From sudaneseonline.com

مقالات و تحليلات
دي شنو يا الوزير كرتى/صديق ابوعمار
By
Apr 6, 2011, 00:23

    بسم الله الرحمن الرحيم

                                                                                                 دي شنو يا الوزير كرتى

أها سوات على كرتى دى شفتو وزير خارجية قبل كدة سواها ، دى والله شغلة عاوزة  شدرة ليمون عشان الواحد يواصل بقية القصة ، شوفو يا ناس الله السودان دا مر بيهو وزير خارجية واحد محترم بذرتو طبيعية ما فيها ميكنة  تقاوى ، الوزير دا ود المحجوب ، المحجوب من الفساد والتجارة بالدين ودماء البشر والتفريض فى عذرية الوطن ، وزير عندو هيبة وعلم ، ود رواكيب بجد وركاب حمير بجد لإنو ولد فقير وحكم فقير ومات فقير ودى صفات زول الجنة ، ما زى جنتك ( يا بتاع الصداقة إنت ) الهريتنا بيها أيام لبديك فى المعارك ( انشاء الله يكون فاكر يرول الزول ده ) .... القروش الكتيرة  دى جبتها من وين يا الزول السمح ، إما إنك سرقت قروشنا أو بقت غسال دكانك ناصية وفى الحالتين ( ياهو ) ، أو عندك سفارات طيارى قاعد تقرش حقها  زى الوظائف الألفين ( الوهمية  ) القبضوها فى النيل الابيض( وبرضو ياهو ) ،  أو دى القروش  البلعها جمعة الجمعة ( بخطيطكم طبعا ) وبعدين قمتوا سرقتوها منو( دى ياهو دبل ) ، أو دى قروش العلماء والاخيار الاختارم  الله فى الجنوب ( و دى ياهو شينة ) ، أو دى حاجة كدة من ثروة أخوان الريس والجوكية الإثنين المدورين التجارة فى السودان ( دى تخلينا نطقعك بالحجار ) ، وبرضو إحتمال تكون عربون من أوكامبو عشان تسلمو زول الله شهرسبتمبر(دى كان هى تكون ميه ميه ) ، وبرضو يمكن تكون سمسرتك  لشليع  دارفور .... الخيارات صعبة عشان كده الاحتمالات دى كلها واردة  والارجح إنها الطرق الوصلت لفندق برج الصداقة .. كل وجوه المؤتمر الوطنى العظيم بالشكل دا وذى الشكل ده  حرامية بإمتياز وقوة عين ، زول بدفع 55 مليون دولار وكاش والباقى بعد ستة أشهر دا  بيعنى إنو الستة شهور الجاية وزير خارجيتنا بكون شغال لقيط وفقة الكسر فى السوق السياسى (طريقتو) فى إدارة شأن السودان الخارجى .. النظام دا يا جماعة الخير اليومين ديل فى داخلو صراع سمح ومطلوب بشدة لان أجنحة الفاسد داخلو كثيرة وفاسدها متنوع ، فيهم ناس متخصصين بنوك وشركات داخلية ( ديل ناس جنيه ساكت )، وجماعة ( تخصص ) دولار ديل ناس ماليزيا واندونيسيا وتركيا والبلد الفيها القرضاوى والجزيرة وعزمى بشارة ، وواحدين أراضى وبالاخص الميادين الاستراتيجية ، وتانين الوظائف الوهمية وتمكين ناس مقبول فى المرافق الحيوية ، صراع الجماعة ديل تبلور لكومين كبار واحد حق زول الله والتانى  يجازية  الله ............  

صديق ابوعمار

[email protected]



© Copyright by sudaneseonline.com