|
|
 قــهــوة لي سيــــدي الـحســـــن
|
يا بنية بُن
يا قَهوة عابقة منكهة
معمولة لي سيدي الحسَن
يا باقَّة نور
يا زاهية وازهى من الحُسن
طليتي من بين المدى
نوَّرتِ إحزان الزمن
رفرفتِ قلبي الْكان سَكن
خليتي شريان الغرام بيك احتقن
وسرحتَ في دنيا الوله
نديان هوى ومليان شجَن
بين رنة الفرح الطفل
وضَحكة أصفى من اللبن
ما انتِ يا روح المُنى
بارقة الفال الحَسَن
وانا في رجاك
اسكُت وازن
قمرية قوقاية بتئن
احكي الشعر
زي التقول راكبني جن
احييييييييييييييي
من قلبي البِِوِِن
عاشق الجمال
والانفعال
يصرخ ويصن
|
|
 
|
|
|
|
|
|
|
 Re: قــهــوة لي سيــــدي الـحســـــن (Re: د.محمد حسن)
|
مالك علينا محمد حسن فى رمضان وعز النهار وتجيب سيرة القهوة بالغت عديل
الظاهر عليك بس ماعملت حساب لمدمنى القهوة وكيف السيرة ممكن تخليهم يتجرسو عديل
وتميت الناقصة بسيدى الحسن غاينو بس عافين ليك ببركة سيدى الحسن تسلم يارب انت
| |
|
|
|
|
|
|
|
|
|
Re: قــهــوة لي سيــــدي الـحســـــن (Re: Ahmed Yousif Abu Harira)
|
Quote: كيف الحال يادكتور
القهوة دي متين بعد الفطور ولا ساعة السحور؟
ماتفوتونا ليها عشان تسمعنا فوقا القصيدة |
القهوه رفقه ومزاج..
بعد الفطور وقبل السحور ومع صلاة العيد..
القهوه زوق واحساس..
فرح واشتياق..
تقع زانت منتظرها وتقول ..
ياسيدي الحسن تلحقني ومن رمية القهوه تنجدني..
ولا شنو؟
| |
|
|
|
|
|
|
|
|
|
Re: قــهــوة لي سيــــدي الـحســـــن (Re: Muna Khugali)
|
سمح عازماك وانت مابتتعزم..
في حوش مرشوش..فيه عنقريب وبمبر وطربيزه لبنيه..
جبنه ممسحة بصندليه في صينيه..
نقلي البن ونضحك..
ندق البن ونغني..
البن في الشرقرق يرقص..
.....
هبهان وجنزبيل ومستكه..
وجمره نارها هاديه في مبخر..
بخور جاولي وتيمان..
ومزاج مجنون..
ياسيدي الحسن تلحقني وتنجدني..
وتوصلني لي وقت جبنتي...
الليله اليوم ده طويل خلاص!
| |
|
|
|
|
|
|
| |
د.محمد حسن
ادريس خليفة علم الهدي
هاشم أحمد خلف الله
Safia Mohamed
ماجدة عوض خوجلى
ابو جهينة
Ahmed Yousif Abu Harira
Muna Khugali
Souad Taj-Elsir
ود محجوب
Mohamed Moatasim
فيس بوك
تويتر
انستقرام
يوتيوب
بنتيريست