قصة و شعر
أنا ملوال سوداني الجنسية/عمر بشير ابوعاقلة
By
Oct 3, 2010, 21:32

أنا ملوال سوداني الجنسية

انا ملوال من ما قمت سوداني الجنسية
ساكن بحري شرق وشغال جنب الردمية
وأجدادي جوا هنا زمان من زمن المهدية
اخوي جون ساكن بري وشغال في المنشية
وأخواتي تزوجوا في كردفان والشمالية
ولدي ساكن في كسلا واخوه في المحمية
انا كنت عايش سعيد ومبسوط مية المية
الان انا بواجه أكبر مشكلة وأخطر قضية
قالوا انفصال ؟ يا ناس بالله روقوا شوية
انتوا جبتوا كلام دا من وين؟ دي كيف نسويه
دا ما حل دا دمار دي فتنة دي تجارة هوية
كيف نقسم بلدنا وكيف نسبب حرب دموية
لا لا دا ما ممكن ما ممكن نبقي نحن الضحية
أحنا كنا سوا وحنبقي سوا في أحسن أرضية
ياهو دا السودان كلوا واحد ما فيهو عنصرية
شمالوا لجنوبوا وشرقوا لغربوا علاقة ابدية

عمر بشير ابوعاقلة