From sudaneseonline.com

مقالات و تحليلات
غندور دا يا أخوانا فى راسو شنو/صديق ابوعمار
By
Apr 2, 2011, 10:48

بسم الله الرحمن الرحيم

                                 غندور دا يا أخوانا فى راسو شنو

اليومين ديل ونسة الفساد ست الساحة ، من ساحات دهاليز الحكومة اللهى المؤتمر الوطنى العظيم  اللهوالمعني بالشغلة ، والى ساحات وخنادق المعارضة الجوة وبرة ، والأغرب  ساحات الجماعة اللعبهم بالدس  ( ناس هيثم وفرفور والعجب ) فسادهم الفى التجنيس والعداد ، يعنى الفساد للقزاز ،،، مسئوول السياسة بالمؤتمر الوطنى العظيم  يرى ان الصهينة عن تكوين المفوضية راجع لاجازات الجماعة الفاضلين من المجلس الوطنى الحزين ، الما معروف رسمى ولا شعبى  والعجيبة  تلتو بقو خبراء أجانب ، يا أخوانا ياتو مفوضية فيها فايدة ، شوفوا مفوضيات السلطة الانتقالية لدارفور من اركو مناوى للزول المكنكش فيها دا ، شوفو مفوضيات نيفاشا ودتنا وين وعملت فينا شنو ، شوفوا مفوضية الانتخابات جابت لينا شنو من ناس العمم والشال ، يعنى لو إتكونت الجديدة برضو حتكون مفوضية المؤتمر الوطنى لمكافحة الفساد القاعدين يعملوهو ناس المؤتمر ذاتـم ، والمثل بقول الفى يدو الحكم محال يدين نفسو ، والأكيد المفوضية برضو فى نفسها حتكون إضافة نوعية لكوم المؤسسات والشركات والمفوضيات الفاسدة المتخندقة فى حى الرياض والمنشية يعنى شكلها حيكون ذى كيمان الهكر الكورى الدافس شارع عبيد ختم ، لأنو تعين المفوض   ( طريقة إختيارتو يعنى ) حتكون خاضعة للكر والفر بين أجنحة الفساد المتصارعة ، والعجيب شلة الموظفين الكل وكتهم مع الكمبيوتر بتفرجو على البرامج الماياها ، فراجة البرامج ديل حيكونوا برضو مكومين كيمان إنحياز إيجابى قصاد كيمان الهبرالمتعددة الألوان والأعراق  فى درفسة المعلومات ( كان إتلقت طبعا ) ووزيع الأخبار ، يعنى الوضع حيكون توازن مصائب داخل مفوضية المصايب ،،، شغلة الفساد دى يا المؤتمر الوطنى العظيم عاوزة قضاء مستقل تماما وبعيد بعد السماء من الارض عن المؤسسات السياسية والتنفيذية عشان يبقى مؤسسة عدلية مرجعيتها قوانين تصون كل حقوق الناس وحكمها يطال كل ناس البلد يعنى من حوش بانقا لحدى الجوغان الجنب امروابة ، شغلانية ولادة الداية زمانو فرتق  يا غندور، الشغلة عاوزة تخصص عدل عادل يمكن الحق والقانون فى البلد ، علاج اللتيك والرقيع القاعدين تعملوه مع أسيادى الكرام ديل ما بنفع فى موضوع الفساد الخلانا الطيش وسط الامم ،،،،،، خلاصة قولنا يا البتاع الوطنى العظيم ، لعب التلاتة ورقات دا دقة قديمة والعاقل من يفسح المجال (بفوتو طبعا ) لناس تانين ليهم القدرة على بناء دولة سودانية متعددة ومتنوعة فى كل حاجة ........

صديق ابوعمار

[email protected]



© Copyright by sudaneseonline.com