سلام عليكم يا ناس المنبر جاكم زولا ختري عجاج كرعيه يجري جري قبُل ما أبدأ لساني يلهج بالشكر يا باشمهندس بكري، لكن يا ولد امي تعبتني تعب شديد خلاس خليتني اتنخج واقشقش في مخاخيتي لامن اديتني الكود، يا زول انت عندك تار مع سودانية المغرب علي قلتم ولا شنو؟ المهم يا جماعة الخير بقيت عضو معاكم وزي ما عارفين الحديد لمن يكون جديد بكون شديد، بالله انطلقت في المنبر دا زي جدول الموية اهابش دا والكز داك لامن رقبتي اتعسمت من الصنقيع جنب الجهاز، وكنت فاكر الناس حا ترحب بي شديد لكن اتاريني طلعت غبيان خلاص ولقيت نفسي زي الماسورة المحلوجة، القصة مُو شلل وكل ناس بترحب بي زولا الجديد ويقدموه للناس انا الكحيان دا ما لقيت لي واحد ينابشني وحتى الناس الهابشتهم ما عبروني، باركتة لي دكتور معز المعرض والله ما ناضمني وتلقاهو قال دكتور الحمير دا كمان طلع لينا من وين، ناوشت "شبا" وسعلتو عن شبا دي لانها قرية ليها مكانة في الفشافيش وبيت الكلاوي واستبشرت خير وقلت لقيت لي واحد بلدياتي أمانة عليكم لي يوم اليلة محل غتس ما عرفتو، كتبت لي بوست عن الحلمنتيشي والله بقا مصنقِر براهو زي الزول الولدتو امه وماتت بي تتنوس ولحقا ابوه بي جلطة، اكان الفنجرية نجود بس الهبشتو كتر خيرا، والنصيحة لي الله دكتور سجيمان ناضمني مرتين في شلاليف نوال الزغبي والانتاية ألتو ديك لكن المسعلة يبدو ليها علاقة بالمهنة حسب علمي انا وهو ولاد حرفة واحدة واصلو ناس بيطرة ديل بيكوسو لي بعضم شديد ليه ما عارف، يمكن والله اعلم كلنا ضُقنا يا لفخة حمار يا نطحة تور يا رفسة حصان يعني بالبلدي كدي أخوان في اللَفِخ، وكمان محسن خالد اداني حنكين كدي، يبدو انه الله حنا علي اخيرا لانه اكتشفت انه "القلب النابض" قريبتي بالصدفة بعد وفاة خالنا "ابراهيم ابو دية" عليه الرحمة. المهم يا جماعة الخير وأنا متلش قدام الجهاز اشتهيتلي ملاح سبروق بي شبت بي قراصة تكون 10 بوصة ومقطع فوقها بصل وجنبها كورية شحمانة بي الشطة والدكوة وعِمَة قديمة كدي عشان الواحد يقشقش فيها مخاخيتو من الشِطَطْ، وقصة الاكل دي يبدو انها وراثية لانه عندي عماً لي بس يشوف جريد الكرِيگة "الراكوبة" اتحرك شوية يقول لي مرتو: " فاطنة جابتلها زيفي (همبريب يا ناس البندر) قومي سويلنا تركين، ان كان جا هنا من كترة الهمبريب كان كمل تركين الدناقلة والمحس كمان، المهم يا جماعة الخير الفكرة اخدت راحتها خالص خالص والتتليشة بقت شلهتة عديل، وبديت افكر في السفر لي السودان لانه السبروق وين القاهو عند المغاربة احبابنا ديل حتى اكلتم الشعبية اسمها ما بيتنطق يوم قلتها للحاجة "بت ابو دية" قالت لي: انت اظنك مشيت انطلقت في المغرب يا ولد ، والمغاربة ديل كان عرفونا بناكل "التركين" كان رحلوني زمان، نرجع لي موضوع السفر، بقيت اهبش في جيوبي لقيت نفسي اباطي والنجم، فلسطين في الضلوع رسمي، لانه عَقَابْنا في السودان الله يديهم طولة العمر قبل ما ترفع سماعة التلفون زي الناس يقولولك: عافي منك رسلنا مصاريف، وعافي منك دي تقلب قراصة النبق لخوخة والتبروقة تبقى قرمصيص وتخلي العطرون جلكوز والسفة مهلبية وباقي اخوكم قليبو رهيف. واصلوا الحاج ليهو طولة العمر أيي "مَرَة" عجبتوا شُلُوخَا في مروي عرسها وكتر البُطان وبقا يربي ويخرج اما لو كان سمع بي مديدة سجيمان ديك كان ضايقنا نحنا ذاتنا في العرس. هسا العمل شنو يا جماعة الخير السبروق دا دخل في النخاشيش والجيوب سكن فيها العنكبوت، وبالرغم من اني حلفت ما ارجع السودان دا تاني لانه واحد كدي في جهاز المغتربين كرهني الدنيا ما خلا ليه مصحف ما حلفني فيهو شي عثماني وشي ورش غايتو كتاب الله ما مابينو علا الزول حجتو كتيرة خلاس، والغريبة يحلفني في المصاحف وشلوفتو مليانة تمباك زي طبق الكسرة وليه جضوما منفخة وصدره مخوجج تقول مُعلاق لبن ولو ما الشنب كان قلت انتاية عديل، والله من خلقني ما شفتة لي زكاة كلو شهر "قالوا اسمها زكاة الراتب" ودي ما عارف هي كل شهر حا يحول عليها الحول كيفن. بالله افتونا يا جماعة الخير في حكاية السفر دي، ولامن يجيني ردكم ما عندي حل غير "محمد كرم الله" واغنيتين يحرقِن الحشا "انا وا مغستي رحل تلوت الليل" و"كُر من حالي كُر قاعدلي في قيزان جَمُر"
صنقيعة: لا شوفتن تبل الشوق لا ردا يطمن اريتك تبقى طيب انت والبي كلو هيِّن
طارق جبريل بيطري ضل طريقه إلى الصحافة بالمغرب
11-25-2005, 01:07 AM
showgi idriss
showgi idriss
تاريخ التسجيل: 08-07-2005
مجموع المشاركات: 440
رفيق الدرب والكفاح طارق جبريل في حاجتين بنتشابه فيهن 1- هاجى من البلد وما عايز ارجع 2- رفيقك في الفلس.. واختلف معاك في الدكترة ... انا دكتور( بشري بيطري) بتسألني كيف ؟؟ ولا فهمتها.. باقي ناس المنبر ديل متشللين... بعنى كل ناس عندهم ناس.. وانت لازم تبقي مع قطيع.. والا حتلقى نفسك مرفوس.. دي نصيحة لأحد مرضاي...؟؟؟ اما حكاية السفر .. ما مرت على في عيادتي زي حالتك دى.. بشوف قاموس الحشرات المهاجرة يمكن القالك فيهو وصفة.. أصلو المرض دا مستشري بين الطاشين.. ولازم نشوفلو علاج
11-25-2005, 02:54 AM
طارق جبريل
طارق جبريل
تاريخ التسجيل: 10-11-2005
مجموع المشاركات: 22555
شوقي ادريس يا الفنجري والله يا زول بسطني تب وخليتني محلق في السماء يعني هم ناس المنبر الفاقع مرارتم من جهتنا شنو ما يلقوا لينا فرقة كدي ويدخلونا فيهامعاهم ويا زول اقولك نحن ما نكبر كومنا ونشوفلنا وحيدين زينا ضهبانين ومفلسين وكيتا في شلل المنبر ديل نسميها هيئة مفلسي المنبر اها رأيك شنو وحكاية (بشري بطري) يا خوي ما فهمتها اصلي باقي متلش شديد
11-25-2005, 03:12 AM
showgi idriss
showgi idriss
تاريخ التسجيل: 08-07-2005
مجموع المشاركات: 440
ابو الشوش يا جميل يا زول مدام وافقتة انا خلاص من جهتي بحاول ادخل ناس المغرب الخمسين كلهم في المنبر واتوسطلهم عند الباشمهندس وانت كمان كبر الكوم من عندك وقصة الفلس بتجيب السودان كلو لي عندنا لانها الوتر الحساس يا زول الناس كلها ضهبانة والبوش هرا مصارينها
يا أبا ريم ليك كده البداية غير الموفقة!! ليه بديت بإذا زلزلت الأرض زلزالها.. ما كان أحسن تخلينا مع القراصة اللي عندما ذكرتها ريقي جم واتذكرت استاذنا دكتور حيدر أحمد إبراهيم الذي كان له الفضل في أن آكل أول قراصة في حياتي بشارع فال ولد عمير.. ليه جايب سيرة جهاز المغتربين.. جهاز تعذيب المغتربين.. جهاز تغريب المغتربين.. جهاز تخريب المغتربين.. جهاز تشريد المغتربين.. جهاز تكشيت المغتربين.. ليه كده؟؟! لك الود يا الساكن تمارة
11-26-2005, 01:10 PM
القلب النابض
القلب النابض
تاريخ التسجيل: 06-22-2002
مجموع المشاركات: 8418
الاخ طارق جبريل حبابك جوة البيت والدار .. ولو انها متأخرة. بس عندي سؤال انتو حكايتكم شنو يالبياطرة مع حلمنتيش و"الكتابات الساخرة" دي بتجيبوها من وين ؟. على العموم اهلا بك عضوا في جماعة الصحافيين بالمنبر.
11-27-2005, 09:52 AM
showgi idriss
showgi idriss
تاريخ التسجيل: 08-07-2005
مجموع المشاركات: 440
تلراف: الى الفردة المشلهت : طارق جبريل من المتلش :أبوالشوش كيف كان مراحكم.. لقد تأخرتم في جمع القطيع الفلسي.. عرفونا...بآخر أنباء استقطاب المعلمين القايلة لقد التحق بشلة الفلص .. مفلصان سنرى لهم زرائب هنا.. لا تدع البوست يرعى كما يشاء .. انتبه للداجنات من القواعد.. فقد تصيبها الفلو بيرد.. رغم أنها اشاعة مثل السلام والتعليم المشاع.. ومن أخبارنا مكتبة طبية الكترونية لكل مراح... حتى يتعلم ابنائنا من دون قيد ..أو نطح العزر لكل نطيحة أو منخنقة أو موسومة.. وللضكور..
تتليشة: كنت قايلك من فوارس كنت قايل ظاتي فارس أو حصان بس طلعت بالختورة من المفالس وفي الختورة (صرنا) خالس حظ أشتر... زي حظوظ (الخنبسان)
11-29-2005, 06:13 AM
طارق جبريل
طارق جبريل
تاريخ التسجيل: 10-11-2005
مجموع المشاركات: 22555
الحبيب ابو الشوش تحية مشلهتة يا فنجري سامحنا الواحد بيقتس مرة مرة كدي لزوم الشوق والبحث عن العيش والواحد لسانه لمن وقع من التليش ابشر يا زول ناس المغرب كلهم حا ادخلهم ليك في هيئة المتلشين العليا بس منتظرين الباشمهندس يطلقلنا الراهائن (الكودات) وبعداك عينك ما تشفوف الا النور والله ننزلك في المنبر نتخوجج زي صلاح ادريس في الخرطوم بس هو عنده القريشات ونحن عندنا كيمان من التليش والحشاش يملأ شبكتو
تليشة: يا الصيدلاني تعال ياخي ما تبقى بايخ تعال ياخي نفتح اجزحانة ان شاء الله نسرق ان شاء الله ننهب ان شاء الله من باقي الاعانة حبة زكمة وريدة حبة حبة قحة وريدة حبة تبقى من كل حبة قربة واحدة نفخة ونفخة تاني القربة تمرق قندراني
11-29-2005, 06:22 AM
طارق جبريل
طارق جبريل
تاريخ التسجيل: 10-11-2005
مجموع المشاركات: 22555
دكتور محمد الامين سلامات يا الساكن عجمان والله هناك ايامكم ساكوبيس ورغيفكم ذاتو طري وناعم زي مؤخرة طفل حديث الولادة. يا اخوي ان بقيت كملتلك شغل ناس جهاز المغتربين معاي بتجيني جلطة من الحكي وانا عندي عقاب في السودان وكيمان لحم هني وهناك وداير اعيش عشان أأمنلهم القوت وكدي والله اشتهيت المقهى السمح القعدتني فيه داك ويا زول العروس اخبارها شنو
12-01-2005, 01:15 AM
محمد الأمين موسى
محمد الأمين موسى
تاريخ التسجيل: 10-30-2005
مجموع المشاركات: 3470
يا دكتور محمد الامين الايزو دي ذاتها ما ممكن تتصنفر وتبقى عرس ودحين ان بقيت باريت ناس بيومي واطاتك اصبحت خلهم يا زول وتعالنا هني العرس زي الشي الكعب والعماريات ما لاقيا اليشيلا
12-01-2005, 03:26 AM
محمد الأمين موسى
محمد الأمين موسى
تاريخ التسجيل: 10-30-2005
مجموع المشاركات: 3470
قريبتي الفنجرية القلب النابض عاد انا بعد تلفونك داك ما اتنفختة وبقيت ماشي في الرباط زي الطاووس والله البوليس وقفني عشان مشيت في الضوء الاحمر والله ما اشتغلت بيه الشغلة يا زولة كلامك دا خلاني اريل عديل كدي وهسا ان بقا جابولي بوش باكلو كأنه سبروق وخليتيني افكر بدل ما امشي السودان اجيك ناطي هناك لكن خفت من جواز سفري العامل زي البامية فرك دا والانجليز باقي الايامات دي لاوين بوزم مننا وتسلمي يا السمحة انت وانشاء الله قدرتي تتصلي بي طلحة في الشرق الاوسط
11-29-2005, 06:39 AM
AMNA MUKHTAR
AMNA MUKHTAR
تاريخ التسجيل: 07-31-2005
مجموع المشاركات: 13702
طارق جبريل البيطرى الحلمنتيشى ..كيف الحال ، ومبروك الاستضافة فى حوش بكرى. وعلى ذكر موضوع الشللية.. هو فعلا موضوع سخيف ، لكن الحكاية لا تستاهل الاهتمام ..فقط اكتب ما تريد وستجد من يقرأه .
واعدك بأنى سأكون قارئة مواظبة.
تحياتى لكل ناس المغرب فى البورد.
آمنة أحمد مختار
11-29-2005, 06:44 AM
طارق جبريل
طارق جبريل
تاريخ التسجيل: 10-11-2005
مجموع المشاركات: 22555
الزول الزين حسن البشاري يا سيدي ترحيبك قبلنبو ان بقى متأخر ولا بدري هو نحن الطارينا منو في المنبر دا وحاتك ولا زول وبعدين حكاية النضم والحلمنتيشي ألليل البياطرة ديل دا يا زول ما خترفة وطربيق ودراب ساكت ودا كلو من اللفخ اما رفسة حمار ولا نطحة تور وكدي يعني اجارك الله يا زول نحن قرايتنا كلها جري وخلعة عشان كدي انتو بتشوفو كلامنا لذيذ لكن يا زول دي هضربة ساكت يا ود ابوي
11-29-2005, 06:51 AM
طارق جبريل
طارق جبريل
تاريخ التسجيل: 10-11-2005
مجموع المشاركات: 22555
اها اقدل يا اخوي بس قش الرياله دي لانو والله ما فارزين الملاح من الرياله خلينا ناكل معاك وما تقرفنا
شوف يا طارق وشوشو كان بتواصلو في طبكم البشبيطري دا انحنا ما معاكم بس كان ناس شلهته وبشتنه والله نعجنكم الانجايز ديل علمونا كل شيئ حتى ملاح الرجله بقينا نعملو بالسبانخ
كدي قول لي البصاره كيف؟
والله نفسي فيها مع شوية حرشة كدا وقهوة كحلة
ودي لك والى ناس المغرب
هترشه
حلاتك انتي يا الرجله
وحلات الباميه بالفجلة
تقزقز نيفه دون خجله
تمص طايقو راس عجله
وتقش ايديكا بي عجله
تهبش تركب العجله
وتقوم سداري لي الملجه
تلاقي السمحه تبسم ليك
وتبرق ليك حلاة فلجه
تطير الغدوة من الراس
تترتر توصل الدلجه
وتعاين لي خلوق الله
وتقوم خجلان براك تنجر
تنطط زي كليب الحر
تفتش لي البكورك جر
ولما السمحه حدرت ليك
وشفتا وشيشه داك انصر
شلتا قفاكا في وشك
وصوف قبال تقوليك كر
اها قبل ماتقولو لي كر انا متخارج
ياخي جوعتونا ذاتو
سلام عبدالله
11-30-2005, 04:59 AM
طارق جبريل
طارق جبريل
تاريخ التسجيل: 10-11-2005
مجموع المشاركات: 22555
عبد الله ولد العكاري يا راجل والله كلامك متمسح خلاس وانت يا اخوي تبرا من الفلس شديد وبعدين الفلس يجيك من وين في بلاد الانجليز والقصيدة ألتك دي حقو تنزلا في الرابط دا حلمنتيشيات
تليشة: ابوك بي هناك ليهو شخير والخمارة ليها هدير والسوسيو وقع في الزير
12-06-2005, 03:32 PM
Walid Safwat
Walid Safwat
تاريخ التسجيل: 01-15-2003
مجموع المشاركات: 1227
Quote: حلفت ما ارجع السودان دا تاني لانه واحد كدي في جهاز المغتربين كرهني الدنيا ما خلا ليه مصحف ما حلفني فيهو شي عثماني وشي ورش غايتو كتاب الله ما مابينو علا الزول حجتو كتيرة خلاس، والغريبة يحلفني في المصاحف وشلوفتو مليانة تمباك زي طبق الكسرة وليه جضوما منفخة وصدره مخوجج تقول مُعلاق لبن ولو ما الشنب كان قلت انتاية عديل، والله من خلقني ما شفتة لي زكاة كلو شهر "قالوا اسمها زكاة الراتب" ودي ما عارف هي كل شهر حا يحول عليها الحول كيفن.
ورغـــم أن حدثا مشابها ومع نفس الجهاز الموقر قد حدث لي في العام الماضي إلا أن ذاكرتي قد عادت إلى الوراء واستحضرت " قسما " كنت قد جاهرت به بأن لا أعود مجددا لهذا السودان .. ولكن يا صديقي روعة وتفرد هذا الوطن الجميل تجبرك على العودة حتى لو استدعى الأمر أن تصوم أياما وشهورا ...
ولا بأس هنا من أن أسرد عليك ذلك الموقف الذي جعلني أقسم ، لترى كيف أن البعض ( يتلذذ ) في تنغيص عطلة القادم للوطن . .............. حدث أن عدت - في مطلع التسعينيات - إلى الخرطوم قادما من دمشق بعد غيبة امدت لعامين كاملين حسبتها آنذاك كافية لتحطيم الرقم القياسي في الابتعاد عن الوطن ... عدت ، وبي من الأشواق ما جعل الخرطوم تتراءى لي طوال الرحلة كأنثى ما خلق الله من يضاهيها في الجمال والروعة. حطت بنا الطائرة بعد محاولات تكررت كثيرا إذ إن " كتاحة " من إياهم كانت في انتظارنا ... كم كنت سعيدا لحظتها بتلك الكتاحة التي مكّنتني من استنشاق " تراب الوطن " دفعة واحدة بالأنف والأذن والعينين... دخلنا إلى صالة الوصول يسابق بعضنا البعض بتلك العشوائية التي تميزنا عن بقية خلق الله ، أستقبلتنا وجوه شاحبة مكفهرة ووجدنا معاملة من رجال الأمن أقل ما توصف به أنها " عدائية " ..أصبت بخيبة أمل كبيرة إذ كنت متهئيا لاستقبال تتوزع فيه الابتسامات وعبارات الترحيب .. ببطء يثير الحنق اكملنا إجراءات الدخول ودلفنا لصالة الجمارك كقطعان الماشية محاصرون برجال الأمن وبالجمركيين وصيحاتهم تتعالى : " أيوة أنت أمشي بهناك ... تعال إنت يا زول ماشي وين ..اترزع هنا .. "وفي لحظات قليلة أصبحت الصالة أشبه بسوق للباعة المتجولين ، الجميع أفرغ - بتعليمات - محتويات الحقائب التي يحملونها.. ، أحسست بالوقت يمرّ بطيئا.. فتحركت بصعوبة وسط الملابس والأحذية المفترشة على الأرض وانتحيت جانبا بأحد موظفي الجمارك بعد أن توسمت فيه خيرا وخاطبته قائلا : - ياخي لو سمحت .. أنا طالب بسورية ما تاجر شنطة ، ولي سنتين ما رجعت البلد .. وما عندي غير شنيطة واحدة بتسهل مراجعة محتوياتها .. يا ريت تشوفها وتعفيني من انتظار الصف الطويل " ... ضحك صاحبنا عاليا ورد منتشيا : " قلت لي طالب ..هاهاها ما ياكم انتو ذاااااااتكم البنفتش ليكم ... أفرش شنطتك دي بلا لماضة معاك وانتظر دورك " استفزتني ضحكته ورده غير المتوقع فقلت له وعلامات الانفعال بادية عليّ : " أسمعني أقول ليك حاجة .. ما أنا بفارش .. النشوف حتعمل شنو " - انتظرني حأوريك بعمل شنو ". قال هذه الجملة واختفى وسط الزحام ، ولم يترك لخيالي فرصة لوضع تصور لما يمكن أن يحدث بعد هذا التهديد فقد عاد بعد هنيهة مصحوبا بزميل له... ، بنظرات لا تخلو من الشفقة إلتفت نحوي معظم الفارشين والفارشات بعد أن سمعوه يخاطبني وهو لما يصلني بعد: - قالوا لي عامل فيها ضكر بط - ياخي أنا البط ذاتو ضكرو وانتايتو ما في كتير ود لي معاهم..شوف شغلك وخليني امشي لبيتنا" هكذا رديت بانفعال.
ولا أخفي عليك أخي طارق بأنني أكبرت في هذا الأخير مراعاته لحقوق الانسان ، فقد وجه لكماته وشتائمه و " شلاليته " للحقيبة ، ولو فكر في تصويبها لجسدي لما وقف مانع في وجهه ، فمن جهة هو مصنف من ضمن " القوات النظامية " .. وكم روعونا منذ الصغر بالستة أشهر سجنا نافذا التي تنتظر من يجرؤ على اقتلاع " زرارة " رجل من القوات النظامية ، ومن ناحية أخرى لا مقارنة البتة بين بنيته - ما شاء الله - وبين جسدي الهزيل وقتها. وبعد أن مارس هذا " الأبضاي " على حد قول اخوتنا السوريين -ساديته بحق الحقيبة تبرّع لي مشكورا بـ " كيس نايلون أنيق " عليه شعار مؤسسة الأسواق الحرة ولم ينس أن يضع بداخله خمس قطع من الملابس التي تخصني. بعد ساعتين بالتمام والكمال من وصول الطائرة وجدت نفسي خارج المطار ، استنشق مجددا " تراب الوطن " وكلمات الجمركي الأخيرة ترن في أذني " عشان نوريك لماضتك دي أمش بعد يومين تلاتة لمدينة الحجاج وفتش على شنطتك "
12-11-2005, 08:16 AM
Muna Khugali
Muna Khugali
تاريخ التسجيل: 11-27-2004
مجموع المشاركات: 22503
العزيزة مـني عـوض خـوجـلي لكن يا بت الحلال ما خليتيي اريل رسمي واقشقش في مخاخيتي عديل كدة كان كدي انا جاييك ناطي في مربع 9 في الامتداد واصلي قريب منك في مربع 3 بس بالله الشية تكون بتاعة جمر والشطط من الابيض تحياتي
12-13-2005, 02:56 PM
طارق جبريل
طارق جبريل
تاريخ التسجيل: 10-11-2005
مجموع المشاركات: 22555
تعرف يا باشا لو كنت رجعت اليومين ديل كان مرروك طوالي خوفا من انفلونزا الطيور
عشان كدة انا بقول قبل ما يعينوا ايي زول في مطار الخرطوم مفروض يرسلوه كورس للابتسامة في سنغافورة والخوف الواحد منهم بعد يجي من سنغافورة يقوم يقول ليك (ضكر فيلة)
12-13-2005, 03:22 PM
القلب النابض
القلب النابض
تاريخ التسجيل: 06-22-2002
مجموع المشاركات: 8418
ود عمتي لومتني علشان ما جبت ليك نلاح السبروق لكن بوريك ليه الليلة دي وما تجي تقول لي المصران قام علي أصلك ولا جهز اللبراكس : اول شي تعمل الشوربة العادية بتاعة المفروكة لحمة + البصل والملح والموية
بعد ما الشربة تنضج طلع اللحمة علشان ما تتهرس من الفرك
كب السبانخ وكل مرة جرب بالمفراكة انها وصلت درجة من النضج " 10 دقايق" كب البامية في الحلة وخليها سبعة دقايق وأضف نصف ملعقة صغيرة بيكربونات خليها دقيقة وأفركها لغاية تموت. وبعد ذلك اضف الثوم والفلفل.
تقدم ساخنة بالكسرة وتفضل بالقراصة 3 بوصة
وبالهنا والشفاء تحياتي اسامة السيد!!!!
جهز الحبوب قبل الاكل وجهز صحن البصل بالليمون والشطة. رسل للجيران صحن معاك على الخطوط البريطانية.
12-13-2005, 03:27 PM
طارق جبريل
طارق جبريل
تاريخ التسجيل: 10-11-2005
مجموع المشاركات: 22555
بت خالي النجيضة ريالتي ولصت قعر الجزمة وبكرة من تصبح ا########## اقوم افتش على الحاجات القلتيها دي عفيت منك يا بت ابودية واصلو الدياب ديل يا فنانين يا بتاعين ملاهط الظاهر علينا انا وانت ناس ملاهط ساكت وهي الملاهط دي اذاتها ما فن مو كدي يا بت الخال
12-13-2005, 06:32 PM
القلب النابض
القلب النابض
تاريخ التسجيل: 06-22-2002
مجموع المشاركات: 8418
الحبيب ود جبريل ... أمبارح المدام رغم أنها جعلية من ناس بانقا .. بس ظبطت لينا تركين وملحقاته من البصل والشطة بالدكوة .. فورنا ليك دم العمارة دي كلها لحدي ما لاوزنا يجونا ناس الدفاع المدني ... وهكذا عزيزي وتكريسا لذكرى قريتي الحبيبة الجميلةبالشمال " كرمكول " أمارس هذه الطقوس الجميلة كل ويك آند .. ورغم ذلك عزيزي .. ذكرني موضوعك الجميل .. أحبتي بالجزائر وموائد "الكسكسي " بياء في آخرها تفادياً للإحراج ذلك المعمول في البيوت والمظبط على يد زميلتي " عواد عباسية " وبجانبه اللبن الرايب الأصلي سليل الزرايب البديعة ... وإمعاناً في الشلهتة " أخوك بحب الطعام " تحضرني الآن رغبة قوية في ملاح شرموط أبيض تقيل بالسمن البلدي والكسرة البيضا الرهيفة الما خمج .. ولك دائماً أيها الحبيب .. أشواقي أخوك فرحات
12-15-2005, 03:22 AM
طارق جبريل
طارق جبريل
تاريخ التسجيل: 10-11-2005
مجموع المشاركات: 22555
العزيز ود فرحات ايامك ساكوبيس انت على الاقل كان اتمنيت بت بانقا جنبك انا كان بالغتة خاص في التمني بظبط لي ويكة سجمانة وبراي وباكلها بالكوراسا شفتة الشلهتة دي كيف. وعلى ذكر كرمكول كان في واحد بناي في منطقتنا في البركل دايما يتغنى بكروكولكم تلك: كرمكول يا بلد الجرم كرمكول اناما بنوم هل لديك اي اخبار او ايميل عن ذلك العسكري المثقف ود الصديق
12-21-2005, 05:33 AM
طارق جبريل
طارق جبريل
تاريخ التسجيل: 10-11-2005
مجموع المشاركات: 22555
يا جماعة الخير السبروق انتهينا منه والبرد دخل في العضام والرطوبة عششت فينا زي الحبوبات اها شوفوا لينا حاجة تانية نلهطا عشان البرد دا وعلى ذكر الحبوبات والرطوبة كان عندي حبوبة لمن تركع في الصلاة تقول: تقول الله اكبر..... الله الله الله يا ركبي... سمع الله لمن حمده الله يرحمها.
الاخ ود جبرين سيد المتلشين صباحات شوقنا بي شوق .. صباحك فركت السبروق وين انت وين ديارك ...؟ ليك مدة ما ريلتا و أنا في إشتياق لي ريالتك يا مريل وين انت وين الهيئة وين ديراكم نحن غبنا بي عذر وانتو ما عندكم خبر سلالالالالالالالالام كتير نحن هنا بي الجد: عندي موضوع مسخن للنقاش ( الاحزاب السياسية إحتضار .. القبلية إنتصار.. لكل قارئ خيار ) شاركنا الرأئ بالجد كده وبدون تليش تليشة : ليس بالسبروق وحده يتدفي المتلش ود زبيدة
12-21-2005, 06:00 AM
طارق جبريل
طارق جبريل
تاريخ التسجيل: 10-11-2005
مجموع المشاركات: 22555
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة