From sudaneseonline.com

مقالات و تحليلات
يا إسرائيل ........دحين النضم دا، ما أعوج مِنِك؟/د.عادل الصادق المكي
By
Apr 14, 2011, 10:16

 

يا إسرائيل ........دحين النضم دا، ما أعوج مِنِك؟

 

قدر ما قلنا نصبر ونتحملك... وانتي  تسوي في اللعوج عديل عينك عينك ونص النهار والشمش حية والعين تشوف... حسي الزولين  القتلتيهم ديل، جلابة( ألبل) ديل مالم سوو ليكي شنو؟....يعني نحن حتى اكل عيشنا..نخليهو ليكي ؟...واللا نجي نشاورك نشتغل شنو؟ وما نشتغل شنو؟...... بعدين انتي الحدسك بيهم منو؟؟؟؟ ...دا منو القوّال دا؟...قال لك ديل تجار سلاح؟... السلاح قاعدين يبيعو فيهو في نص الخرتوم وفارشنو في الشارع.... شارع المك نمر اول البارح شوف عيني اكتر من اربعة تنفار شايلن سكاكين وسيوف وعكاكيز ويبيعو فيها ...اها دا ما سلاح؟.... باكر دي تجي اباتشي تتقدّل في نص الخرتوم وتضرب تجار السلاح ديل .....ومعاهم شوية شحادين.. واصلو ما بنسعلها..عندنا كم طيارة راكة في مطار الخرتوم....خايفين عليهن.... تجي تحوم حوامتها دي.... وترجع اهلها..اصلها دايرة تقعد لمتين؟ خمسة دقايق بس... خمسة دقائق ما بتسوي بنا اي شي  ... نقوم نشاغلها تمشي المطار ...وتضرب طياراتنا ديل... وباكر ان بقى فينا زول عيان ومودنو الاردن ما نعرف نوديهو كيفن؟........ بعدين يا اسرائيل يا بت الناس... وحات الله انتي ما عاقلة ولا نصيحة..ومجنونة في دنيقيسك دا..حسي ان براحة حدستينا وقلتي لينا في نفرين منكم انا دايراهم..وجيبوهم لي.... انتي قايلة نحن بنتلوم فيكي؟.... وحات الله نكرهم من اضنيهم ونسلمهم ليكي...شنو يعني نفرين؟عندنا غيرهم كتاااار..شفتي الحيشان دي، كلها مليانة ومستفة ناس، وما عارفين نوديهم وين؟ .....و انتي اخير لك من شيل الحال... .اليسوى والما يسوى ينضم فيكي اسرائيل ضربت واسرائيل فعلت واسرائيل تركت...ما شفتينا سوينا كيفن علي كارلوس؟.... براحة غشيناهو  دودرناهو ودردقناهو وجيبناهو هنا... وخدرناهو... وصبحناهو في باريس...لا ملاوة ولا مساككة...وغيرو كتاااااار...نحن ناس طيبين، ما تشوفينا كدي؟ ..طيبين وكضابين ساكت اصلو المسويها فينا الكضب دا.... وما حمل ضرب ولفح ومخانقة... وما تسمعي غنية اركزو وزينب وراكم، هم ناس عليكي الله متركزين علي زينب فيهم فايدة؟ ..وخصوصا لو عرفتي انو زينب دي عندها مراريا وتايفويد وبعد دا كلو مليانة كورتيزون من مسيّح وجليّط الوشي بالكريمات ..ما تصدقي النضم دا، وتفكري ان دايرة تحاربينا تقولي اول حاجة اضرب زينب دي، بتتلومي ساكت وتقعد لك عيبة...  علا انتي الله يهديكي .... اصلك ما بتتحملي..وعلي الهبشة....اصلو الزول ما يطاركي..يلقاكي جيتيهو ولفحتيهو تحت اضنيهو ورجعتي اهلك... و نحن سويتينا شغلة حسي داك الليلة ما ضربتينا، تااااااااني يا اسرائيل  تجي وتضربينا ؟ النضم دا مو عيب؟......وبعدين الطيارة البتخوف الاسمها الاباتشي دي .. شينة ... وتشبه البعاتية... تاعبة نفسك ومرسلاها من هنااااااك لينا؟... وحات الله ان رسلتي لينا مروحة طربيزة ساكت.. نطلق لها الدرب ونقوم جارين  وما يحوشونا علا في مصراتة....

قفل الباب:-

هو من يبتدئ الخلق

وهم من يخلقون الخاتمات!

هو يعفو عن خطايانا

وهم لا يغفرون الحسنات!

هو يعطينا الحياة

دون إذلا

وهم، إن فاتنا القتل،

يمنون علينا بالوفاة

© Copyright by sudaneseonline.com