From sudaneseonline.com

مقالات و تحليلات
دكتور نافع والدكتور سيدى الميرغنى/صديق ابوعمار
By
Mar 28, 2011, 11:15

                                                                           بسم الله الرحمن الرحيم

                      دكتور نافع والدكتور سيدى الميرغنى

حال أحزابنا البتعارض النظام بالكضب اليومين ديل وحال سيدى المعارض نص نص (على قول نانسى عجرم )  تخلى الشبكة خارج الشبكة مش أنحنا بس الخارج الشبكة ،،الجماعة أسسوا ليهم  تحالف أحزاب للمعارضة ( الجوه ) والبشارة الجايانا منهم فى الخطط الوضعت لهزيمة البعاعيت ديل مكربة ومتوازنة فى الهجوم والدفاع ، وقالوا خبر الجماعة مسألة وكت ليس إلا، صدقنا طبعا بل فكرنا إنو اى زول زعلان من مادة فى دساتير الحربتجية ديل تنشال برة (إنشاء الله ما يفضل فيهو سطر) خاصة دساتير المحليات الجننت وأفقرت خلق الله ،أحزاب المعارضة مصيبتها إنها قعدت وكل حزب شايل عكازو وساطورو عشان ما يكون الجنبو قدامو فى ادارة أمور الشغلة ، حزب الترابى متحكر وعارف نفسو كان جاء شايل الكعبة فى راسو زول بصدقوا مافى فى مسألة الديمقراطية والشريعة والوفاء بالعهد ، وحزب نقد متقوعد  وعارف الجماعة القاعد معاهم كاشفين نومتو وحافظين سلمو البطلع بيهو  بعدين  (مع إنو غندور خلاهو فسيخ وكسيح وفصيح )، سيدى الامام شغال دورى محلى ودورى ممتاز يعنى مرة هنا ومرات هناك ،كضبة هنا  وكضبة هناك ، وبرضو المعاهو كاشفين نومتو وعارفين قاعد معاهم قعدة  المشطوها بقملة تنكرش طول الوكت ، سيدى الميرغنى شغلو دايما  ورى الستاير والسواتر ، عندو تيم مدرب على لعب التلاتة ورقات وصناعة السمن من الاسمنت ، والمصيبة من كل الاعمار يعنى من الخليفة ونازل ، والأخطر ضموا للعيبة إحتراف حزبى فيهم الشايت لفت وفيهم الشايت رايت ،  قياداتوا عارفة اسعار البلح والقرين والموز وسعر متر الارض فى مكة واريتريا وأسعار الشقق فى القاهرة ، قسم الحزب  وفق مصالحو ، ثقافة  قياداتو وفهمها لبرنامج الحزب وأدبياتو (كان فى) إنحصر فى ترديد كلام الزعيم الأزهرى الكان سنة 56 ذى الحرية نور ونار وإستغلال السودان ذى الصحن الصينى لا شق لا طق ،  حزب رأسو الميرغنى وأمينو العام الميرغنى وامين  ضحاكاتو  الميرغني ،،، صرتو وضحكتو  مع ناس حزب نافع فى أمور السودان بتتحكم فيها الختة ،  أكان بقت الختة كويسة سيدى قاعد فى السودان شهرين والعشرة شهور جرى وطيران ما بين السعودية واريتريا ومصر، خجلنا الزول دا من كترة الشحدة الجوه وبره ، الحركة الاتحادية سيدى الميرغنى لن تموت وتندثرلأن الاصل حمل الراية التى تعانى من لبيدك الكثير وشغلك التحت تحدت مع البروف إبراهيم أحمد عمر ووجودك   طول الوكت خارج شبكة الحزب .....والله ياسيدى قشرنا قفطانك الكلو عقارب ومصايب وعجايب .......

صديق ابوعمار

[email protected]



© Copyright by sudaneseonline.com