From sudaneseonline.com

مقالات و تحليلات
في ضيافة الشيطان /جمال السراج
By
Apr 9, 2011, 11:46

 

بسم الله الرحمن الرحيم

في ضيافة الشيطان

 

 

عزيزي القاري. بعد ان اسودت الحياة في وجهي وضاعت كل امالي واحلامي قررت وبكامل قواي العقلية والبدنية ان انزوي من الحياة قليلأ لافكر وأدبر وأمخمخ في الانتصار علي مصائب الزمان وجور الهوي والسياسة العاهرة .. اتجهت جهة الغرب الحبيب وبعد رحلة طويلة ممتعة وشيقة وشائقة جلست تحت ظل شجرة وارفة وظليلة واخذت استمتع بمناظر الغرب الرائعة التي دغدغتني وجعلت الشهوة والمتعة تسري في جسدي كانسياب الماء بين حبيبات الرمل . فجاء لمحت فتاة رائعة الجمال سيسبانية الطول نيلية الشعر ، فنجانية العينين ناعسة ، كستبانية الشفاه ناعمة كزهرة الرمان ، نهدها حق وخصرها مرهف خصير تكاد اصابعك الخمس تحتويه بنعومة ويسر .. رائعة الابتسامة والوجنات وملفوفة العود ومبرومة الافخاذ

 

تجمدت الدماء في عروقي واخذت اهذي بجمالها الرائع .. لكنها بادرتني بابتسامة ساحرة وقالت :

 

اهلا وسهلا

هلاا بيك

اتائه انت ؟؟؟

لا ، بل زائر

هلا بضيفنا العزيز

من انتم

انا ابنة الشيطان وابي يدعوك لبيتنا حتي نقوم بواجب الضيافة

اتستقبلون الضيوف مثلنا ؟؟؟

نحن وانتم نعبد الله سبحانه وتعالي ومنا المنافقون والطيبون

يا سبحان الله .. طيب ناس المعارضة ديل بتكلموا عليكم بالباطل والفسق والفجور

اذا اتتنا مذمتنا من ناقص فهي الشهادة لنا بالكمال

تقصدي منو يعني ؟؟؟

المعارضة كلها وخاصة السيدين وثالثهما

شايفهم دايرين يغيرو الحكومة

الغريبة الجماعة ديل يصرحو في الجرائد تصريحات خطيرة جدا وفي الليل يتعشو مع الحكومة ويملو كروش

تقصدي شنو بيملوا كروشم ؟؟؟

ما تفضحنا .. خلي الطبق مستور

طيب تصريحاتهم عن شباب الفيس بوكس

شباب الزمن ديل حناكيش لا بطقعوا ولا بيجيبو الحجار ويقولوا دائما : اخير لينا الشات من ناس المعارضة ديل

طيب رايكم شنو في دكتور نافع ؟؟؟

دكتور نافع ده ماسك مفاتيح شفراتم كلهم ، واذا قاليهم يمين يلفوا يمين واذا قاليهم الفيل بيطير يقولو يطير ونص وعشرة

حاجة غريبة والله العظيم

ما غريب الا الشيطان

طيب دكتور نافع ده عاملين معاهو كيف

تعرف يا جيمي الراجل ده حيرنا وكل ما ندور نخش معاهو في حلف يقراء سورة الكرسي ويحرقنا يحدي ما عدمنا النفاخة

يعني خلاص مافي معارضة ولا يحزنون

عليك الله ياجيمي معارضة شنو وليشنوا  .. ذاتو مافي رجال يمسكوها .. الرجال ماتو في كرري

طيب  مشكلتي دي البيحلها منو ؟؟؟

انت عايز شنو يا جيمي ؟؟؟

انا عايز اتزوج واشتري بيت وعربية وراتب مناسب كل شهر وبعدين أقسم بيتي نصين نص اسكن فيه والنص التاني أأجروا

بالغت يا جيمي .. انت اعلامي كبير وصحفي وما عندك بيت ولا عربية ولا زوجة

تعرفي يا شيطونتي نحن الاعلاميين ديل والصحفيين زي البناين داعين علينا .. يم عندنا ويوم ما عندنا

لكن يا جيمي في زملاء مهنة مبسوطين ومنعنشين

الجماعة ديل ما ناس المعارضة زاتهم

عجيب والله

جيمي عرسني انا

لكن كيف ؟؟

اخطبني من ابوي

اوكي .. حتشترلي عربية وبيت

انت جنيت يا جيمي .. انا لو كان عندي بيت كان سكنا في الصقيعة دي .. كلامك ده زي كلام ناس المعارضة الفارغين ديل

 

 

 

جمال السراج

 

أعلامي وكاتب صحفي

E.MAIL:[email protected]



© Copyright by sudaneseonline.com