مقالات و تحليلات
مندور المهدى الجدع ده عندو قصة/صديق ابوعمار
By
Apr 1, 2011, 11:15

                       بسم الله الرحمن الرحيم

             مندور المهدى الجدع ده عندو قصة

      مندورالمهدى دا قصصوا كترت ومسخت والله ، وخانات لعبوا الجماعة الحرامية الكبار( أوى ) نوعوها ليهو ،  يعنى مرة دفاع ومرة هجوم، مرة كتايب ومرة مصايب ، مرة غرايب ومرة عجايب ، الزول دا مهمتو النفخ فى شولات  البلاستيك ، وبيع  الطعمية فى محطة القطر، دا إتعلم ركوب العجلة فى كبرو ، دا من صفاتو دايما ترقيتو فى الحزب ( ل  ورى )، أذان المؤتمر الوطنى العظيم دا كان مسئوول الجانب السياسي نمرة واحد فى المؤتمر الكلو فساد ، يعنى فى عهدو تم تزوير إرادة الناس فى الانتخابات ، الزول المضلم دا جابوه  نمرة 2 فى ولاية اليابس دا بموجب وزن شغلة ويا ريت شغلة بالكيلو دى شغلة رطل دغميسو كتر زى ما قالو ، الاخ دا قال بفتش لدلائل وأدلة  دامغة  لفساد حزبو عشان يدور القوانين لحربو ، طيب أنحنا نديك دليل كل زول شايفو وعارفو ... كوم الحرامية (الانت واحد منهم) لما استلمو مقاليد أمور العباد ( بالسرقة ) فى 89 حالهم كان معروف  و بعضمة لسانهم قالو هم اولاد رواكيب وركابين حمير ، دا صحيح والله بل حالهم كان أسوأ من الكومتوهم  فى معسكر كلمة وأبوشوك فى دار فور ،، تعال شوف ( حال ناس ياهو ) بعد التوظيف وتنظيف خزاين البلد ، شوف الضابط الادارى ( بتاع المحلية)كان كيف وبقى كيف ، شوف المحافظ كان وين وبقى وين ، شوف لعيبة المجالس التشريعية حالهم كيف وجيبم كيف، شوف الوزراء و وزراء الدولة ومستشارين الوصلة و شكل بيوتهم ( الكان البوماستك حقها زبالة )  بقت كيف ، شوف شغل غسيل القروش الوسخ أحياء البلد وهكر الحديد الكورى الدفس شوارع البلد  ،  شوف حتى ناس اللجنة الشعبية الهارننا  بالخمسة جنية فى شهادة السكن وشهادة الفقر وشهادة  القبر ( ديل يا زول غيرو العجلات لركشات) ، شوف الجماعة الكبار الرئيس مجلس ادارتهم عوض الجاز ومديرهم العام المتعافى بتاع شوارع الزلط والتقاوى الفاسدة ، شوف عمارات اولاد حوش بانقا وقصتا مع وزارة المالية ، شوف أخوان الريس البشير فيهم البلع إسبتالية كوبر، وفيهم الشغال فى أربعة وظائف وناس المأهلات حايمين فى الشوارع ، شوف حلالين الكلمات المتقاطعة المالين الوزارات والمحليات ودور الحزب الشغالين بفقة الرشوة حالهم كان كيف وبقى كيف ، والجماعة الفوق ديل كلهم مؤتمر وطنى،، طيب يازول كان عترنا فى الوسخ والوثائق البجيب خبر الجماعة ديل نديها لمولانا دوسة ولا شيخنا حاج ماجد ؟ صحى الحرامى فى راسو ريشة  لكن صحبانا ديل عندهم ريشتين   ذى شغلهم مع العرس ( واحدة معروفة والتانية مدسوسة ).....

صديق ابوعمار

[email protected]