الهضربة بتودي التوج

الحبيبين كيفنكم
الله يستركم ويبعد منكم العوارض والمرض يا رب
دحين لا قدر الله ان بقى واحدا فيكم داير يشيلو مرارة ولا لوز
يشوفلو ابعد حِتي ممكن يكوجن فيها الشي دة فشان ما يقعلكم الوقع لي واحدا قريبي
ويقعد يهضرب ويفتو كله لامن العكاكيز تتضارب فوقه..
احمد راجلا زين... من قام وشبى وهو رياد ويحب البنوت زي عيونه
اصله قلبه دة رقده خل.. بالله زي الركشة.. اي بت عجبتو يشعلقها في قلبه
حتى ان بقى من طرف واحد...
امه حلفت بي ايمانها علي يتزوج بت خاله..
- يمة انا رايدلي بت من زمااان ودايرا
- يا ولدي بت خالك ان اديت فيها كلمة وماني قادري اتراجع منها
- نان يمة ما تشاوريني.. موش يبقى عندي فهما تاني
- انت عاد ماك ود رضاي عارفاك آآبتقولي لا
- نان يمة فشان ود رضاك تدفنيني
- يا ولدي لا تكتر الحجي بتخالك ياها غتاك وماني شايفالي زولتا غيرها بتنفعها
زولكم اتوكر في بت خاله وعرسها.. وبقى مهَضْلِم علي فُراق حبيبته
الدنيا ساقته معاها وجابلو منها شافعين
يوم حسالو بي ألما في بطنه.. من دكتور لي دكتور
من فحص لي فحص:
ياخي ضروري نشيل ليك المرارة
قال يقوم يمشي مصر يشيلا
اقنعوه يسويها في الخرطوم
اتوكل ودخل العملية والحمد لله العمليي نجحت وطلعوهوا في العنبر.. البنج ما فكة منه
اخواته ومرته واخوانه كلهم متلمين فوقه..
اها والبنج لليلي ما فكة منه قوم يا شقي الحال هضرب وسط الناس:
- يا حنان انا كنت دايرك علي امي عرستلي الكُوهني بت خالي
- وحات الله يا حنان عضم الشيطان أليلا علي راس الكُونش ان بقت نغزتك بيهو علي يجيك تتنوس
اخواته بقن يضحكن وامه تعضعض في لسانها ومرته وشها حمر وهو مرة مرة يديها هضربة
- وحاتك يا حنان رُكبتها علي رجل العنقريب الكافينلهم فيها كوريي
- يا حنان انا وِكِر ضُمة ضُمة
اخوه مشى مسكه من راسو وصاقعلو: احمد قول بسم الله... احمد.. احمد
زولكم ياخدلو صني وتاني يقوم يهضرب:
- يا حنان الضرعات ألاتها زي رُقاد العنقريب من غير لحاف
اصله اخواته ديل بقن يزحن بالضحك.. وأمه اتمحنت ومسكت سبحتها وتدعي في ربها: يا ربي يبقى كويس ود حشاي احمد
المهم المسكيني ما خلالا جنبي تنوم عليها:
- يا حنان شعرها مكبوس كركار زي لساتك القندران المشحمات
- يا حنان انا غيرك اصلي ما ردتة
ساعتين وهو في الحالة دي لامن فاق من البنج
وكتين فاق كويس اخواته اتزرقن ومرقن من الأوضة وطلَعَن اُمَهِن معاهِن واخوانه مرقوا
شويتين المرة شالت سير الدِرِب وبقت تمعط فيهو في رجلينه وتكورك:
انا جضومي زي لستك العجلة المنفس يا احمد... وطاااااق تجلد فيهو بي سير الدرب
انا ستيانتي علي خورتاية الغنم البعلقوها في ضرعاتن... وطاااااق تجلد فيهو بي سير الدرب
الرجل بقى يكورك لامن اهلو جوا منكبسين عليهو.. وبي الله ويامين فكوا منه المرة

دحين يا الحبان ان بقى فيكم واحدا هضراب اليقول للدكتور في البنج تقلي لساني

غايتو انا خايف علي ود شيقوق وصديق الموج
ود شيقوق حا يفتوا كله
ما حا يخليلو عنكوليب ولا قعاد جنب الترعة
ولا ونسة دقاقة في القمرا
وان بقى لي ود الموج يمين حا يضربوه جبخانة كله كله

(عدل بواسطة طارق جبريل on 04-21-2010, 12:35 PM)

Quote: احمد راجلا زين... من قام وشبى وهو رياد ويحب البنوت زي عيونه اصله قلبه دة رقده خل.. بالله زي الركشة.. اي بت عجبتو يشعلقها في قلبه

موبااالغه يا طارق !!

Quote: جبريلا اللذيذ... و الله لو بقينا مجبرين لي شيتا زي ده بمشي جنوب أفريقيا عديل كده... بقول ليهم العملية دي ما بتتعمل الا هناك...دكاترتهم شاطرين في العمليات دي... ببقى الخوف من الموبايلات و الفيس بوك...

شوفت الزوغة دي كيف

Quote: الحبيب \ طارق جبريل ,, كيف حالك وحال ولاداتك؟ الكعب هضربة النسوان الله لاسمعك ليها.

Quote: - يا حنان الضرعات ألاتها زي رُقاد العنقريب من غير لحاف

Quote: كان بقت عليك جنس الهضربة دى حظك ..ناس المغرب ما حيفهموها ضمة ضمة يعنى هضرب هضربتك ...

اخير نهضرب كتامي

Quote: موبااالغه يا طارق !!

Quote: عاد ود الصائم و ودشيقوق امرهم هوين علا الخوف منك ات حاتجيب ضقلا يكركر.

Quote: طارق جبريل سلام ياخي الله يلعن شياطينك قول آمين اضحك الله سنك و الله ضحكت لامن بنيتي الصغيرة جات تتاوق و تشوف مالي أضحك براي

Quote: أها إعترافات زي دي في حكم القانون بتكون منتزعة عنوة ولا تحت تأثير مؤثر. ود جبريل شكيتك على الأمم المتحدة قبل ما تتفرتق.

Quote: يا حليلنا منها بقيت تهضرب وانت صـــــــــاحي قلته شنو كده! زي خرتـــــاية شنو؟؟ ماك نصيح انت؟؟؟؟؟ حليل النخجي و البكاء علا اخوك اليومين ديل ضعلته مكسوووورة عديل لووووووووووووووول ازيك ياخي ومشتهينك والله

Quote: يا حنان

Quote: غايتو حنان السوته رقدت .. وكان لي احمد داك بس ضمه بالغ ..

Quote: أها يا عمكـ جابت ليها بواسير خُــم .. وليّس!

Quote: يا طارق دى ماها هضربة مرارة دى هضربة بواسير عديل كدة

Quote: والله مبالغة يا طارق ربنا يديك العافيه

Quote: والله يا شقي الحال ضحكت ضحك الليلة لي زمن منو والمشكلة براي في المكتب واخوك عامل جادي في الشغل الليلة إتخجيت عديل من الضحك الله يلعن ابليسك يا طارق الله يديك العافية ويخليك لينا كلنا بالمناسبة يا طارق الناس الهنا ديل كلهم واكتر منهم لسا ما جو بيحبوك جدا وانا اولهم

Quote: سلامات يا ود جبريل الحمد لله احنا هضربتنا بنقولا صاحييييييييين!

Quote: ود جبريل .. يديك العافية يابا .. ده ما الخايفين منو ذاااتو !!! بنج شنو يا خوي ؟؟ نحن حرّم النوم ده ما بنغرق فيهو كان ما الجماعة شخروا !!!! الدنيا ما معروفة يابا وحمار النوم شيّااال !!! انشاء الله يوم هضربتك ما يجي .....