قصة و شعر
من زمان وأنا كنت فاكرك زولي تب/عمر موسي منجي
By
Sep 30, 2010, 23:27

من زمان وأنا كنت فاكرك زولي تب
رافع الكُلَف شايل الملامات والعتب
شايل همومك قبل همي وخاتيك للزمن الصعب
وأخدمك بي كل تفاني وما شكيت ليك يوم تعب
و الاخوّة البينا كانت صافية أغلي من الدهب
كانت مضرب الامثال وقمّة في الاخلاق والادب
لكن لقيتك زول غتيت ودافنو لي كل الكعب
تلومني للعدو والحبيب وتشكيني لي من هب ودب
الشكوي ما بتفرق معاي لكن مزعلني الكضب
كيف تنسي أيامنا الزمان وتجافيني بي أبسط سبب
أيام نهرجل في الفصل نقعد نشخبط في الكنب
نرجع نزاكر في الدروس قرت أمل وبدر كتب
نلعب وسط نخلاتنا ديك نطلع نلقط في الرطب
أيام نشرّك للدباس والقمري ونعمل مزامير القصب
ونمرح مع ريحة الدعاش ويا مطيرة صبي صب
وفي مياها نخوض ونجري ونصنع من الطين اللُعب
و شاي المغيرب في الشتا وندفّا بي نار الحطب
ولمّة ألاهل ألحنان والبيت معطّر بي بخور تيمان وشب
ونتعلم الوضو والصلاة وتبت يداهُ أبا لهب
وتبت يداهو الدخل بيناتنا ما خاف فينا رب


عمر موسي منجي
ديسمبر 2008
 
 



© Copyright by sudaneseonline.com