|
|
|
 Re: المصور الفوتوغرافي ناجي الملك يثير أهتمام البلجيكين (Re: بكرى ابوبكر)
|
المصور الفوتوغرافي ناجي الملك يثير أهتمام البلجيكين
المصور الفوتوغرافي ناجي الملك يثير أهتمام البلجيكين ويستكشف مع " الاحداث " التراث الهولندي
-بدات التصوير منذ صغري وشجعني والدي وأهداني كاميرا لنجاحي ويثير انتباهي الغروب والنيل .
أجرته من زانس شانس بامستردام : أمل شكت
بعد زيارته المصور الفوتوغرافي السوداني المهندس / ناجي الزبير الملك للعاصمة البلجيكيه بروكسل للمشاركه في المعرض الفوتوغرافي السنوي والذي شارك به ثلاثه مصورين سودانيين ، كما شملت زيارته هولندا ( الاحداث ) التقته ورافقته الي أحدي مدينة الاثرية والتي تميزت بالطواحين الهوائيه والالبان ومنتجاتها وتقع في “ zaans schans “ اقليم أمستردام وذلك لالتقاط مجموعة من الصور ، فكانت هذة حصيلتنا :
-البطاقة الشخصية :
=ناجي الزبير الملك . من مواليد عطبرة 1979م ،درسته هندسة معمار جامعة السودان.
-وأين تعمل؟
=في شركة أين الهندسيه العالميه وهي سودانية سعودية .
-بما انك تمتهن مجال المعمار فما الذي جذبك للتصوير الفوتغرافي ؟
=منذ صغري وجدت نفسي أميل الي هواية التصوير فقد كنت اقوم بتصوير اصدقائي والتوثيق للمناسبات وذلك في المدرسة وفي الكشافة السودانية البرية
-ومادور الاسرة؟
=الوالد كان يشجعني وهو ايضا كان من هواة التصوير وقد وثق كل مراحل حياتناوذكريات طفولتي .
-متي اقتنيت أول كاميرا ؟
=اقتنيت اول كاميرا وكان عمري حوالي 12 سنة وقد كانت أهداء من الوالد رحمة الله بمناسبة نجاحي في امتحان الشهادة المرحلة المرحلة الابتدائية ،وقد كنت الخامس في ولاية نهر النيل ( الاقليم الشمالي ) .
-مانوع هذة الكاميرا ؟
=كوداك فلم 36 ملون .
-في اي عام كان ذلك؟
=في 1990م ومازالت احتفظ بها .
-ومتي اشتريت اول كاميرا من حر مالك ؟
=في عام 2008م ؟
-أين تعلمت فن التصوير ؟
=التحقت بورشة عمل كانت في المركز الثقافي الالماني "جوته "بالخرطوم .
-هذا يعني ان ممارستك للتصوير الفوتغرافي منذ البدء والي ان اصبحت محترف عباره عن أجتهادات شخصية ؟
=كل يوم بتعلم شئ لوحدي وايضا تعلمت من زملاء محترفي لهذا الفن منهم عماد عبدالله و المصور /عصام عبدالحفيظ ، والورشة التي شاركته فيها بالمعهد الالماني كان هو المسئول عنها .
-هذة الورشة عبارة عن ماذا ؟
=الورشة عبارة عن نقاشات لتجربة المشاركين في التصوير .
-ماهي الاشياء الاساسية التي تثير أنتباهك ؟
=تفاصيل الاشياء ، ملامح الناس ، النيل ، الغروب .
-متي وجدت نفسك قد انتقلت الي عالم الأحتراف؟
=بدا الاحتراف من خلال مشاركتي في معرض بالخرطوم في عام 2010م . وقد شاركت بصور كنت قد اخذتها في السودان لكل من منطقة الزومة والاهرامات والبركل .
-هل يخطر شئ بذهنك فلذا تلتقط الصورة ؟
= أنني أبدا التصوير الذهني قبل التصوير الفعلي بالكاميرا .
-ماهي مميزات المصور الناجح ؟
=عينه تكون شوافه والاحساس يلعب دور قبل العين .
-ما اسباب حضورك الي بروكسل ؟
=كنت مشارك باسم السودان في معرض تصوير فوتوغرافي سنوي ينظمة المركز الثقافي البلجيكي وقد شاركت ب 12 صورة ، والمعرض يشتمل علي 41 صورة ، وقد شارك من السودان سلمان محمد الحسن مصور محترف ، ومبارك حته صحافي ومصور .
- ماسبب الاهتمام بدولة السودان بالمعرض ؟
=ان السودان جسر ثقافات مابين العرب والافارقة ودور الطرق الصوفية في السودان في الحفاظ ونشر الاسلام .
-هل حصلت علي جائزه نظير مشاركتك في هذا المعرض وهل حصلت علي جوائز من قبل ؟
= لا لم احصل علي جوائز فقط حظيت بالتحفيز وهذا جعلني افكر بتنظيم معرض بعد عودتي للوطن لعكس كل الاعمال التي قمت بها بكل من بلجيكا وفرنسا و هولندا .
-كيف تم اختيارك لهذا المعرض ؟
=تم اختياري بعد مشاهدة صوري في صفحتي علي النت .
-ماهي الصعوبات التي واجهتكم ؟
=ان تكاليف الاجراءات و السفر من السودان الي بلجيكا كان علي النفقة الشخصية ، رغم مخاطبة الجهة المنظمة المعرض جهاز المغتربين رسميا ، الا أننا لم نحصل علي الا في اللحظات الاخيره علي مبلغ مالي بسيط للمعرض . كما لم تكن هناك مشاركة رسمية في الحضور من طاقم السفارة السودانية ببروكسل علما بأنه كان حضور رسمي من الجانب البلجيكي
-وكيف كان الحضور من السودانين المتواجدين هناك ؟
=الحضور كان جيد ومشجع ووجدنا منهم كثير من التعاون .
-ماالذي اكتسبته من خلال مشاركتك في المعرض ؟
=ان امتحن التصوير كمهنة اضافية .
-كلمة أخيرة ؟
=اشكرك لمجئيك وتحملك المتاعب وكما اشكر كل السودانيين الذين وقفوا بجانبنا ورحبه بنا .
| |
 
|
|
|
|
|
|
|
|
Re: المصور الفوتوغرافي ناجي الملك يثير أهتمام البلجيكين (Re: عبدالرحمن عزّاز)
|
| Quote: أجرته من زانس شانس بامستردام |
والله لو ما قريت الكلام الفوق ده انا كنت قايل اللقاء ده معمول في جريدة الدار ..
بالله برضو ناس زانس شانس ديل بيسألوا من البطاقة الشخصية ؟ وأين تعمل ؟ وما هو دور الأسرة ؟
غايتو ما باقي ليك يا أمل يا اختي إلا تقولي ليهو ثلاثة زهرات لمن تهديها ؟ وما رأيك في الأم ؟ الليل ؟ الخريف؟
مع كل الإحترام لي الصديق ناجي إلا إنو يا بكري إنت أديتا كوز واللقاء ده من وجهة نظري ضعيف وما فيهو أي دلالة على إثارة إهتمام البلجيكيين .. فدحين لو عندك حاجة تانية بتأكد غير اللقاء ده تكون ما قصرت ونورتنا وازددنا فخراً بي ولدنا ناجي ..
لكن كان عشان أمل شكت دي فياخوي يفتح الله ..
وفي كل الأحوال شغلك مقدر يا ناجي ومزيد من التوفيق يا حبوب
تخريمة :
| Quote: المصور الفوتوغرافي ناجي الملك يثير أهتمام البلجيكين |
| Quote: أجرته من زانس شانس بامستردام |
عاد يا بكري ما بسألك ..
| |
|
|
|
|
|
|
|
|
|
Re: المصور الفوتوغرافي ناجي الملك يثير أهتمام البلجيكين (Re: فيصل محمد خليل)
|
اولآ الف مبروك للملك ويستاهل كل خير
Quote: تخريمة :
Quote: المصور الفوتوغرافي ناجي الملك يثير أهتمام البلجيكين
Quote: أجرته من زانس شانس بامستردام
عاد يا بكري ما بسألك .. |
كااااااااااااك
كييييييييييييك
كووووووووووووك
عشرة/ صفر عديل دى
يا فاروق إنت ما خايف على العدة ولا شنو
عادل إمام مش قال الرئيس بيلهط على طووووووووووول؟؟
اها هنا كمان اى حاجة تمشى يا معلم
| |
|
|
|
|
|
|
|
|
|
Re: المصور الفوتوغرافي ناجي الملك يثير أهتمام البلجيكين (Re: هيثم درار)
|
الفنان ناجى الملك اكد للجميع بان السودان بلد به من تعدد الثقافات ما يكفى لكتابة الكتب وقد كان لى شرف حضور المعرض المميز الذى قدمة الفنان ببلجيكا والذى استطاع من خلالة اقناع الحضور بان الفن هو من اهم الوسائل لنقل ثقافة البلد للخارج ، وقد شاهدت اندهاش الحضور من الجانب البلجيكى وغيرة بتميز الصور التى تم عرضها وكم كنا فخورين بكل ماقدم .
والى الامام ناجى وبالتوفيق للجميع
رياض همت
| |
|
|
|
|
|
|
|
|
|
Re: المصور الفوتوغرافي ناجي الملك يثير أهتمام البلجيكين (Re: عبدالرحيم أبراهيم العبيد)
|
الف مبروك يا ملك
فنان فنان مافي كلام
رفعت راسنا والله
Quote:
تخريمة :
| Quote: المصور الفوتوغرافي ناجي الملك يثير أهتمام البلجيكين |
| Quote: أجرته من زانس شانس بامستردام |
عاد يا بكري ما بسألك .. |
Quote:
المصور الفوتوغرافي ناجي الملك يثير أهتمام البلجيكين ويستكشف مع " الاحداث " التراث الهولندي |
Quote:
بعد زيارته المصور الفوتوغرافي السوداني المهندس / ناجي الزبير الملك للعاصمة البلجيكيه بروكسل للمشاركه في المعرض الفوتوغرافي السنوي والذي شارك به ثلاثه مصورين سودانيين ، كما شملت زيارته هولندا |
| |
|
|
|
|
|
|
|
|
|
Re: المصور الفوتوغرافي ناجي الملك يثير أهتمام البلجيكين (Re: وليد محمد المبارك)
|
يا صاوي والله تكون حاجة حلوة شديد يثير الهولنديين والبلجيكيين وده النحن عايزنو وبيسعدنا ..
إثارة البلجيكيين بكري يجيب لينا الصحفية البلجيكية والحوار البلجيكي..
إثارة الهولنديين يجيبو لينا الصحفية الهولندية والجريدة الهولندية ..
انا جني وجن عناوين بكري بتاعت التضخيم دي ..
يعني ما مثلاً لو في بلجيكي واحد قال شغل ناجي حلو معناها البلجيكيين أثيرو مش؟
ولااا لو هولندية واحدة قالت لي ناجي شغل مثير معناها هولندا أثيرت صاح؟
والله ناجي شغلو حبااابو وبتمنى ليهو السمح لكن انا مصر وملح أشكك في موضوع بكري إنو ما بي الضخامة دي والدليلإنو ناجي قال ما شال ولا جائزة من العرض ده ويا قول جماعتنا في الكورة السودانية كسبت الإحتكاك من المشاركة ..
إثارة بدون جوائز دي ما ادونا ليها خصوصا لو كانت من البلجيكيين ..
يعني معقول البلجيكيين يثيروا لي ناجي ويدو الجوائز لي الناس الما مثيرين ؟؟
والناس هنا بصراحة لخبطت بين التشجيع والاطراء وبين المجاملة ..
شغل ناجي حلو لكن ما مثير مش؟
وبرضو كلام بكري واللقاء المصاحب ما عندو أييي مرجعية تخلينا نصدق خبر الإثارة ده مش؟
بكري جاب ليهو لقاء عملتو زولة يبدو إنها عربية من خلال الإسم وما بعيد تكون سودانية أو كمان بتعرف سوداني في هولندا .. وده ما تقليل من شأن ناجي أبداً والله ..لكن لأني بعرف تماااما كيف نحن السودانيين بي مجاملاتنا بنساعد بعض من خلال لفت نظر الناس التانيين ..
يعني انا أسة متأكد تمااااما كل ظهور اعضاء سودانيز في قناة النيل الأزرق تم من خلال الواسطة والعلاقات وليس من خلال الإقتناع والمصادفة ..
ومعظم لقاءات قناة الجزيرة التوثيقية والاخبارية عندها علاقة بي ناس المنبر الشغالين في قناة الجزيرة ..
بكري أداها كوز في موضوع ناجي ده ..ودي ما المرة الأولى بكري ينفخ اعضاء المنبر والمنبر زاااتو ويكبر كومو ..
وانا لسة مع إنو البلجيكيين ما أثييرو وماحا اقتنع إلا تجيبو لي بلجيكي مثار ..
| |
|
|
|
|
|
|
|
|
 Re: المصور الفوتوغرافي ناجي الملك يثير أهتمام البلجيكين (Re: عماد الشبلي)
|
عمر الفاروق
يا زول انت عكليتة كدة مالك ؟
| Quote: وانا لسة مع إنو البلجيكيين ما أثييرو وماحا اقتنع إلا تجيبو لي بلجيكي مثار .. |
الكلام دا واضح
والصورة بتاعت الاثارة موجودة ( اول صورة في البوست ) ما شايف البتين البلجيكيات ديل مثارات كيف ومكسرات في ناجي
اكا ن ماشفتهم عليك بالنضارة يارجل
وكان داير اثارة اكتر من كدة امشي بلجيكا
واكان دي حركات منك ساي فمافي عوجة
سؤال
عليك الله صور ناجي دي ما اثاراتك انت ذاتك خليك من البلاجيك والدطشاب ؟
والسلام
| |
|
|
|
|
|
|
|
|
|
Re: المصور الفوتوغرافي ناجي الملك يثير أهتمام البلجيكين (Re: عبدالله السفاح)
|
تعرفت على ناجي في السودان عن طريق دكتورة نبراس وصهيب هشام.. وهو صديقهم
لم أشهد له أعمال من قبل ولكن ما نشهده الأن من أعمال في هذا البوست تؤكد على إبداع الرجل
أنا حزين جداً لعدم توفقي لحضور حفل الأفتتاح.. نهاية العام الدراسي وطلبتي مشغوليين بالتحضير لعروض نهاية السنة والامتحانات مما يجعل الاعتذار عن الحصة صعب جداً
والافتتاح كان يوم الخميس وكنت في مدينة تانية كما كل خميس
وحزين لأننا لم نلتقيه
ولكن كما أتقفنا هاتفياً...الجايات أكتر من الرايحات..
بالتوفيق
صادق
| |
|
|
|
|
|
|
|
|
|
Re: المصور الفوتوغرافي ناجي الملك يثير أهتمام البلجيكين (Re: عبدالله السفاح)
|
يا بكري عباس :
والله ما عكلتة وناجي ما طرف أصيل في مدخلاتي دي ..المداخلات موجهة لي بكري وعنوانو وطريقة نقله للخبر..
بالنسبة لي شغل ناجي ان اما خبير تصوير بس كرأي عام وحق مشاهد بعتقد إنو روعة وفن التصوير بتعتمد على اللحظة أكتر من المشهد .. وعليه فمعظم صور ناجي تقليدية خصوصا المتعلق منها بالغروب والنيل وشغل الاضاءة الخافتة ده ..لكن مثلا بعتقد إنو مثلا صورة زي شعر الطفلة البيتطاير و صورة العصفور البيتنفض بي ريشو دي صور فعلا بتعتمد على اللحظة والقرار المناسب والتوقيت المناسب..
| |
|
|
|
|
|
|
|
|
|
Re: المصور الفوتوغرافي ناجي الملك يثير أهتمام البلجيكين (Re: عمر الفاروق)
|
مبرررررررروك يا ناجي وموفق دوما يارب
يا عوووووومر الفاروووق
مالك ياخ ؟!
عاين
كونه بكري يحتفي بناس منبره ويتباهى بيهم دي حاجة سمحة ياخ !
في صورة حقتي إتصورتها مع الرئيس أسياس أفورقي ووزير الخارجية ( سابقا)
د. مصطفى عثمان إسماعيل كنت بغطي إحتفال أسمرا بعيد الشهيد كويس ؟
أهااااا يا اللمنتي عليك قووووم يابكري إتبسط من صورة ( العضوة) في منبره اللي هي العبدة لله
وقووووووم أفتح بوست بالصورة وأكتب ( الرئيس أفورقي ووزير الخارجية يستقبلون زميلة لنا بالبورد) !!
وماااااااااالو ؟!
خلي الزول يقشر بناسو ياخ ونحنا ذاتنا نقشر ببعض .. هسي أنا قاااااشرة بصحبي ناجي ده والله
ربنا يوفقه و( يوفقك) انت ذاااااااااتك وتثير البلجيكيات والهنود الحمر .. المافي شنو ؟!
كن بخير ياعكلييييت ولذيذ شديد ( وش متأثر ) !
| |
|
|
|
|
|
|
|
|
|
Re: المصور الفوتوغرافي ناجي الملك يثير أهتمام البلجيكين (Re: نادية عثمان)
|
والله يا نادية ما عكلتة بكري زودها حبتين وبكري لفااااح ..
عارفة لو بكري إكتفى بي العنوان ده وجاب صور ناجي الملك دي بقول حبااابو والله وبخلي موضوع الإثارة ده لي فطنة وذوق القارئ ..
لكن يجيب ليهو حوار متهالك واسئلة أقل ما توصف بيهو إنها أسئلة بدائية لكن لمجرد إنها إتعملت في أمستردام ومن زولة إسمها أمل منو كده ما عارف فده ما مؤشر لي إثارة البلجيكيين ..
عليك الله أقري الحوار ده فوق تحت قلبة عدلة وإنتي زولة صحفية وريني حتة واااحدة في اللقاء ده اتكلمت فيها الصحفية دي عن تجربة ناجي دي بي صورة إحترافية .. أو حتى سؤال واحد يوضح إثارة البلجيكيين ؟؟؟
يعني طالما الخبر كده اقلاه يكون في سؤال :
بعض من أعمالك أدهشت البلجيكيين كتلك اللقطة ...حدثنا عنها ؟
رغم من إنك حديث التجربة والإحترافية إلا أنك أثرت الحضور كيف فعلت ذلك وما هو الجديد في أعمالك التي لفتت إنتباه الحضور؟
لكن دي من أسئلتها ناجي زاااتو قرب يقول ليها تعلمت التصوير في الدورة المدرسية ومنذ نعومة أظافري وذاد الشجون تأثرني ووجبتي المفضلة التقلية بي الكسرة ومشروبي المفضل الكركدي المثلج ..
عارفة يا نادية دي نوع الحوارات الممكن الصحفي يعملا وهو قاعد فييي بيتهم وضيفو ده يكون نايم فيييي سريرو ويقول ليهو رسل لي صورة ليك عليك الله وبكرة يقول ليهو يا فلان أمشي شوف نزلت ليك حوار صحفي في الجريدة وريني رايك فيهو ..
ناجي ربنا يوفقه ومشاركته خطوة جريئة ودخول في الاحترافية وإمتهان حاجة حباها ويبدو إن طور نفسو شدييييد .. ودي حاجة حلوة وكلنا في يوم ح نقشر بي ناجي الملك مع إنو الولد ده برلومي ونحن أصحاب من التسعينات وكده :) .
تخريمة :
انا غايتو إثارة البلجيكيين ما عايزا إلا كان لقيت حقت السويديين ما باباها ..
| |
|
|
|
|
|
|
|
|
|
Re: المصور الفوتوغرافي ناجي الملك يثير أهتمام البلجيكين (Re: عمر الفاروق)
|
ناجى صاحبى ..ناجى برلومى .ناجى زول حبوب ..
ياخ انت طالما بتتحسس كدا ماكنت تفوت القصة
وتلبد لى بكرى دا فى حتة تانية ...بتلقاهو
ساهل (كان الليلة كان بكره) زى ماقال طارق
لعماد ..يعنى القصة مامحتاجة المخاطرة والمجازفة
العملتها دى ...
تكتب فى البوست زى الزول الماشى بعلب صلصه 
مابعرف زمان بتقدو علب الصلصه وبتربطوا فيها
(سير) وتمشوا بيها ..ولا ناس امدرمان مابلعبوا
كدا ...
| |
|
|
|
|
|
|
|
|
|
Re: المصور الفوتوغرافي ناجي الملك يثير أهتمام البلجيكين (Re: محمد عبدالرحمن)
|
لالا يا محمد يبقا إنت ما بتعرفني ..
انا بقول ليهم في الكلام ده عشان أوضح ليهم إنو لو القصة كسير تلج فأنا أولى بناجي الملك منهم .. في تلج كتير دوور هنا بي سبب إنو الكاتب بكري والمشكور ناجي ومن هنا جات الروعة ..
ولو فوق قريت رايي في شغل ناجي قلتو ووضحتو بي عين المشاهد وليس المتخصص وقلت إنو شغل عاااادي ..
ما انا الزول البيتحسس من قول رأيو خصوووصا في الحاجات اللي زي دي الما فيها حساسية إنو ممكن تهبش حتت تانية ..
عقدكم دي ما عندي يا عمك ..
تخريمة :
دي شنو الألعاب البيئة الإستدليت بيها دي ؟ صلص؟؟؟؟؟؟؟؟؟ انت جااادي؟
| |
|
|
|
|
|
|
|
|
|
Re: المصور الفوتوغرافي ناجي الملك يثير أهتمام البلجيكين (Re: نادية عثمان)
|
Quote: بعض من أعمالك أدهشت البلجيكيين كتلك اللقطة ...حدثنا عنها ؟
رغم من إنك حديث التجربة والإحترافية إلا أنك أثرت الحضور كيف فعلت ذلك وما هو الجديد في أعمالك التي لفتت إنتباه الحضور؟ |
هسي مافات شيء وممكن ناجي يجي يرد على الأسئلة دي عشان الموضوع يرقى لمصاف ( البلجكة) !!
عارف ياعمر ؟؟
ماكل الناس ممكن تفهم طريقتك دي صاح !!
أنت زول وأضح وحقاني وأي حاجة سمحة لكن مرات ( بتوجع) ناس (بتحبك ) دون سبب !!
| |
|
|
|
|
|
|
|
|
|
Re: المصور الفوتوغرافي ناجي الملك يثير أهتمام البلجيكين (Re: نادية عثمان)
|
نبارك للزميل ناجي مقدرته علي اثارة اهتمام البلجيكيين ومن قبلهم نحن السودانيين بلوحاته الرائعة والتي تنم عن فنان حقيقي
كما لا يفوتني ان اشكر الريس بكري علي نقله دلك الحوار
ود الفاروق برضه ما جاوبت علي السؤال ناجي دا بالصورة الاولي المعلقة فوق دي اثار اهتمام البلاجيك ديل ولا ما اثاروا ؟
وبلاش قر قر واجد يا رفيق
| |
|
|
|
|
|
|
|
|
|
Re: المصور الفوتوغرافي ناجي الملك يثير أهتمام البلجيكين (Re: محجوب البيلي)
|
الف مبروك حبيبنا ناجي الملك علي النجاح هنا ببلجيكا
ولكن يااحمد بشير Quote:
عمر فاروقبلجيكا هولند, مسافة ساعة بالسيارة
عــادي جدا البلجيكي يكون متواجــد في هولندا
ونفس اللغــة, بين البلدين , ماعدي اقصي جنوب بلجيكا لغة فرنسية.
البلجيكين من شدة ما اعجبو بناجي "الله يعطيه الف عافية" تابعوهو لحدي هولندا , وكان اللقاء هناكانشاء الله تكون اقتنعت الآن؟ |
اللغه الفرنسيه البدايه من بروكسل عاصمه الاتحاد الاوربي
تقع وسط بلجيكا وهي منطقه محايده في بلجيكابين الفلام(VLAAMS)والواال(WALOON)
فهي لغه رسميه ولها اهميتهاعلي حسب نسبه السكان ومناطقها مناطق حيه بالنسبه
للدوله البلجيكيه فهي اللغه الثانيه هنا في بلجيكا من حيث النطق في المملكه.
| |
|
|
|
|
|
|
|
|
|
Re: المصور الفوتوغرافي ناجي الملك يثير أهتمام البلجيكين (Re: عمران حسن صالح)
|
يا بكري يا عباس:
| Quote: ود الفاروق برضه ما جاوبت علي السؤال ناجي دا بالصورة الاولي المعلقة فوق دي اثار اهتمام البلاجيك ديل ولا ما اثاروا ؟ |
إنت عايز جرجرة صاح ؟ طيب ممكن أرد ليك بي بساطة هو القال ديل زاااتهم بلجيك منو ؟
مش ممكن يكونو روس؟
ولا أقول ليك ممكن يكونوا نرويج ..
وعليه تصبح القصة ناجي أثار الروس والنرويجيين ..
الصورة الفوق ما فيها أي إثارة ضيوف مارين على صاحب المعرض زيو زي تفيدة المشاركة من مصر وعليوة من تونس وباسولي من غينيا الإستوائية ..
لو اي زول عمل زي بكري ده فأتوقع إنو غينيانيز أون لاين بيكونوا كتبو عن باسولي إنو أثار البلجيكيين ويجيبو نفس الصورة دي لي نفس البتين ديل ونفس الكذلك مصراوي أنو لاين مع تفيدة (اللي ح تكون أثارات البلجيكيين الرجال طبعاً بي تصويرها ) أما عليوة فسوف تتحدث عن إثارته كل دول الهلال الخصيب ..
صدقني صور ناجي المعروضة هنا صورعادية تقليدية مكررة ما فيها إبداع خلاق مشاهد يمكن إلتقاطها حتى من الشخص الما خبير (معظم وليس كل عشان أكون فيير) ولسة بكرر ليك إبداع التصوير يعتمد في الأساس على اللحظة مع الدقة ..
يعني صورة زي حقت البت البتضحك دي ومع إحترامي لي عمران فهي صورة ماخود التعبير فيها من عمران بي الجانب العاطفي ما التقني ولا التخصصي وعليه أسة انا ممكن أجيب ليك صورة لي اولادي بي نفس الملامح دي وبي نفس طريقة التصوير دي ..
صورة زي حقت النيل والغروب وتضلم جانب وتوضح جانب دي نحن كنا بنهديها للجكس في عيد ميلادهم من نحن في سنة رابعة إبتدائي نوع البت والولد ماسكين يدينهم وماشين في الشاطي ومرة مرة لو قويت قلبك بترسل ناس حضن الإسلام ديك ..
صورة لي كباية الشاي وصورة لي صينية القهوة وصورة لي طفل واقف وصورة لي بت مغطية وشها كلها صور فكرتها عادية ..
عشان كده بقول ليك وبكرر صورتين أبدع فيهم ناجي وخاطب حسو الفني وسرعة البديهة واختيار الوقت المنااااسب عشان يضغط زر التصوير الطائر ابو ريش والبت أم شعر .. غير كده ومع احترامي لي كل الاذواق وحب الناس مذاهب فهي صور تقليدية ممكن تمبس يصورها
| |
|
|
|
|
|
|
|
|
|
Re: المصور الفوتوغرافي ناجي الملك يثير أهتمام البلجيكين (Re: عمر الفاروق)
|
نايدة بت عتمان :
| Quote: ماكل الناس ممكن تفهم طريقتك دي صاح !! |
وانا ما مستعد أقعد كمان بعد كل جملة مفيدة أقعد أشرح ليهم مش ؟ صدقيني طالما انتي قولتي اني زول حقاني وواضح واي حاجة سمحة يبقا ما اظن في مشكلة
| Quote: أنت زول وأضح وحقاني وأي حاجة سمحة لكن مرات ( بتوجع) ناس (بتحبك ) دون سبب !! |
لو الناس ديل بيحبوني بي الجدجد ومفترضين فيني الاوصاف الحلوة دي يبقا اكيد مفروض يعرفو اني ما قاعد أجرح فيهم ..قاعد أقول البينفعهم وبيجود حاجاتهم ..
ساااااااااااااااي كده بلا شغلة
أسة في داعي لي جنس الحـــوريج ده ؟
| |
|
|
|
|
|
|
|
|
|
Re: المصور الفوتوغرافي ناجي الملك يثير أهتمام البلجيكين (Re: عمر الفاروق)
|
ناجى ...
انت لسه فى بلجيكا ؟
صور بديعة ومشاركة جريئة
قلبى معك ..
داليا حافظ لووووووووووب
لقيتك صاحية للون والله ...
احييييك ياخ قوية ..
البيبى كيف ؟
فى داعى ؟الموضوع دا بستاهل؟ ولا نكتفى
بشق المقابر ؟ مبكمممممه ؟ خلاص ردى فى الخاص ..
عمر الفاروق !
هسه لو كتبت ليك 5 سطور مش كنا شاركنا معاك
فيما تقول ؟ فى زول نصيح بقرا لى كلام قدر دا عن معرض ؟؟
تعرض كدا اقول ليك وين .... طبعا اصلك خارج الزفة ..
ــــــــــــــــــ
ناجى !
الى الامام ... الى الامام (القديمة) ..
| |
|
|
|
|
|
|
|
|
|
Re: المصور الفوتوغرافي ناجي الملك يثير أهتمام البلجيكين (Re: دينا خالد)
|
| Quote: يعني صورة زي حقت البت البتضحك دي ومع إحترامي لي عمران فهي صورة ماخود التعبير فيها من عمران بي الجانب العاطفي ما التقني ولا التخصصي وعليه أسة انا ممكن أجيب ليك صورة لي اولادي بي نفس الملامح دي وبي نفس طريقة التصوير دي .. |
أيوااااااا كده طلع كيسكـ فاضي 
اتفقنا إذن يا عمر على مبدأ ( التقني والتخصصي ) دي .
وده مربط ( مشكلة رأيكـ في الكلام الفوق ده كلو ) !! ، ومباشرة أقول ليكـ يا عمر أهل التخصص بيقولو عن صور ناجي أنها جميلة إعتماداًعلى تقنيات التصوير ( المعقدة جداً بالمناسبة ) ، ومافي داعي ندخل فيها . القصد الآخر مسألة العاطفة لنظرتي للصورة ، هذا كان من المفترض سبب دخولكـ للبوست إما إعجاباً بالصوَر من ناحية عاطفية كما فعلت أنا ( حسب اعتقادكـ ) ، أو تفنيداً لرأي ( تخصصي ) عن الصور يتحدث عن الزاوية والإضاءة وفتحة العدسة وسرعة الشتر :) وباقي نظريات ونقة التصوير .
أها يا عمر لا كنت من ديل ولا من ديل .
يعني لا تذوقت الجمال ولا خليت الناس يتذوقوهو .
لا كلامكـ كان تخصصي ، ولا عاطفي
____________________________________________________________________________________
بالمناسبة أتحداكـ تصوِر محمد صورة أقرب لصورة الفتاة المبتسمة ولو أقرب ليها بما يعادل 10% من جودة الصورة وزاوية التصوير ، وما تقول لي كاميرا سوني بحجم علبة السجاير عملت الكلام ده ، power on وككـكـ ، خلاص صوَرتَ
أما إن كانت الصورة ليلية ففشلكـ نسبتو 100% .
| |
|
|
|
|
|
|
|
|
|
Re: المصور الفوتوغرافي ناجي الملك يثير أهتمام البلجيكين (Re: احمد محمد بشير)
|
عمران يا عمران ..
عارف أبداً ما اتخيلتك تقرا عاطفة دي بي صورتك اللي خلتك تفووور كده ..
يا عمران ياخ انت واحد من الناس انا شوفت كاميرات التخصص دي عندك وانا وقتها مغترب جديد لنج وكل فهمي لي الكاميرا حقت كوداك البتطلع الصورة طوااالي ديك..
لكن انا صدقني انا ولاني بعرفك فحتى لو انت حلفت لي شديييييد برضو انت اسة الصورة دي اخدتها بي العاطفة ما بي عرفتك وتخصصك ..انت زل بتفهم في التصوير ومتخصص وانا فاهم الكلام ده وممكن تجي هنا تحلل اي صورة لكن بررررضو لمن عجبتك الصورة دي عجبتك بي عاطفة الطفولة ..
انا ما متخصص ولا طرحت نفسي متخصص واي حاجة في المنبر ده غير الكورة بقولا بي عين المشاهد العادي.. عشان كده شغل ناجي ده قلتو بي عيني الزي عين كتير من الناس القالت ليهو شغلك مثير في المنبر هنا .. بس الفرق إنو انا رأيي مختلف ..
| |
|
|
|
|
|
|
|
|
|
Re: المصور الفوتوغرافي ناجي الملك يثير أهتمام البلجيكين (Re: محمد عبدالرحمن)
|
غايتو زول معجب بي قدر محمد عبد الرحمن ده ماف !!!
أما فيما يتعلق بي الكورة وشهادات الفيفا فبقول ليك انا في الحتة دي وبي عرفتي للكورة ما سائل في مورينهو زاااتو وكلامي البعرفو عنها ما محتاج شهادات ..ما تراهو ناجي البتردح في بوستيهو ده قال الشغلانة هواية ويادووب عايز يفكر في الاحتراف وبعد ده كلللو إنت وزمرة البورداب والبلجيكيين أثرتو ..
ناجي ده كان طلع شهاداتو من مركز التصوير الأمبريالي التخصصي؟
| |
|
|
|
|
|
|
|
|
|
Re: المصور الفوتوغرافي ناجي الملك يثير أهتمام البلجيكين (Re: عمر الفاروق)
|
عمر الفاروق ...
بكرى لم يقم بصناعة عنوان البوست ..هو نقله من موقع الصحيفة ... والتى وضعته بذات الشكل
بدون إنقاص او ذيادة ... لا أرى أنه يتحمل كل ما كتبت ...
ولو قام بصناعة او تعديل لشئ فأظن انه امر غير مسموح به فى النقل ...
ولكن ...
البوست فى حد ذاته بوست إحتفائ أو احتفالى ...سمها كما تشاء ...
وليس بوست لدراسة او لنقد ... او حتى لتوجيه
عموماً ...وعشان ما اكون منافق ...
مسختا علي البوست ...
شكراً
ــــ
زيكو تسلم يا صديقى
ــــ
نجلاء ...يسمع منك رب العالمين ...
ما زلت فى البداية وفى اشد الحوجة إلى الدعوات ...
ــــ
ماجد ...
وينك يا مان .. حاول أظهر بى هناكـ
دايركــ
ــــ
فيصل الله يبارك فيك ياخ ...
ــــ
عبد اللطيف السيدح
تسلم يا صديقى ...وشكراً على المرور والمطايبة ...
| |
|
|
|
|
|
|
|
|
|
Re: المصور الفوتوغرافي ناجي الملك يثير أهتمام البلجيكين (Re: الملك)
|
احمد محمد بشير
صديقى
مرفق مودتى وإحترامى وفخرى ...
أنتمى إلى هذا البورد من فترة طويلة .. وأفتخر
تعلمت الكثير هُنا ... وعاشرت الكثيرين ..
ربما كانت فى إحدى الصور التى قمت بوضعها .. إبنة "واحد" من اعضاء البورد
ويد "عضو" آخر من اعضاء البورد ... وجانب من رحلة ..ذهبتها فى هذا البورد ...
فشكراً لسودانييز اونلاين التى جمعتنا وصقلتنا ... ووجهتنا فى هذه الحياة ...
وشكراً لك اولاً وأخيراً
| |
|
|
|
|
|
|
|
|
|
Re: المصور الفوتوغرافي ناجي الملك يثير أهتمام البلجيكين (Re: الملك)
|
كوجان ...
صديقى و موطن الكائنات التى تكتب ... بعمق مريح ...
ممتع ما كتبت ,,, ببساطة
يا سيدى كما قُلت تماماُ
Quote: opens
the sail for uncharted horizons of imagination
and thoughtful feeling
like catching a punch of air from the end tail of a flying bird
!!
that is one hell of good and beautiful work |
وانا أحبك اكثر ...
| |
|
|
|
|
|
|
|
|
|
Re: المصور الفوتوغرافي ناجي الملك يثير أهتمام البلجيكين (Re: ناصر احمد الامين)
|
حبيب نورة ...
كويس انى لاقيتك فى القاهرة ... لزمن طويل يا صاحبى لم نتواجد فى مكان واحد
كل الشكر والود ...
ــــ
حمور ذيادة ...كده حتثبت عبارة "الإجندة الاجنبية فى الثورة المصرية"
:)
ــــ
زهير الزناتى ...بعيداً عن المعرض والعنوانين البارزة كيفك ياخ... ومشتاقين
شكراً للموازرة والدعم من زمان
ــــ
ود الصايم ...
المٌدهش فى الموضوع .... لمن يندهشو من فكرة وجود نيل أصلاً... عندنا ...
ووجود إهرامات وتأريخ ... ومصوريين من اصلو ...
ياخ انحنا طلعنا ...منسيين بشكل ...
ــــ
محمد المرتضى ...
بعيداً عن النفاق السائد ... الموضوع ده كُلو على بعضو ... دين للبلد القُمنا وقرينا وحيينا وحنموت فيها دي
وأظن اننا لحدى ما نموت ما حنقدر نديها ...حقها الواجب علينا ...
تعريفنا لذاتنا بعيداً عن السياسة .. والمؤسسة الحاكمة ... بشكل سليم ...
حيكون فيهو خصم علينا لكن ما مشكلة ...ربك يهون ...
ــــ
أشرف شكراٍ يا زول يا كويس
ــــ
عبد الرحمن عزاز
وانا بنفس القدر من الفخر بكم يا صديقى
| |
|
|
|
|
|
|
|
|
|
Re: المصور الفوتوغرافي ناجي الملك يثير أهتمام البلجيكين (Re: الملك)
|
محمد زكريا
إتضح أن العالم لا يعرف عنا الا ثلاثة أشياء ...وهذا على حسب المدة القصيرة التى قضيتها والاسئلة التى وجهت لى
لا يعرف غير "حرب دارفور ...وجلد النساء ... والإنفصال ...
الحمد لله أن القليلين الذين قابلناهم قد غيرنا وجهة تفكيرهم ... لتفاصيل آخرى ...سالبة وموجبة ولكنها حقيقية نوعاً ما
ــــ
هيثم تسلم يا صديقى ...
ــــ
رياض ... الحمد لله الذى وفقنا من قبل ومن بعد
معظم الزوار ما عدا السودانيين طبعاً لا يعرفون عنا أى شئ ...
لكن المعرض كان بعنوان ... السودان جسر ثقافة بين افريقيا والعالم العربى... والإسلامى
ومعظم صورى كانت فى القسم الصوفى ... تم إختيارها من قبلهم ... كتوضيح هم فى وجهة نظرهم طبعاً
يرون أن الطرق الصوفية ساعدت فى نشر الإسلام وتثبيته فى أفريقيا .. وأرى أنه وجهة نظر صحيحة إلى حد ما ...
ــــ
ياسر العيلفون ... إزيك
شكراً على الدعوات ...
ولك صورة من المعرض ...
| |
|
|
|
|
|
|
|
|
|
Re: المصور الفوتوغرافي ناجي الملك يثير أهتمام البلجيكين (Re: الملك)
|
مزمل خيرى ...
شكراً ليكــ ياخ وأتمنى انى أكون عند حسن ظنك ديمة
ــــ
عبد الرحيم عبود
اللهم امين ...
ــــ
أزهرى ياخى انا
صاحبك :) قبل وبعد ... شُهرة شنو ...!
ــــ
الصاوي ..رأسنا مرفوع ديمة ,,, بس لو خلتنا السياسة دي شوية ...
ــــ
ندى على :) ...شكراً ياخ ما أعدمك..
| |
|
|
|
|
|
|
|
|
|
Re: المصور الفوتوغرافي ناجي الملك يثير أهتمام البلجيكين (Re: الملك)
|
يا ناجي :
Quote: عموماً ...وعشان ما اكون منافق ...
مسختا علي البوست ... |
يا زول النفاق لزومو ؟؟
إنتو يعني هنا مرات بتنافقوا ؟؟
انا شخصياً ما بنافق لكن يبدو عليك يا زعيم إنو عايز الناس يحتفوا بيك وما دون ذلك فهو مسيخ ..
انزل لي تحت شوية لأنو شايف في زول أمن على كلامي وقال برضو بيوافقني الفكرة فما عارف برضو ح يكون مسخ عليك البوست ؟
ولا بس انا البمسخ ..؟؟
يا حبيب حتى لو بكري نقل العنوان فهو بصراحة عنوان منفوخ انا شايف ولسة عند كلامي يا مان إنو لو بي الحاجة الشايفة قدامي دي فيا إما البلجيكيين ديل قاعدين عا الهبشة يا الصحفية دي أدتا كوز..
ولسة تاني بقول ليك يا حبة ركز في صور اللحظة وسيبك من شغل الضلام مع النيل والغروب ده ..
| |
|
|
|
|
|
|
|
|
|
Re: المصور الفوتوغرافي ناجي الملك يثير أهتمام البلجيكين (Re: عمر الفاروق)
|
عُمر ...
بإذن الأعضاء الكرام اللسه ما رديت عليهم الفوق ديل ...
انا قٌلت ليك بصراحة شعورى لمن لقيت كلامكــ..عشان ما أتبسم ليك هنا وفينى حبة ... زعل
ووريتك وجهة نظرى فى موضوع نقل عنوان البوست .. او الخبر.. الحوار كما هو ... على حسب ما قُلت
ووريتك ووريت الناس دي انو الصور الفوق دي ما هى الصور الشاركت بيهاما عدا الصورة التى أرفقتها فى مداخلتى
انا شاركتا بى حاجة إسمها الصوفية... للإعتبارات المذكورة أعلاه فى مداخلة ما...
ولم اقم بإختيار صورى المشاركة ...الإختيار تم من قبل المركز ومن ناس متخصصين...
فى البوم إسمو
Sufism's In Sudan
ممكن أتم إنزال بقية صور المعرض .... لكن بس أدينى فرقة جيت ولقيت شغل شهر منتظرنى واسي مارق منو عشان ارد عليك وارجع اتردم بيهو تانى
وياعمر انا اكتر زول فاهمك بتتكلم عن شنو,,,
بالمناسبة الجميلة دى أنا بعرفك من سنة 98 يعنى من أقدم الناس البعرفهم هنا ...
وبعرف تماماً انو فكرتك توجيهى ... فيما ما يتعلق بالصور فى حد ذاتا ...
وانت خير العارفين قبل ما أقول انى درست شنو ... ... والحمد لله حتى الآن لم أدرس شئياً له علاقة بالتصوير ..
حتى أقيم صورى الفوق دى بس البوست كان إحتفالاً نوعاً ما ... لو سالتنى مباشرة عن أنطباع الناس الجات حضرت المعرض من الأجانب بما فيهم وزيرة الثقافة المحلية هناكـ فهم أصلاً مندهشين من فكرة وجود مصوريين ذاتو دعك من فكرة "بداية نهر النيل فى السودان" وفى وجود إهرامات .. ونوع من الحضارة الإنسانية وطريقة الخليط العربى الافريقى سواء فى العادات والتقاليد وصولاً لملامحنا وعاداتنا وتفاصيلنا ... المعرض تم تحت رعاية مركز فى اول طلب ليهو حدد بوجهة نظر معينة انو ما الغرض من المعرض تعريف سياحى بالسودان بقدر ما هو تعريف بالسودان .. ثقافياً .. إجتماعياً... دينياً...
يعنى الفكرة ما كانت ناجى فى حد ذاته
انا على حسب تقييمى المتواضع لى نفسى انى ماشى كويس ... وبمارس حاجة بحبها .. وبقدر اطور روحي فيها بدون دعاية او مذايدة ...
من شخص او منبر ... لكن بداية التصوير الفعلية بدت من توجيه ناس بعينهم .. إحتمال لو إنى ما كنت مشترك فى المنبر ده ما كان الاقيهم ...
انا بس شايفك عاصر على موضوع العنوان شديد..
وحتى لو امن عليك زول او هاجمك زول .. انا ما كنتا حابي انو يكون الموضوع المُسيطر على البوست ...
دى وجهة نظرى ... طبعاً
والسلام كما تحب
| |
|
|
|
|
|
|
|
|
|
Re: المصور الفوتوغرافي ناجي الملك يثير أهتمام البلجيكين (Re: عمر الفاروق)
|
عمر صديق
الله يبارك فيك ودعواتك ياخ
ـــ
شهاب الفاتح
وانتم فخرى وأعتزازى ,,, طبعاً
ومرفق شكرى وتقديرى ...
ـــ
خالد كودى
شكراً ,,, وربنا يوفقنا جميعاً إن شاء الله ..
ـــ
وليد الشفت
الله ينور دربك ياخ ...
مشتاقين يا مان
ــــ
دينق ...
الله يبارك فيكــ...
ومبروك ميلاد الدولة الجديدة مع امنياتنا بالتوفيق ...
ــــ
العوض ...
إن شاء الله ... بالتوفيق للجميع ...
ــــ
عماد الشلبى
تسلم يا زميل العدسة .. ورفيق الدروب
ــــ
طارق ميرغنى
والزملاء الذين يساندوننا بكل كلمة ...
شكراً جزيلاً لك
ــــ
محمد السني
أستاذى ... فى الطفولة وفى الشباب
كوم محبة وأكوام من الشكر ... الجميل
ــــ
عبد الله السفاح
تسلم يا صديقى .. شكراً على الأمنيات الطيبة بوجودكــ
ــــ
ابو مريم
بالتأكيد الجايات أكتر من الرايحات...
حتماً ,,,
ومافى أى مشكلة زى ما اتفقنا ... أبقي عشرة ..
ــــ
نادية ... شكراً ياستى
وعقبال ما نبارك ليك كل جميل ...
ــــ
محمد عبد الرحمن
أُمن على كلامك فيما يخصنى طبعاً
:)
وشكراً على الامانى الطيبة ياخ
| |
|
|
|
|
|
|
|
|
|
Re: المصور الفوتوغرافي ناجي الملك يثير أهتمام البلجيكين (Re: الملك)
|
عمر عشارى ..
شربتو وبى تَفلو كمان :)
شايفك مُهاجر برضو ...
حترجع متين ؟
ـــ
بكرى عباس
كامل تقديرى وإحترامى
وكلامك .. تاج ...
تسلم يا إنسان
ـــ
سوفى :)
باب جوته مثلاً...؟
ـــ
محجوب البيلي .. شكراً
ـــ
عمر مقبول ...
تشكراتى يا عزيزى
ــــ
داليا حافظ :)
الله يعيدا الايام اللطيفة ديك ياخ ...
ــــ
عمران
الفرح "قسمة" من رب العالمين..
الله يكتبنا لينا فرحة فى أيامنا الفضلت دى
ــــ
دينا :)
عديل كده ..شايفك شايتة فى كم كوم كده
انا جيت ... طبعاً ومنتظر وعدكـ ...!
ــــ
محمد على شقدي
تسلم على الامنيات الطيبة ...
ــــ
امين "الخال"
امين يا رب ... فى حاجة إلى مذيد من الدعوات ...
والامنيات ...ربنا يوفقنا جميعاً
ــــ
ناصر
شكراً على الامنيات .. والتوفيق بيد الخالق
أتمنى انى اكون وفقت وقدرت أتقدم خطوة فى الإتجاه ده
طبعاً الإستفادة ...فى وما اكضب العرفتو أكتر من سنة تصوير فى المعرض ده
ــــ
السمؤال
تشكراتى يا جميل ..
| |
|
|
|
|
|
|
| |
بكرى ابوبكر
احمد محمد بشير
امينة عيسى
ibrahim kojan
ismeil abbas
حبيب نورة
حمور زيادة
زهير الزناتي
محمد عبد الماجد الصايم
محمد المرتضى حامد
Ashraf el-Halabi
عبدالرحمن عزّاز
عمر الفاروق
نجلاء قرافي
ماجد معالى
فيصل محمد خليل
عبد اللطيف السيدح
محمد زكريا
هيثم درار
ياسر السر
مزمل خيرى
عبدالرحيم أبراهيم العبيد
elsawi
nada ali
عمر صديق
شهاب الفاتح عثمان
Khalid Kodi
وليد محمد المبارك
الملك
Deng
Elawad
عماد الشبلي
بكري عباس علي
محمد سنى دفع الله
عبدالله السفاح
Abu Mariam
محمد عبدالرحمن
عمر عشاري
سفيان بشير نابرى
محجوب البيلي
داليا حافظ
عمران حسن صالح
دينا خالد
محمد علي شقدي
أمين محمد سليمان
ناصر احمد الامين
السمؤال بدرالدين
ombadda
إبراهيم عبد الحليم
Magdi Ahmed Elsheikh
فيس بوك
تويتر
انستقرام
يوتيوب
بنتيريست