|
|
 الرسول فيكم لو مازحيتوا لي كده من الباندوث دا
|
اول الحكي
ماشيك وعارفك يا حريق
فى يوم غماماتك ..بجن فرهد غيابك اغنيات
ظلت اراضى اللقيا بور
وبلقاكى يا كل الطيور مسجونة والحرية سور
وبلقاكى وبيناتنا الثبات
وبيناتنا شمس البكرة فى لحظة مخاض
طول الوجع رشح مواطن العافية فيك
خلانى ارجع وابتديك
واقراكى من كل الجهات
الكلام : عاطف خيري ، الغناء مصطفي سيد احمد
زحوا لي كده من الباندوث
هذا الباندوث الذي شغل الانترنيتيين واقام البورداب وما أقعدهم حتى هذه اللحظة وبسببه قامت شكلات كتيرات ، لم تتطاير فيها رقاب لكن على الاقل تعلمنا منها تكنيكات جديدة للمتشاكلين رغم اعتزالنا اللعب على مضمار مثل هذه الالعاب الخشنة التي تحذرني منها نصف شغالتنا الاسيرلانكية ا لا انني في لحظات شوية كدة تستفذني هذه الشمارات واقرب استعمل تكنيك المديده حرقتني .. فتقف في وشي صديقتي السيرلانكية وتسحبني الى الداخل وهي تكثر من نقنقتها فرغم كل شيء فهي حنونه الى حد ما .
سيري هذا انت سوي سوي هوا ، انت سوي جنجال بعدين انت في نفر يضرب كده واحد بوكس انت في روح قبرستان ، وتعني ان تقول لي انني ليس في روح لاي شكلة هي ضربة واحدة فقط سوف تسكنني المقابر .
والحق اقول انني اخاف اذ انني واحدة خوافه ، اذا ما تبادر الى ان الذي يناقشني قادر على مناولتي لزكة حتى ولو خفيفونه اترعوي وانطم حتى اذا ما ضمنت انه ليس بقادر على ان تلاحقني حتى ولو اصابعه اعود نافشة ريشي. والا فانني لن اجازف باسناني ولا نخرتي ، اعرفني اني لست حمل اكثر من لكزه خفيفونه كده فاحسن لي ان انعجص في مكاني واهمد ، وكفاني استعراض العضلات التبشيه . هههههههااه
هذا الباندوث الجبان الذي اختبئ مني وانا افتش عن اصله وفصله بين شقوق شرائح كومبيوتري .فيا ويله وثبوره مني ، خليه بس يصبر لي السنيح القبيح ، كدي النلم فيه .
بحثت وفتشت ولفيت على كل الشرائح الثابته منه والمتحركة ونفضتها وهززتها بعنف مثل ما تفعل نسوان الشاي لمنقدهن في حركة شريرة جدا ، تحمل اكثر من رد فعل قوي ، فيتششت الرماد ويذر غباره في وجه من ينجعص امامها على امل شرب الشاي ، لكنه يعاكسها وبسماجة غريبة وغلاثة تستحق ان تشيل اكبر جمره وهي ملهلبه لتدخلها في عيونه ، لانه ما احترم ذاتها ولا راعي فيها الله ولا رسوله ، وراء شهوانيته الحيوانيه انساق يتخذ من هذه السانحة معولا يهدم به معبدها ، موش برضو العمل عبادة ؟
فان كان عنده شوية احساس ، يحترم نفسه ويعرف ان (هززت الجمر وذر الرماد في العيون بهذه الكثافة معناها موش خلاص اتحنطرت بشااايك ، يلااا هوووينا يا لغم والذين لا يفهمون في لغة الرندوك افسر ماغمض من كلامي واشكل عليهم ، اقول انها تعني الناس السمجين .
وحينما لم اجد للباندوث على كومبيوتري أي اثر ، استعنت بالله وبجهاز اللاب توب خاصة اخي الاكبر ، وغافلته ، ثم فككته بسكين سنينه ، ومع ذلك ما وجدت له من اثر ايضا. قاتل الله الباندوث بقدر ما زهجني .وبسببه تلقيت كثيرا من الشكاوي من حبيبة البي يازوله123 ومن الزول الراقي يازول يازول .
دقيقة بس ، هسع بجي
للهترشه بقية
|
|
 
|
|
|
|
|
|
|
|
Re: الرسول فيكم لو مازحيتوا لي كده من الباندوث دا (Re: shiry)
|
مزاج مفتوح للهترشه
اليوم استيقظت من النوم وبي رغبات شريره جدا ، ان اصوط فيه واجوط، فليشتكيني هذا الباندوث عند لجنة التموين الزراعي التابعة لوزارة البريد والبرق ولا حتى هيئة كبار مصممي الحدائق المنزلية التي تمتد في اوطاننا فداناتا كثيرة ، ماشاء الله نحن ناس ، بنحب الاشياء الخضراء والزهور ، عشان كده تجدهم على الدوام يتمنون لك ، حينما تقسي عليك طبيعة الارض وتيمم شطر المنافي ، دربك اخضر. وهذا من الاستحالة اذ لم تكن من سكان امستردام او فيينا
وحينما تكون مزهج احدهم يقذف في وجهك ، قشه ما تعتر ليك . لا تعتمد على هذا الدعاء ، فانك لا محال متعتر بوعثاء الطريق ، فالقش في شوارعنا اكثر من الهم على القلب ، فانت لا محالة متعثر ولا محالة واقع وردددلووووب . هو نحن لاقين ناكل عشان نخلي البلدية تشوف شغلها في الشوارع . احسن لينا نفتحها محطات بنزين اهو الركشات في الشارع زيها زي الدفارات والاتوبيسات . عجييييبة اول مرة اشوف لي عاصمة محطات بنزينها اكثر من محطات تنقيه المياه وبيعها ، ومراكز البواليص بين كل مركز ومركز توجد شرطة شكل ،
شي امن المجتمع ، وشي الشرطة الشعبية ، وشيء الخدمة الالزاميه ، وشي شرطة النظام العام . في الوقت الذي تحتاج فيه الى صبر ايوب او اقمار التجسس الامريكية لتلم ليك في مركز ثفافـــي واحد ، وبرضو يقول ليك انقـــاذ ؟
فهذا الباندوث ان زعل مني خليهو يشتت وقشه ما تعتر ليهو .. فليدعو ناسوا ، وسوف ادعو هترشتي ، ها انذي اجلس في البيت ولا احد يقلقل وحدتي ، نصف سيرلانكيتنا ، جاءتني صباحا ، تشتكي من الارق ، وتشتكي الحنين ، وتشتكي الفلس ، وتشتكيني انا نفسي ، غيظة في وكية في اهتمامي بها رغم انها تعرف انها تحكيني بلغة ربما لا افهم منها غير اسمي ، واسمها فقط . وحتى الاسمين يطلعان بلغتي .
واردت انا من هذه الهترشه الصغنتوته التي لن تقلق الباندوث ولن تسهكه قيد بندثه واحده ، لانني غبت عنكم وعنه يجي مساحة اسبوع كامل من الخميس الى الخميس . فكيف يمكنه هذا الفقري ان يمد رأسه ويسعلني ، لماذا ، عكرت عليه هدؤه وصفاء ذهنه . ؟؟
عارفه وحات الله
اني زهجتكم بس
للهترشه احكام
نعمل شنو ، جاييا
راجعة تاني
| |
|
|
|
|
|
|
|
|
|
Re: الرسول فيكم لو مازحيتوا لي كده من الباندوث دا (Re: shiry)
|
للنساء ايضا عاطفة للشراء
وانا اكتبكم واهترشكم هنا براحه براحه ، تلقيت اتصالا من صديقتي ، تسألني عن عطر احبه اسمه شاي ، ويخيل الي فعلا انه من الشاي ، لذلك انا اشتريته ، وكانت قد زارتني في يومي السابق فاريتها اياها ، لذلك راحت تفتش عنه وحينما اعياها البحث ، هاتفتني وهي مستاءة : اقول شيري ، فين احصل عطرك المنيـّل دا .
طيب هو منيل انت ايش تبغين فيه .؟
طيب يا سأأأأأأأأيله ، يجيبك الموز يا قرد .
للنساء عاطفة قوية جدا وشره تجاه كل ما يمكن ان يشتري بفلوس حتى ولو كان صابون بودرة من عينة (داك )، له رائحة معفنة تجعلك تكره ثيابك من بعده حتى ولو كانت من حرير ، او اهدتك اياها الاميره سارا فيرجسون . لذلك يعشقن التسوق ويتفنن في التسكع على فاتيرانات المحلات سواء ان كن فعلا يردن الشراء او لم يردن .
عليه اسمع نصيحتي سيدي الرجل ولا تدقس . ان كانت زوجتك او اختك او حتى امك ، اخبرتك عن طريق التحنيس ان تسمح لها بالتسوق من اجل خبز او حتى لبان لادن ، واستدرجتك حتى وافقت ان تكون هي في صحبتك ، هي تقول ذلك ، لانها تعرف انك سرعان ما تمل هذه التكنيكات وتتوه في تلافيف هذه الاستراتجيات فانت لست حمل امرة واحدة حتى ولو كانت طفله ، تهم ببدء فرد مشروعها التسوقي بصحبتك ..
لا تفعل سيدي الرجل ذلك وانت على غفلة من الامر وعاري تماما من اي غطاء جووي . فانك مهزوم لا محال وما اعتقدت فيها من ماكينات الصرافات الالكترونيه وبطاقات الصرافات ، محصتنك ضد رغباتها الشره ، فانها سرعان ما تنهار وتنهار تبعا لذلك كل مدخراتك الماليه اي ضحاكاتك ان كانت لديك .. لان ذلك بكل بساطه يعني ان الغرض الذي ربما لا يتعدي ثمنه الريالين ، سوف تضطر ان تضع على اقل تقدير ومع الرافة من السيدة بتاعتك او الانثي التي بصحبتك على يمينه اكثر من صفرين ، وان دقست شوية كده سوف تتحلس كل كنجالاتك ، وسوف تجد نفسك في الاخير جريت شفاط محفظتك ، واصبح بح .
هي كده ، دائما ما تبدأ بالاشياء الهينه وبطلب صغنتوتي ، عايزين لينا مرقة ماجي ، وترى انت ، ان الامر اهين من هين ، فهي من الحرافة والرهافة والتفتيحية ما يجعلها تتحصن جيدا امام أي محاولة منك للهرب من صحبتها .
لذلك تتفن في شحدك للتسوق معها ، حتى تجر رجلك وتتورط في مشروعها التسوقي وتراه ، انت حاجة بسيطه ، اهو نشتري دماغنا .
لكن سرعان ما يتبين لك ان شراء الدماغ هذا الذي سعيت من اجله تحول الى كركيب الدماغ وتلفه .
وما ان يلطشها هواء كندشة العزيزية بنده ولا سوق الحجاز على اسوء افتراض باب شريف ، الا وتنقطع الشعره التي بينك وبينها ، وتصبح هي سعرانه عديل كده ، الله يا ابو فلاااان شوف الكريم دا ينفع لي سموحه .. يا الله ، شوف سماحة ثلاجة الشاي دي ، بالله موش رخيصه ؟ اهو رمضان جااي . مع ان رمضان الذي تتكلم عنه يدوب ليهو اسبوعين من ما خلص .
اها شفت ، الملايات دي بالذات انا شتفهم عن ناس ليلي ، والمعفنة قالت لي اشترتهم بميتين ريال ، شوف شوف شوف بالله الملايات سمحاتها ورخصها ، بمائة وثمانون ريال بس .
فللاغراض سحرها وهي تتمدد على ارفف المتاجر ، فكما يجذبكم شكل السلعة ، انا ايضا تجذبني التحذيرات التي تّدون بجانب او فوق او على جنب او تحت صندوق سلعة ما .
-رجي هذه القارورة تماما قبل ان تستعمليها ..
- للعامل المؤكسد في هذا المنتج تفاعلات ربما تؤثر على جلدك ، فابعديه عن متناول الاطفال ،
عليكم الله شوفوا الفلسفه ؟؟ يؤثر على جلدك انت ، بعدين ابعديه عن ولدك .
ومع ذلك نشتريه ، لانه استفذانا ..
عن نفسي دائما ما تستفذني ، قسم المثلجات وقسم الكريمات ، فللاسنكرز ، رهبة عظيمة . بغلافها ، بطعمها ، بحلاوتها وبنكهتها ، لا تنفك ، تتحاوم جمب تلاجتها ، ما ان تشتري واحد الا وتجدك مرهون الي الستة الباقيات ، وساعتها ، تقول ياخي سيبك خلينا نشيل الدسته كلها ، اهو كلها اسمها تحلية بــُق .
كان بودي ان هترش معكم ، لكن تاتي دائما الشمارات بما لا نحسب لها اي مرصد . ساكتفي بهذه الهترشه على امل ان اعاودكم ان سمحت لي ظروفي بالدخول مرة ثانية
اخر الحكــي
هنالك عظمة ما، في ان نغادر المكان ونحن في قمة نجاحاتنا
انه الفرق بين عامة الناس ..
والرجال الاستثنائيين
احلام مستغماني ـ ذاكرة الجسد
| |
|
|
|
|
|
|
|
|
|
Re: الرسول فيكم لو مازحيتوا لي كده من الباندوث دا (Re: اساسي)
|
اساسي الجميل
سلام مربع
يعز مقامك ياود امي
ويخليك
والله ماقصرت خالص
عرفتني كيف بالله لو ماهترشت بموووت
..؟؟
والله انا كل مايكون عندي فرصة صنغتوته كده
في البورد دا
لن يفلت مني باخوي واخوك
مثل ما يقولون
هذا الباندوث
والله يفكني منه بس ، الكهرباء تقطع
ولا بطاقة الاشتراك تخلص
غير كده
جيبوا عكاكيزكم يا هل العوض وشانتير
وطالعوني الخــلاء
سلام خاص ليك يا خالتي بيان
وانا اتذكر بوستك الرائع هنا
سلمت ياساسي للطله البهية
| |
|
|
|
|
|
|
|
|
|
Re: الرسول فيكم لو مازحيتوا لي كده من الباندوث دا (Re: Ahlalawad)
|
سلام مربع
اهل العوض
عشان كده شايفاك ليك مدة
مو باين نوب
اتاريك انت غاطس في التشليح
مبروك الترقيه الجديده
بس نصيحتي لك ما تشيل معاك قروش كاش
وانت تتسوق هناك
حاول استعمل بطاقاتك الاعتمادية
لانو اتخيل لي كده التسوق
في تلك المحلات حاجة ماتخلص
عارف مره كده الشغالة الاندونيسيه
تبع جيراننا
زهجتها ليك واقلقت مخها
قالت انت في مخ مــره خــراب سيري
روح طايف ، طايف مافي يقبل
انت تشليح مافي حصل مخ
وقلت في نفسي يابت
ممكن يكون التشليح فيهو مخ ،ياباني
ولا حتى مخ ، تشادي
المهم اركب عللي هذه الجمجة الفارغة
وراتاح شوية
زي مابنعمل في الجوالات
يوم احمر ، ويوم بنفسج
ويوم موف
على فكره
ايش نوع جوالك
؟؟
| |
|
|
|
|
|
|
|
|
|
Re: الرسول فيكم لو مازحيتوا لي كده من الباندوث دا (Re: shiry)
|
شيري
سلام ، مستطيل ومسدس ومثمن
سلام من كل الأركان
سؤال : هل هناك علاقة بين الباندوث والبانجوث
والبانجوث بلغة أهل الدنيكا الولد الصغير
تعرفي نفسي في شنو!! أوديك جهاز المغتربين
وأخليكي تعمل إجراءات الإستيفاء لوحدك ، وبحذافيرها
بشرط تكوني من مطلوبي الخدمة الإلزامية
وبعد الحصول على تأشيرة الخروج بالله أعمل لينا بوست كارب
| |
|
|
|
|
|
|
|
|
|
Re: الرسول فيكم لو مازحيتوا لي كده من الباندوث دا (Re: ولياب)
|
سلام مربع
ولياب
يجازيك يا ولياب
عايز توديني الخدمة الالزاميه
عايزهم يبشتنوني
اكتر مما انا مبشتنه
هاههاهه
الله يكفينا شرهم ناس جهاز المغتربين
بجيهم
بس بجيهم وانا مضافة في اقامة
وجواز يحمل مهنة طالبة
قول معاي
انشاء الله يارب جوازي يفضل طالبة كده
وما يسحروني
هاههههه
| |
|
|
|
|
|
|
|
|
|
Re: الرسول فيكم لو مازحيتوا لي كده من الباندوث دا (Re: shiry)
|
شري
شكرا على النصيحة الإعلانية
طيب لو مشيت هناك وأكيد حا أمشي
ألاقيك في دكان منو من الجماعة
والمشكلة إنهم ما بقبلوا كاش ما عارف ليه
دايما شغلهم بالورق الفيه الزول أبو صلعة داك
ويقولو ليك تورد لينا في حسابنا في البنك السويسري
بالله الدينار دا مالو؟
أما بالنسبة للموبايل
دقيقة .. إتي قصدك الموبايل البشتغل في محلات التشليح
ولا في المستفشى الفي الطايف
كلهن لونهم أحمر
| |
|
|
|
|
|
|
|
|
|
Re: الرسول فيكم لو مازحيتوا لي كده من الباندوث دا (Re: Ahlalawad)
|
سلام مربع
اهل العوض
اكيد تلاقيني منجعصة في جار القمر في ركن تهبهب فيه الكندشه الناعمة في من مكيفات تهدهدك ، حتى يصيب نافوخك الخدر ، ولا تعرف هل هواء هذا المكيف اصلا كده حلوه ، وطاعمة وريحتها حلوه ، ولا بجيبوها وبعدين يغسلوها كويس ثم يغمسونها في العطور الباريسيه الراقيه ..
واكيد في محلات زي كده ، جار القمر ، وهمسات الاماسي ، لا تقبل الا البطاقات الائتمانيه ، على ذكر البطاقات الائتمانيه ، على شلاقتي ، صديقتي استحوذت على احداها وباسمها ، ويضعون عليها اسمك كمان ، وقلت ومالو ، انا اعمل لي واحده ، وليه لا
وما ان عبئنا هذه البطاقات حتى كسفوني ، بانني اجنبيه وفي الاجنبيه كمان مضافة ، يعني لازم ابوي يوافق يطلع لي ،
وطبعا ، ابوي وانا بعرفو ، بطاقة الصراف الاليكتروني ، مرة لكسل اصابه ، ولنقة شديدة خوطت نافوخه بها ، رضي ان يرهن عندي بطاقة الصراف ، وعندما شاءت الظروف ان يعرف رصيده ، عرف انني (عوقته) على حد قوله شديد
فكيف يقبل ان يسلمني بطاقة اعتماد ، امرح واسرح بها حيث اشاء ،
لا برفع من كريمات ولا حلويات ، ولا فساتين ولا عطورات ،
وبلعت ريقي وقعدت اشحد في الله ، يديني ويغنيني ، وفي الحلويات اتهني ، والكريمات اغطس ، أنشاء الله عساهم ما وفروا ..
الموبايل الانا معاي ، لوقت قريب كنت احفظ رقمه ، لكن الله يجازيهم ناس الاتصالات قصدوني عديل كده ، قالوا لي اتعديتي الحد الائتماني حقك ، وقاموا قطعوهو
هسع انا شايلاهو معاي لكن من غير اتصال ، ولان لونه عاجبني جدا ، لذلك لا مانع عندي من افضح لك لونه ، انه موووووف شاشته ملونه ، وبستخدم برنامج اكس بي ملون ..
ايه رايك في النوع دا من الجوالات ؟ عندك زيو ؟
في حالة الموافقة على شراءه ، اكيد اذا اودعت لي قيمته في رقم حسابي ، ح اتعطف واتنازل وابيعوا ليك ، لانو بصراحة الموبايل دا ، مافيش حد استعمله الا نفرين
انا واحدة ، والثانيه ، اصالة .. لو مغالطني ، اتصل عليها واسعلها .
| |
|
|
|
|
|
|
|
|
|
Re: الرسول فيكم لو مازحيتوا لي كده من الباندوث دا (Re: abas)
|
العزيزة شيري
ياريت لو نقضي على الباندوث بمثل روائعك التي تنثريها بين الحين والآخر .الباندوث راخ كلو في المشاكل والخلافات الشخصية وتدخل الاجاويد وضاع منا الكلام العذب الجميل وياريت تواصلي هترشاتك ولو الباندوث كمل نعمل لك الف باندوث من اجل كلامك الجميل
| |
|
|
|
|
|
|
|
|
|
Re: الرسول فيكم لو مازحيتوا لي كده من الباندوث دا (Re: ابو يسرا)
|
سلام مربع
عباس
من خشمك لي باب السماء
انا لو الهلال غلب
المريخ
ح اسوي ليكم
قهوة ، ومعاها تمر
ايه رايكم
؟؟
ابو يسرا
انشاء الله يارب دائما مبسوط
ودائما دماغك بعيد من المشاكل
ومرتاح البال
انت ويسرا
العسوله البشوف فيها دي
وماتخاف انا هترشتي ما ح تكمل
لكن خايفه جد جد على الباندوث
يقوم من الزهج ، يفكوا فيني
سلمت ياطيب للطله العذبة
مشتاق
طبعا نحن متذكرين اننا باركنا ليك
النجاج والتخرج
ومتذكرين جدا زي امبارح دي
انك ما عملت لينا حاجة
يعني ما ضبحت اي دم
ولا قسمت لا حلاوة ولا تمر
ولا عملت قهوة سيدي الحسن
على العموم
عندي ليك بشاره
اذا الهلال بكره باذن واحد احد
غلب المريخ
11/2
ح اعبي البورد دا كلو سرامس شاي
لمن الناس تتنفس الشاي
بالعناع كمان
عشان ماالعطشان يروي
سلمت ياسيدي لنكهات الشرير
عليك وعليه الف سلام
| |
|
|
|
|
|
|
|
|
|
Re: الرسول فيكم لو مازحيتوا لي كده من الباندوث دا (Re: shiry)
|
العزيزه شيري
صباحك بنكهه من نكهات اخونا شرير والبرتقاله
طبعا من فتره طويله لم يسعفني الحظ في الدخول الي راكوبتك العامره
اقصد بوستاتك العامره وشايفك الليله مشغوله بالباندوث كيف اخبارك
وكيف جده معاك ؟وبالمناسبه انت حكايتك شنو مع الشاي الظاهر انك
كييفة شاي زي ووالله انا من غير شاي عامل زي بتاع المخدرات طول
اليوم حايص ولايص في البيت الحمد لله بقت علي الشاي بس لانو السجاير
بتعبني والحاجات التانيه ما من انصاره الغريبه مرض الشاي ده
اصابني من كم سنه بس يمكن من الغربه ياربي؟
ولك الود والورد
| |
|
|
|
|
|
|
|
|
|
Re: الرسول فيكم لو مازحيتوا لي كده من الباندوث دا (Re: مشتاق)
|
شيري يا قلب وروح البورد وما حوله
سلاااااااااام كتييييييير
شيري انا بقترح انو ناس البورد يخصصوا يوم يسموهو
يوم التبرع لشيري بالباندويدث
ويصرفوها ليك وتتصرفي فيها زي ما انتي عاوزه
وكان الود ودي
زول يكتب غيرك في البورد دا مافي
ونظل كلنا قرأ
ونكون رابطه معجبــــي شيــــري
| |
|
|
|
|
|
|
|
|
|
Re: الرسول فيكم لو مازحيتوا لي كده من الباندوث دا (Re: HOPEFUL)
|
سلام مربع
هوب فـل
يعيط العافيه ياسيدي طول ماالجداده حافيه
وانشاء الله عمرها ما لبست
عشان تظل طوال العمر شباب في شباب
ياراجل يازوق ياراقي
اتخيل الكلام العسل بتاعك دا
رفع لي معنوياتي
واصدقك القول
رحت اتخيلني عندي فايض كبير جدا
من الباندوث
وتساءلت
ياتري ماذا تراني فاعلة
وقلبت السؤال علي طول
لانني عرفت انني اصلا وكل الناس عارفه الااجابة
انني سوف اكمل الباندوث في هترشتين
يعني ما ح الحق اتهني بالباندوث
لكن كان سؤالي
ياربي ناس البورد ح يصرفوا كيف
؟؟
| |
|
|
|
|
|
|
|
|
|
Re: الرسول فيكم لو مازحيتوا لي كده من الباندوث دا (Re: مشتاق)
|
شيرين سارت
للنجوم فاشرقت فى صحو
هذا اليوم شمسا فى المساء
شيئين شاء ان تكون
فاخفقت ان لا تكون الا
شمس للحقيقة فوق
اقبيه السماء
وما جمال الشمس يدركه النظر
ولا خيال الشعر سطره القدر
شيرين يا شوقا تاجج
فاق احتمال اخيله
البشر
شيرين يا عشقا توهج
للعشاق غنى وحيال اغنيتى
كفر
اهديك كل مساحتى البندوثيه
فالبقاء هنا للابداع
| |
|
|
|
|
|
|
|
|
|
Re: الرسول فيكم لو مازحيتوا لي كده من الباندوث دا (Re: shiry)
|
شيري انشاء الله تطيري
( طبعا ما لاقية الوش ابو لسان بالجنبة)
وعرفتك خوافة قلت كدى النحقر بيها واتعلم فيها تكنيك الشكل
شيرى براحة براحة ماعلى الباوندث على انا دى
خلينا نعرف نتابع زى بقية خلق الله ديل
لما تقولى جاية فى العدد القادم ادينا فرقة شوية ماتجى فى حذتك
(حذتك دى كدى صاح ؟؟)
المهم شميت لى ريحة جبنة وشايفة صحن التمر يتخيل لى كدا بسموه بانجقلي ولا جانبقلى مابعرف
النمشى واجى اوريك شبوهها بشنو
قاتل الله الزمن حرامي بشاااااكل
اها لمن اجي
وزى ما وصيتك على حكاية الاقساط
| |
|
|
|
|
|
|
|
|
 Re: الرسول فيكم لو مازحيتوا لي كده من الباندوث دا (Re: ملكة سبأ)
|
بت أختي
شيري
والله لينا اسبوع الواحد يخش البوستات جري ويمرق جري يخاف كان ردة ويخاف كان ما ردة ، اصلو الجماعة أخلاقم ضايقة وأقل حاجة يشتموك ويقعدوك في علبك وأنا جني وجن العلب، ومدام ربنا جابك بالسلامة وكتبتي الكلام الحلو ده كدي النتفشة واكتب لي كلمتين تلاتة وانا مطمئن ما في عوجة تب بتجيني عارفك حنينة وما بتقولي الشين
أها يا بت أختي ما تطولي غيبتك اصلو الوليدات جنو والهضربة كترت وجيتك بتجيب الهمبريب وغيابك جاب لينا الهوا وفي الهوا أم شير
حمد الله علي السلامة
| |
|
|
|
|
|
|
|
|
|
Re: الرسول فيكم لو مازحيتوا لي كده من الباندوث دا (Re: ملكة سبأ)
|
العزيزة شيري..
التحية ليك..وانت تفردين هذه اللغة البشوشة..وتمتطينها جواداً ..جواداًً (بالتشديد) ..بكل رشاقة ..هي المرة الثالثة التي اطالع ..حديثك الوناس ..الغريب المفردات ..وقد انست به وفك"دبرستي" ..
ودي العميق لك..همسه في اذنك حاسداك علي رحابة الوقت والسكون الذي احسه في "كلماتك المقعدة" ونحن نقتطع الوقت .."مسارقة" لنفرد للنفس قليلا من ترويح ..وملاقاة ناس متلك ياحبيبة..
| |
|
|
|
|
|
|
|
|
|
Re: الرسول فيكم لو مازحيتوا لي كده من الباندوث دا (Re: garjah)
|
سلام مربع
موسيقارنا :حمزة سليمان
وانت ايضا سيدي حمزه رجلا مبدعا بحق وحقيقي موش زي هترشتي التي ما ان نغلق جهازنا حتى تتلاشي مثلي تماما
لذلك تجدني على الدوام ممتنة لك على هذه الاريحية التي ظللت على الدوام تدعمني بها
وانشاء الله يارب ما نعدمك على طول دخر لنا
ملكة سبأ
اتخيلي انا ذاتي لحدي هسع ما عارفه الوشوش ديك بجيبوها من وين ، والشيء التاني مابقدر افرزها ، هل الوش دا زعلان ولا فرحان ولا ببكي ، لانو العتب على النظر ، محتاجة لمايكرسكروب عشان ادقق في تفاصيل الوش الصغيروني دا .
الله الله ياسلام على القهوة ام تمر . هي عشقي الجميل
عشان كده بختك ، المره الجايه اعزميني عليها يا عسل
ولا يهمك المره الجاية بنتظر شوية كده وانزل الحلقة البعدها
بس دا كلو عايزين نحن راحتك يا طيبه
وسلمت ياستي للطله
ابا
سلمت ياسيدي للطله البهية ، وانشاء الله دائما مبسوط . وماتخاف انشاء الله الغيبة ما تطول ، بس ربنا يرقد لينا كروت الانترنيت ، وناس شركة الاتصالات ما يرموا الفاتورة في وشي ابوي كده طوالي ، حبه حبه عليهو ، عشان ما يكون مبسوط معاي ووجه باسم على طول .
ماتخاف . الناس المتشاكلين اتصالحوا ، وانشاء الله تاني مايشتاكل زول
ربنا يسهل غايتو الباندوث بتاع بكري مايقوم بكره يطردني
أنا بت النيل
شرفتني طلتك حد البهجه ، وانا ايضا قرأت لك بوستك الرائع محطات البترول ، فراغتني موضوعيته ، واعجبتني جدا لغتك التي نغمتي بها الموضوع .
سلمت ياستي للاطراء وانشاء الله دائما مبسوطه ، ودائما امورك سالكه .
وبعيدة مسافة سنين عن الدبرسه
سلمت ياستي للطله البهية
قرجة
فعلا انا مفتقداااااك وبراي يوم داك قعدت اسال عن العمدة قرشو ، وعنك . وقلت الجماعة ديل ياربي مشوا وين
اتاريك زايق من هترشتي ..
لكن ما احبطتني ، يعني هترشتي دي طويلة للدرجة دي ، الغريبة انا ذاتي ما قعد ارجع عشان اقراها تاني لاني ماعندي وقت
هاههااههااههاه
سلمت ياسيدي للطله وربنا يقدرنا على العمل على اقتراحك .
كدي انت اسال من جانبك في برنامج كومبيوتر بعمل كده
لانو لو الشغلانه بقت علي ، ياك الادبست طول عمرك بهذه الهترشه التي تقطع النفس
| |
|
|
|
|
|
|
|
|
|
Re: الرسول فيكم لو مازحيتوا لي كده من الباندوث دا (Re: shiry)
|
شيرى العسل
غبت فترة طويله غير مفقوداً .. واول ما قرأت
هذه الهترشه خفيفة الظل .. وبعدين الباندوث
ده الجماعه مالينو لينا مشاكل ساكت اعرضى فوقو
واسرحى وامرحى زى ما يعجبك وكان بتملى وينقطع
نفسو بى جنس الكلام اللذيذ ده ما توفرى منو باندوثايه
واحده لى ناس المشاكل ديل
دامت الهترشه
| |
|
|
|
|
|
|
|
|
|
Re: الرسول فيكم لو مازحيتوا لي كده من الباندوث دا (Re: artiga)
|
علي حس الهترشه دي، حكي لينا واحد سوداني من عندنا عايش في امريكا ليهو كمين سنه،يعني عشره سنه واكتر، المهم صاحبنا ده مشي السودان داير يشتري ليهو بيت في المنشيه ولا الرياض ولا الطائف ما عارف بالتحديد وين،السمسار قال ليهو عندنا البيوت وقبل ما تبداء المعاينه وناخد لينا مشاوير ساي لازم تعرف ان الاسعار في الحتات ديك بين 700الف لي مليون دولار امريكي. صاحبنااتخلع قلب يدينو وقال يعني بيتكم ده بيساوي قدر تلاته بيوت في كالفورنيا وفاتحات علي البيتش؟!0
_______________
وطني ولا ملي بطني!!0
بليلتي ولا ضبائح طي!!0
| |
|
|
|
|
|
|
| |
shiry
ابو جهينة
اساسي
bayan
نصار
يازولyazoalيازول
ترهاقا
ولياب
Raja
abas
ابو يسرا
مشتاق
HOPEFUL
HAMZA SULIMAN
ملكة سبأ
aba
garjah
فيس بوك
تويتر
انستقرام
يوتيوب
بنتيريست