From sudaneseonline.com

مقالات و تحليلات
الوالى الخضر وكتائب البشير بوعمر/صديق ابوعمار
By
Mar 26, 2011, 23:24

                                                                           بسم الله الرحمن الرحيم

                         الوالى الخضر وكتائب البشير بوعمر

          حمى أم برد ضربت والى الخرطوم أخونا الخضر فإرتفعت عندوا الهلوسة والهضربة وقول الكلام البسد النفس ، الخضر اقر بأحقية الشعب فى التظاهر والخروج فى مسيرات احتجاجية سلمية ودا حق كما قال كفلو  الدستور،  لكن المصيبة إكتشفنا أن الدستور بجلالتو خادع لتقديرات الاجهزة الامنية ، يعنى نشيل ال OK من سعاتو فى الولاية للتظاهر ونبلوا ونموصو فى مكاتب الاجهزة الامنية ، معادلة ابالسة برعوا فى تدويخ الشعب وخداع الشعب وترويع خلق الله ، ولاية اليابس دا (الخضر)أصابها  هلع الثورات التى انتظمت الشارع العربى ، ثورات شباب ملوا الفاقة وقلة الحيلة مع قوم إختصهم الله بالظلم فى توزيع فرص التوظيف ، فالاقارب هم الاولى بالتوظيف فى شرعهم لان فقة التمكين متجدد عندهم دوما ، ثورة شباب اشتعلت رؤوسهم شيبا وهم فى العشرين من ضياع الامل فى حياة كريمة مزدهرة يستظلون بظلها ، بيوت اندفست عوانس بعزوف وهروب الشباب من مكابسة توفير قفة الملاح وايجاد حق المواصلات ، شوارع البلد انتفخت بالبطالة وستات الكسرة وبنابر الشاى ، والمصيبة كمان مكاتب الدولة من القصر الجمهوري وحتى المحلية إتعبت بالحثالة والعطالة ،، لم يتقنوا الا الكذب والغنى بعرق الاخرين ، مهامهم التى برعوا فيها أذية خلق الله فى النفس والمال والولد ، ديل ناس كان سلم عليك عد أصابعيك لان السرقة ثدى متوارث  ، بنوا مجدهم الكالح على جماجم الاحرار فى رمضان وعلى الاخيار فى أمرئ  وبورسودان وعلى تشريد شعب بأكمله  فى دارفور وكردفان ، باعوا تلت السودان ليبقوا حكاما على السودان ، ديل ناس فشخرة فى الفاضى والمليان ،،، والمصيبة كمان تفكير سيدى الامام ...جماعة الخير ديل سيدى الشئ المكتوب فوق دا دى صفاتهم الحميدة والأمورالجارنك ليها اليومين دى  كلها قافلنها بطبلة من النوع اليابانى المابنفع معاهو الفتيح والحنيس ديل سيدى عاوزين كسير وفجيخ لانو ديل والله أكعب من الحاربهم جدك ، قضية كراع جوه وكراع برة دى مع الجماعة ديل ما بتجيب حقها لانو السياسة دى هم اسيادها ، شوف شكل الشريعة العندهم مره كدى ومره كدى ، شوف حالهم مع الجنوب فصايل جوة وفصايل برة ، شوف حال دارفور تفاوض جوه وتفاوض بره ، وكمان شوف سيدى حال سيدى الميرغنى بسمة جوه وحرنة بره خليك زيو بدل البهدلة اليوماتى مع الجماعة ديل .....

صديق ابوعمار

[email protected] 



© Copyright by sudaneseonline.com