البتاع بتاع البتاع
تأملات حساس محمد حساس د محمد عبد الله الريح البتاع بتاع البتاع في عام 1986م كتبت شيئاً قريباً من المسرحية الملهاة، لكن منذ ذلك التاريخ تغيّرت اللغة كثيراً ودخلت كلمات جديدة وتعبيرات جديدة ـ مما استدعى قراءة ثانية للملهاة وإعادة صياغتها بشكل يلائم التطورات (وعلى القراء الكرام مراعاة فروق اللغة). ٭ تدور أحداث الملهاة في جمهورية كلامستان الديمقراطية، وقد مرت على تلك الجمهورية أحداث رهيبة وأزمان رديئة تضخمت فيها اللغة وفقدت الكلمات سحرها وقوتها بعد أن استنفد الناس كل رصيدهم من الكلمات الصعبة وأصبحت الدولة تلجأ للافتراض من الاذاعة والتلفزيون والصحف لتموِّل عجزها الخطير في الكلمات وانخفضت قيمة الكلمات حتى أن الشخص يستعمل ألف كلمة للحصول عل قطعة خبز واحدة وأصبح الناس يتكلمون من الصباح حتى المساء بلا انقطاع لكي يحصلوا على حاجتهم الضرورية وعندما حلّت الكوارث بجمهورية كلامستان الديمقراطية أعلنت حالة الطواريء ووقف مندوبها الدائم ليلقي خطابه في الأمم المتحدة موضحاً حجم الكارثة الا أنه استمر يتحدث لمدة شهر كامل لأنه كان يتحدث بلغة بلاده الرسمية والتي كما قلنا انخفضت قيمتها في ميزان التبادل انخفاضاً كبيراً ٭ ولما تبيّن العالم الخارجي ما كان يعنيه ذلك المندوب الدائم كانت الكارثة قد عصفت بنظام جمهورية كلامستان الديمقراطية واستولى حكام جدد على السلطة بحجة أنهم جاءوا لانقاذ البلاد من حالة التدهور الكلامي الشنيع، لذلك أعلنوا في أول بيان لهم أنهم قد غيروا اسم الجمهورية كلامستان الديمقراطية الى كلام ساكت الشعبية غير أن الحكام الجدد لم يفلحوا في ايقاف ذلك التدهور والارتفاع بقيمة الكلمات بل هبطت القدرة التعبيرية عند الشعب الى مستويات لم تعهدها البلاد من قبل حتى أن كلمة كارثة مثلاً احتطفها تجار الكلمات العشوائية فأصبحت مثل مرقة ماجي تدخل في كل شيء فالولد كارثة،والبنت كارثة والشوارع كارثة والكهرباء كارثة والاذاعة كارثة الى آخرها كارثة. ولم يجد عامة الشعب الا كلمات بسيطة مبهمة مثل البتاع وهناي وكدا وشديد وزي عايز أقول التي اصدر المفتي اللغوي فتوى بخصوصها يقول فيها إن (زي عايز تقول) تكفي واذا قام بها البعض سقطت عن الآخرين وانحصرت لغة الحرفيين في مفردات الحرف التي يمتهنونها فقد قال أحد العاملين بمحل ملء البطاريات أنه أخذ والدته المريضة الى المستشفى لأنها بقت ما بتمسك نار أو أحد ميكانيكيية العربات قال وهو يصف صديقاً له أصيب بالملاريا: كان قاعد معانا كويس قام طوالي رترت رترت كدا وتقسيمتو بقت عالي طوالي طرش أحد البياطرة كان يتحدث عما أصاب زوجته فقال: وقعت وجرحت رجلها الورانية لقد أدى الفقر المدقع في الكلمات وأدوات التعبير الى أن يكتب أحد الشعراء قصيدة زي تقول كلماتها البتاع بتاع البتاع في السوق بتاع البتاع وهذه المسرحية التي جرت أحداثها تضم عدداً من الأشخاص يتحركون في اطار الكلمات وخارج نطاق جاذبية المعاني وذلك بعد أن تلقوا دعماً من هيئة الاغاثة الكلامية التي تتكون من عدة هيئات تطوعية عالمية غير أن قضية التعبير ظلت هي المشكلة الأساسية بعد أن تبيّن أن كلمات الاغاثة التي وزعت لم تلائم بعض الألسن مثل خيو ـ شو ها المصيبي الخ لذلك اضطر الناس الى بيعها في السوق السوداء وشراء كلمات محلية مثل البتاع ـ كده ـ فردة ووهم تصلح للتعبير عن واقع الناس. وبالرغم من أن بعض الناس استطاعوا أن يتحصلوا بطرق ملتوية على قواميس من الكلمات البراقة الا أن معظمها كان فاقداً للصلاحية ووجد أن استعمالها بعد إنتهاء فترة صلاحيتها يؤدي الى التسمم الفكري فالمسرحية الملهاة اذاً تحاول أن تبحث عن الكلمات المناسبة للألسن المناسبة: مذكرة اخراج ٭ المسرح من ذلك النوع الطليعي الذي يمكن أن يحتوي على ديكور أو لا ديكور ـ وإن كنا نري أن الديكور يتكون من لوحة للعبة الكلمات المتقاطعة وموسيقى تصويرية سجلت في أسواق بيع البهايم وسماسرة الأراضي ومواقف البصات والسوق الشعبي، تتخللها مقاطع من الحلف بالطلاق وخطب رؤساء المجالس تتكون المسرحية من عدة شخصيات الفصل الأول والأخير ٭ شخصان يجلسان على كرسيين بلاستيكيين وكأنهما يتفرجان على أحد الشوارع الشخص الأول : اسمع الجماعة بتاعين الموضوع ما وصولكم؟ الشخص الثاني :وين يصلونا؟ قلنا ليهم أحسن ينتظروا لحدي ما الحكاية وكدا وهناي مشى لحدي هناك وجا راجع ما قابل أي واحد.... لكن هناي عنده شوية هنايات ختاهم في البتاعة وكدا وقال لما يجوا يدوهم ليهم. الشخص الأول: والله الحكاية زي تقول كدا مطرشقة أنا كنت متصور انو الهناية دي انتهت زمان وخلي بالك يا فردة انا لما قابلت الزول بتاعكم ما فهمني كدا ولا كدا وعلى أي حال بعدين نسوق الجماعة بتاعين الهناي نوديهم هناك الشخص الثاني : وهو قال ليك هم عايزين يجوا؟ الحكاية زي كلها مفبركة وكدا الشخص الأول : نحن مالنا نعمل العلينا وكدا (يلتفت كدا وكدا كمن يبحث عن شيء) ثم يقول هناي مشى وين؟ الشخص الثاني: عقبك هناك الشخص الأول : تتصور أنا كنت قايلو يكون لحدي هسع مسمر بي جاي الشخص الثاني : وانت عملت شنو مع هناية؟ ما وديت ليها البتاع عشان البتاعة؟ الشخص الأول : أول حاجة الراجل زي طلع نصاب مشينا ليهو مليون مرة وضربنا ليهو مليون هناي وكدا وما لقيناهو الشخص الثاني مشيتو ليهو وين؟ الشخص الأول: مشينا ليهو هناك كدا والبتاعة نفسها قالوا ما جاهزة وهناية شفقانة ساكت وكلامها كتير انا ما عارف بتلقى الكلام دا وين؟ الشخص الثاني : طبعاً ولدها مغترب وكل يوم شنطة كلام ومرة بالفاكس ومرة بالاي ميل الشخص الأول :الحقيقة كلماتها كلها مستوردة يومداك قالت لي تعالي يا ولد يا شاطر يا سواق تخيل تستعمل كلمتين من النوع الغالي جداً عشان تقول لي يا سواق ونحنا غير بتاع وكدا وهناي ما لاقين الشخص الثاني :وانت قلت ليها شنو؟ الشخص الأول قلت ليها حاضر يا هلمجرا ودي ذاتها ما حقتي استلفتها من واحد قريبنا جاب معاهو جنس هلمجرات تقول اشتراهم من الدلالة خلي بالك يكون هربهم الشخص الثاني يضع يده على جبهته ويحدق الزول الجاي علينا دا منو؟ الشخص الأول ما عرفتو؟ دا ما هناي الشخص الثاني هناي منو؟ الشخص الأول :يا خي هناي ودالجماعة البي جاي الشخص الثاني: ها عرفتو دا مش الشغال في الهناية؟ الشخص الأول: ايوا ما شايفو خامي كلام الهناية كيف؟ يا خي يوم داك في فطور ناس هناي جاب ليهو عشرة كلمات جديدة خلى ليك الناس دي تتطاقش مع بعض يصل الرجل ويُلقي التحية السلام عليكم ورحمة الله وبركاته يرد الأثنيان: أهلا يبادر الشخص الأول قائلاً الليلة كان عندكم شنو في الهناية؟ الشخص حقيقتاً وبما انو وعملا بما جاء وتفعيلاً وتمكيناً يعني تقدر تقول بوضوح انو المطروح في الساحة اليومين دي كلمة حيوجهها اخونا للأمة الشخص الثاني كلمة فيها شنو يعني؟ الشخص حقيقتاً عندنا قناعة تامة انو اخونا حيتناول بالطرح الأوضاع السياسية الراهنة وكل الأمور المتعلقة بالمأزق الكلامي الذي تمر به البلاد... الشخص الأول مأزق كلامي؟ دي جيبتوها من وين كمان؟ خلي بالك دي كلمة دفع رباعي تكون بمليون دولار بالله شوف مأزق كلامي... يا ريت لو الواحد فينا يقدر يستعمل زي الكلمات المكندشة دي... الشخص يا اخي دي كلمة بسيطة جداً وصرفوها لينا مع الحوافز انت لو سمعت كلمات زي الأصولية والتعددية والمنهجية تقول شنو؟ الشخص الأول: ديل ولا عايز اسمعهم ولا اشوفهم ونحنا خلينا مع ناس هناي وبتاع وكدا وزي عايز اقول في هذا الاثناء يظهر على المسرح كلور الدلال وكان يعتمد على لسانه في الدلالة ولهذا عندما حدثت مشكلة المأزق الكلامي حدثت له أمور كثيرة عقّدت عملية الدلالة جداً ويفكر الآن أن يصبح معلقاً رياضياً ولكنه رسب في أول امتحان لأن كلماته التي دخل بها المقابلة الشفوية كانت ناقصة وعندما لمح ذلك الشخص الذي يعمل في الهناية قرر أن يعرج عليه حتى يساعده في الدخول الى دنيا الرياضة من بوابة التعليق الرياضي كلور الدلال : سلام يا ناس الناس: سلام كلور مخاطباً الشخص يا اخوي عملت لي شنو؟ انا ما خلاص تعبت والجماعة الهناك قالوا لي بس يديك ورقة ويمضي ليك فيها الشخص : ما عندي مانع بس انت اتدربت كويس؟ كلور اتدربت يا خي لمن لساني ذاتو كشّ واحد قريبنا في الامارات شغال مع المعلق الرياضي بتاعهم جاب لي كلمات جديدة أصلها ما اتسمعت وفجأة ينحبس صوت كلور ويفقد القدرة على الكلام وهنا ينتبه الشخص الأول الى أن بطارية كلور قد نزلت ولابد له من سلك خارجي ولكن الموجودين بطارياتهم نازلة الا ذلك الشخص الذي يعمل في الهناية ويخاطبه الشخص الأول انت لازم تديه سلك براني لانو خلاص بطاريتو وقعت انت اصلو خليتو يتكلم من قبيل ويوافق الشخص اذ أن هذا عمل خيري ويوصل الشخص الأول سلك الى حلق الشحص وسلك الى لسان كلور وحلقه ويطلب من الرجل بتاع الهناية أن يتكلم بصوت عالي فيقول بما انو تفعيل القضايا المصيرية والتنظير المستشرف آفاق المستقبل وهنا يكح كلور ثم يقول بس بس خلاص ويخاطبه الشخص الثاني اوعاك تقيف من الكلام اتكلم طوالي لحدي ما البطارية تملأ وينصرف كلور وهو يردد البتاع بتاع البتاع وزي عايز أقول وناس هناي مشوا بي جاي ولازم اتكلم شديد وكدا وفي هذه الأثناء ينطلق صوت راديو قريب وأحد المسؤولين يناقش موضوعاً يتعلق بالمأزق الكلامي: زي عايز اقول انو نحنا شاعرين بالحصار علينا عشان ما بيجينا اي دعم من الكلمات من الخارج وحتى البنك الدولي للكلمات اوقف تعامله معنا عشان كدا لازم نعتمد على انفسنا ونتكلم مما نسمع والسياسة دي زي ادتنا دفرة لي قدام واجتزنا مرحلة الحصار ومزقنا فاتورة الكلمات المستوردة وحندخل مرحلة التصدير ينصرف الشخص الشغال في الهناية ويعود الشخصان يواصلان حديثهما الشخص الأول: انت حترجع للجماعة تاني؟ الشخص الثاني:.. ايوا الشخص الأول قبل ما ترجع حقو تتأكد من البتاع الجماعة شالوه معاهم ولا خلوه هناك. يضع الشخص الثاني يده على ذقنه كمن يبحث عن كلمة سقطت منه ثم يتجه ببصره الى ناحية ما من المسرح ويقول قريبكم الكارثة دا يا فردة لو وافق كان من زمان لعبنا القصة مظبوط لكن تقول شنو؟ خليهو مع جماعتو محل ما يشيلوه يشيلوه ومحل ما يختوه يختوه ونحن مالنا والوكت زي بقى غير مناسب . الشخص الثاني قريبنا انتو ساكت شايلين حسو وما في حاجة تلمكم معاهو، والجماعة لو قدروا عليهو كان شالوه من بدري لكن عشان هو دوغري ما في زول قدر يتسلبط عليهو مش قالوا قبل كدا انو اختلس وبدد الكلمات في الهوا وطلعت الحكاية كلها اشاعة؟ الشخص الأول الحكاية ما اشاعة وانت عارف المأزق الكلامي دا سببو شنو؟ قال ليك في حوالي تسعين في المية هم سبب المأزق الكلامي دا. وهسع الناس قاطعوا الكلمات المتقاطعة لأنها بقت غالية ومعدومة. يأتي شخص جديد يقدم التحية للشخصين الجالسين ثم يقول: يا اخوانا انا زي بفتش لي على مفردة تايهة ما جات بي هنا؟ الشخص الأول مفردة تايهة؟ يا سلام خد اهو قال ليك مفردة تايهة والله حكايتكم حكاية انتو جنس الكلام دا بتجيبوه من وين؟ الشخص الثاني : انت عارف زي الكلمة دي دفع رباعي وكمان مكندشة ومظللة الشخص الأول يا ربي يكونوا دفعوا عليها جمارك؟ الشخص الثاني جمارك شنو؟ زي دي في زول بقدر يدفع جمارك؟ ويتضايق الشخص الجديد ويقول يا اخوانا انا ما ناقص تريقة منكم بس قولوا لي لو شفتوها جات بي جاي ولا جاي الشخص الأول: ايوا مشت كدا الشخص الثاني: لا ... مشت كدا الشخص الجديد يقف متحيراً ويقول انتو مش شفتوها كلكم؟ كيف واحد يقول مشت كدا والثاني يقول مشت كدا؟ الشخص الأول يا اخ كل زول حر يشوف البشوفو وبي طريقتو الشخص الجديد: اولاً المفردة التايهة دي واحدة وانتو الاثنين قلتو شفتوها سوا يبقى كيف تختلفوا؟ انتو عايزين تهظروا معاي؟ انا ما عندي روح لي الهظار انا من الصباح طلعت بفتش ما لقيتها قالوا لي اجي افتش بي جاي فبالله عليكم قولوا لي بالضبط شفتوها وين؟ الشخص الثاني يضحك باستهزاء ويقول: اولا يا اخينا ما في حاجة اسمها بالضبط نحنا حكايتنا كلها بقت بالتقريب يعني زي عايز تقول وزي عندك مفردة تايهة وزي اولادك سافروا وزي طلقت المرة عشان كدا انا قلت ليك مشت بي هناك والاخ يقول ليك لا مشت بي هناك ولما انت تفكر كويس حتكتشف انو هنا وهناك كلو واحد وكدا وكداك كلو واحد ما هو اصلو كلام والسلام ولما انا اطلع تصريح والاخ دا يطلع تصريح ويظهر انو مضاد ليهو.... هو في الواقع حاجة واحدة. الشخص الجديد: يا اخ دا كلام فارغ الامور ما ممكن تكون بقت سايبة للحد دا. الشخص الثاني للحد دا والحد داك انت ما سمعت المغني يقول امشي اسيبها مدني واجي اسكن حداكا.. انت هسع عارف حداكا دي وين؟ الحكاية كلها كلام الشخص الأول: شفت يا إبن العم انت ما( تدئش) زي ما بقولوا اخوانا المصريين كدا وكداك حاجة واحدة وهنا وهناك حاجة واحدة ولو مشيت عشان تشتري الهناي وما لقيتو ولقيت بدلو البتاع اشتريهو طوالي انت مش شفت الواحد بمشي الاجزخانة بشتري البديل وما بشتري الدواء الكتبو الدكتور؟ الشخص الجديد : • لا ابداً الحكاية مش كدا كل الموضوع انو عشان ما عندنا كلمات صعبة بقينا نولف الكلام والسمكرية والخراطين هنا عندنا بالكوم البتاع والهناي مش حاجة و احدة ولو كان عندك كلمات صعبة وعملت ليها دكلريشن ومشيت السوق الحرة كان اكتشفت انو البتاع غير الهناي والعملية كلها انو نحنا محتاجين لقرض من البنك الدولي للكلمات عشان نغطي بيهو اللغة بتاعتنا وبعدين نتحصل على آلكلمة وغطايتها هسع غطايتها ما في وانتو من فضلكم كلمة وغطايتها المفرد التايهة دي جات بي هنا ولا بي هناك؟ • نحنا يا اخوي لو لمينا في الكلمة بس ما عايزين غطايتها ولا مش؟ مش (تمت). (عدل بواسطة Rayah on 10-05-2007, 07:57 AM)

10-04-2007, 07:22 PM

جمال السنوسي

جمال السنوسي
تاريخ التسجيل: 09-14-2002
مجموع المشاركات: 6372

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: البتاع بتاع البتاع (Re: Rayah)
ود الريح يعني البتاع بتاع البتاع خلانا زي عايزين نقول في الحتة دي انه نحن من زمان ما عارفين اخبار ناس هناي ديل اها بالله ما تقصر وورينا اخبارهم وكل عام وانتم بخير

10-04-2007, 09:25 PM

Rayah

Rayah
تاريخ التسجيل: 08-26-2007
مجموع المشاركات: 158

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: البتاع بتاع البتاع (Re: جمال السنوسي)
يعني يا جمال السنوسي .... جمال دنيانا عايز تقول زي إنك حقيقةً ما كنت عارف إنو ناس هناي كانوا هناك لما البتاعة طرشقت؟ وكل عام وأنت والجماعة كلهم بخير وعافية. ودالريح E.mail :[email protected]

10-04-2007, 09:42 PM

جمال السنوسي

جمال السنوسي
تاريخ التسجيل: 09-14-2002
مجموع المشاركات: 6372

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: البتاع بتاع البتاع (Re: Rayah)
يا ود الريح هم قالوا لي انه البتاعة طرشقت لأنهم مااستخرجوا بتاع من ناس البتاع اهابتاعين البتاع ديل ما وافقوا ليهم من دون بتاع المهم في النهاية ناس هناي داك قال انو موعد البتاعة الجاية سيقرر في البتاعات الجاية لو عرفت البتاع متين ارجو ان تخبرني على الايميل : [email protected]

10-04-2007, 11:01 PM

sumah

sumah
تاريخ التسجيل: 08-27-2002
مجموع المشاركات: 1737

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: البتاع بتاع البتاع (Re: Rayah)
** * ريح طبتم.. وطاب الهناى ده لكم. اظن انك لم تعى ان جمهورية كلامستان الديمقراطية.. اصابها الهنانى الاساسي في البتاع.. كلمات .. ذى شرف البتاع .. وسجناء الهناى والكلمة وقادة الراى وكدا.. فلما استولت الهنايه على الهناى استخدمت مفرده واحده هي ياهوديه.. ياهوديه.. في الاذاعة والتلفزيون والصحف . انخفضت قيمة الكلمات. لكن بعدالهناى والمنشيه .. اضمحلت وتلاشت المفردات . اصبح الهناى مرجعية وحصريا الهنايه اصابنا الهناى في مقتل فتفرقناايدى سبا.. فمنا من اتلحس ومنا من دقس .. فظهرت اللغة البتاع لغة الهناي داك .. او ما يعرف في هناية الكلمات حصريا بلغة حداك واتحداك .. وعلى بالطلاق .. وهى اللغة اللاونديه .. هى البتاع الاساسي للدولة والمبرئة للهنايه.. والمعترف بها فى البنك بتاع البتاع .. ويمكن استخدمها حداك لتخليص الكلمات الهجين ذات الدفع داك.. لذاك نرجو صياغتها بشكل يلائم التطورات. وعليك مراعاة فروق اللغة. طبتم وطاب لكم البتاع.. * **

10-04-2007, 11:54 PM

جمال السنوسي

جمال السنوسي
تاريخ التسجيل: 09-14-2002
مجموع المشاركات: 6372

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: البتاع بتاع البتاع (Re: sumah)
ود الريح والله البتاع الجديد ده حيرنا كلما نقعد نحسب ما عارفين نحسبها كيف لو حسبنا بالقديم بنقول بالبتاع القديم قالو لينا البتاعات اتغيرت وبقى كل بتاع جديد بيساوي الف من البتاعات القديمة أها كدي نورنا كيف البتاع الجديد اها لو دخلت السوق بقول ليك اسعار البتاعات بالبتاع القديم ام الجديد يعني هسه بتاع امريكي بيساوي بتعاعين سودانيين بالطريقة دي قريبا بتبقى المعادلة بتاع امريكي بيساوي بتاع سوداني اللهم زد وبارك

10-05-2007, 09:18 PM

Rayah

Rayah
تاريخ التسجيل: 08-26-2007
مجموع المشاركات: 158

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: البتاع بتاع البتاع (Re: جمال السنوسي)
البتاع دلوقت زي ما كان بقول صاحبك شمس الدين: حليلك بالكتير ما عمرنا بعدك جف والغني والفقير في الوجبة ما بتكفى كان في الكف نشيلك ونملا بيك القفة بقت القفة جزلان والخدار في القفة

[رد على الموضوع]

صفحة 1 „‰ 1: << 1 >>

احدث عناوين سودانيز اون لاين الان

اراء حرة و مقالات	Latest Posts in English Forum
Articles and Views	اخر المواضيع فى المنبر العام
News and Press Releases	اخبار و بيانات

الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة

About Us
Contact Us
About Sudanese Online

اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين

News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums

If you're looking to submit News,Video,a Press Release or or Article please feel free to send it to [email protected]