مناظير بقلم: د. زهير السراج
قبل ( الحريق ) ..!!/زهير السراج
By
Feb 17, 2011, 11:36

مناظير

زهير السراج

قبل ( الحريق ) ..!!

* اتحدث اليوم بالدراجى الواضح الصريح حتى يفهمنى ( أهل الانقاد) إن كان فهم العربية الفصيحة مشكلة صعبة بالنسبة لهم، أوعلى الأقل هذا ما وضح لنا خلال السنوات الطويلة التى ظللنا نكتب فيها بدون ان يفهمنا منهم أحد ..!!

* وأبدأ بالقول .. يا اخوانا عشرين سنة كتيرة جدا فى الحكم علينا، والناس زهجت وملت الوجوه التى لا تتغير وكأن الام السودانية الرؤوم لا تنجب .. يعنى بالدراجى الفصيح زهجنا من لعبة الكونكان بتاعتكم دى، زى ما قال شاب سودانى فى حديث مع قناة البى بى سى العربية  خلال برنامج عن الاوضاع فى السودان استضاف فيه المذيع السودانى اللامع عمر الطيب بعض أقطاب الحكومة والمعارضة !!

* وطبعا لعبة الكونكان، زى ما بعرفوها ناس الكوتشينة، بتتغير فيها مع كل فتوح أماكن اللعيبة بدون ما يتغير الأشخاص أو الوجوه، يعنى تلقى ستة ولا سبعة قاعدين يكنكنوا، اليوم كلو يقوموا ويقعدوا ويغيروا أماكن الجلوس بيناتهم حسب الفاتح ( الفاتح بتاع الكوتشينة موش الفاتح العثمانى الفتح اسطنبول قبل خمسة قرون وشوية) أو حسب ( البلية) ــ  بكسر االباء وتسكين اللام ــ موش ( البلية) البلعبو بيها الشفع الصغار، بدون ما يزهجوا ولا يملوا ولا يتغيروا، ولو دخل  عليهم ضيف وسلم عليهم ما يردوا عليو السلام وما فى واحد فيهم بيشتغل بيهو لحدى ما يزهج ويفوت براو، وفى احتمال ما يكونوا جابو خبرو ..!!

* أها دى طريقتنا وحالنا معاكم يا ناس الانقاذ عشرين سنة كاملة، انتو بتلعبوا ومستمتعين على الآخر وتتبادلوا فى الكراسى، والبحرق فيكم حسب قوانينكم بيخش على أكبر بنط ، يعنى مافى طريقة يطلع برة، وما شغالين بينا شغلة وما جايبين خبرنا .. جيعانين ولا عطشانين ولا عيانين ولا فلسانين ولا متضايقين ولا مزنوقين، ولو فى زول دخل وسلم عليكم ما بتردوا ليو السلام مع انكم عاملين بتاعين دين وكده والدين بيقول ( السلام سنة والرد فرض )، لكنكم لا شغالين بى  سنة ولا بى فرض وتلعبوا فى لعبكم وتخموا فى خمكم، ولو الزول رفع صوتوا عشان تسمعوهو تقولوا ده شنو الزول السخيف ده وتصروا ليهو وشوشكم، ولو كتر تندموهو على دخلتو عليكم..!!

* والغريبة يا ناس الانقاذ انكم  بتلعبوا الكونكان ومانعين الناس يلعبوهو، ولو عرفتوا فى زول  قاعد يلعبوا الله قال بى قولو من ناس النظام العام، وانتو تلعبوا فى لعبكم عشرين سنة بالتمام والكمال ولا فى زول بيكشكم ولا بيفضحكم، وحارسينكم الجماعة ذاااتهم البكشوا الناس ويبهدلوهم، لا خلوا بت ولا مرة ولا راجل ..!!

* المهم نرجع لى موضوعنا .. باختصار يا اخوانا انتو طولتوا شديد، عشرين سنة والله كتيرة، عليكم وعلينا، ولو فرضنا يعنى انكم كنتوا فى العشرين سنة دى أحسن ناس وما فى زول أحسن منكم، لكين برضو راعوا لى مشاعرنا، ما ممكن طواااالى كده .. انتو ما سمعتوا بى قصة شيخ ابوسن زعيم الشكرية لمن سألو المفتش الانجليزى عن مأمور المركز فقال ليو ( كويس إلا طول )؟!

 * بصراحة يا اخوانا بنقولها ليكم بالفم المليان كده ( انتو طولتوا، وما تخلونا نتلوم معاكم ونتعاور ونلحس كيعانا ) !!