مقالات و تحليلات
الزول الإسمو الحاج ادم دا ليهو حكاية/صديق ابوعمار
By
Mar 29, 2011, 21:39

                   بسم الله الرحمن الرحيم

         الزول الإسمو الحاج ادم دا ليهو حكاية

          الزول الإسمو حاج أدم دا مكنتوا مع جماعة الخير ديل سلكت بسرعة تحير ، صار هارب الشعبى من كبار رجالات المؤتمر الوطنى العظيم ، الحاج أدم يا جماعة الخير أكما عارفنو غواصة حايمة فى خيران الاحزاب والحركات المسلحة التى إبتلى بها الله الشعب السودانى ، الزول الكعب دا غواصة للشعبى وغواصة للوطنى ، غواصة لخليل وغواصة للسيسى ، غواصة للامة وغواصة للحبشى ، غواصة لمدنى وغواصة لشندى ، الزول البحرش لينا الأمن دا زول ملطخ بدم العباد فى الجنوب وكردفان ودارفور ، ده من القيادة السرقت السلطة سنة 89 ، ومن الجماعة العادو الكره سنة 2004 م ،، الزول دا طين بادوبا زراعتها بجيب الخسار والحسره وكسر الشيكات الما ليهو حد ، قال جهاز الامن يشوف شغلو قال !!! هو جهاز الامن دا البعمل فيهو من سنة 89 وحتى التو واللحظة ما شغل ؟ بيوت الاشباح إلتهمت النخوة والرجولة والعقول وبرضو دا ما شغل ؟ إختفاء الآلاف فى ظروف غامضة ماشغل ؟ كتل خلق الله فى السد وتصفية أدروب فى بورسودان وكويم شعب دارفور فى المخيمات ما شغل؟ إغتصاب بنات الناس فى مكاتب الحكومة ( تيم ويرك ) ما شغل ؟ قطع أرزاق عباد الله وقطع الطريق لفعل الخير ما شغل ؟ مساككتم لينا من الشمش تغيب وحتى مغيب بكرة ما شغل ؟ روقة الضباط والعساكر والجقاجق ( المصادر )البتغلى فى الشوارع ما شغل؟ حقيقة والله البلد حاكمنها الحيران والكيزان ، الزول الما بخاف من الله دا حلل لنفسو وهو فى الشعبى حمل السلاح لقطع دابر المؤتمر الوطنى وبحرم علينا حومة الكرعين فى شوارع البلد والعياط فى ميادين البلد لا شايلين سكين لا ساطور لا كلاش ، شايلين فى يدنا باقة مويه وقطعة دلقان إستعدادا للبكى الراجينا من البمبان ، صعاليك المؤتمر الوطنى عاوزين يعملو لينا حش البرسيم قبل يومو ، قسموا ادوارهم ، خلوا حاج ماجد على رأس إدارة الفساد الحزبى لأنو أى مفسد وفاسد فى السودان مؤتمر وطنى ، وربيع عبد العاطى خلوه على ادارة عفيس الخشم وكسير القلم ، ومندور المهدى مسكو درب الكلام الشين والعياط والاستعداد للخروج بكتائب النفرة ، طيب  الأخ  الشين دا مسكو شنو يا جماعة الخير ؟؟؟

صديق ابوعمار

[email protected]