حكايات الديم الغميسة ( إسماعين ود العاتي )

مرحبا Guest
اخر زيارك لك: 03-28-2024, 03:36 PM الصفحة الرئيسية

منتديات سودانيزاونلاين    مكتبة الفساد    ابحث    اخبار و بيانات    مواضيع توثيقية    منبر الشعبية    اراء حرة و مقالات    مدخل أرشيف اراء حرة و مقالات   
News and Press Releases    اتصل بنا    Articles and Views    English Forum    ناس الزقازيق   
مكتبة عماد عبد الله (Emad Abdulla)
نسخة قابلة للطباعة من الموضوع   ارسل الموضوع لصديق   اقرا المشاركات فى شكل سلسلة « | »
اقرا احدث مداخلة فى هذا الموضوع »
05-28-2008, 01:25 PM

Emad Abdulla
<aEmad Abdulla
تاريخ التسجيل: 09-18-2005
مجموع المشاركات: 6751

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
حكايات الديم الغميسة ( إسماعين ود العاتي )



    : يازول شوف ربك وين ..
    قالها ( اسماعين ود العاتي ) ..
    و ذلك لقبه - د العاتي - و منذوراً للعنف كان منذ نفخ الخليقة ، أو منذنا عرفنا للرجل وجوداً في الحي الذي نسيته الرحمة أسفل المدينة المتورمة بغاثاً و غثاً و دمامل جراء تصاريف الخلق و السلطان و الزمان .
    صوته الذي يقرب من خوار ثور عظيم منه لكائن بشري ..
    و لا يرق الصوت ذاك فيرتد مزموما كتوما كقرقعة ماكينة طاحونة عمك جلال .. إلا ليعود تزيده غلظة بحة مشروخة طرأت عليه من أثر السنوات الطويلات الزُرق في حضرة ( البنقو ) ..
    و قد كان شرهاً في تدخينه له ، يمجّ اللفافة تلو الأخري حتى استحالت سبابته و الإبهام و لمى شفتيه الغلاظ .. إلى دكانةٍ في اللون من أثر تشتشات ( الحرباشة ) ..
    ويغلظ ود العاتي ما شاء له في الحلف بالطلاق , و هو الأعزب الأزلي تتجنبه النسوة كما يُتجنب مصيوب الطاعون و المرض الكعب ..
    يمص العرقي - وحده لا شريك له - في لذةٍ نهمة دون تأتأةٍ و لا يلجّ له لسان حتى لما بعد زجاجته الثانية .
    عظيم الجسم .. فارعاً ممشوقا كما نصبٍ تذكاري ، ساعده و ذراعه كانتا أقرب إلى غصنٍ معروقٍ لشجرة لبخٍ عظيمة ..
    أمردٌ الشعر إلا من شاربٍ خفيف يشعث على جانبي فمه متدليٍ كالمحاربين التتار ، وعلى ذلك فقد كان وسيماً إذا سكنت ملامحه دائمة الحنق و الصرران تلك .
    صغيرتان عيناه كفأر .. تلتمعان كمن توشك على البكاء , أو لفرط لذةٍ غامضة . مغرم بارتداء الـ ( فنايل الكط ) .. تبرز تكوينه العضلي أعلى ساعده و قفصه الصدري المدجج بالغضب ..
    داكنة الألوان ملابسه في كل حالها . مهاباً من رفاقه - وفيهم من يفوقه جسامة -
    و رجال الشرطة قي " قسمهم " القريب , ما يملكون له في عبورهم لـ ( خانته ) إلا سؤالاً على استحياء و مسكنة : ( ما فيها إصطباحية يا معلم ؟؟ ) ..
    أو حين يتقربونه زلفى .. ولا يجرؤون علي النبس بنت شفة في حضرته سوى : ود العاتي .. كيفك يا معلم ؟.

    كنت يومها أجالسه ، لم أكن أزعجه بكثير الكلام .. أقبع هناك في ذات المكان كل مرة متلفعاً بصمتي ..
    ( إذ ما كان من العقل في شيء استثارة حنقه بكلمةٍ تحسبها عادية , في حين له فيها قراءات تبركن غضبته فلا تسطيع لدفق حممه لاجماً حينها ) ..
    و هو هو ود العاتي , في حيث الصدر من تلك " الضروة " عند مدخل الخانة , يدير قلعته المملكة و شؤون روادها و سمارها من عمال السخرة و الأفندية و العسكريين و صغارالصنايعية و المعلمين بطانته و الخليلين ..
    يطيب مزاجه فيدع لجسده القارب أن يتمدد كيفما اتفق , و يستغرق ساهماً و صامتا .. ثم يغمغم في كل مرة بذات الكلمات لذات المزاج : الغزالة الفوق في السلم .. ديني أنا ياخ .
    بقيت بيني و بينه علاقة الصياد بالفخ .. حذرة و متصالحة , أكتفي بمتابعة الداخليِهِ والخارجين .. غائمة رؤاي بفعل كثافة الدخان و شحنة التوتر التي تحوم في المكان .. والحوارات الغريبة .
    يشدني كل ذلك و محاولتي نحت التفاصيل المتسارعة في ذاكرتي ، و عناصر الحياة تمور في قمة دراما قاع المجتمع هنا ..
    بيتٍ قصيٍ لَبِنٍ تلفه العزلة و الريبة , يتشارك و البيوت شبيهته في الفقر و العوز و الضيق و .. المسغبة . و أناسٌ نسيتهم رحمة السماء .
    و .. الديم لا ينام .
    مضى الوقت غرائياً .. ود العاتي و مزاجه اللاهب يومها ، و صيفٌ مالح ينزّ فيه الهواء عرق الناس زئبقاً مصهوراً لزجا .
    استعذت من الشيطان واقفاً .. رمقني .. وهدر صوته : شنو ياخينا ؟.. متخارج وين ؟.. قلت : ماشي .. عندي حاجات داير أخلصها .. برجع بالليل .. ليه ؟؟.
    أجابني وصوته يكفهر بمسحة غضب جلية : يازول الله ما ليك ؟؟ جكك .. دايرك أنا في موضوع كده , شوف ليهو دوا نضيف يااااااااا عبدوووووو .
    ابتلعت ريقي جالساً ترفص خلجاتي من توقع طامةٍ وشيكة .
    إعتدل هو : داير أتخارج عُمرة يا أخو .. و الوهم ديل مادايرين يخارجونا .. أنا محضور ياخ ( محظور ) .. ناقش إنت .. صاح ؟ ..
    قلت : صاح .. لكن أنا دايرني أعمل شنو ؟.. إعتدل أكثر : تعمل لي أي نظام ستان كده في الجواز بتاعي , مكنة تشيل في البُمبه الفارات و ما يكونوا أنقوش .. مش إنت رسّيم وللا دينك كيف إنت .. ؟ أي مكنة تدقّس بيها الكحومة شغالة يا أخو .
    لم أجد حينها ريقاً ابتلعه .. فابتلعني خوفي ..
    كان الطرق العنيف على الباب مخرجاً لي من كثير أفكارٍ راودنني ليس أهونها ( جوه الجك ) بتهمة التزوير و التستر و التعاطي و المتاجرة إلخ .
    توجست خيفة من الطرق المثابر و إلحاحه المريب المريب ذاك .. ( أكيد ده خبيط الحكومة ) .. تململت في قسوة الدكة تحتي . صاح هوَ هادراً : عبدووو .. شوف المغشم الفي الباب منو .
    ولم يكن ذاك باباً .. كان درعاً من الحديد فوقه متاريس و أقفال و ترابيس .. أقرب إلى بوابات القلاع في حكايات شكسبير .
    كنت أستعيذ ما توالى الطرق و علا .. و أحوقل و أضع السيناريو الهوليوودي " الآكشن " تلو أخيه , أرقب عبدو ينظر من ثقب الباب . : شنو يا دور ؟.. خليك حِنيّن يااا ..
    قالها عبدو قافلاً إلي ود العاتي : زبون وهم يا معلم ، صرخ الصوت خلف الباب بعدها : شوف لينا حاجة يا معلم .. أي حاجة .. شخرمبة ياخ و أمان الله الغلة تِكْ .
    كنت أقفز واقفاً حين أخرج ود العاتي صوتاً أشبه بماكينة الديزل القديمة لسيارة عبدالمنعم أب قُرط :
    يا زول شوف ربك وين .. ما عندنا حاجة ليك .. اتخارج .
    و لم يتخارج الطارق .. و ألح طرقاً و استجداءً ..
    تخارجت أنفاسي و علون حتى كادت رئتي تقفز خارج قفصها و ود العاتي ينتصب مخرجاً من كتلة الكرور على يمينه آلة حديدية جهمة الخلقة , و يزوم لاعناً و خطوه يتأرجح في الخطيوات القليلات بينه و البوابة السجن من فرط ما دخنه من أعشاب .
    تلت ذلك أصوات وأحداث و صريخ و عواء .. سبابٌ كثيرٌ و ( كركبة ) ... و البوابة الحديدية تفتح في صرير عالٍ ..
    لترتفع ذراع ود العاتي كساقٍ لشجرة عظيمة ثم تهوي ملتمعة في خافت الضوء الذي تسنى له الولوج إلى عتمة الخن ذاك .. بعنف تهوي ذراعه وهي حاملة ( فرار ) ..
    و تنهض عاية ذات الذراع الشجرة مرة أخرى بفرارها مغمورٌ نصله المعقوف تماما بالدم .. يتناثر في كل تلك ( الراكوبة ) التعسة .. ثم من جديد يهوي جذع الشجرة ذاك .. بأعنف مما يكون , و الذبيحة / الرجل يهوي كالطود شاخراً .
    ( لم أدرك أن ذلك – كل ذلك - كان حقيقيا إلا و أنا في غرفتي في البيت .. أهم بخلع بنطالي , و معه أخلع هوجاء أنفاسي و الصور الطيفية من الليلة الصاخبة .. حين بصِرتُ بأطراف البنطال و النعل و كأن غُمِستْ في الدم ) .
    قفزت فوق الجسد المسجي على الأرض المبتلة عند البوابة .. إلى هواء الزقاق المتعطن .. تتبعني الأصوات والصراخ : فرتق يا خينا ..
    كان كل شيء يبدو كما كابوسٍ صغير أو .. ربما نشوة السُكر .

    غبت طويلاً عن ود العاتي بعدها .. عدتُ لأيامي الرتيبة و أفكاري الرتيبة و أحلامي الرتيبة . .و عاد هو إلى القاع المظلم .. هناك .
    سنين عبرن من بعدها .. و الديم ما يزال لم تغادره عبقرية المكان .. بل تشبثبت به و عنده اناخت ,
    و الزمان أيضاً ما عبره , فظل كما خلقه الرب أول أمره : معتماً حميماً .. و مندساً كالوحمة في خاصرة المدينة .
    سنين طوال تلك , غبت فيهن ما غبتُ .. و ركضتُ ركضتُ فيها كالوحوش لأحوش رزقاً يصيبني هنا و هناك .. و الرب ما يزال يعطي ليأخذ ليعطي و يأخذ .

    لقيت ود العاتي بعدها في المقابر ..
    كانت المتوفاة جدته لأمه , و حبيبته و سميره الذي تبقى من قومٍ كثير عُدّوا أهله لكنهم تأبّوا عليه و غادروه وحيدا منبوذا .. إلا هي .
    الجمع المشيع يتجنب دموعه الطفولية و نحيبه العوّاء و كأنه يقوم بتجربة البكاء و التصويت لمرته الأولى .
    ألجمت الناس غرابة ما يحدث أمامهم , و ضعف ما عهدوه في الرجل و انكسار و مسكنة ، كان يبكي بألم كبير و يجهش بأكبر منه .. و الصوت - الثور العظيم - يندفع حزينا نوّاحا .
    لم أقو علي التصديق أنه ذات الرجل الدموي , و الوحش ذاته الذي صادقته زمناً و هو يعيث رعباً في الحي و ما جاوره .. ذات الرجل - الآن - يدعو إعياء روحه لأن تحتضنه كطفلٍ يتيم ..
    كان داخل ( ود اللحد ) و الرجال حوله , يوسد ( الطينة الباردة ) رأس جدته وهو ينهنه نحيباً ( يقطع القلب ) يضع قوالب الطوب الأخضر المتيبس " أحفظ مالك " في حنو غريب ليغطي به الجسد الصغير المتلاشي ..
    و يسأل كما الطفل الحائر في صوته الباكي : التوب اجرو خلاص ؟ .. و يوجهه الرجال بإغلاق ذاك المنفذ بالطين و هذا بالتراب ..
    و هو – لدهشتي – يستجيب في طاعةٍ لا تشبهه , ثم ينهال بالتراب عليها في رفق و بطء و كأنه يطمع في معجزة لتحدث , فتناديه المرأة من مرقدها و ينتهي كابوس حزنه .
    تخرج كلماته دامعة : الله يُمه .. الله يرحمك , يحني لها الرجال المتحلقون حوله رؤوسهم يملؤهم حزنه فيدارونه رفقا به و يهمسون : إتصبر يا سماعين ياخي .. أطلب ليها الرحمة و المغفرة .. إتصبر .
    فلا يعيرهم التفاتا و عيناه على القبر حمامتان خُضر : مع السلامة يُمه .. الله معاك .. الله يرحمك يُمه .. و أنا الله معاي برضو .
    حين مددت له يدي مغادرا المقابر .. - مواسياً للمرة الأخيرة لأندس بين الجموع المغادرة - دفع بيدي بعيداً .. واحتضنني .. وبكى صامتاً و طويلاً .. : بقيت براي يا أستاذ .. شفت الدنيا دي كعبة كيف ؟ ..

    ود العاتي ..
    تأخذ الأرض منه طعمها واللون ..
    هناك في القاع المنسي .. حيث دورة الحياة الحقيقية ..
    ورائحتنا التي نخجل منها .. و نتغاضى .
    والعتمة الأبدية القائمة علينا .. من صنعنا .


    (عدل بواسطة Emad Abdulla on 05-28-2008, 01:32 PM)
    (عدل بواسطة Emad Abdulla on 05-28-2008, 01:45 PM)

                  

05-28-2008, 02:34 PM

عزاز شامي

تاريخ التسجيل: 01-08-2005
مجموع المشاركات: 5933

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حكايات الديم الغميسة ( إسماعين ود العاتي ) (Re: Emad Abdulla)

    Quote: بقيت براي يا أستاذ .. شفت الدنيا دي كعبة كيف ؟ ..

    ود العاتي ..
    تأخذ الأرض منه طعمها واللون ..
    هناك في القاع المنسي .. حيث دورة الحياة الحقيقية ..
    ورائحتنا التي نخجل منها .. و نتغاضى .
    والعتمة الأبدية القائمة علينا .. من صنعنا .


    يادي سيرة الموت الي بتوريني قلة قيمة الدنيا الزايلة دي!!

    ايييهه ... دنيا ...

    العتمة خشم بيوت يا عماد، عتمة جوة و عتمة برة .. وعتمة جوة بتعتم اعتى صباح!


    ابقى طيب ...
                  

05-28-2008, 03:35 PM

ibrahim kojan
<aibrahim kojan
تاريخ التسجيل: 03-29-2007
مجموع المشاركات: 1457

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حكايات الديم الغميسة ( إسماعين ود العاتي ) (Re: عزاز شامي)

    وطفر الكلام صمتا ........أو الصمت كلام... ما فرقت!

    لا حوله ولا قوه الا بالله يامنعول ؟؟

    ود العاتي يسكن كل الاحياء الغميسه.. والتي سنتها واحده ... الحميميه والود الانساني الذي لا يعرف التدلس و... ياخ لسانش نشف (يمكن محربش!!)

    بجيك راجع مع قراءه أخري ,

    جيك ملك؟؟

    ابراهيم
                  

05-28-2008, 03:48 PM

عبدالكريم الامين احمد
<aعبدالكريم الامين احمد
تاريخ التسجيل: 10-06-2005
مجموع المشاركات: 32520

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حكايات الديم الغميسة ( إسماعين ود العاتي ) (Re: ibrahim kojan)

    يا الله
    وياسلام يا عماد علي عوالمك الغميسة
    وعوالم العاتي الضاجة بالكبنقة والشفتنة والجراءة والمرح ثم الغضب الرهيب
    مثل هذه العوالم هي مغناطيس تجذب وتدهش وتجعل الانسان يحن عليها في كل الاحوال..
    اسماعين بدا نبيلا صعلوكا ثم فارسا لايهاب الاريرة وصعاليك الخانات والخجانين..
    ومدهش بل ملهم تماما وموغل في التراجيدا هو لقاكم في المقابر
    واظنه مشهد لو اتيح له ان يري السينما لنال اوسكار بلا منازع
                  

05-28-2008, 03:52 PM

خدر
<aخدر
تاريخ التسجيل: 02-07-2005
مجموع المشاركات: 13188

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حكايات الديم الغميسة ( إسماعين ود العاتي ) (Re: ibrahim kojan)

    والله يا عماد ما قدرت اكمل الحكاية
    كتابتكـ بتوجع ياخ و صوركـ حية و حايمة قدامي اسه
                  

05-28-2008, 04:32 PM

tayseer alnworani
<atayseer alnworani
تاريخ التسجيل: 07-30-2007
مجموع المشاركات: 1500

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حكايات الديم الغميسة ( إسماعين ود العاتي ) (Re: خدر)

    سلامات يا عماد
    يا الله على هذا الحزن و خاصة على من نحب يلجمنا و يجعلنا مثل الاطفال حكاويك جميلة
    لاتسكت





    كسرة
    عماد انت مصر ما تلاقينى الله يسامحك
                  

06-03-2008, 09:25 AM

Emad Abdulla
<aEmad Abdulla
تاريخ التسجيل: 09-18-2005
مجموع المشاركات: 6751

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حكايات الديم الغميسة ( إسماعين ود العاتي ) (Re: ibrahim kojan)

    كوجان ..

    خليني أسكت شوية ..
    فترت من الكلام .
                  

05-28-2008, 05:58 PM

Emad Abdulla
<aEmad Abdulla
تاريخ التسجيل: 09-18-2005
مجموع المشاركات: 6751

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حكايات الديم الغميسة ( إسماعين ود العاتي ) (Re: عزاز شامي)


    عارفة يا عزاز ..
    حالة غريبة في حلتنا ..
    الناس فيها بيحتفلوا بالحياة أكنر .. و بمنطق
    Quote: قلة قيمة الدنيا الزايلة
    و لسان حالهم : الحي أبقى من الميت ..
    أو يمكن من كترة أحزانهم و أوجاعهم قامت جلود أرواحهم إندبغت و تخنت ..
    Quote: عتمة جوة و عتمة برة .. وعتمة جوة بتعتم اعتى صباح !
    العتمة .. !!! و الصباح ..
    منطق الضد ..
    الجدار و الضو ..
    لا حولا ..
    عمنا أمل دنقل قال :
    ( ربما لو لم يكن هذا الجدار .. ما عرفنا قيمة الضوء الطليق ) .
    ربما يا صاحبتنا ..
    ربما .



    ......
    مرورك حلو يا عزاز ..
    ليك ماليك من ود و تقدير .


                  

05-28-2008, 04:07 PM

فرحات عباس
<aفرحات عباس
تاريخ التسجيل: 09-20-2005
مجموع المشاركات: 500

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حكايات الديم الغميسة ( إسماعين ود العاتي ) (Re: Emad Abdulla)

    عمدة أيها الحبيب .. واصل .. قررت للتو أن أسكن هذا البوست ..
                  

05-28-2008, 05:00 PM

ناظم ابراهيم
<aناظم ابراهيم
تاريخ التسجيل: 04-18-2008
مجموع المشاركات: 3734

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حكايات الديم الغميسة ( إسماعين ود العاتي ) (Re: Emad Abdulla)

    يا عماد

    ده نوع الكلام(البفرتق صواميل الروح)

    (عدل بواسطة ناظم ابراهيم on 05-28-2008, 05:02 PM)

                  

05-28-2008, 05:17 PM

اساسي
<aاساسي
تاريخ التسجيل: 07-20-2002
مجموع المشاركات: 16468

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حكايات الديم الغميسة ( إسماعين ود العاتي ) (Re: ناظم ابراهيم)

    الله يغيظك يا عماد ياخي ما كان في اي داعي تلم لينا الموقفين ديل مع بعض , نقلتنا نقلة مصرجة عديل .. الكورة كانت في ملعبك تضقل بينا زي ما عايز وفي النهاية تجدع التراجيديا دي . اسع خليت العالم دي كلها تمسك طرف توب الجدعة وتمارس الحزن النبيل ,
    زي ما قال ليك ود عبد الكريم كل الجخانين بي ود عاتيها , هؤلاء القوم تجمعهم غلظة في صلف ورقة في حنية في ذات نفس الوقت , هما كحكايتك هذه دائما لديهم من تنهار دفوعاتهم امامهم ويتحولون الي اطفال لا حول لهم ولا قوة .
    شهدت موقف بالكربون لود (عاتي ) حلتنا حينما كان يدوخ ( البواليس) دوخة الصائم في نهار غائظ ويفعل بهم الافاعيل , يومها توفيت والدته فتشوا ليهو طوب الارض جابوه سكران طينة . بعد الدفن جلس علي حافة القبر وجعل ينتحب نحيبا قاسيا ويجعر بعلو صوته وكانه ليس ود عاتي حلتنا
                  

05-28-2008, 06:11 PM

Osman Musa
<aOsman Musa
تاريخ التسجيل: 11-28-2006
مجموع المشاركات: 23082

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حكايات الديم الغميسة ( إسماعين ود العاتي ) (Re: اساسي)


    حال الدنيا ام قدود
    زحف الليل فغمرت دجنته الديم .
    ماذا حدث ؟
    جدت ود العاتى رقدت الرقاد الأبدى .
    يا ....
    دايما تنهمر مطر العبر والحكم من كتاب عماد .
    ...
    سلامات
                  

05-28-2008, 05:22 PM

Masoud

تاريخ التسجيل: 08-11-2005
مجموع المشاركات: 1623

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حكايات الديم الغميسة ( إسماعين ود العاتي ) (Re: Emad Abdulla)

    "لم أجد حينها ريقاً ابتلعه .. فابتلعني خوفي "




    شوف يا عماد :
    اكتب!
                  

05-28-2008, 06:24 PM

Nasr
<aNasr
تاريخ التسجيل: 08-18-2003
مجموع المشاركات: 10759

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حكايات الديم الغميسة ( إسماعين ود العاتي ) (Re: Emad Abdulla)

    إلي الذي يلمح أبرة "الإنسان" في كومة قش الديم
    لماذا أنت بخيل بالكتابة؟
                  

05-28-2008, 06:53 PM

أبو ساندرا
<aأبو ساندرا
تاريخ التسجيل: 02-26-2003
مجموع المشاركات: 15493

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حكايات الديم الغميسة ( إسماعين ود العاتي ) (Re: Emad Abdulla)

    Quote: ده نوع الكلام(البفرتق صواميل الروح)

    ده كلام تمام يا ناظم
    علا صواميل روحنا فرتقناها زمان
    صامولة صامولة
    والروح صارت قاعدة في السهلة

    يا عماد
    عليك أي عزيز ومقدس لديك
    واصل
    وجوب شوارع الديم شارعآ فسيح
    وزقاق ، ضيق ، ممزق ، حالم ومريح

    وانا سامعك

    وقد نجوبه معاك على ذات النسق
    ونفس الموال
    فحكايات الديم غميسه
    وناسه أغمس
                  

05-28-2008, 07:00 PM

كمال علي الزين
<aكمال علي الزين
تاريخ التسجيل: 11-14-2006
مجموع المشاركات: 13386

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حكايات الديم الغميسة ( إسماعين ود العاتي ) (Re: أبو ساندرا)

    (*)

    عاد نقول شنو , ..؟

    نسكت بس ..
                  

05-28-2008, 07:40 PM

محمد عثمان

تاريخ التسجيل: 11-10-2006
مجموع المشاركات: 6534

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حكايات الديم الغميسة ( إسماعين ود العاتي ) (Re: Emad Abdulla)

    الاخ عماد..

    تفااصيل و مشااهد حيه..لها مثيلاتها
    باختلاف المكان و الزمان...
    و كم من ود العاتى..؟؟
    مع الحكاية سرحت بعيدا لايااام مضت...
    فى مكان ما...ملح البحر و الارض النازة
    و السخانه للطيش...لا حولا..!!

    شكرا عماد...
                  

05-29-2008, 00:45 AM

صلاح الفكي

تاريخ التسجيل: 09-14-2007
مجموع المشاركات: 1478

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حكايات الديم الغميسة ( إسماعين ود العاتي ) (Re: Emad Abdulla)

    عماد ياعزيز..
    نفس القصة تكاد تتكرر لدينا في الحلة الجديدة ..مع عمنا (؟ )ولد سعد.. يقوم يمشي لجارنا حريقة.. ويشتري منه لفة البنقو.. ويقوم في الحلة يهرج ويقول أنا ألأسد.. ، الذكريات دائما صادقة وجميلة.. مهما تج افينا بنقول حليله ..
    تسلم عماد..
                  

05-29-2008, 02:04 AM

ابراهيم عدلان
<aابراهيم عدلان
تاريخ التسجيل: 01-04-2007
مجموع المشاركات: 3418

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حكايات الديم الغميسة ( إسماعين ود العاتي ) (Re: Emad Abdulla)

    عماد


    ملئ انت يا صاحبي بالتفاصيل العادية المدهشة

    ملئ انت بالحياة و تصاوير البساطة









    ____________
    دمت
                  

05-29-2008, 03:02 AM

مصطفي سري
<aمصطفي سري
تاريخ التسجيل: 03-07-2007
مجموع المشاركات: 2339

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حكايات الديم الغميسة ( إسماعين ود العاتي ) (Re: ابراهيم عدلان)

    اذن انت بخيل علينا

    بما انني من تلك الناحية

    في ذلك الحي ، اشهد انك قلت ما يحتاج الزيادة

    ولانك (عاتي ) ، تعرف يا عمدة تذكرت كثيرين في الديم

    لكن انت تملك ناصية الكلمة في (نصها) الواقعي المتخيل

    وتلك اجادة اخرى ، يعرفها في السودان الراحل البروف
    علي المك - انت كنت رفيقه ذات يوم في صحيفة الايام - والاخر

    الدكتور بشرى الفاضل ، وكذلك كنت رفيقه ، على الاقل عندما سمعت

    ويا عمدة لك من احتشاد للذاكرة تتعامل معها وفق ما تود وللقارئ
    ان يضع تخيله في منحنى تلك المدن ... انت لست اقل من عزيز ينسين
    او محمد شكري (الخبز الحافي ) ولدينا شيئا نقوله ... وتحيا الوحدة
    الديامية .. وتذكرت عيونو وقعر بابور وجني والقبطي
                  

05-29-2008, 06:23 AM

أبو ساندرا
<aأبو ساندرا
تاريخ التسجيل: 02-26-2003
مجموع المشاركات: 15493

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حكايات الديم الغميسة ( إسماعين ود العاتي ) (Re: مصطفي سري)

    Quote: وتذكرت عيونو وقعر بابور وجني والقبطي

    ومعلم بدر
    يا درش

    أنت وعماد طبعآ بتعرفو الديم الفوقاني
    حلتكم عاملة زي الحلة الفوق حلة ناس خدر

    لكن مابتعرفو الديم التحتاني
    من سوق الديم وتنزل جنوبآ
    هناك برضو في ناس
    وحكايات

    إبراهيم عدلان الفوق ده بيعرفها
    بيعرف
    دريسة
    والسر وش الطيرة
    وبكري هيمت
    وعيييييك

    أنزلو تحت شوية يا شباب
                  

05-29-2008, 11:19 AM

عز الدين عثمان

تاريخ التسجيل: 06-23-2005
مجموع المشاركات: 411

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حكايات الديم الغميسة ( إسماعين ود العاتي ) (Re: أبو ساندرا)

    Quote: عاد نقول شنو , ..؟



    سينما الديم تقدم:

    حكاوى القاع الغميسة

    سكوب ألوان

    إخراج العمدة




    توجد بصات أهلية بعد العرض: نوع البصات بتاعة بشرى الفاضل فى الغازات.


    شفت يا كمال الزمن البدخلنا فيهو صاحبك عماد، الله يطلع ديمو
                  

05-29-2008, 11:48 PM

ibrahim kojan
<aibrahim kojan
تاريخ التسجيل: 03-29-2007
مجموع المشاركات: 1457

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حكايات الديم الغميسة ( إسماعين ود العاتي ) (Re: عز الدين عثمان)

    (غماس عبدالله.. و وعمادة الديم )

    انا لله ياخ!!!!!!!!!!!!!!!!!!!!!!!!!!!!!!!!!!!!!!!!!!!!

    القراءة المليون والمداخله الثانيه ولا حوله ولا قوه الا بالله
                  

05-30-2008, 00:31 AM

khatab
<akhatab
تاريخ التسجيل: 09-29-2007
مجموع المشاركات: 3433

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حكايات الديم الغميسة ( إسماعين ود العاتي ) (Re: ibrahim kojan)

    و يسأل كما الطفل الحائر في صوته الباكي : التوب اجرو خلاص ؟ .. و يوجهه الرجال بإغلاق ذاك المنفذ بالطين و هذا بالتراب ..
    و هو – لدهشتي – يستجيب في طاعةٍ لا تشبهه , ثم ينهال بالتراب عليها في رفق و بطء و كأنه يطمع في معجزة لتحدث , فتناديه المرأة من مرقدها و ينتهي كابوس حزنه .
    ...
    . هو هو .. نفس الزول الذى تتحاشاه النساء و على استحياء يخاطبه رجال البوليس
    .
    . شكرا على هذا العاتى .. الطفل وعالمه .. والذى بعمارته الابداعيه المرسومه هنا لم يعد الديم
    المساحه التى يشغلها فقط .. لقد انتمى ... او ينتمى للمكان الانسانى العريض الان ..
    . شكرا ً ثانى ٍ .. للمتعة التى التقطت
    ...
    .
                  

05-30-2008, 05:40 AM

نهي محسن أبوراس
<aنهي محسن أبوراس
تاريخ التسجيل: 04-02-2008
مجموع المشاركات: 488

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حكايات الديم الغميسة ( إسماعين ود العاتي ) (Re: Emad Abdulla)

    Quote: و الزمان أيضاً ما عبره , فظل كما خلقه الرب أول أمره : معتماً حميماً .. و مندساً كالوحمة في خاصرة المدينة .
    سنين طوال تلك , غبت فيهن ما غبتُ .. و ركضتُ ركضتُ فيها كالوحوش لأحوش رزقاً يصيبني هنا و هناك .. و الرب ما يزال يعطي ليأخذ ليعطي و يأخذ .

    سلمت وسلمت تلك الملكة الرائعة والفيض المتدفق من غموض الإثارة والصدق..
    تناقض عجيب..
    لكن ده البحسو من كتاباتك..

    تسلم ياخ علي ماتصنع وعلي ماتزرعه فينا من مرح ومحاولات ناجحة لطرد الضجر والكآبة..

    مودتي وتقديري
                  

05-30-2008, 04:31 PM

ASHRAF TAHA
<aASHRAF TAHA
تاريخ التسجيل: 08-04-2007
مجموع المشاركات: 1017

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حكايات الديم الغميسة ( إسماعين ود العاتي ) (Re: Emad Abdulla)

    العماد !
                  

05-31-2008, 08:39 AM

Salah Abdulla

تاريخ التسجيل: 03-15-2006
مجموع المشاركات: 3169

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حكايات الديم الغميسة ( إسماعين ود العاتي ) (Re: ASHRAF TAHA)

    بالله مش ياهو زاتو يا أشرف طه؟

    عماد عبدالله .. شكراً ياخ أن أرجعتنا لذلك الزمن السمح.
    Quote: مش إنت رسّيم

    أشهد .. ريشة وقلم (وأشياء أُخر)..

    أدينا بالله ، وكتّر لينا من زي ده.
                  

06-03-2008, 08:10 AM

اساسي
<aاساسي
تاريخ التسجيل: 07-20-2002
مجموع المشاركات: 16468

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حكايات الديم الغميسة ( إسماعين ود العاتي ) (Re: Emad Abdulla)

    البوست لسع ما استوي

    ياخي احلي حاجة تقعد تكتب ليك في حاجة جميلة وتنحت نافوخك وتقعد لليل , وتقدمها للناس في اشهي طبق بتتوقعه . حنك كامل الدسم يجوك يقولوا ليك واصل؟
    واصل ود اشراقة ولا منو؟


    لكن ظهرتها عاملة قلت لي بترد لي المزز بس

    لكن ما لقيتك ديامي غميس وبايع القميص
                  

06-03-2008, 09:32 AM

Emad Abdulla
<aEmad Abdulla
تاريخ التسجيل: 09-18-2005
مجموع المشاركات: 6751

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حكايات الديم الغميسة ( إسماعين ود العاتي ) (Re: اساسي)

    أساسي ..

    ياخي ما عرفت أقول شنو ..
    مزاج ببح ..
    أنا مقتنع إنو كتابة المداخلات و الرد عليها هي جزء من الموضوع الرئيس .. و بيقتح فيهو فجات جديدة ..
    لقيتني ما عندي شي حالياً أقولو ..
    يابس واقف عود أجارك الله ..
    و خجلان أكتب كلمتين مجاملة ميتانات للناس الجميلين المروا هنا ..
    فقلت ياخي إلى حين ميسرة ..


    ......
    ثم ياخي البتاع ده كان مشى ورا و مرقني من الحرج ..
    جاي ناطي بيهو هنا تاني ليه ؟؟؟
                  

06-04-2008, 08:38 PM

ASHRAF TAHA
<aASHRAF TAHA
تاريخ التسجيل: 08-04-2007
مجموع المشاركات: 1017

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حكايات الديم الغميسة ( إسماعين ود العاتي ) (Re: Emad Abdulla)

    يا العماد!

    غمست الكيبورد في الهارد ديسك
    مع حبة F5 كـ(بهارات)
    نضمك تِمو
    ولا جيب ليهو توم
                  

06-04-2008, 09:12 PM

Emad Abdulla
<aEmad Abdulla
تاريخ التسجيل: 09-18-2005
مجموع المشاركات: 6751

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حكايات الديم الغميسة ( إسماعين ود العاتي ) (Re: ASHRAF TAHA)


    أشرف ياخي مافيني بال لشي ..
    خليهو يكسح ..






    ...........
    ما اتصلت بيك عشان مافي جديد ..
    كلو ملصق و واقف دوت .



                  

06-13-2008, 08:34 AM

Emad Abdulla
<aEmad Abdulla
تاريخ التسجيل: 09-18-2005
مجموع المشاركات: 6751

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حكايات الديم الغميسة ( إسماعين ود العاتي ) (Re: Emad Abdulla)


    جملته الأثيرة :
    ( ود البدري سمين ) ..





    .....
    فذهبتَ بدري يا ود العاتي ..
    و غيّبك الغياب الكبير .




                  


[رد على الموضوع] صفحة 1 „‰ 1:   <<  1  >>




احدث عناوين سودانيز اون لاين الان
اراء حرة و مقالات
Latest Posts in English Forum
Articles and Views
اخر المواضيع فى المنبر العام
News and Press Releases
اخبار و بيانات



فيس بوك تويتر انستقرام يوتيوب بنتيريست
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
About Us
Contact Us
About Sudanese Online
اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين
News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums
If you're looking to submit News,Video,a Press Release or or Article please feel free to send it to [email protected]

© 2014 SudaneseOnline.com

Software Version 1.3.0 © 2N-com.de