|
|
 الهوا ضَكَر ..
|
الخرطوم الغريقة ..
أحبك ..
.....
و كنا نكثر من إقتعاد النواصي . في حيينا ثلاث نواصٍ صالحة للقعاد .. و الزمان وقتئذٍ أوائل الثمانينيات ، و نحب السينما و تدخين البرنجي و الشامبيون و الروثمان .. نجاهد في استعراض فتوتنا المراهقة بأيما كان من صنوف ( الرجالة ) .
أقول كانت النساء نساء في زماننا ذاك . تنقسمن لصنفين : نساء خالات ، . و أخريات غير خالات صالحات للحب و العشق و الهوى .. و الليل الذي بهن يطول و يحلو .
حسناً .. كان الهواء حينها " ضكراً " !!!
تذكرت ذلك و الخرطوم تعصف منذ يومين و تمطر ، و خط الإستواء مستويٍ تماماً فوق أم يافوخنا .
صعالبك الحي و رواد الناصيات الكواذب الجميلات ظلوا يتخذونها مقاعد للونس و المناجاة و بعض نزقٍ حييٍ مما يمارسه الفتية الذين اشتموا " صُناح " إباطهم . فما أن تهب نسيمة ترفع الغبار عن الأرض قليلاً إلا و يعد الصابئة أولئك للصيد عدته .. صيدٌ أدواته العيون و القلوب الصبية ، و الطريدة : فستان وسيع الحواف بطياتٍ و طياتٍ توجع القلب ، و تنورة هفهافة تسر الناظرين و ترفع صاحبتها مقام فينوس الإلهة .
كانت النساء بنكهة البهار - قلت ذلك ؟ - حسناً ..
الخالات كن بالتياب يتهادين و لا أجمل .. لا أوقر ، أوسمتهن الأمومة الجميلة حسناً فوقه حسن . ثيابهن بيض .. أشهرها أبوقجيجة .. علامة العاملات و المعلمات و و و .. و أخرى تياب مبرقشة بألوانٍ عجب .. كنا نعرف طرفاً منها في ثقافتنا الشعبية المحدثة و لمجاورتنا لأحياء الخرطوم اتنين و تلاتة .. و حيّنا نحن خير الأمور وسطاً بينهم . يسألنا من يسأل فنقول : نحنا الديم : ضواحي العمارات ، فنما إلينا من علوم الموضة رسالة لندن ، و الشيفون ، و الزلاّق - و الأخير كنت أحبه لتواطئه الدائم معي - ذلك ثم تأتي الإسكيرتات الواسعات المكشكشات الخصيرات المنتصفات للساق .. ( لما تعب محمد سعد من ذكورة الهواء اليومية قال في إنهاك و قهر كبير : البنات ديل حقو الواحد يمسكهن يدقهن ) .
أقول لكم جازماً أن تلك الاسكيرتات كانت تؤنث كل من ترتديها .. ثمة مسحة أنثوية ساحرة بديعة كانت في تلك التنانير الفضفاضة يعلوها قميص ما .. خصير هو الآخر .. قصير الأكمام يشق ظهر الباصريه .. و قد كنا بُصّرٌ راؤون .
المدارس الثانويات كانت تحيط بحينا .. ما أن ينتصف النهار إلا و يندلق اللون الأزرق على الطرقات و الدروب البينية الحميمة .. تعج الحافلات زرقة و شقشقة ، و عطور خفيفات و حقائب حدائق .
مقتل كلنا كان فيمن تحتضن مجموع كتبها بين يديها .. ذاك عُرفٌ بقي بيننا ، و ظل عالقاً بخاطري ( لا أعرف ماذا في ذلك الوضع يجعله مسماً و قاتلاً .. أن تحتضن إحداهن بالفستان الأزرق كتبها أمام صدرها و بين يديها .. و تخطر خفيفة خجلة !! ) أظن كان بنا عُتهٌ ما أو شيء من هذا القبيل ..
أعود للفحات الهواء حين يجن معنا و ندخله في زمرة الرفقة و الأصحاب ..
قال سيد خليفة : أي سربٍ يتهادى ، و كن يسرن سرباً سربا .. جاهدات في لَمّ تلك التنورات عليهن خشية فحولة الهواء ..
لكنه الملعون يغافلهن و يدور يدور ثم تنفخه الأرض علواً فيعلو .. و ترتفع الحواف الحشيدة أنوثة بطياتها و اتساعها و خيرها و خيرها ، و تصيح الأراضين الجالسه من شعوب النواصي مهللة : أمممممك .. الهوا ضكر .
ربما عرف أهل هوليوود بذلك الكشف السوداني أيام حبيبتنا مارلين مونرو .. و صورتها الشهيرة تلك و هي تلم كتفيها المرمر عليها ، فينعجنان طوعا .. ترفع نحرها فيضيق مجري العطر .. و تضيق بنا الوسيعة ، يرتفع ذاك الفستان المجنون حتى بالكاد يغدو ورقة توت و .. تنهمر الأضواء . هوليوود عرفت بأمر ذاك ( الهوا الضكر ) بتاعنا .. فكسبت الملايين من أنفس الخلق المعلقات على السببية ، و مئات ملايين من العملة الخضراء بنت الذين .
لا تبدو النساء الآن نساء .. ما ثمة أنوثة حقيقية هنا في الطرقات .
رأيتها تضيق الإسكيرتات ( أهذا اسمها الآن ؟ ) و تضيق الخطوات ، تضيق الطرقات بزرافات منهن ، ما ثم فرق هنا بين واحدة و أخرى .. لا تشي تلك الملابس المكرضمة بشيء ، ليس من حس أنثوي يستوقفك .. ليس ما يشعل فتيل الأرض فتغدق و تسبغ علي واطئاتها ذاك السحر الأنثوي المتين .
اليومين ديل الهوا ضكر ..
.. على الفاضي .
.....
حبيبتي الخرطوم .. ( صبحك الهوى بصبحه الجميل ) .
|
|
 
|
|
|
|
|
|
|
|
Re: الهوا ضَكَر .. (Re: Emad Abdulla)
|
| Quote: لا تبدو النساء الآن نساء .. ما ثمة أنوثة حقيقية هنا في الطرقات . |
النساء هن النساء .. و الأنوثة هي الأنوثة .. و لكنه حكم الزمان 
| |
|
|
|
|
|
|
|
|
|
Re: الهوا ضَكَر .. (Re: Hussein Mallasi)
|
ضكر دماغك البصلحو الهوا الضكر و ذكرى انوثة غابت مثل اشياء اخرى
يمكن "الغلط" ما في الانوثة بل في شوف الانوثة ... امشي اكشف او غير النضاره او اترزع في بيتكم استنى حسن الخاتمة
حقك في | Quote: الناصيات الكواذب الجميلات |
اخدتو و كفاية
| Quote: أخريات غير خالات صالحات للحب و العشق و الهوى |
"الصنف" ده يبدو انه انقرض ... في براقماتية و حسابات و براكتيكاليتى تقيلة مسيطرة ...
الحقونا بي هوا .... ما مهم جنسو شنو
| |
|
|
|
|
|
|
|
|
|
Re: الهوا ضَكَر .. (Re: esam gabralla)
|
قلت ليك مية مره : الحمبكة و النرفزة دي ما كويسة معاك ..
إنت زول صاحب عيا .
و بعدين كان إنت كان ملاسي .. الزول سااااكت ما يتمطّق شوية بواقي ذكريات معاكم وللا كيف ؟
سابقة : أول مرة تتفق مع ملاسي في شي .. الله يستر .
......
إتخارج يا عصام بالله ..
ناقصك انا !!
| |
|
|
|
|
|
|
|
|
|
Re: الهوا ضَكَر .. (Re: Emad Abdulla)
|
| Quote: أقول لكم جازماً أن تلك الاسكيرتات كانت تؤنث كل من ترتديها |
الإسكيرتات الـmini لو ربطوها على عمود كهرباء، لتجمعنا حوله..
___
رمضانك كريم يا عمدة..
| |
|
|
|
|
|
|
|
|
|
Re: الهوا ضَكَر .. (Re: خضر حسين خليل)
|
خضر و الأسرة ..
السلام عليكم و رحمة الله تعالى و بركاته ..
و بعد ، نفيدكم أننا بخير و علي خير ..
هوا ضكر ما ضكر إنت بعد ده ( و الأسرة ) ناس بلكونات سااااااااي ..
لسه فوقك الملايكة ؟؟
إنت الملايكة ديل قالوا ليك تمسكهم عندك و تقعد ؟ مافي مواطنين تاني بيعرسوا غيرك يعني وللا النظام شنو ؟
شهرين عسل .. يا لصقة ؟
.....
اتصل ضروري ..
أنا و خالد بنفتش عليك .. إنت و الأسرة و الملايكة .
| |
|
|
|
|
|
|
|
|
 Re: الهوا ضَكَر .. (Re: esam gabralla)
|
ود جبرالله يا صاحبي!
أجمل مافي النساء لبسهُنّ، حسن إختيار الزي مع عدم الإسراف فيه هو ما يجعل المرأة أنثى..
___
الإمساك لسه قدامو ساعة وعشرة دقائق، لو ما إنشغلت بأكل العيش، فلي عودّة مبروكة إن شاء الله..
| |
|
|
|
|
|
|
|
|
|
Re: الهوا ضَكَر .. (Re: Yassir Tayfour)
|
انتو ملاعين ياخ
الله يدينا خيركم .... عصام رسل لي عنواك في الايميل عشان تستلم وصيه من تاج السر....
صاحب الهوا الضكر بجيك راجع والله هنا الهوا انثي جد جد ومزركش كمان ..... والبحر بجيب المصايب
كويس!! رمضان كريم وتلفوني البيفطر داك المسا كويس!!
خدر زول ملعون والله يا عماد!!!!!!!!!
فطور العيد عندكم!!
متفق انت مع ملاسي (بركات رمضان)!!!!!!!!!!!!!!!!!!!!!
طيب اعزمو معانا الفطور ...الضكر !
| |
|
|
|
|
|
|
|
|
|
Re: الهوا ضَكَر .. (Re: ibrahim kojan)
|
يا خواننا أنا بتكلم عن ضكورة الهواء حق زمان ..
هوا أنثي ده ما أدونا ليهو يا كوجان .
إنتو ناس خواجات ساي .. مرفوع عنكم القلم ..
تضكروا الهوا .. تأنثوهو .. خاتف لونين ، على كيفكم .
.......
و آخر دعوانا مثلما قال ود التوم : تلفون منك قبل الفطور .. الله و النبي .
| |
|
|
|
|
|
|
|
|
|
Re: الهوا ضَكَر .. (Re: Yassir Tayfour)
|
| Quote: الإسكيرتات الـmini لو ربطوها على عمود كهرباء، لتجمعنا حوله.. |
تجمعنا ؟؟؟
اللهم لا اعتراض ..
اللهم إني صايم .
.....
أمشي يا ياسر من قدام وشي .
| |
|
|
|
|
|
|
|
|
|
Re: الهوا ضَكَر .. (Re: Abd Alla Elhabib)
|
Quote: كانت النساء بنكهة البهار - قلت ذلك ؟ - حسناً ..
الخالات كن بالتياب يتهادين و لا أجمل .. لا أوقر ، أوسمتهن الأمومة الجميلة حسناً فوقه حسن . ثيابهن بيض .. أشهرها أبوقجيجة .. علامة العاملات و المعلمات و و و .. و أخرى تياب مبرقشة بألوانٍ عجب .. كنا نعرف طرفاً منها في ثقافتنا الشعبية المحدثة و لمجاورتنا لأحياء الخرطوم اتنين و تلاتة .. و حيّنا نحن خير الأمور وسطاً بينهم . يسألنا من يسأل فنقول : نحنا الديم : ضواحي العمارات ، فنما إلينا من علوم الموضة رسالة لندن ، و الشيفون ، و الزلاّق - و الأخير كنت أحبه لتواطئه الدائم معي - |
غايتو..
رمضان كريـــــــــــم
و اعفص تحت شوف عركي بغني شنو؟
وقطع شك!!
ياهو زمن التوب..داااااك!!
######
معليش لانزال المادة دون استئذان يا عماد!
http://www.youtube.com/watch?v=loOiL72OBVg
| |
|
|
|
|
|
|
|
|
|
Re: الهوا ضَكَر .. (Re: Abd Alla Elhabib)
|
هسه انا اقول شنو؟؟؟؟؟
اتخاجل والا اتخارج؟؟
يا عماد رمضان كريم
وانت قاعد فى الناصية كم مرة تدللت حسناء و استنجدت بيك
عليك الله يا عماد تعال ايدك معانا عاوزين نغير محل الكنبة والا الدولاب والا التلاجة
فنهضت مزهوا ان تم اختيارك من دون خلق الله المتنواصين
وعشان تثبت لها ولهم ان اختيارك لم يكن عشوائيا تفننت فى اظهار ماهو قادر على تحريك المستحيل!!!!
عضلات تبش قال ليك
اما عضلات القلب فكانت زى ديك العدة تقفز و يتوالى صدى قفزاتها فى كل ما حواه الجذع
مدعى انت يا عماد
عضلات بيش
:) :) :)
| |
|
|
|
|
|
|
|
|
|
Re: الهوا ضَكَر .. (Re: Siham Elmugammar)
|
| Quote: أجمل مافي النساء لبسهُنّ، حسن إختيار الزي مع عدم الإسراف فيه هو ما يجعل المرأة أنثى.. |
يا سلام ياخ، الود دا بيقول درر تفطّر عديل!!!
يا عمدة دا ما بوست رمضانى، بيجوك ناس النظام العام.
| |
|
|
|
|
|
|
|
|
|
Re: الهوا ضَكَر .. (Re: abubakr salih)
|
أحب الخرطوم على أي حالة كانت
-------
أنوثة منو يا عمدة ؟؟
نساء هسي بقوا ( أولاد عم ) عديييييل
من الجري اليومي ، والشغل والمشاوير الما بتنتهي
أها تصدق الجري ده ممكن يغير هرمونات الأنوثة عندهن
وده البيخليهن أقرب إلى أولاد العم من بناتو
عشان كده قامن يعوّضن و يتجمّلن بالمضيّق والمحزّق ، والألوان والكريمات
التي تقضي على البقية الباقية من الأنوثة ..
ما في مجال مقارنة بين بنات التمنينات وبنات الالفين
ديلاك عاشن حياة الدعة والانوثة الجد ، وما عندهن جري ولا طيران وحياتهن ( أوانئذٍ) - كانت - ساااااهلة ، مش زي ناس قريعتي راحت ديل
والله أنا بحن عليهن ، جن في زمن أغبر ..
- الكلام ده (ليس عاماً) آآآآي بالله ، ما ناقصين نحن ..
| |
|
|
|
|
|
|
|
|
|
Re: الهوا ضَكَر .. (Re: Salah Abdulla)
|
صلاح بن عبدالله..
للحقيقة بنات الزمن ده بي طرطشت هدومِن، أنجّض من الضكور في احايين كثيرة، قرّن، وإشتغلّن وشايلات بيوت صبيانها قاعدين في ضل الضحى..
___
رمضان كريم ياخ!
| |
|
|
|
|
|
|
|
|
|
Re: الهوا ضَكَر .. (Re: Salah Abdulla)
|
البلد كلها مطبطبة يا ابن امي ..
وحياتك الحريمات في الطرقات محزقات حزيقة العدو .. لامن تحن عليهن ..
أي نعم إنه طويلٌ طويلٌ جاري بالواطـه .. لكنه مكرضمٌ كيفما عاينت ليهو .
هن البنات ديل قايلات التَحِزّق ده بيجيب العرسان ؟؟
هو العريس بعد ما نقش الفورمة .. تاني داير يكتشف شنو ؟ ..
ثم أجارك الله يا صلاح ياخي من الكِلَو .. كل سكيرت مطبطب مدلدلات بجنباتو كلاوي و قدامو حكومة كرشية متندلة ..
تقرب تقول ليهم كلام زمان داك : ( بارجُغُل في بطنو شُغُل ) .
مرة و معاي حليمة في سعد قشرة .. بتين دايرات يطلعوا السلم بتاع البرندة .. النصيبة الضيقة اللابسنها دي أبت تفك كرعينهم .. بقوا : تكّس .. راجع .. تكّس .. راجع .. تكّس .. راجع , و عينك ما تشوف إلا البطاطس . آخر ما آخر قالن كدي شنقن الاسكيرتات فوووق .. و تُلُبُت نطن .
حليمة لبعتني في ضهري و أنا سارح في دي المحنة , قلت ليها البنطلون مااااالوا !! .. فستان وجيه و جميل و وسيع ماااالو .. إن شا الله جكسا في خط سته بدل هذه البهدلة ياخي .
و فوق ده و داك .. شن فايدة الهوا في الحالة دي ؟
....
| Quote: الكلام ده (ليس عاماً) |
 هأأأأو ..
( إنت كورَكتَ ؟؟ ) .
| |
|
|
|
|
|
|
|
|
|
Re: الهوا ضَكَر .. (Re: abubakr salih)
|
| Quote: بيجوك ناس النظام العام |
طيب أعمل شنو ؟ ألبّسو جرجار يعني بوستيني ده ؟
وينك يا مواطن ؟؟ من ديك و عيييك !!
....
( عدم الإسراف ) ..
يا سلام .
| |
|
|
|
|
|
|
|
|
|
Re: الهوا ضَكَر .. (Re: Siham Elmugammar)
|
Quote: هسه انا اقول شنو؟؟؟؟؟
اتخاجل والا اتخارج؟؟ |
هسه أنا زاتي أقول شنو ؟
الخيارين ما بطالات معانا .
لكن أقعدي غايتو .. إتلقي الحجج .
....
رمضان كريم يا سهام
| |
|
|
|
|
|
|
|
|
|
Re: الهوا ضَكَر .. (Re: Siham Elmugammar)
|
Quote: هسه انا اقول شنو؟؟؟؟؟
اتخاجل والا اتخارج؟؟
يا عماد رمضان كريم
وانت قاعد فى الناصية كم مرة تدللت حسناء و استنجدت بيك
عليك الله يا عماد تعال ايدك معانا عاوزين نغير محل الكنبة والا الدولاب والا التلاجة
فنهضت مزهوا ان تم اختيارك من دون خلق الله المتنواصين
وعشان تثبت لها ولهم ان اختيارك لم يكن عشوائيا تفننت فى اظهار ماهو قادر على تحريك المستحيل!!!!
عضلات تبش قال ليك
اما عضلات القلب فكانت زى ديك العدة تقفز و يتوالى صدى قفزاتها فى كل ما حواه الجذع
مدعى انت يا عماد
عضلات بيش |
خلاص شربتي المويه؟
قال عضلات تبش قال....
هسي يقولو ليك شنو ماعارف؟؟؟
| |
|
|
|
|
|
|
|
|
|
Re: الهوا ضَكَر .. (Re: Abd Alla Elhabib)
|
ود الحبيب يا جميل ..
رمضان كريم , و مطره مباركة ..
بعدين جريح شنو الجرحناهو يا مواطنين إنتو ؟؟
ياخواننا بس الكلام جاب الكلام و الهوا قلب الذكريات فقلنا ما بطال نتجغم شوية جغيمات .
....
هسه الواحد يعمل شنو يعني ؟
تسلم يا حبيب
| |
|
|
|
|
|
|
|
|
|
Re: الهوا ضَكَر .. (Re: Emad Abdulla)
|
Quote:
(1) لا تبدو النساء الآن نساء ..
(2) ما ثمة أنوثة حقيقية هنا في الطرقات .
(3) ما ثم فرق هنا بين واحدة و أخرى ..
(4) لا تشي تلك الملابس المكرضمة بشيء ،
(5) ليس من حس أنثوي يستوقفك ..
(6) ليس ما يشعل فتيل الأرض فتغدق و تسبغ علي واطئاتها ذاك السحر الأنثوي المتين .
|
* وبرضي يا عماد بتفق مع صاحبيك المتفقين أعلاه والمختلفين في كل شان (بدون همزة على الألف).
عليك يا صاحبي أن تبحث فيك عن تلك الروح "الماساهلة والمتعدية" التي كانت بقدرة تسمع بها هسهسات خيط، عند خصر صبية، وتنهداته مع كل خطوة والتفاتة.
اسأل يا سيدي عن ذلك الكائن الذي كنته، وكانت حواسه -حينها - تدرك من تفاصيل ملبس الصبية، أكثر مما ادركته "إبرة الخياط"، وتخبر ملمس حتى ما توارى خلف "كفة" في طرف.
* بعد مراجعة ما هو مبين أعلاه (من 1 إلى 6)، وبعد التأكد أن الأمر ما مشكلة "نضارة"، نوصي بزيارة "سرِّية" إلى أبعد محل عطّار وخبير في العلاج "بالعسل".
* بالمناسبة هل كان للبس الثانوي "اللبني" رائحة خاصة أم كنت أتوهمها - حينهابرضو؟-
* على كل حال ده ما بوست صيام يا عماد ياخ..
،
| |
|
|
|
|
|
|
|
|
|
Re: الهوا ضَكَر .. (Re: بدري الياس)
|
Quote: إنتي البجيبك بهنا شنو؟؟؟
إتخارجي ...
وبعدين انتي تابعه لناس زمان وكده!!!!!!
رمضان كريم |
يا كوجان والله كلامك صحى و انا زاتى قلت كده
بس بعد فوات الرد
ياخ انا عماد ده ما بفوت ليهو بوست الا ما اشوفه
والغريبة نادر جدا ما اكتب ليهو المره دى مرقت كيف ما عارفة؟؟؟
اها قلت لى ناس زمان الضحكت ملاسى على شنو ما بعرف التقول ناس زمان
ديل هو غبيان منهن او عامل فيها زكى..دعونى اعيش وكده على كل المستويات الظاهر :)
| |
|
|
|
|
|
|
|
|
|
Re: الهوا ضَكَر .. (Re: محمد البشرى الخضر)
|
البوست فى عضمو بقى ضكر ..وعمود نور وضبان زاتو
| Quote: كانت النساء بنكهة البهار - قلت ذلك ؟ - حسناً |
يعنى نحن نقعد فى كانت وكانت ذنبنا شنو...ادو ناس ياسر طيفور ديل فرصة
عشان بعد كم سنة برضو يجو ويقولو كانن وكانن... مش تقهموهم من اسى وتخلوهم
يشوفو طشاش ....
ياسر طيفور عافية منك وسط المخضرمين ديل ..بردت بطنى
عماد عبدالله ؟ امنت بالله
| |
|
|
|
|
|
|
|
|
|
Re: الهوا ضَكَر .. (Re: محمد البشرى الخضر)
|
بعد العيد هو في هوا ؟؟
الخريف قالوا جا فجأة .. كلام حكومي .
الفجأة بقت حقت الخريف بعدما كانت حقت الهوا ..!!
يعني نعمل شنو في زمنكم المهبب ده ؟؟
....
علي الله معلم إنت .
| |
|
|
|
|
|
|
|
|
|
Re: الهوا ضَكَر .. (Re: Siham Elmugammar)
|
إنتي يا سهام .. ذِكّير ساكت ما نتذكر ؟؟
مخير الله ..
هسه الزمن العلينا ده غير جاب لينا و ليكم و للبلد الفقر .. شن فايدتو تاني ؟؟
بعدين إنتي الذكرى دي مش قالوا بتنفع المؤمنين ؟ .. أنا مؤمنين , و يعلم الله داير النفع .
البلد كلها ماشة في حكاية النفعية دي .. إشمعني أنا يعني ؟؟
ملاسي في الشركة إسمو عمو حسين ..
و البنات السغار المعانا ديل بيقولوا لينا تِحِت تِحِت : عموات حسين و عماد ..
أنا بقول ليهم : عمى كباسة ..
هو أظنو بيديهم إبتسامتو الما معروفة كيف كيف ديك .. زي الختاها هنا دي .
....
تاني رمضان كريم .
| |
|
|
|
|
|
|
|
|
|
Re: الهوا ضَكَر .. (Re: بدري الياس)
|
Quote: عليك يا صاحبي أن تبحث فيك عن تلك الروح "الماساهلة والمتعدية" التي كانت بقدرة تسمع بها هسهسات خيط، عند خصر صبية، وتنهداته مع كل خطوة والتفاتة.
اسأل يا سيدي عن ذلك الكائن الذي كنته، وكانت حواسه -حينها - تدرك من تفاصيل ملبس الصبية، أكثر مما ادركته "إبرة الخياط"، وتخبر ملمس حتى ما توارى خلف "كفة" في طرف. |
هسه يا البدري اشكيك لمنو في الليل ده ؟
إنت و ملاسي و عصام بقيتو علي أنا يعني ؟؟ خليتو ضكورية الهوا ( حينها ) و قبلتو علي ؟؟!!
.....Quote: * بالمناسبة هل كان للبس الثانوي "اللبني" رائحة خاصة أم كنت أتوهمها - حينهابرضو؟-
|
إنت وكت حينها برضو .. العسل مابيهو مالك ؟
| |
|
|
|
|
|
|
|
|
|
Re: الهوا ضَكَر .. (Re: Emad Abdulla)
|
| Quote: مقتل كلنا كان فيمن تحتضن مجموع كتبها بين يديها .. ذاك عُرفٌ بقي بيننا ، و ظل عالقاً بخاطري ( لا أعرف ماذا في ذلك الوضع يجعله مسماً و قاتلاً .. أن تحتضن إحداهن بالفستان الأزرق كتبها أمام صدرها و بين يديها .. و تخطر خفيفة خجلة !! ) |
صديقك محمود درويش حاول الاجابة على تساؤلاتك يا عماد
Quote: ربما أقضي عليك، و ربما تقضي عليّ
إذا اختلفنا حول
تفسير الأنوثة...
_إنها الجمر الذي يأتي من الساقين
يحرقنا
هي الصدر الذي يتنفّس الأمواج
يغرقنا
_هي العينان حين تضيّعان بداية الدنيا
_هي العنق الذي يشرب
_هي الشفتان حين تناديان الكوكب المالح
_هي الغامض
هي الواضح
|
| |
|
|
|
|
|
|
|
|
|
Re: الهوا ضَكَر .. (Re: Adil Osman)
|
| Quote: ( لما تعب محمد سعد من ذكورة الهواء اليومية قال في إنهاك و قهر كبير : البنات ديل حقو الواحد يمسكهن يدقهن ) . |
كاااااااااااااااااااااااااااكـ
احب محمد سعد انا ياخي
جابا ليكم من الاخر
يا حكمدار ..
تعرف انا لي كم يوم اسوق العجلة و الف ليكـ سودانيزاولاين دي كلها كايس لي كلام زي كلامكـ ده و ما لاقي
اسه ريحتني و بقية الاوغاد في حنانا (ماشايف ملاسي بقي يزور البوست بدون مناسبة كيف ؟)
يا زملاء .. البوست ده فلسفي و عميق , ما تجهجهوهو لينا ساكت
عن نفسي اتفق مع الشقيق صلاح ع.الله
و عليه أقترح رفع شعار
قصة الجندر دي خربت علينا نكهة البنات الزمان ديكـ
__
كوجان حدد موقفكـ من اسه , معانا ولا مع البنات (الـ أسه) ؟
| |
|
|
|
|
|
|
|
|
|
Re: الهوا ضَكَر .. (Re: خدر)
|
Quote: ملاسي في الشركة إسمو عمو حسين ..
و البنات السغار المعانا ديل بيقولوا لينا تِحِت تِحِت : عموات حسين و عماد ..
أنا بقول ليهم : عمى كباسة .. |
النصيحة مابتتدار فى الزمن العلينا ده
ماصحى عمهن
مكبسن مالك؟!!
-------
خليك فى الهوا الضكر ابو اربعينات سعاد حسنى ده
وعش على الذكرى ان الذكرى تنفع المؤمنين بضكورية الهواء
| |
|
|
|
|
|
|
|
|
|
Re: الهوا ضَكَر .. (Re: Ishraga Mustafa)
|
Quote: ليس من حس أنثوي يستوقفك .. ليس ما يشعل فتيل الأرض فتغدق و تسبغ علي واطئاتها ذاك السحر الأنثوي المتين .
اليومين ديل الهوا ضكر ..
.. على الفاضي . |
أيييييييييييييييه دنيا
ولا دائم إلا وجه الله
| |
|
|
|
|
|
|
|
|
|
Re: الهوا ضَكَر .. (Re: خدر)
|
رمضانك كريم وحـميم يا عـمـدة
| Quote: هسه الواحد يعمل شنو يعني ؟ |
بسيطة ياخ !
الهـوا ضكـر والنسمـة أنثي
والبيبى هـمـبريــب !!
-------
اللهم إنا صائمون.
| |
|
|
|
|
|
|
|
|
|
Re: الهوا ضَكَر .. (Re: الملك)
|
Quote: اليومين ديل الهوا ضكر ..
.. على الفاضي .
|
وعلى المليان عند كثيرين.
حزين أنا لأنك لست منهم، على الأقل "الآن".
،
تعرف يا زول
كتابتك الطاعمة دي بتقعدني لغاية رمضان ده ما ينقسم النص. ومني ليك نص حق صيامي.
يديك العافية يا رجل
وأمنياتي بمعافاة سريعة تعود بعدها تسبح بآلاء الهواء "الضكر" على المليان..
،
وافر المحبة
| |
|
|
|
|
|
|
|
|
|
Re: الهوا ضَكَر .. (Re: خالد عويس)
|
بوست ركن عجائز
عمو عماد قاعد تحت الشجرة الجنب عمود النور وبعد مارش قدام البيت
جاهو صاحبو عصام الطوالي مناقره ومغالطو
بعد شوية خالو ملاسي جا يبرم في شنبو
وقعدوا ال3 في الذكريات
عمو عماد نادى الولد ياسر عشان يجيب صينية الشاي
وجا ياسر زهجان من كلام الجلاكين ديل الكلو يوم والله كان وياحليل زمان
وما مخلين ليهم توب والا فستان الا عيونم وارهو
وفي القلب حسرة
وزهجانين في موضوع باصات الترحيل الحرمتمُ من بنيات اللبني
________
تنبيه:
ممنوع دخول السيدات الغير مجندرات لهذا البوست
_____
واحدة مجندرة جداً
____
ومعاها محبتي كمان
| |
|
|
|
|
|
|
|
|
|
Re: الهوا ضَكَر .. (Re: Kostawi)
|
العماد عماد
رمضان كريم
ER Se
| Quote: لا تبدو النساء الآن نساء .. ما ثمة أنوثة حقيقية هنا في الطرقات . |
هناك موضوع طويل بعنوان ( كل أنثى إمرأة .. و لكن ليس كل إمرأة أنثى )
و هو موضوع مثير للجدل
شكرا لذاكرتك التي أطلقتْ نكهة تلك الأيام
دمتم
| |
|
|
|
|
|
|
|
|
|
Re: الهوا ضَكَر .. (Re: Kostawi)
|
عمده رمضانك كريم والاخوه المتداخلين
الهوا ضكر واي حاجة
لكن هوا اليومين ديل بقي يجينا بي غض النظر
غير يكتحنا ما بعمل حاجة
نظام عام ... و كدا
البركه في السلالم
اللهم اني صايم
| |
|
|
|
|
|
|
|
|
|
Re: الهوا ضَكَر .. (Re: الوليد محمد الامين)
|
| Quote: ( بارجُغُل في بطنو شُغُل ) . |
| Quote: : تكّس .. راجع .. تكّس .. راجع .. تكّس .. راجع |
هسي ..موش ليهن حق بنيات الشغل,ينادنك...يا عمو عمــــــــــاد
متل كلامك..كيفن يفهموه !!
عالم دقة قديمة!
ياخي.اتطور و اعمل ابديت..
ناغمن بي هااااااي..و ميرسي لي الله...سو كيوت..
وحاجات من البتخلي الخشيم صفيرون زي الودعة....
قــــــــــــــااادر الله...
الجو عندنا...سخانة و رطوبة..
وخليج المكسيك...يشيل و ينفخنا......بي العواصف و الهوا الما ضكر(هنا كل شئ انتاية)
و الدنيا رمضان...و البنيات مارقات في السهلة...
والشمس التقول فرن بلدي...
والفطور الساعة 8..
ولي الليلة ما ضقت لي اّبري..!!!
و برضو ...
تقول لي الهوا ضكر...
| |
|
|
|
|
|
|
|
|
 Re: الهوا ضَكَر .. (Re: هواري نمر)
|
Quote: الجو عندنا...سخانة و رطوبة..
وخليج المكسيك...يشيل و ينفخنا......بي العواصف و الهوا الما ضكر(هنا كل شئ انتاية)
و الدنيا رمضان...و البنيات مارقات في السهلة...
والشمس التقول فرن بلدي...
والفطور الساعة 8..
ولي الليلة ما ضقت لي اّبري..!!!
و برضو ...
تقول لي الهوا ضكر... |
حالة سعبة يا هوارى ... حالة سعبة للدين هههههههههههه
| |
|
|
|
|
|
|
|
|
|
Re: الهوا ضَكَر .. (Re: داليا حافظ)
|
نخلي المسلمين ديل كلهم ..
بدري الياس !!
ياخي إزيك ياخ ..
و يعود عليك بالخير يا زول يا جميل .
أولاً بالتبادي .. إنت أراضيك وين ؟؟
تاني شي .. ياخي تجي الخرطوم و تفوتني ساكت ؟ أنحنا ما دافننو مع بعض يا صاحبي ؟
قول مهاجر ..!! الأسافير دي ما قاعدة ياخي ..
أنفحها مرة مرة بحاجة للأصحاب .. السلام لله يا بدري ، و الشوق ليك .
غايتو الفيك إنعرفت .
........
نفرين ياخي في هذا البكان فاقدهم و نفسي أقرا ليهم كل يوم شي جديد :
إنت و الطيب برير ..
لو تعرفوا كتاباتكم بتشفي الناس كيفن .. ما كان بخلتو بيها ..
يا فسلين .
ثم ليك ما ليك في القلب يا بدري .
| |
|
|
|
|
|
|
| |
Emad Abdulla
Hussein Mallasi
Yassir Tayfour
العوض المسلمي
خضر حسين خليل
ibrahim kojan
Abd Alla Elhabib
هواري نمر
Siham Elmugammar
abubakr salih
طارق جبريل
محمد البشرى الخضر
إيمان أحمد
عبدالكريم الامين احمد
Kostawi
Adil Osman
خدر
Ishraga Mustafa
الملك
شول اشوانق دينق
ابو جهينة
ناصر احمد الامين
محمد أبوالعزائم أبوالريش
داليا حافظ
فيس بوك
تويتر
انستقرام
يوتيوب
بنتيريست