نقلا عن صحيفة الاحداث الخميس4 أكتوبر 2007 - العدد الثانى والعشرون
Quote: علوب (يرقص) من سنة (82) وعاوز يعمل مدرسة (رقيص) وزيرالدفاع اعطانى تصريح بالرقيص فى كل الحفلات..!! حوار: يوسف الجلال (صحيفة الاحداث ) الجلوس الى احد ظرفاء المدينة يبقى مشاهدة بعين غير رامدة لكل خبايا ومخصوصات وطن بل هو تفاصيل غير كذوبة لملامح وسحنات امة .. هكذا هى الحالة عند الدردشة
مع ظريف بمثل مكانة وخفة دم ورشاقة على دهب عبده الشهير بعلوب دهب احد معالم البهجة فى الخرطوم .. جلسنا اليه فكان جلوسنا فى حضرة القفشة وبمعية المشهد الضاحك .. اذن هى دعوة لفك طلاسم شخصية رجل لا يفهم فى السياسة ولا يعرف الصادق المهدى ولم يسمع بالترابى .. لكنه يعرف حتى المغمورين من المطربين.
بداية منذ متى يمارس علوب دهب الرقص ؟ ·انا برقص من العام 1982وبالمناسبة انا حلفاوى برطن لكن ما بحب اغانى الرطانة عشان الايقاع ما مناسب مع نوعية رقيصى وكمان ما بحب الاورغن ،والاروكسترا مناسبة فى الرقيص. - بتعرف الحفلات كيف؟ مرات كتيرة بتجينى الدعوات فى البيت ومرات اثناء الحفلة يجيك زول يقول ليك الجمعة القادمة عندنا حفلة فى البيت ولازم تجى واى مغترب بقول لى اهلو لو علوب ما جاء العرس بتاعى ما بكون سمح عشان كدة الناس بتحرص على وجودى. قبل وجود الفنان . اول اغنية رقصت فيها كانت اغنية شنو؟ اول اغنية رقصت فيها هى اغنية (اسمر) للفنان المبدع محمد الامين. اكتر فنان بترتاح لى اغانيه وبتلقى فيها الايقاع المناسب للرقيص منو؟ هناك العديد من المطربين استمتع بالرقيص فى اغانيهم واكتر فنان مريح بالنسبة لى فى الغنا هو البعيو وحسين شندى وندى القلعة وحنان بلوبلو التى اذكر انها مرة قالت لى ناس البوليس الذين حاولوا ان يخرجونى من الحفلة (لو علوب طلع انا ما بغنى). اكتر اغنية تجد نفسك تتراقص فيها من الدواخل شنو؟ كل الاغانى ذات الايقاع الراقص لكن اغنية (عمت بشايرنا) فيها ايقاع خاص وهى اقرب اغنية الى قلبى. انت بترقص رقص غربى ام شرقى؟ انا لا ارقص الغربى ولا الشرقى .. انا عندى رقيص حقى براى وما حصل قلدت زول وبالعكس رقيصى حالة خاصة وقريبا سوف اقوم بفتح (مدرسة علوب لتعليم الرقص). عندك هوايات اخرى غير الرقيص زى دخول السينما مثلاً؟ ابدا انا ما بحب السينما وكل وقتى للحفلات والرقيص. علاقتك بالسياسة شنو وهل بتعرف الصادق المهدى؟ الصادق المهدى ده جبهجى ولا شنو .. انا ما بفهم فى السياسة. طيب ما بتعرف السياسة هل بتعرف كرة القدم؟ بشاهد احيانا كورة المريخ. فى رأيك من هو اللاعب الذى يجيد ترقيص الباكات؟ اللاعب فيصل العجب مراوغتو سمحة وبرقص المدافعين. اكتر فنان بتمشى حفلاتو منو؟ كل حفلات الخرطوم انا بمشى ليها وما قاعد تفوتنى حفلة لكن حفلات وردى بكون حريص انى احضرها ومرة فى حفلة من حفلات وردى جاء مسؤول كبير داخل الحفلة الناس كلها وقفت انا سألتهم قلت ليهم ده منو قالوا لى ده (عبد الرحيم محمد حسين) وزير الدفاع مشيت سلمت عليه وقلت ليهو انا بحب الرقيص وناس النظام العام بحمونى ارقص فقال لى تانى ارقص فى اى حفلة ولو فى زول سألك قوليهو عبد الرحيم قال لى ارقص.طيب يا علوب انت مشهور(بالضهب) الكلام ده صحيح والكلمة دى معناها شنو؟ الضهب معناهو الزول يجى حفلة من غير ما يكون مدعو وانا ما بتاع ضهب انا اى زول بدعينى لحفلتو وأنا لو وقع (طشت) بطربنى وحصل حضرت سبع حفلات فى اليوم. حدثنا عن موقف طريف مر بك؟ مره سمعت صوت (ساوند) ولما خشيت لقيت حفلة وقعدت ارقص بعد شوية جونى ناس الامن وقالوا لى دى حفلة اسر الشهداء قمت قلت ليهم انتو منعتوا الحفلات وكمان دايرين تمنعونا نرقص فى حفلاتكم. امنيتك شنو؟ بتمنى اقابل جمال الوالى عشان داير اعرس وبطلب من صلاح ادريس يشترى لى (موتر) عشان امشى بيهو الحفلات. رايك شنو فى الغنا الهابط؟ انا ما قاعد ارقص فى غنا هابط وبالذات اغانى فارس ارباب وحمادة جبرة ديل اغانيهم كلها بتاعة بنات. انت زعلان من منو؟ الناس قالوا لى فرقة الهيلاهوب سرقت رقيصك عشان كده انا زعلان منهم شديد
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
اسعد الريفى
عمار عبدالله عبدالرحمن
فيس بوك
تويتر
انستقرام
يوتيوب
بنتيريست