حوار هاتفي مع بحر إدريس ابو قردة

اجري الحوار وبث يوم 20 مايو 2009

أجري الحوار حسين محمد حلفاوي (سودان راديو سيرفس (Sudan Radio Service)

kkhalil@sudanradio.org

حسين محمد حلفاوي: جميل جدا الأستاذ بحر إدريس أبو قردة قائد الجبهة المتحدة للمقاومة، نحن نرحب بيك في سودان راديو سيرفس

بحر إدريس ابو قردة: الله مرحب بيك

-طيب أستاذ بحر ممكن تكلمنا عن التجربة بتاعتك لمشيتك لمحكمة الجنايات الدولية

بحر إدريس ابو قردة: المعلوم انو يعني بعد أحداث الحسكنيتة كان في يعني ترويج إعلامي من بعض الناس وخاصة مجموعة جماعة خليل إبراهيم بتذكروا انو ذكر اسمي وذكر اسم بعض الشباب القادة الموجودين في الميدان بانو الشئ الحصل في حسكنيتة ده كان من طرفنا ونحنا نفينا في الوقت داك مباشرتا وادنا الحادث ووضح انو بعد داك لاحقا عرفنا انو انا من ضمن الناس المتهمين، المبدأ انحنا حقيقة كنا بنؤمن بمبدأ العدالة ولا بد من مواجهة العدالة ولايمكن ان نطالب بمحاكمة الاخرين لا نو ارتكبو جرائم وإذا بقينا انحنا من ضمن المتهمين نرفض او نتخوف او نتخاذل وكان مبدئيا انطلاقا من مبدأ ايمانا بالعدالة فذهبت انا هناك وعلي استعداد اواجهالعدالة وابرئ نفسي وانا متاكد تمام انو انا ما طرف في قضية حسكنيتا مطلقا وبالتالي انا ذهبت للمسألة دي وحضرت وعدت.

حسين محمد حلفاوي: طيب جميل يا استاذ بحر في لقاء مع ال بي. بي. سي. دكتور الطاهر الفكي بتاعت العدل والمساواة تعرفه جيدا فإتكلم قال انو هم من الناس الشجعوا بحر ادريس ابو قردة بانو يمشي محكمة الجنايات الدولية ويواجه المحكمة، فما صحة هذا القول؟

بحر ادريس ابوقردة: طبعا الطاهر الفكي ده راجل كذاب وتعلم انو هو قبل كده اعلن انو في اذاعة عافية لو تابعت قال انو انحنا تعاونا وقدمنا قال معلومات وقال بحر ادريس قال من الناس ال ارتكبوا جريمة بتاعت حسكنيتة هو ده الزول القبل كده قال الكلام ده هو كذاب اصلو انا ما عندي معاه اية اتصال او علاقة شنو البشجعوا لكن للاسف ديل طبعا دايما بيحاولوا يستفيدوا من اية فرصة موجودة ويحاولوا يوظفوها لمصلحتهم فبالتالي ده كان محاولة رخيصة ومحاولة دنيئة منه علشان يحاول يستفيد من الحدث ده فقط لكن انا داير اثبت من خلال سودان راديو سيرفس انو انا ماعندي أي اتصال ولا عندي أي علاقة بمجموعته بالذات مجموعة بتاعت خليل ابراهيم  

حسين محمد حلفاوي: طيب جميل يا استاذ بحر يعني الحكومة الرسبوند (الاستجابة) بتاعتها لذهابك طوعية لمحكمة الجنايات الدولية قالت انو يا اخي دي تآمر يعني سمته تآمر بين محكمة الجنايات الدولية وبعض حركات دارفور فكيف ترد علي ذلك؟

بحر ادريس ابوقردة: والله انحنا يا أخ حلفاوئ مشكلتنا في السودان الحكومة السودانية يعني كثيرين يؤمنوا فقط بنظرية المؤامرة ودي المشكلة الخلت انو ازمات البلد تنفجر وتواصل الي سنين وعقود ولا تعالج فقط ويعلقون علي شماعة الخارج والتآمر والعمل الضد السودان دي الشعارات الدائما بيطلقوها وده انا بعتقد ما بعالج مشاكل البلد فيجب انو يعلموا تماما انو التآمر شنو يعني انا مثلا بحر ادريس ابو قردة انا القلت لمحكمة الجنايات انو يوجهوا لي التهمة عشان اتآمر علي نفسي يعني فدي حقيقة انا وجهت لي اتهام فلا بد انو ابرئي نفسي يعني

حسين محمد حلفاوي: طيب الاستاذ بحر محكمة الجنايات الدولية هذه المحكمة العاملين ليها شنة ورنة وقومة وقعدة يعني ذهبت اليها بسهولة ورجعت منها بسهولة شنو الرسالة بتاعتك للناس المطلوبين من محكمة الجنايات الدولية انو يمثلوا امامهم شنو رسالتك ليهم؟

بحر ادريس ابوقردة: انا رسالتي انو أي زول يعني وجه اليه اتهام ما اتهام في النهاية اتهام، اتهام ما معناها تجريم أنا اعرف نفسي تماما انو ما عندي أية علاقة بأية جريمة وبالتالي لابد أبرئ نفسي وبنفس الطريقة أنا رسالتي ليهم جميعا انو إذا هم حقيقة واثقين من أنفسهم انو ما ارتكبوا أية جرائم أو حتى لو ارتكبوها يجب أن يواجهوا الحقيقة دي ويواجهوا العدالة.