مقالات و تحليلات
سلامات مولانا الميرغنى ــــ أهلين سيدى الامام/صديق ابوعمار
By
Apr 4, 2011, 10:34

                                                                           بسم الله الرحمن الرحيم

                   سلامات مولانا الميرغنى ــــ أهلين سيدى الامام

         عليكم الله البسوى فيهو سيدى الميرغنى دا فى زول فاهمو ، علل السودان المتراكمة البزيد كل يوم دى بسبب الحاج ده وعمنا التانى والزول الخاتنو هناك ، الجماعة ديل والله فرطو فى ثورات وثروات البلد الما ليها عد ....أسمعوا يا خلق الله ، الحزب الاتحادى الديمقراطى دا كان حزب ليهو شنه ورنه لأنو كانت عندو قيادات درر(عينه) تتمع بفهم شامل لإيقاع متغيرات نبط الشارع ( ونبط الشارع معروف  ناو )، زولنا دا أسع بكون فاهم أو سامع أوشايف الشارع الاتحادى داير شنو؟ خليك من  الشارع الفيهو الإمام وشارع اللئام ديلك ، الشارع الإتحادى يا شيخنا أول حاجة داير الحزب ( فى نفسو ) لأن حزب السيد على والزعيم الأزهرى مسمياتو كترت وزعاماتو فطست،  يا ناس (  الحزب  ) واحدين قادة من ديل  دسو رسينم مع الجماعة  فى السلطة والنعيم والفساد والدمار التحت رعاية  المؤتمر الوطنى العظيم يعنى  قيادات الفتة زي ناس الخط العام والخط الخاص والقيادة الجماعية والفردية وبقية الفكة المورمه لينا دكتور نافع بوزيعا لأخبار الجماعة فى بيوت البكة والعرس ، الحزب بقى حزب شله  وفرجة ، زعامات الأحزاب التمام (سيدى) الفاهمين تلت التلاتة كم ليهم إطلالة إعلامية عندها هيبة  تتناول القضايا الراهنة البتهم البلد والحزب وبإسهاب ، مشكلة سيدى اتخاذو للقرارات البتهم الحزب والبلد  وفق قناعاتو، دون مراعاة لرؤى وقناعات الأخرين (وهم قادة طبعا ) يعنى دايما شغلو بحرقو  بره وياريت لو على جمر أو حتى جوه السودان ...والله البلد كلها مهروسه  لكن الهرس الضرب الاتحادى الديمقراطى عميق ومتمكن عاوز شغل واسع وشامل يأطر لبناء مؤسسات قرار (على الأقل ) ليها قراية لواقع البلد ، وواقع الحزب الماشى بفهم الميرغنى ( الساعى ) لختمنة الحزب و مرغنة الحزب وأصلنة الحزب ,,,,,,,, دا كلو كوم وشغل سيدى الامام شغل تانى ، والله يا سيدى الامام أنحنا عارفين طريقة لعبك مع الجماعة ديل يعنى باص هنا والتانى هناك ، والجماعة ديل أنحنا ( الشباب والشياب زى ما قلت) عندنا خطط وحاجات وثغرات فى دفاعاتم تخليك تحتار فى ( أسامى ) الجمع بودنوباوى ، الثغرة النقولا ليك (الخلاصة يعنى)..لازم تفكر فى  تحويل اللعب من دار الرياضة أمدرمان لميدان الخليفة عشان يكون أول ميدان تحرير عندوا شهادة بحث من الأراضى تنفجر منو الشغلة، ونقسم ليك خلال يومين نخلى الجماعة( البقو باكلوا حق الوسخ والكوش ديل ) يفاوضوك جنب سجن أمدرمان ، لكن شغل النفيسه فيها والقليب مابيها ده ما بجيب خبر الجماعة ديل ، شغلك القاعد تسوى فيهو دا ، داير ليهو عياط وعشان العياط يكون مكرب  سوق زول جنينة سيدى على  وتعال .......

صديق ابوعمار

[email protected]