مقالات و تحليلات
والله قصة أحزاب المعارضة تحير/صديق ابوعمار
By
Mar 30, 2011, 22:20

                                                                           بسم الله الرحمن الرحيم

           والله قصة أحزاب المعارضة تحير

            قصتك قصة يا اللخو الحبيب ود نايل ، سبحان الذى أحيانا لنتذوق بلح القرير الأصلو يابانى ، ،،، يا أخوانا الأحزاب المحترمة عندها حزم إصلاحات ( كان  هى فى الحكومة او بره ) ، وعندها حرمه وحرمات ، أحزاب خطوط مساراتها لترقية البلد وأهلها وفق تراتيب وخطط ودستور ينظم مجمل العلاقات ، أحزاب ما فيها  ديل قروب سيدى ، أحزاب قياداتها رجال فى كل حاجة ، دى الاحزاب البتبنى البلد وبتجيب ديمقراطية ليها ضل ، لأنو شغلها متأدب ومنساب لنبط الشارع ، القاعدة عندها إنو كل زول عندو حقوق ينالا  بالكامل، ما فيها دا حق سيدى  بالنهب ولا تنصيب ود سيدى لقيادة الحزب بالغصب ، أحزاب ذى دى محترمة لأنو ما فيها وزارة عدل موازية عشان تحارب  الفساد ( يعنى زى وزارة محاسبة الفساد الوزيرها و قاضيها حاج ماجد) ، تعال شوف ملجتنا المافيها الليمون البودر الطمام ، دى أحزاب هناى  ساكت ، أحزاب كمونية ماعز وسخها كتير ، أحزاب أم جغوغة   زيتها كمل ، أحزاب يا ناس الله قياداتها حايمة طول اليوم فى مكاتب وزارة التجارة والمالية والإستثمار ومصلحة الاراضى ومكاتب المحليات (الأكتر من بيوت المحلية) ومكاتب المؤتمر الوطنى العظيم ومكاتب الامن الحنين ، كل واحد من الجماعة ديل شايلو فايل ( ضابى فى عباطو ) وداخل بيهو مكتب حرامى من لصوص المؤتمر الوطنى ، والملف دا فيهو مواعيد الشيك البتودى حجر أمدرمان  ، وفيهو نية لتخميسة سلطة مقابل شق الحزب أو الحركة ، وفيهو البكى والمخيت على الركنة وركوب حافلات سوق ليبيا ، وفيهو ناس  الحكومة إتفقت معاى لما كنت حامل السلاح ولما خليت الشغلة وجيت بموجب إتفاق جماعة الخير كبوا الزوغة ، وفيهو غرايب سيدى الدخل الاولاد الوظائف الفيها كسير الإيدين وحلاوة السوط فى الكرعين وإغتصاب بنات الناس بقوة  عين،،  والغريبة كمان  فيهم  واحدين راكبين عربات المؤتمر الوطنى ( اللجار) ولابسين الجلابية البيضة والعمة الشرط والشال الكلو خرط وخطط ولافين بفتشو لصحفى يكون من بتاعين جرايد اليومين ديل هارننا كضب وقبض العصاية من محل الضبة ، جماعة زى ديل + المؤتمر الوطنى العظيم ، مش لينا حق نحن جيل التغيير لو فكرنا فى كنس الكل وخاصة الجماعة التحت ديل :ـــــــــــ

(1) السيد الصادق المهدى رئاسة 50 سنة ..... حزب الأمة

(2) السيد محمد عثمان الميرغنى رئاسة 50 سنة...... الحزب الاتحادى

(3) دخان السياسة  الاستاذ ابراهيم نقد رئاسة (قريب) 50 سنة.... الحزب الشيوعى

(4) دكنور عبدالله الترابى ( ملاح المرس البتشمو فى الكبدة ) ، ودا بالذات متعدد الرئاسات من يوم سمايتو ( ولحدى أسع شغالين عد )

(5) وسخ الترابى الخلاهو لينا وقام جارى ( دا وسخ شين )  ، وديل زمنهم ما محسوب لأنو يومهم بسنة ( فى ضرر خلق الله )

(6) لعيبة طق الحنك ، وكل زول لابس كرفتة وبتكلم فى السياسة

(7) أحزاب الصرة الما جاها ورم ، المتكرفسة قدام هرس المؤتمر الوطنى للعباد

صديق ابوعمار

[email protected]