|
|
|
 Re: طقوس العروس في امدرمان (Re: Bakhaf)
|
| Quote: الدهب حسب استطاعة ومقدرة العريس وأحيانا لا يحضر |
هو دفع قروش للحاجات دى كلها معقوله يكون ما عندو حق الدهب
بالمناسبه معظم النساء وخصوصا العاملات منهن بيكونو جاهزات بى دهبهم ( عارفين العريس لامن يصل للدهب بيكون خلاص شطب )
| |
 
|
|
|
|
|
|
|
|
Re: طقوس العروس في امدرمان (Re: يوسف الولى)
|
Quote: هو دفع قروش للحاجات دى كلها معقوله يكون ما عندو حق الدهب
بالمناسبه معظم النساء وخصوصا العاملات منهن بيكونو جاهزات بى دهبهم ( عارفين العريس لامن يصل للدهب بيكون خلاص شطب ) |
طيب ما يرجعوا العادة القديمه
زمان يا حبه كان العريس بجيب الشيلة
وعلى اهل العروس تجهيز البيت
وخاصة غرفة النوم
هسع العريس بقى بسويه كلو
| |
|
|
|
|
|
|
|
|
|
Re: طقوس العروس في امدرمان (Re: Bakhaf)
|
تعتبر شيلة، الراسمالى السوداني المعروف الشيخ مصطفى الامين هي اشهر شيلة عروس سودانية على الاطلاق ، وقد خُلدت في اغنية السيرة " الشيخ سيرو" ويقال ان من كتبتها هي والدته.
لم يتثنى لنا التأكد من هذه المعلومات من مصدر موثوق، ولا نعلم حقيقة المقادير والكميات الموجوده في الاغنية بخصو الشيلة ومدى صدقها .
النصيحة دي
انا بريدو
والبريد الشيخ
انا يا ناس بريدو
الشيخ سيرو
سبعة قدور محلبية
سبعة قدور صندلية
سبعة قدور ريحة نيه
نسيبتو قالت شويه
حرمان ما بدخلن علىّ
الشيخ سيرو
تلاته ارادب غدى
تلاته ارادب عشى
ده الشيخ ود مصطفى
الولاده من بعده كفى
الشيخ سيرو
لم اجد النص الكامل للاغنيه لكن هناك محاولات للعثور عليه كاملا ، ادعوا لينا بالتوفيق ، ولو في زول/ة يـ/تذكره كله ، يـ/تنزله لينا هنا ونكون شاكرين ومقدرين
| |
|
|
|
|
|
|
|
|
|
Re: طقوس العروس في امدرمان (Re: Bakhaf)
|
تنويه وتمني
هذا البوست سيكون به الكثير من الاغنيات والرميات والترانيم ، لذا نتمنى من اي شخص محترف موسيقى يمر على هذا البوست ، ان يحاول صفلجت او رد الاغنيات او الترانيم ، الى اصلها الموسيقي ، بمعنى ان تعمل نوته موسيقية لكل أغنيه ما امكن ذلك ، يمكن للجميع توثيق النصوص ، لكن الالحان تضيع ولا توثق ثم تنسى .
| |
|
|
|
|
|
|
|
|
|
Re: طقوس العروس في امدرمان (Re: Bakhaf)
|
عملت سيرش عن الدلكه
جاتني الهوائل
ولقيت ليك ناس الخليج متجدعين بي دلكتنا اكتر مننا ، وبشرحوا في طريقة عملها ، وبذكروا في فوائدهاالتقول حقتهم
دي طريقت عمل الدلكه لقيتا هنا
http://gshaam.com/vb/printthread.php?t=3176
Quote: طريقة عمل الدلكة العادية :
لعمل الدلكة يستخدم حوالي ثلاثة كيلو من دقيق الذرة النقي ويعحن الدقيق بالماء المنقوع بالقرنفل (ينقع القرنفل في الماء لمدة ليلة كاملة) ثم يلطخ على قدح من الخشب ( صحن كبير ) في باطنه حتى يلتصق تماما ثم نكفي القدح على حفرة الدخان ويدخن بالشاف ونغطي الصحن والحفرة جيدا لتتغلغل رائحة الشاف فيه جيدا ويترك حتى يحمر لون العجين . ثم نرفعه من نار الدخان ويعجن مرة اخري ويبلل بمزيد من نقيع القرنفل ويوضع مرة اخرى على الدخان وهكذا نكرر هذه العملية لمدة أقلها ثلاثة ايام حتى ينضج و يكون لون العجين أقرب للسواد . دليل النضج هو تساقط العجين من القدح..ترفع العجينة المتكونة من الدخان وتخلط بالمسك المسحون والضفرة المسحونة والأرياح السائلة(وهي: فلور دامور والصاروخ وقلامور وقليل من الخمرة) وتعجن جيدا لضمان اختلاط العطور بالعجين وتعبأ في إناء محكم الاغلاق . يستحسن تقطيعها قطعا أو تشكيلها في كريات صغيرة لسهولة استخدامها. عند الاستخدام نأخذ كتلة صغيرة وتبلل بالماء حتى تصير في شكل شبة سائل ويدلك بها الجسم ويستخدم الدهن أو الزيت المعطر ليسهل خروجها ويكسب الجسم لمعانا
دلكة المحلب :
دلكــــــة المحلب يسحن المحلب ناعما ثم ويغربل ثم يعجن بعصير الليمون المخفف بالماء وتدخن بنفس الطريقة المستخدمة في دلكة الذرة وتعجن في كل مرة بمزيج الماء والليمون حتى تنضج وتتساقط من القدح. تعجن بالعطور : صندلية ، فلور دامور ومسك مسحون وقلامور وتعباء في إناء محكم الإغلاق وتترك لتتشرب العطور. تستخدم بنفس الطريقة السابقة |
نرفعها ليكم لحدي ما نشوف حبوباتنا حا يقولن شنو عن الوصفه دي
| |
|
|
|
|
|
|
|
|
|
Re: طقوس العروس في امدرمان (Re: Bakhaf)
|
مدخلة قديمة لي ابقوته يتحدث فيها عن الدخان
Quote: الدخان في التراث العربي نوعان البخور المعروف وتُطب به الأجسام والثياب والبيوت ، والدخان الذي تصطلي به المرأة العربية بغرض الاستدفاء أو الزينة ، وكلا النوعين عندنا في السودان. ولنساء السودان بهما عناية فاقت عناية نساء العرب ، وعادة الدخان كادت تختفي في البيئة العربية إلا عند المرأة السودانية التي صار الدخان لها من أهم أدوات الزينة ، والنساء حريصات على هذه الصفرة المكتسبة ، وهي صفرة محبوبة مشهورة ومذكورة في التراث حتى انهم يقولون للون الأصفر المشرب بحمرة (دخان عزبة) بل يسمون أنواعا من الطيور بذلك ففي عصافير الخريف زوجان كنا نصنع لها الحبائل (الشرك) لصيدها وتسمي الأنثى (قُيحة) ، ولون القيحة جذاب جميل فيه صفرة فاقعة مشربة في بعض اجذائها بحمرة نسميها (دخان عزبة) ، والنساء يطلبن الجمال ويحافظن عليه مهما كلفهن ذلك ، ولا شئ أدل على ذلك من هذا الحريق
المستعر الذي تجلس فوقه المرأة السودانية اسفله نار تحرق المراة السودانية واعلاه دخان يخنق واوسطة غملة وشملة لا تناسب الجسم الذي يُشبهة الشعراء بالحرير حتى قال احدهم
لان حتى لو مشى الذر عليه كاد يدميه
والذر صغار النمل ، ونحن نسميها الدر أما (الغملة) فمن فصيح العامية السودانية ، وغمل الرطب والموز حتى يستويا وينضجا معروف عندنا ، واما الشملة وهي ذلك النسيج من شعر الاغنام فانها غاية في الخشونة وربما استبدلت بها في زماننا هذه البطانيات ، وهي قطعا ارحم وانعم ، ، ونحن ربما أشفقنا على النساء من كل ذلك وهو عليهن هين ، لان العبرة بالخواتيم ولابد دون شهد من ابر النحل ، فالدخان اذا برد حلا وجلا أما (حلا) فحلاوته معروفة لان له عبقا وريحا طيبة بعد التضمخ بالخمرة وغيرها من ألوان العبير والعطور ، وهي في تلك الحال من حلاوة الطيب الناتجة عن ندى البوخة تصبح كأنها مقصودة ، و أما جلا فالدخان يجلو الجسم ويكسوه لونا مشربا بحمرة فيصبح الجسم الأبيض معصفرا والجسم الأسمر كاكاويا ورديا او كالوردي ،
وحفرة الدخان من أهم أداة الزينة بالسودان تكون في كل بيت وتوضع فيها أخشاب الطلح وتقعد المرأة فوق نطع بعد تكون قد ادهنت نفسها بشملة ثقيلة من الشعر لا يبدو إلا رأسها وهو حمام ساخن ، نعم حفرة الدخان كانت ومازالت من الظواهر التي لا تكاد تخطئها العين في كل بيت والقرى أما في الريف فهي في كل بيت في ناحية منه في داخله أو في زاوية أو في برندة أو في راكوبه ، ووضعها في راكوبة أو في الحوش ارحم واسلم لانه يجعل لك الحمام الخانق في هواء طلق ليلا فالليل بارد وكافر (أي : ساتر) ،، أما النطع فلعلة اختفى أو كاد لمن لا يعرفه بساط كانت العرب تصنعه من الجلد المدبوغ ، أما عندنا فهو بساط من خوص أو سعف أشبه بالتبروقه أو المصلاية المستديره ، مثقوب في وسطة ، يبسط فوق حفرة الدخان فيقابل ثقبة فوهة الحفرة |
المصدر
Re: نساء يفتقدن الي الطلح
| |
|
|
|
|
|
|
|
|
|
Re: طقوس العروس في امدرمان (Re: Bakhaf)
|
وصف سريع لي طقوس العروس
المصدر http://www.sudantop.com/vb/showthread.php?t=3858
Quote: طيب في الزواج عاده بيمشوا أهل العريس لطلب يد الفتاه وبيودوا زي ما بيقولوا أهلنا (( فتح الخشم )) وبيكون عاده عباره عن مبلغ من المال وحلوى وعطر وفي بعض الأحيان ذهب .
بعد ما خلاص عريسنا أدوهوا بيجوا بعد داك ناس العروس لو صادف أثناء فتره الخطوبه رمضان بيودوا ما يسمى بــ (( مويه رمضان )) وبتكون عباره عن حلو مر ، أبرى أبيض ، كركدي ، قنتليز ، عرديب ،قمر دين ....إلخ بالإضافه إلى جميع أنواع البهارات وعده لي أم العريس من كبابي وصواني وفناجين ... إلخ وبالمناسبه الزمن ده الناس المقتدره بقت تودي كل الأدوات الكهربائيه الخاصه بالمطبخ من التلاجه لغايه مضرب البيض وده طبعا أسمحوا لي نوع من البوبار الفنكهه الفاضيه .
يجوا يا شباب ناس العريس يجبوا لي العروس هديه العيد من ملابس وكريمات وكل ما تتمناه البنيه وقالتوا لي السيد العريس كان قاصده كان في مجرد ونسه نظام يا فالح أفهم براك ده البيسوا الزمن ده .
عند تحديد يوم لي للزواج يقوم أهل العريس بتحديد يوم لأهل العروس لسد المال وبيودوا الشيله حقت الملابس + شيله الأكل+ المهر أو يدوا ناس العروس متكفي .
إتحدد العرس يوم حنه العريس ناس العروس بيودوا فطور العريس وهو بيلم كل ما لذ وطاب في صينيتنا السودانيه العصيده والملاح والشعيريه والسكسكانيه والفول والطعميه ......إلخ طبعا الفطور بيمشي بي سيره بتتكون من نسوان تختارهم أم العروس وقريبتها ويصلوا هناك والجماعه يرحبوا بيهم ويكرموهم وهم طالعين بيدوا كل واحده من نسوان الفطور هديه يا بيكون فيها قطعه قماش أو ثوب أو فتيل ريحه ولو العريس مغترب ومقتدر ما بتكون في كلمه لو دي بتكون كل الأصناف مع إضافات كمان .
ناس العروس قبل العرس بأيام بيكون عندهم يوم دق الريحه وده اليوم البيكفوا فيهو الدلكه ويعملوا خمره الزيت وخمره المحلب وبخور الصندل وبخور الشاف ولازم من الحاجات دي تمشي لي أم العريس ضواقه لو ما كده الناريه بتولع والزمن ده بتمشي صينيه الريحه مع الفطور وبتكون مزينه ومزركشه .
بعد داك ناس العروس بيكون عندهم يوم فتح الفطير وعاده بيكون قبل يوم فطورالعريس بيوم .
أما عروسنا طيله فتره الإستعداد لي الزفاف وقبل حوالي الشهر أو الشهرين بتقعد في الدخان وقعدته دي ليها طقوس :-
1. عدم التعرض لي الشمس نهائياً .
2. عدم مقابله أي فرد من غير أفراد البيت ولو لزم الأمر تكون متبلمه .
3. الجلوس في عنقريب وبدون مرتبه وليلها ونهاره على قول حبوباتنا تتجربن بي الزيت (( تتمسح )) .
4. الجلوس في حفره الدخان مرتين في اليوم لمده ساعتين على الأقل في كل مره ويختوا جنبها جك عصير ليمون عشان تعوض الفاقد .
5. تقوم صديقات العروس واخواتها بتدليكها يوميا 3 مرات على الأقل .
يوم الحنه العروس والتي تكون عاده قبل الزفاف بيوم تأتي الحنانه نترسم وتنقش للعروس وصديقاتها وأخواتها وبيجيبوا غنايه لزوم الهجيج . |
| |
|
|
|
|
|
|
|
|
|
Re: طقوس العروس في امدرمان (Re: Bakhaf)
|
استدراك
1) قديما لم تكن هنالك "شيلة اكل" كان والد العروس يتكفل بكل وليمة ليلة الدخلة
2) كمان كان اهل العروس يتكفلون بعفش البيت او غرفة النوم وسنفصل لاحقا امر عفش العروس هذا
2) سد المال
- قديما كان يقال " سد مالو 100 ميه مصمته ، 50 خمسين في حنتها ، 40 واربعين في بشتها " الحنه معروفة وهي حنة العروس ام البشة فهي تكون في سبوع العرس الذي يكون فيه الجرتق - نفصل لاحقا- اي بمعنى ان المجموع هو 190 جنيه
- سد مالو متكفي وهو ان يقوم العرس دفع ما يوازي الشيلة - هدوم ، اكل ، ريحة - والدهب اموالاً تضاف الى المالي المتعارف عليه ليقوم اهل العروس هم بشراء احتياجات العروس من ملابس وعطور المتوسط الآن 8.000.000 ثمانية مليون جنيه
| |
|
|
|
|
|
|
|
|
|
Re: طقوس العروس في امدرمان (Re: Bakhaf)
|
تعريف
الصندل (Sandal Wood) هو نوع خشب له رائحة طيبة, وقد أولى الطب الأوروبي عناية خاصة للصندل. حيث يستخم مسحوقه لعلاج العدوي بالمثانة ويساعد علي إنزال حصوات الكلى ويعالج إلتهابها. وزيته يستعمل كمرطب للجلد وفي الحمي والعدوي به وللمساج. ورائحته مهدئة. ويعالج السيلان.
لخشب الصندل وخلاصته مكانة خاصة في الطقوس الدينية الهندوسية, حيث يصنع أفخر أنواع البخور, وتصف قطع من أخشاب الصندل لتحرق مع جثامين الهندوس الأغنياء وذلك لعطر الصندل المميز.
شجرة الصندل نبات طفيلي، يتراوح ارتفاعه بين 8 - 10م, يتطفل على الأشجار القريبة فيتعلق عليها, تقطع هذه الشجرة بعد مرور عشر سنوات على نموها، ويستعمل جوفها الأصفر البني لصناعة خلاصة الصندل بالتقطير.
ينتشر الصندل في دول الصين والهند والفلبين وأندونيسيا بكثرة.
المصدر
http://ar.wikipedia.org/wiki/%D8%B5%D9%86%D8%AF%D9%84_(%D8%B4%D8%AC%D8%B1)
| |
|
|
|
|
|
|
|
|
|
Re: طقوس العروس في امدرمان (Re: willeim andrea)
|
ملحق
دق الريحة ( كسر الريحة )
ايضا، قديما كانت تصنع لهذه المناسبة مشروبات خاصة في بعض احياء ومناطق امدرمان ، مثل البقنيته والابيض ضميرك والشربوت ، والبقنيته-الاسم ده انا ما متاكد منو لو في زول متاكد منو يصححه لي - عبارة مريسة (21) خفيفة يتم تحضيرها خصيصا لدق الريحة معها اللقيمات والمرارة (22) وتصنع البقنيته من الذره ، والابيض ضميرك كذلك ، اما الشربوت فيصنع من البلح .
وكما اسلفنا فانه تعزم لهذه المناسبة نسوه معينات يتم اختيارهن وتمحيصهن بعناية من ضمن الاهل والاقارب والصديقات ، والتي تعزم و لم يتسنى لها حضور دق الريحة ، تقوم بارسال جردل (23) لكي توضع فيه ماكولات ومشروبات هذه المناسبة .
_________
(21): المريسة هي مشروب مسكر يصنع من الذرة ، وله قيمة غذائية عالية جدا وهو حلو الطعم
(33): المرارة من الماكولات السودانية يمكن اعتبارها من المقبلات - هاهاهاهاهاها- تُحضر من احشاء الحيوان والمناطق الداخلية منه ( الكرشة ، ام فتفت ، الكبده والفشفاش ) وتوكل نيه او مخدعه ومطبوخة طبخ خفيف ، مع الكثير من الشطه والتوابل .
(23): وعاء
| |
|
|
|
|
|
|
|
|
|
Re: طقوس العروس في امدرمان (Re: Bakhaf)
|
دق الشلوفة (24)
هو ايضا تقليد قديم لبعض المناطق في امدرمان، ويكون بعد زيارة الرجال مباشرة، فتاتي الحلبية (25) لدق شلوفة العروس بالابار لاكسابها اللون الاخدر لتبدو لمياء ، والشلوفة المعنية بهذا هي الشلوفة السفلية ، تحضر الحلبية معها دسته ابار – جمع ابره - ويتم ربطها مع بعضها البعض ، ثم تجهز خلطة من بول السمك مع سكن (26) صاج العواسة(27) – وهو ما يصبغ الشلوفة باللون الاخضر - ثم تغمس الابار في الخلطة وتضرب بها الشفة السفلية للفتاة ، ويسبب ذلك الكثير من الالم المصاحب له نزيف دم ، لا تتمكن الفتاة من الاكل مده يوين ، يتم تغزيتها بالنشاة وهي شراب مصنوع من الذرة .
________
(24): الشلوفة هي الشفه السفلية للفتاة
(25): الحلبه معروفين في السودان وما هم بقبيلة معينه لكنهم مجموعة معروفة ، ويميز بشرتهم لون احمر والسبب حسب ما اعتقد لفح الشمس لهم فيتحول لونهم الابيض الى الاحمر من اثرها ، صار ينادي كل من هو فاتح اللون بالحلبي والانثى بالحلبية
(26): السكن هو الدخان العالق بمكان ايقاد النار او اواني الطبخ
(27): هو المكان الذي تطبخ فيه الكسرة ، والكسرة هو عجين الزرة المخمر والمطبوخ ،ويكون رهيفا بعد طبخة مثل الفطيرة بل ارهف منها سماكة
| |
|
|
|
|
|
|
|
|
|
Re: طقوس العروس في امدرمان (Re: Bakhaf)
|
القعوده
هي ايضا من العادات القديمه ، وتكون قبل الدخلة بثلاثة ايام وهي القعاد – الجلوس – للمشاط (2 ، ويتم فيه الباس العروس لبس جديد ، فيحضر البلال وهو ماء به ارياح ودلكة وصمغ تغمس فيه المشاطه (29) يدها كل ما تبدأ مسك شعرة جديده حتى تكون رائحة الشعر جميلة ويكون متماسكا باثر الصمغ .
يضع البنبر (30) فوق العنقريب (31) وتجلس المشاطه في البنبر والعروس على العنقريب ليبدأ المشاط
لا تضع المشاطه يدها في شعر العروس الا بعد ان ياتي العريس ويدفع البياض (32)[/GREEN]
________
(2: تسريح الشعر وفتله في ضفائر دقيقية متقنه
(29): من تقوم بالمشاط
(30): كرسي قصير جدا ، يستخدمه النساء عند المشاط او الطبخ او بعض اعمالهن الاخرى
(31): سرير من الخشب مجلد بالسعف المضفور
(32): يقصد به الاجر وهو غير محدد ويترك لزوق من يدفع
| |
|
|
|
|
|
|
|
|
|
Re: طقوس العروس في امدرمان (Re: Bakhaf)
|
حنة العروس
كانت قديما تكون قبل الدخلة باربعة ايام تقريبا والسبب في ذلك انه قديما كانت تستخدم الحناء العادية لصبغ اليدين والرجلين ، فكانت يحتاج الى وضعها على الارجل والايدي اكثر من مرة " الطبقة " حتى تكتسب اللون الاسود المحبب لدى السودانين ، وكانت الحنة قديما بدون نقوش " حنه جلوط " ، قديما كان يشترط عند بعض اهل امدرمان حضور العريس لحنة العروس ويضع هو لها الحنه في يدها ان كان عاقداً ، اما ان لم يكن عاقد فتقوم بذلك شقيقته " اخته لذم " ولابد في الحالتين ان يحضر العريس ، وعند البعض الاخر تقوم ببداية وضع الحنه للعروس امرأة كبيره متزوجه ولها ابناء ويشترط ان يكون زوجها حي وهي في حبله ، وذلك تيمنا وتبركا بها .
ايضا في هذه المناسبة تكون الماكولات قدح بياض وزلابية
ام الان فالحنة اصبح لها متخصصات ومحترفات في نقشها ورسوماتها مثل "عفاف النجومي" و "افه" واسمها الحقيقي وفاء ، وصارت الحنه توضع متاخر جدا قبل الدخلة بيوم واحد فقط ، وتستخدم الصبغة بدلا عن الحناء المعروفة ، وهي حالة السواد وسريعة التاثير ، لكنها خطرة جدا على الصحة وقد تؤدي الى الوفاة ، اما الحنه كتقليد فاصبح يقام قبل يومين من الدخلة لان اليوم الذي يسبق الدخلة بيوم يكون لحنة العريس ، وتكون مناسبة للنساء فقط والرجال المقربين من العروس ( اهل ومعارف ) وتكون لصديقات العروس على الاخص ، ويكون فيها حفل تغني في مغنيه على الارجح او احد الذين يقلدون المغنيات وهم كثر هذه الايام من مشاهير الغنايات " زهريمان ، هاجر كباشي ، درية الانقاذ ، ندى القلعة ، نجاة بت الفتحاب ، رشاء بت المورده ، حنان بلبلو ، قسمه ، سميره دنيا ..... الخ "
غالبا ما تكون ضيافة هذه المناسبة سندوتشات ، وقد يستعين اهل الحفل بمكنه شاورما ( هاهاهاهاهاهاه) عشان يفضوا للرقيص والجبجبه
| |
|
|
|
|
|
|
|
|
|
Re: طقوس العروس في امدرمان (Re: Bakhaf)
|
اسعار الحنة تتراوح ما بين 400 الف دينار و300 الف دينار
اصبحت الان توجد بدعة وهي ان العروس لا تحنن لليلة الدخلة
ولكنها تحنن في اليوم التاي يوم الصبحية الذي يكون فيه رقيصها
| |
|
|
|
|
|
|
|
|
|
Re: طقوس العروس في امدرمان (Re: Bakhaf)
|
عفش العروس زمان:
السحارة : صندوق كبير توضع فيه بعض الاشياء التي تحتاجها الزوجة
الكابديلو : سبت توضع فيه ملابس العروس كان يستخدم بدلاعن الدولاب
عنقريب فرطه : سرير من الخشب كبير الحجم وفاخر وتوضع عليه مراتب او لحافات ويستخدم كسرير غرفة النوم، ويكون للعروس الجديده عنقربين فرطه
عنقريب هبابي : سرير من الخشب اقل جوده من العنقريب الفرطه ويوضع عليه برش ويستخدم للقيلولة
التبروكه : مصلاية الصلاة مصنوعة من الزعف او صوف الحيوان
المشلعيب : يصنع من الزعف ويعق على السقف ليحفظ الطعام
المترار : ادات يفتل بها القطن ليصبخ خيط
اللداية : ثلاثة حجار او خمشات طين توضع عليها قدور الطعام
الدحلوب : قدر يستخدم بدلا عن المرحاض ( قصرية ) للمرأة الواضعة جنين حديثا ( النفسه )
الدوداية : قدر كبير جدا للمناسبات الكبيره
الدُلُك : قدر يحفظ فيه الروب ( اللبن الرائب )
الكنتوش : قدر المطبخ العادي لطبخ الطعام اليومي
الدوكه : صاج مصنوع من الطين المطبوخ تعمل فيه الكسرة ( العواسة )
القرعة : نوع من النبات مستدير الشكل يجوف ثم يجفف بعد شقه نصفين ويستخدم لشرب الماء والسوائل
| |
|
|
|
|
|
|
|
|
|
Re: طقوس العروس في امدرمان (Re: Bakhaf)
|
بخاف
سلامات يااخى نحن انصار سنه والحاجات دى كلها ما عندنا ما تشيل الناس دى هم ساى
Quote: يعني ما قلت ليك الخيمة سعرها كم
والفنان كم
والفنانة كم
والكوفير كم
والصور كم
والمكياج كم
وفستان الزفاف كم
وبتاعة الكوشة كم
الفديو كم
والزفة كم
وتزين العربية كم
والشقة كم
و
و
و
و
|
| |
|
|
|
|
|
|
|
|
|
Re: طقوس العروس في امدرمان (Re: SAdo7)
|
Quote: بخاف
سلامات يااخى نحن انصار سنه والحاجات دى كلها ما عندنا ما تشيل الناس دى هم ساى |
طيب ما تكتب لينا طقوس العروس عند انصار السنة
عشان الناس تحتذي بيه
ولا كيف
هاهاهاهاهاهاه
| |
|
|
|
|
|
|
|
|
|
Re: طقوس العروس في امدرمان (Re: Bakhaf)
|
اخوى بخاف
Quote: يعني ما قلت ليك الخيمة سعرها كم
والفنان كم
والفنانة كم
والكوفير كم
والصور كم
والمكياج كم
وفستان الزفاف كم
وبتاعة الكوشة كم
الفديو كم
والزفة كم
وتزين العربية كم
والشقة كم |
يا سلام ما تذكرنى الانى كدة بحردها والله
ما كفاية يعنى
Quote: اصبر في الاخر بنعمل ملخص بتاع عرس
وفي المتوسط بكون 20 مليون |
بالطريقة دى الا نبقى كيزان على شان نعرس
عارف ليه لان مالهم سايب وممكن تعرس بيه بسهولة ولا انت رايك شنو ...
| |
|
|
|
|
|
|
|
|
|
Re: طقوس العروس في امدرمان (Re: Bakhaf)
|
عفش عروس جديده الايام دي
اساسيات
اوضة نوم صينيه 2.800.000
بتجاز 3 عيون 0.050.000
امبوبه غاز 0.100.000
ثلاجة 10 قدم 1.000.000
عدة متبخ 0.500.000
سريرين خشب 0.600.000
سريرين حديد 0.250.000
كراسي بلاستيك 0.100.000
طقم ترابيز 0.200.000
المجموع 5.600.000
اساسيات نص نص
مكوة 0.030.000
خلاط 0.100.000
تلفزيون 0.450.000
طقم كراسي جلوس 1.500.000
المجموع 2.080.000
| |
|
|
|
|
|
|
|
|
|
Re: طقوس العروس في امدرمان (Re: Bakhaf)
|
اسماء بعض الثياب القديمة التي كانت تحضر مع الشيلة
الثلاثينيات
فاطمة رشدي
الجورسي
المركزي
الاربعينيات
رسالة لندن
المظاهر
ابو قجيجه
الدلع
القمر الروسي
السلك الدبلوماسي
الشفون
2000 ولي فوق
الثياب الربط
تتراوح اسعار الثياب من 30 الف جنية
حتى 400 جنيه
غالبا ما يحضر في الشلة العادية
2 ثوب السعر بين 300 الى 400
2 ثوب السعر بين 100 الى 200
2 ثوب بين 50 الى 100
وتوب لام العروس بين 100 الى 200
بمعني ان الثياب تكلف ما بين 1.000.000 الى 1.500.00 جنيه
| |
|
|
|
|
|
|
|
|
|
Re: طقوس العروس في امدرمان (Re: Bakhaf)
|
موية رمضان
هي وفطور العريس الشيئين الوحدين الذين تقدمهما العروس للعريس او اهل العروس لاهل العريس ، وهي مجموعة من اللوازم التي تستخدمها الاسرة السودانية في هذا الشهر المبارك . قديما تتكون ( موية رمضان ) من سلة مصنوعة من سعف النخيل يسميها أهل السودان ( القفة ) تملأ بالحلومر ( الابري الاحمر ) بالاضافة الى قفة ابري ابيض وقفة رقاق , كما يحضر العريس ملابس العيد لعروستة المنتظرة وشقيقاتها أو قريباتهاالمصدر . اما الان اصبحت موية رمضان طقس مكلف جدا ، حيث تقوم العروس بعد تجهيز الاشياء السابقة من حلو مر وابري ابيض ورقاق ، تضيف اليهم اشياء مثل علبة لبن فورموست كبيره ، وتانج ، وبهارات ، وكذلك الاواني التي تستخدم في رمضان مثل الجكاكه ، والصواني ، والجرادل الصغيره ، وطقم عشاء فاخر
| |
|
|
|
|
|
|
|
|
|
Re: طقوس العروس في امدرمان (Re: Bakhaf)
|
فطور العريس
فطور العريس في السابق كان يتكون من العصيدة وملاح الروب الأحمر والأبيض وملاح التقلية باللحمة الناشفة والشعيرية والسكسكانية والفطير وهو بذلك غير مكلف، أما الآن فأصبح باهظ التكاليف ويعتبر عبئا على أهل العروس كما تبالغ بعض الأسر في تجهيزه بل تتنافس النساء في ذلك، وأصبح يضم جميع المأكولات الفاخرة واللحوم البيضاء والحمراء، والخبائز بأنواعها إضافة إلى بعض الهدايا والتي تشمل “خاتم العريس”، والعطر والجلباب السكروتة للعريس والعمة والشال والمركوب النمر لأبي العريس.. وتحمل المأكولات في صندوق أو اثنين وتغلف بالسلوفان.. كما يزفونه بالطبل والزغاريد أو “الكيتا” إلى منزل أم العريس” المصدر
| |
|
|
|
|
|
|
|
|
|
Re: طقوس العروس في امدرمان (Re: Bakhaf)
|
الاخ بخاف
ارق التحايا لكم فى اول مداخلاتنا واتمنى ان تدوم مودةً
الحقيقة تقال انة بوست رائع بكل معنى الكلمة،واصل في توثيق التراث بما لكم من ملكة عصماءُ جهبز فى هذا المجال ،وإن اختلفنا مع بعضة او جُلة،هذا تراثنا ويجب ان يُحفظ لمن هم بعدنا.
معكم بالمتابعه
اخوكم
محمد مكى
| |
|
|
|
|
|
|
|
|
|
Re: طقوس العروس في امدرمان (Re: محمد مكى محمد)
|
اخونا محمد مكي
سلامات واحترامات
شكرا كتير على الاطراء والمرور ،
اهو غايتو بنحاول ننقل حكي حبوباتنا قبلي ما تختطفهن المنايا
وفي الاخر بتظهر لينا سلبياتنا ايجابياتنا .. ولن تظهر الا بالتوثيق والمقارنة
شكرا كتير
وفي انتظارك
| |
|
|
|
|
|
|
|
|
|
Re: طقوس العروس في امدرمان (Re: Bakhaf)
|
طبعا يا حلوين وزي ما هو ظاهر من العنوان
ما حا نتكلم عن طقوس العريس كتير بس نهبشا هنا
عشان العاوز يقيم عرسه من البوست يقدر
والحاجات البتخص العريس براه وما مفروض تظهر في طقوس العروس
قيدومه العريس
حنة الريس
مكان شهر العسل
والفنان
الحلاق والساونا
قيدومة العريس غالبا ما يقوم بها الاصدقاء وما بكون فيها اي تكالف على العريس احتمال بس حق التصديق لو عاملين فيها مكبرات صوت والتصديق بي 35 الف ، وبتكون مقفولة شديد على الاصدقاء المقربين وغالبا ما تكون احادية الجندر
حنة العريس هي حاجتين
العزومة والحفلة ومرات الاثنين بكونو مع بعض زي زمان ، لكن هسع فصلوهم بقت العزومة غالبا ما تكون غدا( وجبة الغداء) والحفلة مساء اليوم الذي يسبق الدخلة .. قد العزومه (الوجبه ) نهار اليوم الذي يسبق الدخلة وفي مسائه تكون حفلة الحنه او في نهار يوم الدخلة حتى تخفف من التكلفة بالستعانة بفطور العريس الجايباه العروس وما يخسروا كتير . ودي بقوم بيها العريس ، غالبا ما يكون فيها كشف يغطي تكلفتها يزيد او ينقص قليلا .
مكان شهر العسل
زماااااااااان كان السفر للاقاليم لدى الاقارب هو شهر العسل ، بعد فترة في السبعينات والستينات والثمانينات كان شهر العسل اما ان يكون خارج السودان للميسورين او في فنادق الخرطوم وبعض المدن الجميلة مثل ود مدني او كسلا . الان اصبح شهر العسل يقضى في داخل الخرطوم في الشقق المفروشة فهى اقل تكلفة واكثر خصوصية . تكلفة الشقة تتراوح ما بين 35 الى 50 لليلة الواحدة ، وهي شقق مجهزة بكل الكماليات والعسل اصبح اقصر من شهر.. ما بين اسبوع الى 15 يوم فقط
الفنان (ده خشم بيوت)
بتراوح من الفنانين الركشات ( البغنو بي اي شي ) وديل يحتاجون فقط الى مكبرات صوت ، اله اورغ ، وفسحة رقيص .. وجبجبه للصباح .. وتكلفتهم ما بتكون كتيره ولا تتجاوز الـ 300 الف .. لحدي ما يجيك الفنانين درجة اولى واكبر اجر بياخذه ترباس وهو 8 مليون جنيه
بكري المغربي 2 مليون
محمود 3 مليون
فرفور 3 مليون
نادر خدر 3 مليون
عصام محمد نور 3 مليون
قدورة 2 مليون
احمد بورتسودان 2 مليون
حمادة بت مليون ونص
حسين شندي 6 مليون ( ليه ما عارف )
ترباس 8 مليون
ديل الفنانين الرائجين اليومين ديل والاسعار دي قابلة للتخفيض حسب علاقتك بالفنان .. يعني لو بتعرف زول بعرف الفنان بجيك في حدود مليون جنيه
الحلاق والساونة في حدود 100 الف وديل سبب نورة العريس يوم العرس
حا نجيب ليكم قائمة بالحلاقين المشاهير واسعارهم
| |
|
|
|
|
|
|
|
|
|
Re: طقوس العروس في امدرمان (Re: Bakhaf)
|
الحبس
تحبس العروس قبل الدخلة بشهر تقريبا في منزل اهلها ، ولا تخرج منه الا لضرورة قصوى ، في تلك الفترة تقعد العروس للدخان واللخوخة والدلكة ، ويزاد وزنها ان كان قليل بشرب الموص ( 33) والعصائر والمدايد ، وتخسس ان كان وزنها زائدا بالرجيم والدخان ، وتقوم على خدمتها احدى قريباتها ( بنات عمها / بنات خالاتها )
_______
( 33)
: الموص هو خليط الكسرة مع الماء والسكر
| |
|
|
|
|
|
|
|
|
|
Re: طقوس العروس في امدرمان (Re: Ahmed Abdallah)
|
Quote: ياخي قالوا جابوا حبوب طبية جديدة اسمها حبوب الدش
وقالوا انواع كثيرة احسنها ال Digital |
يا احمد عبد الله
سلامات واحترامات
يا زول الحبوب دي من بدري
من زمن (ميسوجور) وهسع احدث حبوب اسمها (الصفقة)
كمان يا حبه الايام دي قايمين في الحقن
ودي بستخدموها في المنطقة المراد تسمينها فقط
عشان كده الايام دي البنات ماشاء الله كلهم شايلين تقيل
وكمان يقال انهم بستخدموا حقن الانسولين حقت السكري ..
ويتم حقنها في المنطقة المراد تسمينها او الاصح المراد توريمها
ما عارفا لكلام ده صاح ولا غلط
وطبعا ده كلو عنده تاثيرات جانبية خطيره
الموص يا عمك
مضمون وما عنده اثار جانبيه
وكمان معاها النشا
اثارهم فقط في انهم بعملوا كرش
| |
|
|
|
|
|
|
|
|
|
Re: طقوس العروس في امدرمان (Re: Bakhaf)
|
ظهرت طقوس جديده ، تمارس قبل ليلة الدخلة من اجل النورة والظهور بشكل حسن في ذلك اليوم المهم جدا او من اجل التوثيق له، واغلب هذه الاشياء وافد وتحتاج الى اختصاصين ، او اقله لى خبراء مارسوا هذا الشي لفترة معقولة من هذه الاشياء :
لبس العروس ومكياجها
اصبح هناك متخصصات في هذا المجال اشهرهن هند حمتو ، انتصار حجا و غادة شرفي . هؤلاء يقمن بتجميل العروس تجميل كامل فكل ما يخصها من ماكياج او لبس يكون تحت اشرافهن المباشر ومشورتهن ، وتكون هذه المهم بمبلغ 800.000 (ثمانمائة الف جنيه) وهي للاشراف على لبس العروس ومكاياجها يو الدخلة ، ويكون قبل ذلك جلستين لتقشير الوجه وازالة البثور وشفط الدهون ، جلسة يوم حنة العروس وجلسة قبل الدخلة بيوم واحد وكل جلسة بسعر 100.000 (مائة الف جنيه)
| |
|
|
|
|
|
|
|
|
|
Re: طقوس العروس في امدرمان (Re: Bakhaf)
|
اخر موضه في الحبس ( شئ استايل )
( شئ استايل ) هو اسم مكان في مدينة النيل بالثورة بام درمان تديره سيده تدعى (تهاني بت النعمه) ، في هذا المكان تحبس العروس الحبس الذي تحدثنا عنه سابقا ، تحت اشراف وعناية احترافية ويكون تحت اشراف فلبينيات وتحبس العروس قبل شهر من زواجها وتخصص لها غرفة كاملة التجهيز وعلى مستوى فندقي ، والحبس نوعين حبس كامل بمعنى ان تحبس العروس طيلة الشهر داخل المكان ( شئ استايل ) او حبس جزئي ويكون بان تحضر العروس الى المكان عند الساعة السابعة صباحا وتخرج منه عند الساعة التاسعة مساء حتى لا تتعرض لاشعة الشمس المحرقة ، وفي هذا المكان تجرى للعروس كل الاشاء التقليديه من دخان ودلكة ولخوخه زائدا عليها بعض الاشياء العلمية المدروسة مثل المساج والعناية بالبشرة وتخسيس او زيادة الوزن
________
لم اتحصل على سعر هذه الخدمه حتى الان
| |
|
|
|
|
|
|
|
|
|
Re: طقوس العروس في امدرمان (Re: Bakhaf)
|
الكوشة
اصبحت طقس لوحدها ، ولها متخصصين واختصاصيين منهم (هالة) ، وهي متخصصة في الكوش ولديها تصاميم والبومات ، فتعرض عليك ما قامت بانجازه وما هو متاح الان ، ويتم الاتفاق معها قبل شهر من الزواج وتاتي قبل اسبوع لتري مكان الحفل لتحدد اين تكون الكوشة ، وتصمم الكوش بالتنسيق مع صاحبة المكياج ولون الفستان حتى لا يكون لون الكوشة وتصميمها اشتر
سعر الخدمة بي 1.000.000 ( مليون جنيه )
| |
|
|
|
|
|
|
|
|
|
Re: طقوس العروس في امدرمان (Re: Bakhaf)
|
ايجار فستان الزفاف وطقم الاكسسوار
الفستان 500.000 ( خمسمائة الف جنيه)
الطقم 300.000 ( ثلاثمائة الف جنيه)
اشهر محلات ايجار الفساتين والاطقم توجد في
بحري المؤسسة
والخرطوم العمارات شارع 15
الخيمة ايجارها ما بين 1.000.00 و 2.000.000
اما الصالات فاسعارها غالية
مثلا صالة الخليل بمنتزه المورده سعرها مع خدمات متكاملة يصل الى
18.000.000 ( ثمانية عشر مليون جنيه )
| |
|
|
|
|
|
|
|
|
|
Re: طقوس العروس في امدرمان (Re: Bakhaf)
|
التوثيق للمناسبة
اصبح التوثيق لمناسبة الزواج من الاساسيات ، والتوثيق نوعين توثيق فديو وتوثيق فتوغراف ، واصبح للاثنين محترفين ومتخصصين خاصة توثيف الفديو اصبحت اماكن التوثيق بالفديو كثيرة وكلها جيده ويتم التوثيق في شارئط الفديو وعلى الاسطوانات المدمجة كذلك
اسعار التوثيق بالفديو تبدا من 50.000 ( خمسين الف جنيه ) 20.000 ( عشرون الف ) للشريط و30.000 (ثلاثين الف ) ايجار كاميرا، وفي هذه الحالة تكون كاميرا واحده فقط ومصور واحد يقوم بتغطية ما يستطيع من المناسبة ، وتصل تكلفة توثيق الفديو الى 1.000.000 ( مليون جنيه ) ويكون ذلك توثيق احترافي معه مخرج واربعة كاميرات ثلاثة متحركة وواحده ثابته وجهاز حاسوب للمونتاج السريع وملتميديا بروجكتر و2 تلفزيون تعرض للمشاهدين حركة الكاميرات لتمكنهم من متابعة الحفل وهم جلوس
فيما يخص التوثيق الفتوغرافي ، ايضا هو تقدم، لكن هناك محلات تصوير متقدمه جدا منها محل يوجد في الخرطوم 2 - غير متاكد من المكان - اعتقد ان اسمه ( مجستك ) هذا المحل يتعامل مع الفتوغراف بصورة مدهشة ومبدعة وهو محل منضبط في مواعيده ملتزم بها ، يقوم بعد اخذ الصور الفتوغرافيه بمعالجتها ببرامج معالجة الصور الرقمية بواسطة الحاسوب ، ويكون ذلك بادخال خلفيات مبتكره على الصور ومعالجة بعض المشاكل والعيوب فيها ، سعر هذه الخدمة في المتوسط 400.000 الف جنيه لعدد 30 لقطه كل لقطة منها 4 كروت معها اربعة لقطات مكبره هدية مع البوم صور
| |
|
|
|
|
|
|
|
|
|
Re: طقوس العروس في امدرمان (Re: Bakhaf)
|
الاخ الـحبيـب الحبوب،
بـخاف،
كل عام وانتـم بخـير وادام اللـة علي الجميع الـصحة والعافية الدائـمة.
الـمتابع لـمراسـيم الزواج قديمآ وحـديثآ في منطـقة ( الـمسالـمة ) بالذات والتي أغلب سكانها من الاخـوة الاقباط وانـها لم تتغيـر كثيـرآ عن ذي قبل، عكس السودانيين والذين ثآثروا بـما هـو غربي او مستمد من عادات انتقلت الينا وعبـر المسلسلات فاصبح الزواج السوداني الان ويفتقر الي كثـير من الاصالة القديمة.
| |
|
|
|
|
|
|
|
|
|
Re: طقوس العروس في امدرمان (Re: بكري الصايغ)
|
مرحب اخونا بكري الصايغ
سلامات واحترمات
وعيد سعيد
نبهتني لي حاجة مهمة ، وهو زواج غير المسلمين، طقوسه وتفاصيله
شكرا كتير
بخصوص التغيير الحصل في طقوس الزواج ، الغريب انه لم يحدث تغير الا فيما هو مكلف ومنفر من الزواج ، حتى الاشياء التي ننفرد بها نحن السودانيون
رقيص العروس ( سنتحدث عنه لاحقا )
موية رمضان
فطور العريس
لم يحدث تغير فيها كعادات، الا انه زادت اعبائها وتكاليفها اضعافا مضاعفة ، قد تصل احيانا الى درجة انها تفوق تكالف الزواج نفسه
بالله لو عندك تفاصيل زواج الاقباط وخطواته وطقوسه
ارفعها لينا هنا تكون مشكور
| |
|
|
|
|
|
|
|
|
|
Re: طقوس العروس في امدرمان (Re: Bakhaf)
|
حُلي واكسسوارات العروس
الجدلة : خيط من الحرير تخاط فيه قطع من الذهب الشريفي والبنادق
الزمام : حلقة مستديرة يخرم لها في الانف وتعلق عليه
الرشمة : سلسة تصل ما بين الزمام وشعر العروس
القدو : حلقتان كبيرتان جدا تلبسان في الاذنين
الطاعات : توضع خلف الراس ( العنقرة ) وهي من السكسك والبنادق
البلوم : حلقة مستديرة تلبس اعلى الزراع في منطقة الزند
الحجل : حلقة مستديرة تلبس اسفل الرجل في اخر الساق
العاجات : اسورتين عريضتين من سن الفيل ( العاج )تلبسان في اليدين
المطارق : خليط من خيط الحرير والخيط العادي وقطع الذهب تلبس اعلى الرقبة
الفتيل : يلبس على الصدر
السيموته : قطعة من السكسك تربط في خيط احمر يتدلى من عنق الفتاه ويتم حبسها من الاطراف بقطع من الذهب .
العَقَد : عقد مزين بالسيموته والفرجلات ويكون طويلا من الرقبة وحتى وسط الفتاة
ظهرت لاحقا انواع من الحُلي منها
القوات المسلحة
احفظ مالك
الان تزين العروس بالنحاس المطلي بالذهب غالبا او اكسوارات الزجاج المُقلده للماس ( الا من رحمها ربي )
| |
|
|
|
|
|
|
|
|
|
Re: طقوس العروس في امدرمان (Re: Bakhaf)
|
الاخ بخاف
كل عام وانت بالف خير
يا اخى واللله شيلتنا هم عديل يا زول
اسمعنى انا الان فى الخرطوم لكن بالطريقة العرس صعب عديل
اسمعنى شارع المعونة بحرى بقى صعب لدرجةان المرور اصبح من المستحيلات
بسبب كثرة العرسان وتجهيزات العروس ....
استر يا رب
| |
|
|
|
|
|
|
|
|
|
Re: طقوس العروس في امدرمان (Re: Bakhaf)
|
السلام عليكم ورحمة الله وبركاته
اخى الكريم بخاف, كل سنه وانت طيب والسنه الجايه على امانيك
جزاك الله خيرا لهذا البوست القيم ولو انه حيطفش الرجال من العرس
ارجو شاكره موافاتى بطريقه الاتصال بى تهانى بت النعمه صاحبه شئ ستايل, وهل يجب الحجز مسبقا عندها ام لا
وهل هى تفعل نفس الاشياء التى تفعلها خبيرات المكياج امثال غاده شرفى ام
نحتاج الاثنان معا
وهل هناك صالات منقسمه يعنى جزء للرجال وجزء للنساء? ومصورات نساء? وبديل لفنانين يعنى ناس بغنو اغانى اسلاميه مثلا
جزاك الله خيراوآسفه للأطاله
وفى امان الله
لا اله الا الله
| |
|
|
|
|
|
|
|
|
|
Re: طقوس العروس في امدرمان (Re: bint_alahfad)
|
أختنا بت ألأحفاد
سلامات ومبروك وربنا يتم علي خير
Quote: وهل هناك صالات منقسمه يعنى جزء للرجال وجزء للنساء? ومصورات نساء? وبديل لفنانين يعنى ناس بغنو اغانى اسلاميه مثلا
|
والله بالغتي رسمي في دي !!!!
نحن غايتوا العريس صاحبنا وحالفين انه يكون عرس بهجة
يعني غنى و رقيص للصباح و ما في حاجة اسمها صالات اسلامية
يعدين شنوا مكنة فنانين اسلاميين دي ؟
في حاجة اسمها فنانيين انقاذيين واحد فيهم اسمه قيقم
و يبغني ملح بس تملوا ليه بطنه بلح وشاي
و من روائعة ( أمريكا لمي جدادك) وكذلك ( أمريكاو روسيا دنى عذابهما)
مبروك ويارب يتم ليكم على خير
تحياتي للرائع خالد (كوليل)
| |
|
|
|
|
|
|
|
|
|
Re: طقوس العروس في امدرمان (Re: Bakhaf)
|
تابع السيرة
في فترات لاحقة وبعد ظهور السيارات ( العربيات ، الاتومبيلات ) بقت السيرة بالعربات اولا كانت بالباصات وحقيقي باصات ( ابو رجيلة )(40) ياما نقلت عرسان لي عروساتهم ، وظهرت معاها اغنيات جديده زي :
البابور جاز خلو اليشتغل
الشغل بالجاز خلو اليشتغل
او بادخال مقاطع جديده متماشية مع الموضه في اغنيات قديمه مثل :
وسواقنا زينا وحالف ما يدلينا
الليلة يوهي يا بلالي يوهي
حسي ووزعي الببسي (41) يا ام العروس
واضح مواكبه الموضه في ظهور الببسي والمطالبة بي توزيعه على الضيوف ، وكمان ظهرت عادة دوار البلد وهي ان يبحث سائق البص عن اقرب فسحة من مكان الزواج ثم يظل يدور فيها بالبص والفتيات يغنين :
دور بينا البلد ده احرق الجزلين يالبابور جاز
دور بي حبيبي دور بي .. وووووووووووووك ( صرخة )
يتبع ..
_____________________
(40): باصات مرسيدس كان تابعة لشركة مواصلات العاصمة القومية لونها اصفر
(41) : المقصود ببسي كولا الماركة العالمية
| |
|
|
|
|
|
|
|
|
|
Re: طقوس العروس في امدرمان (Re: Bakhaf)
|
الأخ الكريم بخاف...كل سنة وأنت طيب
أسمح لي أن أعبر عن أعجابى بهذا البوست الراقي...لقد أمدنا حقيقة بمعلومات قيّمة عن طقوس الزواج وخاصة نحن نعيش خارج السودان...أتمنى لو تمت أضافة هذا البوست الى المواضيع التوثيقية والمتميزة...
| Quote: ارجو شاكره موافاتى بطريقه الاتصال بى تهانى بت النعمه صاحبه شئ ستايل |
أيضا عنوان غادة شرفي وطريقة الأتصال بها
مع معزتي
سحر
| |
|
|
|
|
|
|
|
|
|
Re: طقوس العروس في امدرمان (Re: Sahar Abdelrahman)
|
اختنا سحر
سلامات واحترمات
شكرا كتير على اشادتك بالبوست
من الواضح انه هنالك حوجة لقائمة بعناوين الخبراء في كافة المجالات المتعلقة بالبوست
ساحاول جاهدا ان اضع تلك الائحة في القريب العاجل
مع وافر الود التقدير
| |
|
|
|
|
|
|
|
|
|
Re: طقوس العروس في امدرمان (Re: Bakhaf)
|
اخى المفضال بخاف
مازلنا نتابع
اتمنى من الاخ بكرى ان يصوغ هذا العمل التوثيقى الرائع فى وحدة واحدة ويضعة مع المواضيع التوثيقية والمتميزة وذلكم لانة كذلك.
اخوكم
محمد مكى
نرجو الماصلة فيما تبقى من عادات وطقوس
| |
|
|
|
|
|
|
|
|
|
Re: طقوس العروس في امدرمان (Re: Bakhaf)
|
مواصلة السيرة
الان في زمننا هذا ، اندثرت السيرة او كادتت ان تندثر ، والاسباب :
1) الكثير من مناسبات الزواج اصبحت تقام في النوادي
2) الاسر تاتي الى مكان الحفل كلا على حدى
السيرة بقت منحصرة في العربية البتجيب العريس والعروس من الصورة والكوفير ، طبعا مع التغيير ده ظهرت حاجات جديده منها الزفة
الزفة
الزفة تقليد جديد ويكون بزف العريس والعروس من مكان وقوف العربة التي اقلتهم من الكوفير والصورة الى مكان جلوسهم على الكوشة ، والزفة انواع :
الاولى: زفة بالطريقة المصرية وتقدمها فرق موجوده في بحري جوار المؤسسة، يلبس افراد هذه الفرق ازياء موحده ويحملون الدفوف والطبل ويزفون العروسين وسط ايقاعات مصرية ( عشرة بلدي ) ،
الثانية : زفة مودرن ودي بقوم بيها بتاع الساوند سستم ويقوم بتشغيل شريط اجنبي مناسب او الموسيقي الملكية او اي شي يؤدي الغرض ويكون امام العروسين اشبينات تحملان زهور او شموع وفي الجانبين على الممر تشعل النوافير الضوئية وتلقى الاوراق الملونة على الممر والعروسين وفي هذه الحالة لا يذهب العروسين الى الكوشة مباشرة لكن يتوسطان الدائرة ويرقصان رقصة بطيئة ( اسلو ) ثم من بعد نهايتها يذهبان الى الكوشة ،
الثالثة: توديها الفرقة المصاحبة للمغني الرئيسي للحفل ، حيث اصبح الكثير من العرسان يتاخرون في الكوافير والصورة ، مما يجعل المشرفين على الحفل يبدأون الحفل ويتركون المغني الرئيسي يغني ، حتى ياتي العروسين فيتوقف المغني عن الغناء ، وتستمر فرقته في عزف مقطوعة موسيقية مناسبة حتى جلوس العروسين
| |
|
|
|
|
|
|
|
|
|
Re: طقوس العروس في امدرمان (Re: Bakhaf)
|
مشاركة من صديقة تصف في السيرة
Quote: جيبنا ليك عقيد اللولى يا نسيبتو شن بتدورى ...
جبنا ليك الغالى علينا ... و جبنا ليك عجب عينينا ... يا نسيبتو شن بتدورى ...
يالله بنات اهل العروس يردن :
شطة ... شطة يا ام العريس .. شطة جاياك عروس لقطة يا ام العريس ..
و ديلك يردن :
سلاااااام ... سلاااام يا ام العروس سلام جايك عريس تمام يا ام العروس ...
............
و تستمر المبارة لاكثر من نص ساعة اماما منزل اهل العروس ... الى ان تخرج لهم ام العروس و خالاتها ... و يستقبلنهن ... و ينزلوهن من الباص الى المنزل ...
ولى عوده ... |
| |
|
|
|
|
|
|
|
|
|
Re: طقوس العروس في امدرمان (Re: Bakhaf)
|
العزيز بخاف
لك جزيل الشكر
وعام سعيد انشاء الله
Quote: عاصم ابوبكر حامد نور
سلامات واحترمات
وعيد سعيد
شنو يا حبوب ، انت موضوع عرسك هين بس ملحق ابوجا وبتبقى ود وزير ولا مستشار
هاهاهاهاهاهاهاهاهاها
( بهظر معاك ما تزعل مني ) |
يا عم انحنا شكلنا شكل القصر
نحنا ناس ميدان ساكت وحارة بس
شغل الترطيب ده خلاص بقى على الجداد
كدة واصل لينا فى قصة العرس والعروس البقينا نلاوس منها دى ...
يا اخوى فى شئ تانى مهم جدا جدا اختيار العروس واتمنى ان تجد عنها مرجعية كافية
وما تنسئ حاجات الحبوبات والتوصيات الخاصة بملحقات زى ملحق ابوجا
تشكر اخى
| |
|
|
|
|
|
|
|
|
|
Re: طقوس العروس في امدرمان (Re: عاصم ابوبكر حامد)
|
حبابك اخونا عاصم
Quote: (1) الاختيار
كان الاختيار في الفتره الاولى من تكوين مدينة امدرمان يتم عن طريق الترشـــيح من قبل الاهل او الجيران او المعارف او الاصدقاء – بســـبب عدم امكانية الاختلاط بين الجنســــين – وبعد ذلك اصبح العريس يختار مباشــرة بدون وسيط او مرشح وبعد ان يرى فتاة احلامه في احدى المناســـبات الســـعيده " بيت اللعبة"(1) حيث يراها وهي تتوســط الدائرة لترقص الرقبة ويقوم بدوره لاخذ الشــبال ، و الشبال هذا هو اول علامات الاختيار ، اما مؤخرا وبعد ان تحرر النســـاء كثيرا اصبح الاختيار يتم في اماكن الاختلاط كاماكن العمل او الدراسة او التجمعات العامة . لكن ظاهرة الترشـــيح لازالت موجوده حتى ايامنا هذه ، خاصة في اوساط المهاجرين والمغتربين ، فقط زادت عليها امكانية مشـــاهدة العروس بعد الترشيح بالسبل الحديثة المتاحة من فتوغرافيا او فديو اومباشرةً عبر الانترنت على ايامنا هذه ، ويتم كل ذلك بعد ترشيح من قبل الاهل والمعارف والاصدقاء والجيران . |
يا عمك انت نعسته ولا شنو ؟
اول حاجة تطرقنا ليها هي الاختيار
حا احاول اجيب زياده تاني
تسلم يا حبوب
| |
|
|
|
|
|
|
|
|
|
Re: طقوس العروس في امدرمان (Re: Bakhaf)
|
مداخلة مهمة من نفس الصديقة بخصوص المهر
Quote: فى فرق بين المهر = المال ... و بين الصداق ...
المال ده بيدفعو مع الشيلة ... وده حسب قدرة العريس ... و سوق بتاع مزايده((راى شخصى))
الصداق بيدفع عند العقد و هو مقدار محدد فى الشرع
ملحوظة : الصداق حق خاااالص للعروس ... و لمن يدوها ليو بينصحوها انها تشترى بيو حاجة تاكلا او كحل تتكحل بيو ..لانو مال مبروك ... |
| |
|
|
|
|
|
|
| |
Bakhaf
Ahmed Abdallah
نادر السوداني
يوسف الولى
Sobajo
عاصم ابوبكر حامد
عبير خيرى
willeim andrea
waleed500
SAdo7
محمد مكى محمد
bint_alahfad
الزاكى عبد الحميد
Sahar Abdelrahman
فيس بوك
تويتر
انستقرام
يوتيوب
بنتيريست