أنا أقول ليك مشروع تجارى تقول ليا المات ليكم منو؟ وصيوانات وما بعرفو شنو؟
    - بالله يا حاج صديق أنا راسى (جاط) كدى فهمنى الموضوع شويه شويه
    ما أن انتهى حاج صديق بشرح الفكرة للفاضل السمسار حتى بادره الأخير قائلاً :
    - والله دى فكرة بت ستين كلب .. الشعب ده كلو عاوز يبكى ويتفشى وما لاقى ليهو طريقه !
    والله أنا أول زول يجى (يفش غبينتو) عندك ! ناس (المحليه) ماغصنى جنس مغصة ، كل يوم رشوم شكل !
    - أها عندك ليا بيت للمشروع ده !
    - شوف يا حاج أول حاجه لازم البيت العاوزو للمشروع ده يكون بعيد من (الناس) عشان ما تعمل إزعاج وناس النظام العام ديل يجو يكشوك !
    - ما تنسى يا الفاضل إنو ده مشروع إستثمارى ، يعنى لو بعيد من الناس البجينى منو ؟ عشان كده لازم يكون فى موقع إستراتيجى وبعدين ما تخاف من قصة (الإزعاج) دى أنا ح أعمل عوازل (للصوت) عشان الناس تبكى لمن تقول بس !
    - كان كده أنا عندى ليك بيت (لقطه) فى (شارع الأربعين) ينفع للمشروع ده
    قام حاج صديق بمعاينة المنزل والذى يحتوى على عدد كبير من الغرف و(صالة كبيرة) إضافه إلى (صالون) قرر (حاج صديق) أن يقوم بتعديله ليكون بمثابه (حجرة إستقبال)
    - أنا البيت عجبنى يا الفاضل لكن بس عاوزك تجيب السباك يعمل ليا فى كل أوضه (حوض) غسيل و(حنفيه) ويوصلو (بالسايفون) عشان الزول بعد ما (يجعر) ويتفشى تمااام يقوم يستغفر ويغسل وشو !
    قام حاج صديق بعد الإتفاق على قيمة الإيجار بإخطار (االفاضل السمسار) أن (يغشاهو) فى البيت لإستلام (مقدم ثلاثه شهور) حسب الإتفاق على أن يقوم الأخير بتجهيز (سباك) و(نجار) للشروع فى عمل التعديلات المطلوبه إيذانا بإفتتاح المحل !

    فى البيت :
    - أها عملت فى مشروعك شنو يا حاج ؟ صدقو ليك الطلب؟
    - طبعا .. هم يا (نفيسه) حاجه بتجيب ليهم (قروش) ماشين يرفضوها ؟ - مواصلا- وكمان يا حاجه أقول ليكى حاجه ؟ أنا البيت ذاتو الح يكون فيهو المشروع لقيتو وكمان أجرتو !
    - كان كده عاد بس فضل ليك (الزبائن)
    - لا الزباين ديل مضمونين والله كترت ناس ماسكاهم (غبينه) وعاوزين (يفشوها)
    - غايتو أنا يوم الإفتتاح عليا أجيب ليك كم (واحده) يحررو ليكا (البكا) جنس (حرير) !
    - (فى إندهاش) تجيبيهم من وين كمان يا وليه؟
    - كيفن أجيبن من وين؟ الطلعن (صالح عام) والأولادن ماتو فى (المعسكرات) والرجالن (ماتو) فى الطيارات الكل يوم (تقع) دى .. والله أعمل ليك إفتتاح (ووووب) و(أحيااااا) ما تديك الدرب
    - إنتى يا حاجه عاوزة تطرشقى لينا المشروع ؟
    - أطرشقو كيفن يعنى؟
    - إنتى ما عارفا إنو (الإختلاط) ممنوع ؟ عايزة كمان تجيبى ليا نسوان يبكن ويسكلن و(يتشخنفن) قدام الرجال
    - ممنوع كيفن؟ مما يبقى علينا يكون ممنوع ؟ ما أهو (المذيعات) مع (المذيعين) والموظفات مع الموظفين و(المسئولات) مع (المسئولين) أكان فى (برلمان) أكان فى (غيرو) !
    - معليش يا حاجه .. دى الحكومة (تخلط) ذى ما عاوزا .. لكن نحنا لا
    فى هذه الأثناء يتمطى (حمادة) الطالب الجامعى الذى كان يستلقى بعد أن إستيقظ من النوم ظهراً
    وقد إستمع لنقاش الحاج والحاجه :
    - والله يا بوى أنا أجيب ليك لى مشروعك ده كترت (جكس) عاوز يبكى !! شواكيش ساااكت
    - ما قلنا ليكم أبعدونا من الحته بتاعت (الخلط) دى أحسن النظام العام يقفل لينا المحل قبل ما نبدأ
    - تعرف يا بوى عشان تتخارج من حتت (الخلط) دى أنا عندى ليك فكرة؟
    - اللى هيا شنو؟
    - تعرف تعمل ليك قسمين .. قسم (بكاء حريمى) وقسم (بكاء رجالى) !!
    - والله فكرة يا حماده يا ابنى ، ما تقول البيت فيهو سته غرف يبقو تلاته غرف حريم وتلاته (رجال) وأهو كلو (تنفيس) وفش (غبينه) !
    - (الحاجه تتدخل) : والله أنا رأيى غير كده
    - رائك شنو يعنى؟
    - أنا رايى كل ناس (غبينه) تعمل ليهم صالة ويكونو براهم .. يعنى ضحايا (الصالح العام) صاله براهم .. وأهل ضحايا (حوادث الطيارات) صاله براهم ..وضحايا وأهل (الأخطاء الطبيه) صاله براهم ..وضحايا (الشنو ما بعرف داك) صاله براهم وكده .. يعنى تلم الناس العندهم غبينه واحده مع بعض عشان (يواسو) بعضهم !! وإلا رأئك شنو ؟
    - (حماده يتدخل) : وكمان يابوى فى ناس عندهم (دبل غبينه) يعنى زول تلقاهو (شالوهو الصالح العام) جاهو (ضغط وسكرى) مشى يتعالج وقعت بيهو الطيارة .. أها ذى ده أهلو مش ح يكون عندهم (دبل غبينه) ؟

    المحل جاهز :
    بعد أن قام (حاج صديق) بتسليم الفاضل السمسار (قروش الإيجار) وقام بتوقيع العقد مع صاحب المنزل شرع بمساعدة الأخير فى تجهيز المنزل ليتوائم ونوعية بيئة المشروع حيث قام بتوصيل حوض غسيل فى كل غرفة لزوم غسل الوجه بعد (فاصل البكا والجعير) ثم قام بوضع دولاب فى كل غرفة يحتوى على (مناديل ورق) وفوط ومناشف كما يحتوى على كمية من (الدلاقين) لزوم تمزيقها من قبل الزبائن فى حالة تعرضهم لأى نوبات من نوبات البكاء (الهيستيرى) كما لم ينس أن يضيف لدولاب قسم الحريم علاوة على ذلك (عبوات) من (الرماد) لزوم نثره على الرؤوس بواسطة (المغبونات) ! كما تم وضع عدد من (فتايل الريحه) و(فحول البصل) فى جميع الدواليب لزوم لإستخدامها لإفاقة الزبائن فى حالة تعرضهم لأى حالات بكاء مفضى إلى (الغمران) ! كما تم وضع عدد محترم من(البراطيش) القديمة والشباشب والنعلات لزوم اللطم على الوش من أجل أن ينفس المواطن عن نفسو (تنفيس تماااام) !
    - أها يا بوى المحل عاوز تسميهو شنو عشان لازم تعمل ليهو إعلان وكده
    - والله يا حماده يا إبنى حتت الإسم دى كانت فايته عليا – مواصلا- أها تفتكر نسميهو شنو؟
    - والله يا حاج ممكن تسميهو .. تسميهو.. تسميهو أيوااا تسميهو (التنفيس عشان تعيش)
    - لا لا ده إسم طويل وما حلو
    - طيب يعنى تسميو شنو؟
    - (يفكر) : نسميهو (الدمعه الثكلى) !
    - (الدمعه الثكلى) بتاعت مين يا حاج؟ (بازرعه)؟
    - يا إبنى ديك إسمها (القبلة السكرى) !

    - (بعد تفكير) : خلاص أقول ليك حاجه يا حاج سميهو (فش غبينه)!
    - أيواا ده إسم جميل ومعبر ... فش غبينة ...! – مواصلا- خلاص أمشى أعمل ليك لافته كبيرة للمحل وأطبع ليك كروت وأعمل الإعلانات عشان الإفتتاح

    الإعلانات :
    على جميع الصحف اليومية (وخاصة الإجتماعية) ظهر الإعلان التالى :
    يتم فى الساعة السابعه مساء بإذن الله إفتتاح محلات (فش غبينتك) ، صالات مكيفه ذات عوازل صوت للبكاء الحار والسكلى والحى وووب ، يوجد قسم خاص للنساء المحل مزود بمناديل الورق وأحواض الغسيل والبراطيش والجزم والشباشب القديمة لزوم اللطم ، الأسعار فى متناول أى مواطن غلبان !!

    ونجح المشروع :
    لم يصدق حاج صديق عينية وهو يرى أفواج المواطنين تتداعى نحو (المحل) لدرجه أنه إضطر لطلب عدد (قوات الأمن) لتنظيم الصفوف والتى إنتابت بعض المواطنين الواقفين فيها حالات من (الإجهاش البكائى) حتى قبل أن يقومو بالدخول إلى صالات وغرف (البكاء) مما إضطر حاج صديق بعد أن رق قلبه عليهم أن يخاطب رجل الأمن قائلا:
    - بالله يا سعادتك الناس المغبونين و(على الهبشة) وقعدو من هسه يبكو ديل دخلهم أول !!
    - (إحتجاج): شنو يدخلهم أول ؟ يعنى عشان نحنا بس شويه متماسكين طيب أها شوووف
    (الجميع يبدأون فى البكاء الحار والنحيب مما جعل حاج صديق يخاطبهم قائلاً):
    - يا جماعه خلاص أصبرو شويه لمن تدخلو (صالات البكاء) .. المحل بيشيلكم كلكم .. ماتجيبو لينا الكلام بى جعيركم ده و(تخلو النظام) العام يجينا !
    - (الجميع ينتحبون فى تشنج)
    - خلاص يا جماعه إتنظمو شويه .. ناس حوادث الطيران يجو يقيفو فى الصف ده .. وناس الصالح العام عشان كتار خليكم فى الصف داك وناس (سندس) بى هنا .. وناس (الشنو ما بعرفو داك) خليهم يا سعادتك يخشو طواالى عشان (ممكونين) شديييد !
    فى اليوم الأول للإفتتاح إمتلأت (صالات وغرف البكاء) عن بكرة أبيها بينما ظلت جمهرة من (المواطنين) لا يستهان وهى تجهش بالبكاء خارج المحل تنتظر دورها فى (فش غبينتها)
    - آلو حماده ؟ إنت وين يا إبنى (مناديل الورق) دى خلصت .. أشحن ليك دفار جيبو بى سرعه – تانى يا بوى عاوزين حاجه
    - أيوة كمان أغشى سوق الخضار جيب ليك شوال شوالين (بصل) عشان حالات الأغماء !

    على الرغم من أن رسوم (فش الغبينه) كانت فى متناول جميع المواطنين حيث أنها كانت (جنيه) لكل ساعه (جعير) إلا أن (دخل) اليوم الأول قد كان مرضيا بالنسبة لحاج صديق الذى جلس على كاونتر الإستقبال يشرف على دخول (الزبائن) من الرجال بينما كانت زوجته الحاجه (نفيسه) تجلس على كاونتر قسم النساء !

    ثلاثة أشهر مرت .. المشروع يسير على ما يرام .. يدخل المواطن إلى محلات (فش غبينتك) بعد أن يقوم بتحديد (ساعات) البكاء والنحيب التى يود أن يقضيها داخل الصالات معزولة الصوت ويخرج محمر الوجه متورم العينين مستريح الأعصاب بعد أن يكون قد قام بفش (غبينته) ، بعد أن رأى حاج صديق بعينيه (الغباين) المختلفة للحالات التى تأتى إلى محلة
    وسمع بأذنيه (الجعير) و(السكلى) والنحيب لم يعد ينظر إلى ربحية (المشروع) بقدر نظره لتوفير جو (بكائى) مثالى للمواطنين مما حداه إلى تحديد يوم (مجانى) – بكاء جماعى- فى (الأسبوع) يخصص لغير القادرين على دفع رسوم (النحيب) !
    بينما كا (حماده) جالسا على (كاونتر الإستقبال) حضر إليه شخصان يحمل أحدهما بعض الأوراق بينما يحمل الآخر على كتفه (كاميرا فوتوغرافيه)
    - السلام عليكم
    - وعليكم السلام
    - الحقيقه نحنا من جريدة (عالم الإثارة) الإجتماعية وعاوزين نعمل معاكم (تحقيق) مصور خاصة والمشروع بتاعكم ده مشروع جديد وغير مسبوق
    - جدا .. مرحب بيكم .. إتفضلو
    - بس لو ممكن أول حاجه كده تعمل لينا جوله داخل (صالات البكاء) عشان نشوف المواطنين قاعدين (يفشو غبينتم) كيف ؟
    - جدا إتفضلو ! إنتو ذاتكم الليلة محظوظين عشان يوم (السبت) ده قاعدين نعمل فيهو(فش غبينه جماعى) وبنجمع (المغبونين) كلهم فى (صاله) واحده –مواصلا- يلا شوفو معاى (صالة النحيب الجماعى) !
    فى الصالة المعنية كان هنالك أكثر من ثلاثين شخصا من مختلف الأعمار (ينتحبون) بطرق مختلفة .. منهم من يبكى بحرقه ويتمتم ببعض الكلمات غير المفهومة .. ومنهم من يلطم وجهه ويصيح فى هيستيريا .. وقف (الصحفى) بعيدا عند باب الصالة وهو يتابع هذه اللوحة (التراجيدية) بينما لفت نظرة أحد المواطنين (المنتحبين) وهو يضرب راسه على (الحائط) بقوة فى حركات متتاليه وهو يجهش بالبكاء وهو يردد :
    - أنا كان مالى ومال كده !
    - أنا كان مالى ومال كده !
    نظر (الصحفى) إلى (حماده) متسائلاً:
    - إنت الزول القاعد يبكى ويضرب راسو فى الحيطه ده مشكلتو شنو؟
    - ده الوالد.. (حاج صديق) سيد المحل ده .. أمبارح ناس (الضرايب) جابو ليهو ضرايب أكتر من (راس مالو) وأدوهو إنذار 48 ساعه يا يدفع يا يصادرو المحل !
                  

07-04-2008, 09:57 AM

Adel Sameer Tawfiq
<aAdel Sameer Tawfiq
تاريخ التسجيل: 10-05-2006
مجموع المشاركات: 1074

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: سيناريوهات : فش غبينة ! (Re: الفاتح يوسف جبرا)

    الأستاذ المبدع الفاتح

    سلام و شوووووق شديييييييد

    مش دي تقريبا نفس فكرة حائط المبكى في إسرائيل ؟!
                  

07-04-2008, 03:32 PM

ناهد بشير الطيب
<aناهد بشير الطيب
تاريخ التسجيل: 02-08-2008
مجموع المشاركات: 4180

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: سيناريوهات : فش غبينة ! (Re: الفاتح يوسف جبرا)

    هسى يااستاذ الفاتح الواحد يبكى ولا يضحك ليك فى البوست ده


    ربنا يحفظك ويمتعك بالصحة والعافية يااااارب بقدر مابتسعد ايامنا....
    وجمعة مباركة
                  

07-04-2008, 06:28 PM

hisham civil
<ahisham civil
تاريخ التسجيل: 06-08-2008
مجموع المشاركات: 16

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: سيناريوهات : فش غبينة ! (Re: الفاتح يوسف جبرا)

    كم انت مبدع
    اخاف عليك من ابداعك
    لله درك
                  

07-05-2008, 06:25 AM

اسعد الريفى
<aاسعد الريفى
تاريخ التسجيل: 01-21-2007
مجموع المشاركات: 6925

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: سيناريوهات : فش غبينة ! (Re: الفاتح يوسف جبرا)

    استاذنا
    بعد حمدلله على السلامة
    و بعد ما فشينا غبينتنا
    .. نقول ليك .. (بيتون بليس) و لا اليسون ماكنزى ذاتها ..
    تحياتى و تقديرى
                  

07-05-2008, 09:36 AM

نصر الدين عثمان
<aنصر الدين عثمان
تاريخ التسجيل: 03-24-2008
مجموع المشاركات: 3920

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: سيناريوهات : فش غبينة ! (Re: اسعد الريفى)

    Quote: - بالله يا سعادتك الناس المغبونين و(على الهبشة) وقعدو من هسه يبكو ديل دخلهم أول !!
    - (إحتجاج): شنو يدخلهم أول ؟ يعنى عشان نحنا بس شويه متماسكين طيب أها شوووف
    (الجميع يبدأون فى البكاء الحار والنحيب مما جعل حاج صديق يخاطبهم قائلاً):
    - يا جماعه خلاص أصبرو شويه لمن تدخلو (صالات البكاء) .. المحل بيشيلكم كلكم .. ماتجيبو لينا الكلام بى جعيركم ده و(تخلو النظام) العام يجينا !
    - (الجميع ينتحبون فى تشنج)

    وداعاً أيتها الغبينة ...
    لك فائق مودتي وتقديري
                  

07-05-2008, 10:02 AM

الطيب شيقوق
<aالطيب شيقوق
تاريخ التسجيل: 01-31-2005
مجموع المشاركات: 28804

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: سيناريوهات : فش غبينة ! (Re: نصر الدين عثمان)

    استاذ الفاتح حمد الله على السلامة

    فكرة محل البكاء التجارية دى حتنجح مليون المية بس لو نجحت وحققت ارباح ، بعد خصم الضرائب ، الحكومة حتقوم تلغي ترخيصها بحجة انها لم تخضع لمناقصة زى مشروع ابي نعامة شفت كيف ؟ّّّّّّّّّّّ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟.
                  

07-05-2008, 10:22 AM

كمال حامد
<aكمال حامد
تاريخ التسجيل: 06-06-2008
مجموع المشاركات: 595

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: سيناريوهات : فش غبينة ! (Re: اسعد الريفى)

    ولأننا مبدعون في التقليد ، فقد مررت بعد عام واحد فقط بشارع محل ( حاج صديق ) اللي حكى لينا حكايتو الفاتح جبرة ، فكانت هناك عدد من المحلات كلها فتحت في نفس المجال ، ودي أسماء بعضها :
    1) المركز السوداني للبكائيات والترويح ( خبرات أجنبية)
    2) محلات سكلي وسكلبة ( رسوم قدر ظروفك)
    3) تجعرون
    4) ........

    (عدل بواسطة كمال حامد on 07-05-2008, 10:33 AM)

                  

07-05-2008, 08:05 PM

الفاتح يوسف جبرا
<aالفاتح يوسف جبرا
تاريخ التسجيل: 10-31-2006
مجموع المشاركات: 1617

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: سيناريوهات : فش غبينة ! (Re: الفاتح يوسف جبرا)

    Quote: مش دي تقريبا نفس فكرة حائط المبكى في إسرائيل ؟!



    شوق شديد يا مولانا ...الرفق أنهم قاعدين يبكو بى مزاجهم !!
                  

07-05-2008, 08:09 PM

الفاتح يوسف جبرا
<aالفاتح يوسف جبرا
تاريخ التسجيل: 10-31-2006
مجموع المشاركات: 1617

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: سيناريوهات : فش غبينة ! (Re: الفاتح يوسف جبرا)

    Quote: هسى يااستاذ الفاتح الواحد يبكى ولا يضحك ليك فى البوست ده


    أقول ليكى حاجه يا ناهد ؟ أبكى شويه وبعدين أضحكى كتير !
                  

07-05-2008, 08:12 PM

الفاتح يوسف جبرا
<aالفاتح يوسف جبرا
تاريخ التسجيل: 10-31-2006
مجموع المشاركات: 1617

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: سيناريوهات : فش غبينة ! (Re: الفاتح يوسف جبرا)

    hisham civil

    أن تحس بالإبداع إن وجد فهذا يعنى أنك مبدع .. ألف شكر وتحية وربنا يخلينا نكتب الشئ المفيد والبيسعدكم أمين !

                  

07-05-2008, 08:17 PM

الفاتح يوسف جبرا
<aالفاتح يوسف جبرا
تاريخ التسجيل: 10-31-2006
مجموع المشاركات: 1617

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: سيناريوهات : فش غبينة ! (Re: الفاتح يوسف جبرا)

    Quote: و بعد ما فشينا غبينتنا


    أسعد الجميل .. كيفك ياخى ؟ فى قاهرة تتصل خرتوم ما تتصل ؟ الظاهر غبينتك الفشيتا دى ما (دبل) !
                  

07-05-2008, 08:30 PM

الفاتح يوسف جبرا
<aالفاتح يوسف جبرا
تاريخ التسجيل: 10-31-2006
مجموع المشاركات: 1617

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: سيناريوهات : فش غبينة ! (Re: الفاتح يوسف جبرا)

    Quote: الحكومة حتقوم تلغي ترخيصها بحجة انها لم تخضع لمناقصة


    ود شيقوق أخوى إذيك .. شكراً على الإتصال يا أمير ربنا يديك الصحة والعافية وما تشوف شر ... قلت ليا (لم تخضع) لشنو؟
                  

07-05-2008, 08:58 PM

الطيب شيقوق
<aالطيب شيقوق
تاريخ التسجيل: 01-31-2005
مجموع المشاركات: 28804

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: سيناريوهات : فش غبينة ! (Re: الفاتح يوسف جبرا)

    الاستاذ جبره

    Quote: ... قلت ليا (لم تخضع) لشنو؟


    منااااااااااااااااااقصة
                  

07-05-2008, 08:34 PM

الفاتح يوسف جبرا
<aالفاتح يوسف جبرا
تاريخ التسجيل: 10-31-2006
مجموع المشاركات: 1617

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: سيناريوهات : فش غبينة ! (Re: الفاتح يوسف جبرا)

    Quote: 1) المركز السوداني للبكائيات والترويح ( خبرات أجنبية)
    2) محلات سكلي وسكلبة ( رسوم قدر ظروفك)
    3) تجعرون
    4) ........


    تجعرون دى يا كمال تكون بتاعت واحد من الجماعة أكيد !
                  

07-05-2008, 09:43 PM

Abdelmuhsin Said
<aAbdelmuhsin Said
تاريخ التسجيل: 10-10-2006
مجموع المشاركات: 2678

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: سيناريوهات : فش غبينة ! (Re: الفاتح يوسف جبرا)

    استاذ الفاتح حمد الله على السلامة
                  

07-06-2008, 06:32 AM

الفاتح يوسف جبرا
<aالفاتح يوسف جبرا
تاريخ التسجيل: 10-31-2006
مجموع المشاركات: 1617

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: سيناريوهات : فش غبينة ! (Re: الفاتح يوسف جبرا)

    Quote: استاذ الفاتح حمد الله على السلامة


    الله يسلمك يا محسن ويديك الصحة والعافية .. شكراً على المرور .. تحياتى وحبى
                  

07-06-2008, 07:49 AM

اسعد الريفى
<aاسعد الريفى
تاريخ التسجيل: 01-21-2007
مجموع المشاركات: 6925

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: سيناريوهات : فش غبينة ! (Re: الفاتح يوسف جبرا)

    استاذنا و تاج راسنا
    حكاية اضربو لى دى زى حكاية .. واحد رفدوه من الشغل .. و صاحبو الثقيل قال ليهو القاك وين .. قال ليهو (تعال لى فى الشغل)!
    ساعدنا بنمرة .. و المفتاح علينا ..!!
                  

07-06-2008, 09:51 AM

Siham Elmugammar
<aSiham Elmugammar
تاريخ التسجيل: 06-18-2004
مجموع المشاركات: 3488

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: سيناريوهات : فش غبينة ! (Re: اسعد الريفى)

    Quote: ولأننا مبدعون في التقليد ، فقد مررت بعد عام واحد فقط بشارع محل ( حاج صديق ) اللي حكى لينا حكايتو الفاتح جبرة ، فكانت هناك عدد من المحلات كلها فتحت في نفس المجال ، ودي أسماء بعضها :
    1) المركز السوداني للبكائيات والترويح ( خبرات أجنبية)
    2) محلات سكلي وسكلبة ( رسوم قدر ظروفك)
    3) تجعرون
    4) ........


    حلوووووووووووووووووووووووووووووووووووه


    اسعد الريفى حمدالله على سلامتك انت كمان الله يديك العافيه و كفاره

    سلام استاذ الفاتح والله افكارك دى كما لقيتها يوم على ارض الواقع الله يلعن اى حاجة
                  

07-06-2008, 09:37 AM

الفاتح يوسف جبرا
<aالفاتح يوسف جبرا
تاريخ التسجيل: 10-31-2006
مجموع المشاركات: 1617

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: سيناريوهات : فش غبينة ! (Re: الفاتح يوسف جبرا)

    راجع المسنجر يا أسعد !
                  

07-06-2008, 08:35 PM

حبيب نورة
<aحبيب نورة
تاريخ التسجيل: 03-02-2004
مجموع المشاركات: 18581

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: سيناريوهات : فش غبينة ! (Re: الفاتح يوسف جبرا)

    كأعادة لسيناريو مكرر
    لا أجد سوي الأندهااااااااااااش

    لآخر حدود الآآآآآآآآآآآآآآآآش


    بجيك صاد


    شكرن كتيرن!
                  

07-07-2008, 07:17 AM

محمد المرتضى حامد
<aمحمد المرتضى حامد
تاريخ التسجيل: 08-14-2006
مجموع المشاركات: 10832

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: سيناريوهات : فش غبينة ! (Re: حبيب نورة)

    Quote: وكمان يابوى فى ناس عندهم (دبل غبينه)

    شكرا،

    وللمره الألف يا عزيزنا ، مليار حمدالله عالسلامه.
                  

07-07-2008, 10:10 AM

أيمن دياب

تاريخ التسجيل: 07-03-2008
مجموع المشاركات: 3439

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: سيناريوهات : فش غبينة ! (Re: محمد المرتضى حامد)

    استاذي الفاتح يوسف..
    الف حمد لله على سلامتك.. وما تشوف شر.. وكفارة ليك ياأستاذ يارائع..


    تلميذك من زمن الأكاديمية..
                  


[رد على الموضوع] صفحة 1 „‰ 1:   <<  1  >>




احدث عناوين سودانيز اون لاين الان
اراء حرة و مقالات
Latest Posts in English Forum
Articles and Views
اخر المواضيع فى المنبر العام
News and Press Releases
اخبار و بيانات



فيس بوك تويتر انستقرام يوتيوب بنتيريست
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
About Us
Contact Us
About Sudanese Online
اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين
News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums
If you're looking to submit News,Video,a Press Release or or Article please feel free to send it to [email protected]

© 2014 SudaneseOnline.com

Software Version 1.3.0 © 2N-com.de