مقالات و تحليلات
يامندور المهدى زنقتك فى القزاز/صديق ابو عمار
By
Mar 26, 2011, 00:30

                       بسم الله الرحمن الرحيم

              يامندور المهدى زنقتك فى القزاز

ثورات شعوب المنطقة كشفت مستور حرامية الشعوب وجبن قاهرى العباد، من كان يصدق ان بن على حول خيرات تونس لملكية خاصة بل جعل قريشات تونس فى خزائنة داخل قصره فما حمته ادوات القهر فانتصر الشعب وتم حل الجهاز، وحسنى مبارك بوجهه الصارم وخطبة المليانة دراما وإدعائه الطهر والامانة ظهر صاحبنا بهبرة تشيب لها الولدان (سبعين ملياردولار ياود الحلال) فما حمته ادوات قهره وانتصر الشعب فتم حل الجهاز، الزول ملك ملوك افريقيا بارك الله فيهو لانو دفاتر حسابات ما عندو عشان شغلتو كلها كتامى فى كتامى ولما  إنكشف المستور استوعبنا مقولة فى الحاجة تكمن الحرية  ، صالح اخو مصلح بعافر فى الكرسى وطبعا الجزيرة بتبحت تحت تحت فى مقصاتو المالية وايضا التغيير أتى وسيحل الجهاز، ودالاسد الجزيرة شمرت ليهو والظاهر فقة الزنقة زنقة حيكون دليلو فى قمع وسحق ناس الشام وقريبا نسمع بحل الجهاز، زول البحرين اشتغل بنظرية انا وابن عمى على أخوى فتحول الدوار الى موال لن ينتهى ما دامت ايران على الخط ، ملك المغرب ما خلى شئ من البرش وبرضو الشعب يريد تغيير النظام وسيتم حل الجهاز،  زول الاردن  رايح ليهو الدرب فى الموية  وشعب الاردن   سخن الشغلة وقريبا الخبر بجينا بحل الجهاز ،،،   المصيبة الجماعة ديل  فكوا  لينا  جرزان جقار( مناديريعنى على وزن مندور) ليهم ضل مالين شاشات تلفزيوناتهم الحكومية هضربة وكضب وتهديد ووعيد ،،، النوعية دى فى  منها كثير لكن مندور المهدى هضربتو زايدة شوية ، التراجع عن تهديدك بسحق المعارضة لن يغير من الامر شئ ، لان وجود كتائب مهمتها الاساسية الدفاع عن المؤتمر الوطنى (بطينوا الماخلى  وش نضيف) دا فى حدى زاتوا  دليل على ان زنقات القذافى فى البال عند الجماعة ديل ، الكلام القالوا الجقر دا وامام كتيبة تابعة للمؤتمر الوطنى ( الحزب) بخلينا نسأل السيد رئيس هيئة الاركان(لانو رئيس الجيش) دون التعريج على القائد الاعلى ووزير الدفاع، هل مسموح للاحزاب السياسية تكوين كتائب مسلحة (مليشيات) تكون يدها الضاربة لمخالفيها فى الرأى حتى ولو كان الحزب الحاكم؟ وكذلك نسأل مجلس ود الطاهر هل هنالك تشريع يبيح ويقر حمل السلاح لغير المنتسبين للقوات النظامية ؟ الاجابة على الاسئلة دى بتورينا انتو رامين وين ،،، ونقول ليك يا الجقر والله كتائبكم لن تستطيع ايقاف الزحف الذى سيمتد لكل شئ حتى الى كتائبك التى نعلم سرها وجهرها ، ووعيدك وتهديدك لن يخيف من اراد الحياة فالشعب كله كتائب استعدت لنيل الشهادة من اجل تذوق نسمة الحرية ، ونقسم يا الجقر زنقتك يغنن بيها الحكامات.......

صديق ابو عمار

[email protected]